ಡಿಸಿಪಿ ಆಜ್ಞೆಯಂತೆ ಪ್ರತಿಭಟನಾಕಾರರ ಮೇಲೆ 2 ರೌಂಡ್ ಪೆಲೆಟ್ ಗನ್‌ ಪ್ರಯೋಗ: ಪೊಲೀಸ್ ದಾಖಲೆಯಲ್ಲಿ ಸತ್ಯಾಂಶ ಬಯಲು! Pellet Guns

ನವದೆಹಲಿ: ಸಂಸತ್ ಚಲೋ ಪ್ರತಿಭಟನೆಯ ವೇಳೆ ವಿದ್ಯಾರ್ಥಿ ಪ್ರತಿಭಟನಾಕಾರರ ಮೇಲೆ ನಡೆಸಲಾದ ಪೊಲೀಸರ ಕಾರ್ಯಾಚರಣೆಯು ಇದೀಗ ಭಾರಿ ವಿವಾದಕ್ಕೆ ಕಾರಣವಾಗಿದೆ. ಜುಲೈ 20 ರಂದು ನವದೆಹಲಿಯ ಜಂತರ್ ಮಂತರ್‌ನಲ್ಲಿ ನಡೆದ ವಿದ್ಯಾರ್ಥಿಗಳ ಪ್ರತಿಭಟನೆಯನ್ನು ನಿಯಂತ್ರಿಸಲು 'ರ‍್ಯಾಪಿಡ್ ಆಕ್ಷನ್ ಫೋರ್ಸ್' (RAF) ಸಿಬ್ಬಂದಿಗಳು ದೆಹಲಿ ಪೊಲೀಸರ ಸೂಚನೆಯಂತೆ ಕನಿಷ್ಠ ಎರಡು ಬಾರಿ ಪೆಲೆಟ್​ ಗನ್ಸ್​ ( Pellet Guns ) ಬಳಸಿದ್ದಾರೆ ಎಂಬ ಆಘಾತಕಾರಿ ಮಾಹಿತಿ ಬಯಲಾಗಿದೆ. .

ಪ್ರತಿಭಟನಾಕಾರರ ಮೇಲೆ ಪೆಲೆಟ್ ಗನ್‌ಗಳನ್ನು ಬಳಸಿರುವುದನ್ನು ದೆಹಲಿ ಪೊಲೀಸರು ಆರಂಭದಲ್ಲಿ ಸಂಪೂರ್ಣವಾಗಿ ನಿರಾಕರಿಸಿದ್ದರು. ಆದರೆ, ಜುಲೈ 22 ರಂದು ಪಾರ್ಲಿಮೆಂಟ್ ಸ್ಟ್ರೀಟ್ ಪೊಲೀಸ್ ಠಾಣೆಯ ಜನರಲ್ ಡೈರಿಯಲ್ಲಿ ದಾಖಲಾಗಿರುವ ಮಾಹಿತಿಯ ಪ್ರಕಾರ, ಜಂತರ್ ಮಂತರ್‌ನಲ್ಲಿ ನಿಯೋಜನೆಗೊಂಡಿದ್ದ ಡಿಸಿಪಿ ದರ್ಜೆಯ ಅಧಿಕಾರಿಯೊಬ್ಬರ ಆಜ್ಞೆಯ ಮೇರೆಗೆ ರ‍್ಯಾಪಿಡ್ ಆಕ್ಷನ್ ಫೋರ್ಸ್ ಪಡೆಯು ಈ ಗಲಭೆ ನಿಗ್ರಹ ಗನ್‌ಗಳನ್ನು ಪ್ರಯೋಗಿಸಿದೆ ಎಂಬುದು ಈಗ ಬಹಿರಂಗವಾಗಿದೆ.

ವರದಿಯ ಪ್ರಕಾರ, ಜಂತರ್ ಮಂತರ್ ವಲಯ-1 ರಲ್ಲಿ ಪ್ರತಿಭಟನೆ ತೀವ್ರ ಸ್ವರೂಪ ಪಡೆದುಕೊಂಡಾಗ ಆ ಆಕ್ರೋಶಿತ ಗುಂಪನ್ನು ಚದುರಿಸಲು ಆರ್‌ಎಎಫ್ ಸಿಬ್ಬಂದಿ 55 ಎಲೆಕ್ಟ್ರಿಕ್‌ ರಹಿತ ಶೆಲ್‌ಗಳು, 15 ಎಲೆಕ್ಟ್ರಿಕ್ ಶೆಲ್‌ಗಳು, 5 ಕಣ್ಣೀರು ತರಿಸುವ ಗ್ಯಾಸ್ ಗ್ರೇನೆಡ್‌ಗಳು ಹಾಗೂ ಗಲಭೆ ನಿಗ್ರಹ ಗನ್‌ಗಳಿಂದ ಎರಡು ರೌಂಡ್ ಗುಂಡು ಹಾರಿಸಿದ್ದಾರೆ. ಪ್ಲಾಸ್ಟಿಕ್ ಪೆಲೆಟ್‌ಗಳನ್ನು ಒಳಗೊಂಡ ಈ ಕಾರ್ಟ್ರಿಡ್ಜ್‌ಗಳ ದಾಳಿಯಿಂದಾಗಿ ಕನಿಷ್ಠ ನಾಲ್ವರು ತೀವ್ರವಾಗಿ ಗಾಯಗೊಂಡಿದ್ದಾರೆ.

