ದೀದಿ ಹ್ಯಾಟ್ರಿಕ್ ಗೆಲುವಿಗೆ ಯಾರೂ ಅಡ್ಡಿ ಇಲ್ವಾ..? ಜನ್ಮತ್ ಪೋಲ್ ನೀಡಿದ ಅನಿರೀಕ್ಷಿತ ವರದಿ ಇಲ್ಲಿದೆ! | Janmat Poll

ಇತ್ತ ಅಚ್ಚರಿ ಎಂಬಂತೆ ಜನ್ಮತ್ ಸಮೀಕ್ಷೆ ಮಾತ್ರ ಇದಕ್ಕೆ ತದ್ವಿರುದ್ಧವಾದ ವರದಿಯನ್ನು ನೀಡಿದ್ದು, ಈ ಸಮೀಕ್ಷೆಯ ಪ್ರಕಾರ, ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ನೇತೃತ್ವದ ಟಿಎಂಸಿ ಯಾವುದೇ ಅಡೆತಡೆಯಿಲ್ಲದೆ ಬಹುಮತದೊಂದಿಗೆ ಮತ್ತೆ ಅಧಿಕಾರದ ಚುಕ್ಕಾಣಿ ಹಿಡಿಯಲಿದೆ ಎಂದು ಅಂದಾಜಿಸಿದೆ.

294 ಸದಸ್ಯ ಬಲದ ಪಶ್ಚಿಮ ಬಂಗಾಳ ವಿಧಾನಸಭೆಯಲ್ಲಿ ಸರ್ಕಾರ ರಚಿಸಲು 148 ಸ್ಥಾನಗಳ ಅಗತ್ಯವಿದೆ. ಜನ್ಮತ್ ಸಮೀಕ್ಷೆಯ ಅಂದಾಜಿನಂತೆ ಟಿಎಂಸಿ ಮೈತ್ರಿಕೂಟವು 195 ರಿಂದ 205 ಸ್ಥಾನಗಳನ್ನು ಗೆಲ್ಲುವ ಮೂಲಕ ಸ್ಪಷ್ಟ ಬಹುಮತ ಸಾಧಿಸಲಿದೆ. ಮತ್ತೊಂದೆಡೆ, ಬಿಜೆಪಿಯು 80 ರಿಂದ 90 ಸ್ಥಾನಗಳನ್ನು ಗಳಿಸಿ ಎರಡನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಳ್ಳಲಿದೆ ಎಂದು ವರದಿ ಹೇಳಿದೆ. ಇನ್ನುಳಿದಂತೆ ಕಾಂಗ್ರೆಸ್ 1 ರಿಂದ 3 ಸ್ಥಾನ, ಎಡಪಕ್ಷಗಳು 0 ರಿಂದ 1 ಮತ್ತು ಇತರರು 3 ರಿಂದ 5 ಸ್ಥಾನಗಳನ್ನು ಪಡೆಯಬಹುದು ಎಂದು ಅಂದಾಜಿಸಲಾಗಿದೆ. ಈ ಮತ ಹಂಚಿಕೆಯು ಸಂಪೂರ್ಣವಾಗಿ ಟಿಎಂಸಿ ಪರವಾಗಿರುವುದು ಆಡಳಿತ ಪಕ್ಷದ ಮೇಲಿರುವ ಜನರ ಬಲವಾದ ವಿಶ್ವಾಸವನ್ನು ಎತ್ತಿ ತೋರಿಸುತ್ತಿದೆ.

ಜನ್ಮತ್ ಪೋಲ್‌ನ ಈ ವರದಿಯು ಇತರ ಎಲ್ಲ ಸಮೀಕ್ಷೆಗಳಿಗಿಂತ ಸಂಪೂರ್ಣವಾಗಿ ಭಿನ್ನವಾಗಿರುವುದರಿಂದ ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು, ಬಹುತೇಕ ಸಂಸ್ಥೆಗಳು ಬಿಜೆಪಿ ಮತ್ತು ಟಿಎಂಸಿ ನಡುವೆ ಅತ್ಯಂತ ನಿಕಟ ಸ್ಪರ್ಧೆ ಅಥವಾ ಬಿಜೆಪಿಗೆ ಹೆಚ್ಚಿನ ಸ್ಥಾನಗಳ ಮುನ್ಸೂಚನೆ ನೀಡಿವೆ. ಆದರೆ ಟಿಎಂಸಿಗೆ ಇಷ್ಟು ದೊಡ್ಡ ಮಟ್ಟದ ಜಯವನ್ನು ಊಹಿಸಿರುವ ಏಕೈಕ ಸಂಸ್ಥೆ ಎಂದರೆ ಅದು ಜನ್ಮತ್ ಪೋಲ್ ಮಾತ್ರ. ಈ ವಿಭಿನ್ನ ಅಭಿಪ್ರಾಯಗಳು ರಾಜ್ಯದ ಮತದಾರರ ನಿಜವಾದ ಒಲವು ಯಾರ ಕಡೆಗಿದೆ ಎಂಬ ಅನಿಶ್ಚಿತತೆಯನ್ನು ಇನ್ನಷ್ಟು ಹೆಚ್ಚಿಸಿವೆ.

ಎಕ್ಸಿಟ್ ಪೋಲ್‌ಗಳು ಕೇವಲ ಆರಂಭಿಕ ಒಳನೋಟಗಳನ್ನು ನೀಡಬಲ್ಲವೇ ಹೊರತು ಅವುಗಳೇ ಅಂತಿಮ ತೀರ್ಪಲ್ಲ ಎಂಬುದನ್ನು ಈ ವ್ಯತಿರಿಕ್ತ ಮುನ್ಸೂಚನೆಗಳು ಸಾಬೀತುಪಡಿಸುತ್ತಿವೆ. ಜನ್ಮತ್ ಪೋಲ್‌ನ ಈ ಭರ್ಜರಿ ಮುನ್ಸೂಚನೆ ನಿಜವಾಗುತ್ತದೆಯೇ ಅಥವಾ ಇತರ ಸಮೀಕ್ಷೆಗಳ ಲೆಕ್ಕಾಚಾರ ಪಕ್ಕಾ ಆಗಲಿದೆಯೇ ಎಂಬುದು ಮೇ 4 ರಂದು ನಡೆಯಲಿರುವ ಎಣಿಕೆಯ ದಿನದಂದು ಸ್ಪಷ್ಟವಾಗಲಿದೆ(ಏಜೆನ್ಸೀಸ್​​).