1 ಕೋಟಿ ಸಂಬಳ ಪಡೆದು ಲಕ್ಷುರಿ ಜೀವನ ನಡೆಸುತ್ತಿದ್ದ ಮಹಿಳೆಯ ಬಾಳಲ್ಲಿ ವಿಧಿಯಾಟ: ಕ್ಲೀನರ್ ಆದ್ರೂ ಛಲ ಬಿಡದ ಶ್ವೇತಾ! Luxurious Life

Luxurious Life : ಬದುಕಿನಲ್ಲಿ ನಾವು ತೆಗೆದುಕೊಳ್ಳುವ ನಿರ್ಧಾರಗಳು ಗೆಲುವು ಅಥವಾ ಸೋಲು ಎರಡನ್ನೂ ತರಬಹುದು, ಅದರಲ್ಲೂ ವೃತ್ತಿಜೀವನದಲ್ಲಿ ಕೆಲವೊಮ್ಮೆ ದೊಡ್ಡ ಬೆಲೆಯನ್ನೇ ತೆರಬೇಕಾಗುತ್ತದೆ. ಆದರೆ, ಆತ್ಮವಿಶ್ವಾಸದಿಂದ ಹೋರಾಡಿದರೆ ಕಳೆದುಕೊಂಡ ವೃತ್ತಿಜೀವನವನ್ನು ಮತ್ತೆ ಮರಳಿ ಪಡೆಯಬಹುದು ಎಂಬುದಕ್ಕೆ ಭಾರತೀಯ ಮೂಲದ ಮಹಿಳೆಯೊಬ್ಬರ ಕಥೆಯು ಸಾಕ್ಷಿಯಾಗಿದೆ.

ಹೌದು, ಇಂಗ್ಲೆಂಡ್‌ನಲ್ಲಿ ಕೋಟಿ ರೂಪಾಯಿಗಳ ಸಂಬಳ ಪಡೆಯುತ್ತಾ ಅತ್ಯಂತ ಐಷಾರಾಮಿ ಜೀವನ ನಡೆಸುತ್ತಿದ್ದ ಮಹಿಳೆ, ಇಂದು ಅನಿವಾರ್ಯ ಕಾರಣಗಳಿಂದ ಆಸ್ಟ್ರೇಲಿಯಾದಲ್ಲಿ ಕ್ಲೀನರ್ ಆಗಿ ಕೆಲಸ ಮಾಡುತ್ತಿದ್ದು, ತನ್ನ ಶೂನ್ಯ ಸ್ಥಿತಿಯಿಂದಲೇ ಮತ್ತೆ ಮೇಲೆಳುವ ಛಲವನ್ನು ತೋರುತ್ತಿದ್ದಾರೆ.

ಮುಂಬೈನಲ್ಲಿ ಹುಟ್ಟಿ ಬೆಳೆದ 37 ವರ್ಷದ ಶ್ವೇತಾ ದೇಸಾಯಿ ಅವರು ಪ್ರಸ್ತುತ ಆಸ್ಟ್ರೇಲಿಯಾದ ಮೆಲ್ಬೋರ್ನ್ ನಗರದಲ್ಲಿ ತಾವು ಮಾಡುತ್ತಿರುವ ಕೆಲಸದ ಬಗ್ಗೆ ಸಂತೋಷವಾಗಿದ್ದಾರೆ. 2008ರಲ್ಲಿ ತಮ್ಮ 18ನೇ ವಯಸ್ಸಿನಲ್ಲಿ ಉನ್ನತ ವ್ಯಾಸಂಗಕ್ಕಾಗಿ ಲಂಡನ್‌ಗೆ ತೆರಳಿದ ಅವರು, ಅಲ್ಲಿ ಸುಮಾರು 15 ವರ್ಷಗಳ ಕಾಲ ನೆಲೆಸಿದ್ದರು. ಪ್ರಮುಖ ಇ-ಕಾಮರ್ಸ್ ವೆಬ್‌ಸೈಟ್‌ನಲ್ಲಿ ಪ್ರಾಡಕ್ಟ್ ಹೆಡ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಶ್ವೇತಾ, ವಾರ್ಷಿಕ ಸುಮಾರು 1 ಕೋಟಿ ರೂಪಾಯಿಗಳ ಆದಾಯ ಗಳಿಸುತ್ತಾ, ಲಂಡನ್‌ನಲ್ಲಿ ಅತ್ಯಂತ ಐಷಾರಾಮಿ ಜೀವನವನ್ನು ನಡೆಸುತ್ತಿದ್ದರು.