ಈ ಭೀಕರ ಘಟನೆಯ ಬೆನ್ನಲ್ಲೇ ರ‍್ಯಾಪಿಡ್ ಆಕ್ಷನ್ ಫೋರ್ಸ್‌ನ ಇನ್ಸ್​ಪೆಕ್ಟರ್​ ಜನರಲ್ ಸೀಮಾ ಧುಂಧಿಯಾ ಅವರು ಉನ್ನತ ಮಟ್ಟದ ಸಭೆ ಕರೆದು, ಜಂತರ್ ಮಂತರ್ ಪ್ರತಿಭಟನೆಯಲ್ಲಿ "ಅತಿಯಾದ ಶಕ್ತಿಪ್ರಯೋಗ" ಮಾಡಿದ್ದು ನಿಯಮಬಾಹಿರ ಹಾಗೂ ಅನಗತ್ಯವಾಗಿತ್ತು ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ, ಮುಂದಿನ ಆದೇಶದವರೆಗೆ ದೆಹಲಿಯಲ್ಲಿ ಪಂಪ್ ಆ್ಯಕ್ಷನ್ ಗನ್, ಎಆರ್‌ಜಿ, ಎಲೆಕ್ಟ್ರಿಕ್ ಶಾಕ್ ಅಸ್ತ್ರಗಳನ್ನು ಬಳಸದಂತೆ ಮತ್ತು ವಿತರಿಸದಂತೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದು, ಘಟನೆಯ ಬಗ್ಗೆ ಆಂತರಿಕ ತನಿಖೆಗೆ ಆದೇಶಿಸಿದ್ದಾರೆ.

ಸಾಮಾನ್ಯವಾಗಿ ಗಲಭೆ ನಿಗ್ರಹ ಗನ್ (ARG) ಅನ್ನು ಪ್ರಾಣಾಪಾಯ ಉಂಟುಮಾಡದ ಕಡಿಮೆ ಪ್ರಮಾಣದ ಮಾರಕ ಅಸ್ತ್ರವೆಂದು ಪರಿಗಣಿಸಲಾಗುತ್ತದೆ. ಇದು ಸಾಂಪ್ರದಾಯಿಕ ಲೋಹದ ಪೆಲೆಟ್ ಗನ್‌ಗಳಿಗಿಂತ ಭಿನ್ನವಾಗಿದ್ದರೂ ಅದೇ ವರ್ಗಕ್ಕೆ ಸೇರುತ್ತದೆ. ಇದರಲ್ಲಿ ಲೋಹದ ಬದಲಿಗೆ ಪ್ಲಾಸ್ಟಿಕ್ ಪೆಲೆಟ್‌ಗಳನ್ನು ಹೊಂದಿರುವ ಕಾರ್ಟ್ರಿಡ್ಜ್‌ಗಳನ್ನು ಬಳಸಲಾಗುತ್ತದೆ. ಇವುಗಳನ್ನು ಹಾರಿಸಿದಾಗ ಕಾರ್ಟ್ರಿಡ್ಜ್ ಸಿಡಿದು ಹಲವು ತುಂಡುಗಳಾಗಿ ಹರಡುವುದರಿಂದ ಒಂದೇ ಬಾರಿಗೆ ಅನೇಕರಿಗೆ ಗಾಯಗಳಾಗುವ ಸಾಧ್ಯತೆ ಇರುತ್ತದೆ.

ಈ ವಿಷಯವು ಈಗ ರಾಜಕೀಯವಾಗಿಯೂ ಭಾರಿ ಸಂಚಲನ ಮೂಡಿಸಿದ್ದು, ವಿದ್ಯಾರ್ಥಿಗಳ ಮೇಲಿನ ದೌರ್ಜನ್ಯದ ವಿರುದ್ಧ ವಿಪಕ್ಷಗಳು ಕೇಂದ್ರ ಸರ್ಕಾರದ ವಿರುದ್ಧ ಮುಗಿಬಿದ್ದಿವೆ. ಈ ಕುರಿತು ಕೇಂದ್ರ ಗೃಹ ಸಚಿವ ಅಮಿತ್ ಷಾ ಅವರು ಸಂಸತ್ತಿನಲ್ಲಿ ಅಧಿಕೃತ ಹೇಳಿಕೆ ನೀಡಬೇಕೆಂದು ಪ್ರತಿಪಕ್ಷಗಳು ಪಟ್ಟು ಹಿಡಿದಿವೆ. ಮತ್ತೊಂದೆಡೆ, ಈ ಪ್ರಕರಣವು ಈಗ ಸುಪ್ರೀಂ ಕೋರ್ಟ್ ಅಂಗಳವನ್ನೂ ತಲುಪಿದೆ. ಮಾಜಿ ಐಪಿಎಸ್ ಅಧಿಕಾರಿ ಯಶೋವರ್ಧನ್ ಆಜಾದ್ ಹಾಗೂ ಗಾಯಗೊಂಡ ಇಬ್ಬರು ವ್ಯಕ್ತಿಗಳು ವಕೀಲ ವೃಂದಾ ಗ್ರೋವರ್ ಅವರ ಮೂಲಕ ಸುಪ್ರೀಂ ಕೋರ್ಟ್‌ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿದ್ದಾರೆ. ನಾಗರಿಕ ಪ್ರತಿಭಟನೆಗಳನ್ನು ಹತೋಟಿಗೆ ತರಲು ಇಂತಹ ಪೆಲೆಟ್ ಹಾಗೂ ಗಲಭೆ ನಿಗ್ರಹ ಗನ್‌ಗಳ ಬಳಕೆಯನ್ನು ಸಂಪೂರ್ಣವಾಗಿ ನಿಷೇಧಿಸಬೇಕೆಂದು ಅರ್ಜಿಯಲ್ಲಿ ಕೋರಲಾಗಿದೆ, (ಏಜೆನ್ಸೀಸ್​).