Smit Machchhar: ದುಬೈನಿಂದ ಇಸ್ರೇಲ್‌ಗೆ ಹೊರಟಿದ್ದ ಫ್ಲೈದುಬೈ ವಿಮಾನದಲ್ಲಿ ಉಗ್ರರ ದಾಳಿ ನಡೆದಿದೆ ಎಂಬ ವರದಿ ಬಂದ ಬಳಿಕ ಎಲ್ಲರಲ್ಲೂ ಒಂದು ಪ್ರಶ್ನೆ ಮೂಡಿದೆ: ಅದೇನಂದರೆ, ಸಹ-ಪೈಲಟ್ ತನ್ನ ಸಹೋದ್ಯೋಗಿ ಮೇಲೆ ಹಲ್ಲೆ ನಡೆಸಿ, ವಿಮಾನ ಅಪಾಯಕ್ಕೆ ಸಿಲುಕುವಂತೆ ಮಾಡಲು ಆಯುಧವನ್ನು ಹೇಗೆ ಪಡೆದನು..? ಆರಂಭಿಕ ವರದಿಗಳ ಪ್ರಕಾರ, ಒಮಾನ್ ದೇಶದ ಸಹ-ಪೈಲಟ್ ವಿಮಾನದಲ್ಲಿದ್ದ ಚಾಕುವನ್ನೇ ಬಳಸಿ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರ ಮೇಲೆ ಹಲ್ಲೆ ನಡೆಸಿದ್ದಾನೆ ಎಂದು ಹೇಳಲಾಗಿತ್ತು.
ಆದರೆ ಈಗ ತನಿಖೆಯಿಂದ ತಿಳಿದುಬಂದಿರುವಂತೆ, ದಾಳಿಕೋರ ಸಹ-ಪೈಲಟ್ ಯಾವುದೇ ಹೊರಗಿನ ಚಾಕುವನ್ನು ಕಾಕ್ಪಿಟ್ಗೆ ಕಳ್ಳಸಾಗಣೆ ಮಾಡಿಲ್ಲ. ಬದಲಿಗೆ, ಸಿಬಿಎಸ್ ನ್ಯೂಸ್ ವರದಿಯ ಪ್ರಕಾರ, ಅವರು ಕಾಕ್‌ಪಿಟ್ ಒಳಗೇ ಇಡಲಾಗುವ ಕ್ರಾಶ್ ಆಕ್ಸ್ ಬಳಸಿ ತಮ್ಮ ಸಹೋದ್ಯೋಗಿಯ ಮೇಲೆ ಭೀಕರ ದಾಳಿ ನಡೆಸಿರಬಹುದು ಎಂದು ತಿಳಿದುಬಂದಿದೆ. ಇದಕ್ಕೂ ಮುನ್ನ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಕೂಡ ಈ ದಾಳಿಯಲ್ಲಿ ಕ್ರಾಶ್ ಆಕ್ಸ್ ಬಳಸಿರುವ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದರು.
ಫ್ಲೈಡೇಟಾರ್ 24 ಪ್ರಕಾರ, ದುಬೈನಿಂದ ಹೊರಟ ಸುಮಾರು ಎರಡೂವರೆ ಗಂಟೆಗಳ ನಂತರ ವಿಮಾನದಲ್ಲಿ ಗೊಂದಲ ಉಂಟಾಯಿತು. ಸುಮಾರು ಒಂದು ನಿಮಿಷದೊಳಗೆ ವಿಮಾನವು 33,000 ಅಡಿಯಿಂದ 17,000 ಅಡಿಗೆ (ಸುಮಾರು 10,000 ಮೀಟರ್‌ನಿಂದ 5,100 ಮೀಟರ್‌ಗೆ) ಕುಸಿಯಿತು. ಬಳಿಕ ಜೋರ್ಡಾನ್ ಗಡಿಯ ಹತ್ತಿರ ವಿಮಾನವು ಆಕಸ್ಮಿಕವಾಗಿ ಸುತ್ತ ಬಳಸಿ, ಸೌದಿ ಅರೇಬಿಯಾದ ತಬುಕ್ ನಗರದಲ್ಲಿ ಸುಮಾರು ಒಂದು ಗಂಟೆಯ ನಂತರ ಸುರಕ್ಷಿತವಾಗಿ ಭೂಸ್ಪರ್ಶ ಮಾಡಿತು.
ಇದನ್ನೂ ಓದಿ:ಆಕಾಶದಲ್ಲೇ ಜೀವನ್ಮರಣದ ಹೋರಾಟ: ಸ್ಮಿತ್ ಮಚ್ಚರ್ ಸಾಹಸಕ್ಕೆ ವಿಶ್ವ ಮಾಧ್ಯಮಗಳ ವರದಿ ಹೀಗಿವೆ! | Smit Machchhar
ವಿಮಾನ ನಿಯಂತ್ರಣ ಕೊಠಡಿಯ ಸಂಭಾಷಣೆಯನ್ನು ಕೇಳಿದ ವ್ಯಕ್ತಿಯೊಬ್ಬರು ತಿಳಿಸಿದಂತೆ, ಸೌದಿ ಅರೇಬಿಯಾ ಮತ್ತು ಜೋರ್ಡಾನ್ ದೇಶಗಳು ವಿಮಾನಕ್ಕೆ ಇಳಿಯಲು ನಿರಾಕರಿಸಿದವು, ಮತ್ತು ಹಿನ್ನೆಲೆಯಲ್ಲಿ ಪ್ರಯಾಣಿಕರ ಕಿರುಚಾಟ ಕೇಳಿಸುತ್ತಿತ್ತು. ಪೈಲಟ್ ನಡುಗುವ ಧ್ವನಿಯಲ್ಲಿ ಮೇಡೇ (Mayday-ತುರ್ತು ಸಂದೇಶ) ಎಂದು ಕರೆ ಮಾಡಿ, ವಿಮಾನ ಅಪಹರಣಕ್ಕೊಳಗಾಗಿದೆ ಎಂದು ತಿಳಿಸಿದ್ದರು.
