ಶ್ರೀನಗರ: ಜಮ್ಮು-ಕಾಶ್ಮೀರದ ನ್ಯಾಷನಲ್ ಕಾನ್ಫರೆನ್ಸ್ ನೇತೃತ್ವದ ಇಂಡಿಯಾ ಕೂಟದ ಸರ್ಕಾರದಲ್ಲಿ ಬಂಡಾಯದ ಮುನ್ಸೂಚನೆ ಕೇಳಿ ಬಂದಿದ್ದು, ಸಚಿವ ಸಂಪುಟ ಬೆನ್ನಲ್ಲೇ 24 ಶಾಸಕರು ಶುಕ್ರವಾರ(ಅ. 30) ಪ್ರತ್ಯೇಕವಾಗಿ ಸುಧೀರ್ಘ ಕಾಲ ಸಭೆ ನಡೆಸಿದ್ದಾರೆ ಎಂದು ವರದಿಯಾಗಿದೆ.
ಕನಿಷ್ಠ 18 ಅತೃಪ್ತ ನ್ಯಾಷನಲ್ ಕಾನ್ಫರೆನ್ಸ್ (ಎನ್ಸಿ) ಶಾಸಕರ ಗುಂಪು, ಶುಕ್ರವಾರ ಸಂಜೆ ಶ್ರೀನಗರದಲ್ಲಿ ಸಭೆ ಸೇರಿದ್ದು, ಇತರ ಆರು ಶಾಸಕರು ವಿಡಿಯೋ ಕಾನ್ಫರೆನ್ಸ್ ಮೂಲಕ ಭಾಗಿಯಾಗಿದ್ದರು ಎನ್ನಲಾಗಿದೆ. ಇತ್ತೀಚಿನ ಸಚಿವ ಸಂಪುಟ ಪುನರ್ರಚನೆಗೆ ಸರ್ಕಾರ ಅಳವಡಿಸಿಕೊಂಡ ಮಾನದಂಡಗಳಲ್ಲಿ ಹೆಚ್ಚಿನ ಹೊಣೆಗಾರಿಕೆ ಮತ್ತು ಪಾರದರ್ಶಕತೆ ಕೋರಿ ಪಕ್ಷದಲ್ಲಿ ಸುಧಾರಣೆಗಾಗಿ ಹೋರಾಡುವುದಾಗಿ ಶಾಸಕರು ಪ್ರತಿಜ್ಞೆ ಮಾಡಿದ್ದಾರೆ ಎನ್ನಲಾಗಿದೆ.
ಎನ್ಸಿ ಶಾಸಕ ಕೈಸರ್ ಜಮ್ಶಿದ್ ಲೋನ್ ಅವರ ನಿವಾಸದಲ್ಲಿ ಈ ಸಭೆ ನಡೆದಿದೆ. ಮುಖ್ಯಮಂತ್ರಿಯವರ ಸಲಹೆಗಾರರಾಗಿರುವ ನಾಸಿರ್ ಅಸ್ಲಾಂ ವಾನಿ ಅವರನ್ನು ಆ ಹುದ್ದೆಯಿಂದ ತೆಗೆದುಹಾಕಬೇಕು. ಮತ್ತು ಡಿಸಿಎಂ ಸುರಿಂದರ್ ಚೌಧರಿ ಸೇರಿದಂತೆ ಕೆಲವು ಸಚಿವರನ್ನು ಸಂಪುಟದಿಂದ ಕೈಬಿಡಬೇಕು ಎಂದು ಆಗ್ರಹಿಸುವ ನಿರ್ಣಯವೊಂದಕ್ಕೆ ಶಾಸಕರು ಸಹಿ ಹಾಕಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
