ಮಮತಾ ಮೌನದಲ್ಲಿ ಅಡಗಿದೆ ಆ ರಹಸ್ಯ! 2021ರ ಚಮತ್ಕಾರ ಮತ್ತೆ ನಡೆಯುತ್ತದೆ ಎನ್ನುವ ವಿಶ್ವಾಸದಲ್ಲಿದ್ದಾರಾ ದೀದಿ.? | West Bengal Exit Polls

ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಎಕ್ಸಿಟ್​ ಪೋಲ್​ಗಳನ್ನು ಎಷ್ಟು ಬಾರಿ ಧಿಕ್ಕರಿಸಿದ್ದಾರೆ ಎಂಬುದನ್ನು ಪರಿಶೀಲಿಸುವ ಮೊದಲು, ಮೇ 4 ರ ಫಲಿತಾಂಶಗಳ ಬಗ್ಗೆ ಹೆಚ್ಚಿನ ಸಮೀಕ್ಷಾ ಸಂಸ್ಥೆಗಳು ಏನು ಭವಿಷ್ಯ ನುಡಿದಿವೆ ಎಂಬುದನ್ನು ನೋಡೋಣ. ಕೆಲವು ಎಕ್ಸಿಟ್​ ಪೋಲ್​ಗಳು ಬಂಗಾಳದಲ್ಲಿ ಟಿಎಂಸಿಗಿಂತ ಬಿಜೆಪಿಗೆ ಮೇಲುಗೈ ಸಾಧಿಸಿದೆ ಎಂದು ಫಲಿತಾಂಶವನ್ನು ಊಹಿಸುತ್ತಾ, ಕನಿಷ್ಠ ಐದು ಸಂಸ್ಥೆಗಳು ಈ ಚುನಾವಣೆಯಲ್ಲಿ ಬಿಜೆಪಿಯೇ ಮುಂಚೂಣಿಯಲ್ಲಿದೆ ಎಂದು ಹೇಳಿದ್ದಾರೆ.

ಅವುಗಳಲ್ಲಿ, ಟುಡೇಸ್ ಚಾಣಕ್ಯ ತೃಣಮೂಲ ಕಾಂಗ್ರೆಸ್​ಗೆ 100+, ಬಿಜೆಪಿಗೆ 192+ ಸ್ಥಾನಗಳನ್ನು ನೀಡಿದ್ದು, ಬಿಜೆಪಿ ಪರ ಮತಗಳಲ್ಲಿ ಭಾರಿ ಏರಿಳಿತವಾಗುವ ಸಾಧ್ಯತೆ ಇದೆ ಎಂದು ಸಮೀಕ್ಷೆದಾರರು ಭವಿಷ್ಯ ನುಡಿದಿದ್ದಾರೆ. ಅವರ ಅಂದಾಜಿನ ಪ್ರಕಾರ, ಬಿಜೆಪಿ ಒಟ್ಟು ಮತಗಳಲ್ಲಿ ಶೇ. 48 ರಷ್ಟು ಮತಗಳನ್ನು ಪಡೆಯುವ ಸಾಧ್ಯತೆ ಇದ್ದರೆ, ತೃಣಮೂಲ ಕಾಂಗ್ರೆಸ್ ಶೇ. 38 ರಷ್ಟು ಮತಗಳನ್ನು ಪಡೆಯಬಹುದು. ಈ ಸಂಖ್ಯೆಗಳು ಸ್ಥಿರವಾಗಿದ್ದರೆ, 2021 ರ ವಿಧಾನಸಭಾ ಚುನಾವಣೆಗೆ ಹೋಲಿಸಿದರೆ ಬಿಜೆಪಿ ಪರವಾಗಿ ಶೇ. ಎಂಟರಷ್ಟು ಹೆಚ್ಚಳವಾಗಬಹುದು.

ಇತ್ತ ಪಿ-ಮಾರ್ಕ್, ತೃಣಮೂಲ ಕಾಂಗ್ರೆಸ್​​ಗೆ 118 ರಿಂದ 138, ಬಿಜೆಪಿ 150 ರಿಂದ 175 ಸ್ಥಾನಗಳನ್ನು ಗಳಿಸುತ್ತದೆ ಎಂದು ಅಂದಾಜಿಸಿದೆ. ಟಿಎಂಸಿ 125 ರಿಂದ 140 ಸ್ಥಾನಗಳನ್ನು ಗಳಿಸಿದರೆ, ಬಿಜೆಪಿ 146 ರಿಂದ 161 ಸ್ಥಾನಗಳನ್ನು ಗಳಿಸುತ್ತದೆ ಎಂದು ಮ್ಯಾಟ್ರಿಜ್ ಭವಿಷ್ಯ ನುಡಿದಿದೆ. ಪ್ರಜಾ ಪೋಲ್ ಮತ್ತು ಪೋಲ್ ಡೈರಿಯಂತಹ ಸಮೀಕ್ಷೆದಾರರು ಬಿಜೆಪಿ ಕ್ರಮವಾಗಿ 178-208 ಮತ್ತು 142-171 ಸ್ಥಾನಗಳನ್ನು ಗಳಿಸುವ ಸಾಧ್ಯತೆಯಿದೆ ಎಂದು ಅಂದಾಜಿಸಿದ್ದಾರೆ.