2023ರಲ್ಲಿ ಶ್ವೇತಾ ಅವರ ಪತಿ ಲಂಡನ್‌ನಿಂದ ಆಸ್ಟ್ರೇಲಿಯಾಕ್ಕೆ ವರ್ಗಾವಣೆಗೊಂಡಾಗ ಅವರ ಜೀವನದ ದಿಕ್ಕೇ ಬದಲಾಯಿತು. ಮೆಲ್ಬೋರ್ನ್‌ಗೆ ಬಂದಿಳಿದ ನಂತರ ಅವರು ಉದ್ಯೋಗಕ್ಕಾಗಿ ಸಾಕಷ್ಟು ಹುಡುಕಾಟ ನಡೆಸಿದರಾದರೂ, ಲಂಡನ್‌ಗೆ ಹೋಲಿಸಿದರೆ ಮೆಲ್ಬೋರ್ನ್​ನಲ್ಲಿ ಉದ್ಯೋಗ ಮಾರುಕಟ್ಟೆಯ ಪರಿಸ್ಥಿತಿ ತೀರಾ ಭಿನ್ನವಾಗಿತ್ತು.

ಸತತ ಆರು ತಿಂಗಳುಗಳ ಕಾಲ ಪ್ರಯತ್ನಿಸಿದರೂ ಯಾವುದೇ ಸೂಕ್ತ ಕೆಲಸ ಸಿಗದಿದ್ದಾಗ, ಶ್ವೇತಾ ಅವರು ಅಂತಿಮವಾಗಿ ತಮ್ಮ ಕೈಗೆ ಬಂದ ಅವಕಾಶವನ್ನು ಸ್ವೀಕರಿಸಲು ನಿರ್ಧರಿಸಿದರು. ಈ ಹಿನ್ನೆಲೆಯಲ್ಲಿ, ಕೋಟಿ ಸಂಬಳ ಪಡೆಯುತ್ತಿದ್ದ ಅವರು ಮೆಲ್ಬೋರ್ನ್‌ನಲ್ಲಿ ಅಪಾರ್ಟ್‌ಮೆಂಟ್‌ಗಳನ್ನು ಶುಚಿಗೊಳಿಸುವ ಕೆಲಸಕ್ಕೆ ಸೇರಿಕೊಂಡರು.

ಮನೆ ಮತ್ತು ಸುತ್ತಮುತ್ತಲಿನ ಪರಿಸರವನ್ನು ಅಚ್ಚುಕಟ್ಟಾಗಿ ಇಡುವುದು, ಕೊಠಡಿಗಳನ್ನು ಸ್ವಚ್ಛಗೊಳಿಸುವುದು, ಬೆಡ್‌ಶೀಟ್‌ಗಳನ್ನು ತೊಳೆಯುವುದು ಮತ್ತು ಅತಿಥಿಗಳ ದೂರುಗಳನ್ನು ಪರಿಹರಿಸುವುದು ಶ್ವೇತಾ ಅವರ ಹೊಸ ಜವಾಬ್ದಾರಿಗಳಾಗಿವೆ. ಈ ಅನುಭವವು ಸಂಬಳ ಮತ್ತು ಅಂತಸ್ತಿನ ಆಧಾರದ ಮೇಲೆ ಜನರನ್ನು ಅಳೆಯುವ ಅವರ ಹಳೆಯ ದೃಷ್ಟಿಕೋನವನ್ನೇ ಬದಲಿಸಿದ್ದು, ಯಾವುದೇ ಕೆಲಸವೂ ಕೀಳಲ್ಲ ಎಂಬ ಪಾಠವನ್ನು ಕಲಿಸಿದೆ.

ಒಬ್ಬ ವ್ಯಕ್ತಿಯ ವ್ಯಕ್ತಿತ್ವವನ್ನು ಅವರ ಉದ್ಯೋಗ ಅಥವಾ ಆದಾಯದ ಬದಲಾಗಿ ಅವರ ಗುಣಗಳಿಂದ ಗುರುತಿಸಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಪ್ರಸ್ತುತ ಶ್ವೇತಾ ಅವರು ಶುಚಿಗೊಳಿಸುವ ಕೆಲಸದ ಜೊತೆಗೆ ಮಕ್ಕಳಿಗೆ ಇಂಗ್ಲಿಷ್ ಪಾಠವನ್ನು ಕಲಿಸುತ್ತಿದ್ದಾರೆ ಮತ್ತು ಸ್ವಂತ ಕೋಚಿಂಗ್ ಉದ್ಯಮವನ್ನೂ ಸಹ ನಡೆಸುತ್ತಿದ್ದಾರೆ, (ಏಜೆನ್ಸೀಸ್​).