ಇದು ಅಜಿತ್ ಪವಾರ್ ಸೋಲಲ್ಲ...ಪ್ರಧಾನಿ ಮೋದಿ ಮ್ಯಾಜಿಕ್; ಪುಣೆ ಗೆಲುವಿಗೆ ಸಿಎಂ ಫಡ್ನವೀಸ್ ನೀಡಿದ ಕಾರಣ ಹೀಗಿದೆ ನೋಡಿ | Devendra Fadnavis

ಪುಣೆಯಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಫಡ್ನವೀಸ್, ಪವಾರ್ ಕುಟುಂಬದ ಈ ಭದ್ರಕೋಟೆಗಳಲ್ಲಿ ಅಜಿತ್ ಪವಾರ್ ಮತ್ತು ಅವರ ಚಿಕ್ಕಪ್ಪ ಶರದ್ ಪವಾರ್ ನೇತೃತ್ವದ ರಾಷ್ಟ್ರೀಯತಾವಾದಿ ಕಾಂಗ್ರೆಸ್ ಪಕ್ಷ (ಎನ್‌ಸಿಪಿ) ಸೋಲಿನ ಬಳಿಕ ಫಡ್ನವೀಸ್​ರಿಂದ ಈ ಹೇಳಿಕೆಗಳು ಬಂದಿವೆ.

ಜನರು ಅಜಿತ್ ದಾದಾ ಅವರನ್ನು ತಿರಸ್ಕರಿಸಿಲ್ಲ, ಅವರು ಪ್ರಧಾನಿ ಮೋದಿ ಮತ್ತು ಬಿಜೆಪಿಯ ನಾಯಕತ್ವವನ್ನು ಒಪ್ಪಿಕೊಂಡಿದ್ದಾರೆ, ಇಲ್ಲಿ ಬಿಜೆಪಿ ಪಾಲಿಕೆಯ ಸದಸ್ಯರು ತಮ್ಮನ್ನು ತಾವು ಆಡಳಿತಗಾರರೆಂದು ಪರಿಗಣಿಸುವ ಬದಲು, ಸಾರ್ವಜನಿಕರ ಸೇವಕ ಎಂದು ಪರಿಗಣಿಸುತ್ತದೆ ಎಂದರು.

ಪುಣೆ ಮುನ್ಸಿಪಲ್ ಕಾರ್ಪೊರೇಷನ್ (ಪಿಎಂಸಿ) 165 ಸ್ಥಾನಗಳಲ್ಲಿ ಬಿಜೆಪಿ 119 ಸ್ಥಾನಗಳನ್ನು ಗೆದ್ದುಕೊಂಡಿದ್ದು, ಅಜಿತ್ ಪವಾರ್​ರ ಎನ್‌ಸಿಪಿ ಬಣ ಕೇವಲ 27 ಸ್ಥಾನಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದು, ಎನ್‌ಸಿಪಿ ಶರದ್ ಬಣ ಕೇವಲ ಮೂರು ಸ್ಥಾನಗಳನ್ನು ಗಳಿಸಿದರೆ, ಕಾಂಗ್ರೆಸ್ 15 ಸ್ಥಾನಗಳನ್ನು ಗೆಲ್ಲುವಲ್ಲಿ ಯಶಸ್ವಿಯಾಗಿದೆ.

ಈ ಫಲಿತಾಂಶವು ಪುಣೆ ಮೇಲಿನ ಎನ್​ಸಿಪಿಯ ತಮ್ಮ ದೀರ್ಘಕಾಲದ ನಿಯಂತ್ರಣವನ್ನು ಉಳಿಸಿಕೊಳ್ಳುವ ಆಶಯ ಹೊಂದಿದ್ದ ಪವಾರ್ ಕುಟುಂಬಕ್ಕೆ ದೊಡ್ಡ ಆಘಾತ ನೀಡಿದೆ. ಬಿಜೆಪಿ ಪಿಂಪ್ರಿ ಚಿಂಚ್‌ವಾಡ್‌ನಲ್ಲಿ 128 ಸ್ಥಾನಗಳಲ್ಲಿ 84 ಸ್ಥಾನಗಳೊಂದಿಗೆ ಸ್ಪಷ್ಟ ಬಹುಮತವನ್ನು ಗಳಿಸುವ ಮೂಲಕ ಈ ಪ್ರದೇಶದಲ್ಲಿ ತನ್ನ ಪ್ರಾಬಲ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸಿಕೊಂಡಿದೆ.

ಬಿಜೆಪಿಯ ಮೇಲೆ ನಂಬಿಕೆ ಇರಿಸಿ ಭರ್ಜರಿ ಗೆಲುವು ನೀಡಿದ್ದಕ್ಕಾಗಿ ಪುಣೆ ಮತ್ತು ಪಿಂಪ್ರಿ ಚಿಂಚ್‌ವಾಡ್‌ನ ಮತದಾರರಿಗೆ ಧನ್ಯವಾದ ಹೇಳಿದ ಫಡ್ನವೀಸ್​, ಇದು ಕೇವಲ ಕೃತಘ್ನತೆ ಅಲ್ಲ, ನಾನು ಅವರಿಗೆ ಋಣಿಯಾಗಿದ್ದೇನೆ. ಈ ಜನಾದೇಶದ ನಗರಗಳ ಬಗೆಗಿನ ನಮ್ಮ ಜವಾಬ್ದಾರಿಯನ್ನು ಸದಾ ಅದು ನೆನಪಿಸುತ್ತದೆ, ಚುನಾವಣಾ ಪ್ರಚಾರದ ಸಮಯದಲ್ಲಿ ನೀಡಿದ ಭರವಸೆಗಳನ್ನು ಪೂರೈಸಲು ಪಕ್ಷವು ಶ್ರಮಿಸುತ್ತದೆ ಎಂದು ಹೇಳಿದರು(ಏಜೆನ್ಸೀಸ್​).