ಈ ಆತಂಕದ ನಡುವೆಯೇ, ಪೀಪಲ್ಸ್ ಪಲ್ಸ್ ಮತ್ತು ಜನ್ಮತ್ ಪೋಲ್ಸ್ ಸಂಸ್ಥೆಗಳು ಮಮತಾ ಬ್ಯಾನರ್ಜಿ ಸತತ ನಾಲ್ಕನೇ ಬಾರಿಗೆ 177–187 ಸ್ಥಾನಗಳೊಂದಿಗೆ ಅಧಿಕಾರಕ್ಕೆ ಬರಲಿದ್ದಾರೆ ಎಂದು ಭವಿಷ್ಯ ನುಡಿದಿವೆ. ಆದಾಗ್ಯೂ, ಆಕ್ಸಿಸ್ ಮೈ ಇಂಡಿಯಾ ಸಂಸ್ಥೆಯ ಪ್ರದೀಪ್ ಗುಪ್ತಾ ಮತದಾರರ ಮೌನದಿಂದಾಗಿ ಯಾವುದೇ ಎಕ್ಸಿಟ್​ ಪೋಲ್​ ನೀಡಿಲ್ಲ.

2021 ರಲ್ಲಿಯೂ ಸಹ ಹೆಚ್ಚಿನ ಸಮೀಕ್ಷೆಗಳು ಬಿಜೆಪಿ ಮುನ್ನಡೆ ಅಥವಾ ಕಠಿಣ ಸ್ಪರ್ಧೆಯನ್ನು ಊಹಿಸಿದ್ದವು. ಆದರೆ ಚುನಾವಣಾ ತಂತ್ರಜ್ಞ ಪ್ರಶಾಂತ್ ಕಿಶೋರ್ ಅಂದು ಬಿಜೆಪಿ 100 ಸ್ಥಾನ ದಾಟುವುದಿಲ್ಲ ಎಂದು ಹೇಳಿದ್ದರು. ಅಂತಿಮವಾಗಿ ಟಿಎಂಸಿ 215 ಸ್ಥಾನಗಳನ್ನು ಗೆಲ್ಲುವ ಮೂಲಕ ಕಿಶೋರ್​ ಭವಿಷ್ಯವನ್ನು ನಿಜ ಮಾಡಿದ್ದವು. 2024 ರ ಲೋಕಸಭಾ ಚುನಾವಣೆಯಲ್ಲೂ ಟಿಎಂಸಿ 29 ಸ್ಥಾನಗಳನ್ನು ಗೆದ್ದು ಬಿಜೆಪಿಯನ್ನು 12 ಸ್ಥಾನಗಳಿಗೆ ಕುಗ್ಗಿಸುವ ಮೂಲಕ ಸಮೀಕ್ಷೆಗಳನ್ನು ತಲೆಕೆಳಗಾಗಿಸಿತ್ತು.

ಈ ಬಾರಿ ಮಮತಾ ಬ್ಯಾನರ್ಜಿ ತೃಣಮೂಲ ಕಾಂಗ್ರೆಸ್ ಕನಿಷ್ಠ 226 ಸ್ಥಾನಗಳನ್ನು ಗೆಲ್ಲುತ್ತದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದು, ಈ ಎಕ್ಸಿಟ್​​ ಪೋಲ್​ಗಳು ಬಿಜೆಪಿಯ ಒತ್ತಡದಿಂದ ಮಾಡಲ್ಪಟ್ಟಿವೆ ಎಂದು ದೀದಿ ಆರೋಪಿಸಿದ್ದಾರೆ. ಸಂಸದ ಡೆರೆಕ್ ಒಬ್ರೇನ್ ಮತ್ತು ಇತರ ಟಿಎಂಸಿ ನಾಯಕರು ಈ ಭವಿಷ್ಯವಾಣಿಗಳನ್ನು ತಿರಸ್ಕರಿಸಿದ್ದು, ಸಮೀಕ್ಷೆಗಳ ವಿಶ್ವಾಸಾರ್ಹತೆಯನ್ನೇ ಪ್ರಶ್ನಿಸಿದ್ದಾರೆ. 294 ಸದಸ್ಯ ಬಲದ ಪಶ್ಚಿಮ ಬಂಗಾಳ ವಿಧಾನಸಭೆಯ ಮತ ಎಣಿಕೆ ಮೇ 4 ರಂದು ನಡೆಯಲಿದ್ದು, ಈ ಬಾರಿ ಸಮೀಕ್ಷಾ ಸಂಸ್ಥೆಗಳ ಲೆಕ್ಕಾಚಾರ ಏನಾಗಲಿದೆ ಎಂಬುದಕ್ಕೆ ಸೋಮವಾರ ಉತ್ತರ ಸಿಗಲಿದೆ(ಏಜೆನ್ಸೀಸ್​​).