ಆರ್‌ಸಿಬಿ ಸಾಮ್ರಾಜ್ಯಕ್ಕೆ ಹೊಸ ಅಧಿಪತಿ! 2 ಬಿಲಿಯನ್ ಆಫರ್ ನೀಡಿದ ಆ ಎರಡು ದೈತ್ಯ ಕಂಪನಿಗಳು ಇವೇ ನೋಡಿ | RCB

ಆರ್‌ಸಿಬಿ ತಂಡದ ಮೌಲ್ಯಮಾಪನವು ಚರ್ಚೆಯ ಕೇಂದ್ರಬಿಂದುವಾಗಿದ್ದು, ಮಾಲೀಕರು ಸುಮಾರು $2 ಬಿಲಿಯನ್ ಗುರಿಯನ್ನು ಹೊಂದಿದ್ದಾರೆ ಎನ್ನಲಾಗಿದೆ.

ಇಕ್ಯೂಟಿ (EQT): ಸ್ವೀಡಿಷ್ ಮೂಲದ ಜಾಗತಿಕ ಖಾಸಗಿ ಇಕ್ವಿಟಿ ಸಂಸ್ಥೆ, ಆರ್‌ಸಿಬಿ ತಂಡಕ್ಕಾಗಿ ಬೃಹತ್ ಹಣಕಾಸಿನ ಪ್ರಸ್ತಾವನೆಯನ್ನು ಸಲ್ಲಿಸಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ತನ್ನದೇ ಆದ ಪ್ರಭಾವ ಹೊಂದಿರುವ ಈ ಸಂಸ್ಥೆ ಈಗ ಭಾರತೀಯ ಕ್ರಿಕೆಟ್ ಮಾರುಕಟ್ಟೆಗೆ ಲಗ್ಗೆ ಇಡಲು ಸಜ್ಜಾಗಿದೆ.

ಮಣಿಪಾಲ್ - ಕೆಕೆಆರ್ - ಟೆಮಾಸೆಕ್ ಒಕ್ಕೂಟ: ಬೆಂಗಳೂರು ಮೂಲದ ಮಣಿಪಾಲ್ ಆಸ್ಪತ್ರೆಗಳ ರಂಜನ್ ಪೈ, ಅಮೆರಿಕದ ಖಾಸಗಿ ಇಕ್ವಿಟಿ ದೈತ್ಯ ಕೆಕೆಆರ್ (KKR) ಮತ್ತು ಸಿಂಗಾಪುರದ ಹೂಡಿಕೆ ಸಂಸ್ಥೆ ಟೆಮಾಸೆಕ್ ಜೊತೆಗೂಡಿ ಪ್ರಬಲ ಬಿಡ್ ಸಲ್ಲಿಸಿದ್ದಾರೆ. ಸ್ಥಳೀಯ ನಾಯಕತ್ವ ಮತ್ತು ಜಾಗತಿಕ ಹೂಡಿಕೆಯ ಈ ಒಕ್ಕೂಟವು ತಂಡದ ಮೇಲೆ ಹಿಡಿತ ಸಾಧಿಸಲು ತುದಿಗಾಲಲ್ಲಿ ನಿಂತಿದೆ.

ಮ್ಯಾಂಚೆಸ್ಟರ್ ಯುನೈಟೆಡ್ ಮಾಲೀಕರಾದ ಗ್ಲೇಜರ್ ಕುಟುಂಬ ಮತ್ತು ಸೆರಮ್ ಇನ್‌ಸ್ಟಿಟ್ಯೂಟ್‌ನ ಅದರ್ ಪೂನಾವಲ್ಲಾ ಅಂತಿಮವಾಗಿ ಬಿಡ್ ಸಲ್ಲಿಸದೆ ಸ್ಪರ್ಧೆಯಿಂದ ಹಿಂದೆ ಸರಿದಿದ್ದಾರೆ ಎಂದು ವರದಿಯಾಗಿದೆ.

ಈ ಒಪ್ಪಂದವು 1.8 ಬಿಲಿಯನ್‌ನಿಂದ 2 ಬಿಲಿಯನ್ ನಡುವೆ ಅಂತಿಮಗೊಳ್ಳುವ ಸಾಧ್ಯತೆ ಇದ್ದು, ಇದು 2021 ರಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ತಂಡಕ್ಕೆ ಪಾವತಿಸಿದ 850 ಮಿಲಿಯನ್‌ಗಿಂತಲೂ ಎರಡೂ ಪಟ್ಟು ಹೆಚ್ಚು! ಡಿಯಾಜಿಯೊ ಸಂಸ್ಥೆಯು ಮಾರ್ಚ್ 31 ರೊಳಗೆ ಪ್ರಕ್ರಿಯೆ ಮುಗಿಸಲು ಯೋಜಿಸಿದ್ದರೂ, ಬಿಸಿಸಿಐನ ಔಪಚಾರಿಕ ಅನುಮೋದನೆಯ ಬಳಿಕವೇ ಪೂರ್ಣ ಹಸ್ತಾಂತರ ನಡೆಯಬಹುದು ಎನ್ನಲಾಗಿದೆ.

ಆರ್‌ಸಿಬಿ ಮಾತ್ರವಲ್ಲದೇ, ಐಪಿಎಲ್​ ಮೊದಲ ಸೀಸನ್ ಚಾಂಪಿಯನ್ ರಾಜಸ್ಥಾನ ರಾಯಲ್ಸ್ ತಂಡವೂ ಮಾರಾಟದ ಹಾದಿಯಲ್ಲಿದೆ. ಆದಿತ್ಯ ಬಿರ್ಲಾ ಗ್ರೂಪ್ ಮತ್ತು ಅಮೆರಿಕದ ಹೂಡಿಕೆದಾರ ಡೇವಿಡ್ ಬ್ಲಿಟ್ಜರ್ ಜೋಡಿಯು ಈ ತಂಡಕ್ಕಾಗಿ ಬಿಡ್ ಸಲ್ಲಿಸಿದೆ. ರಾಜಸ್ಥಾನ ತಂಡದ ಪ್ರಸ್ತುತ ಮಾಲೀಕರಾದ ಎಮರ್ಜಿಂಗ್ ಮೀಡಿಯಾ ಐಪಿಎಲ್ ಲಿಮಿಟೆಡ್, ಆರಂಭದಲ್ಲಿ ಅಲ್ಪ ಪಾಲನ್ನು ಮಾತ್ರ ಮಾರಾಟ ಮಾಡಲು ಯೋಚಿಸಿತ್ತು. ಆದರೆ ಈಗ ಬಹುಪಾಲು ಪಾಲನ್ನು ಮಾರಾಟ ಮಾಡಲು ಸಿದ್ಧವಾಗಿದೆ ಎಂದು ವರದಿಗಳು ತಿಳಿಸಿವೆ(ಏಜೆನ್ಸೀಸ್​).