ರೋಚಕ ಜಯ ಸಾಧಿಸಿದರೂ ನನ್ನಿಂದ ಅದು ಸಾಧ್ಯವಾಗಲಿಲ್ಲ ಅಂತ ಬೇಸರಗೊಂಡು ಭಾವುಕರಾದ ಕೃನಾಲ್​ ಪಾಂಡ್ಯ! Krunal Pandya

Krunal Pandya : ಪ್ರಸ್ತುತ ನಡೆಯುತ್ತಿರುವ 19ನೇ ಆವೃತ್ತಿಯ ಐಪಿಎಲ್ ಟೂರ್ನಿಯಲ್ಲಿ ನಿನ್ನೆ (ಮೇ 10) ನಡೆದ ರೋಚಕ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ( RCB ) ತಂಡ ಕೊನೆಯ ಎಸೆತದಲ್ಲಿ ರಣರೋಚಕ ಜಯಭೇರಿ ಬಾರಿಸಿತು. ಇದಾದ ಬಳಿಕ ಮಾತನಾಡಿದ ಪಂದ್ಯಶ್ರೇಷ್ಠ ಆಟಗಾರ ಕೃನಾಲ್ ಪಾಂಡ್ಯ, ತಮಗೆ ಒತ್ತಡದ ಸನ್ನಿವೇಶಗಳಲ್ಲಿ ಆಡುವುದು ಇಷ್ಟ ಮತ್ತು ಇಂತಹ ಸವಾಲಿನ ಸಂದರ್ಭಗಳಿಗಾಗಿಯೇ ನಾನು ಸದಾ ಸಿದ್ಧರಿರುವುದಾಗಿ ತಿಳಿಸಿದರು.

ಅಂದಹಾಗೆ, ಮುಂಬೈ ನೀಡಿದ 167 ರನ್‌ಗಳ ಗುರಿ ಬೆನ್ನಟ್ಟಿದ ಆರ್‌ಸಿಬಿ ಒಂದು ಹಂತದಲ್ಲಿ 39 ರನ್‌ಗಳಿಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ, ಕೃನಾಲ್ ಪಾಂಡ್ಯ (46 ಎಸೆತಗಳಲ್ಲಿ 73 ರನ್) ಅವರು ಜೇಕಬ್ ಬೆಥೆಲ್ ಹಾಗೂ ಜಿತೇಶ್ ಶರ್ಮಾ ಅವರೊಂದಿಗೆ ನಿರ್ಣಾಯಕ ಜೊತೆಯಾಟವಾಡಿ ತಂಡವನ್ನು ಗೆಲುವಿನ ಹತ್ತಿರ ತಂದರು. 18ನೇ ಓವರ್‌ನಲ್ಲಿ ಕೃನಾಲ್ ಔಟಾದ ನಂತರ, ಅಂತಿಮ ಹಂತದಲ್ಲಿ ಭುವನೇಶ್ವರ್ ಕುಮಾರ್ ಮತ್ತು ರಸಿಖ್ ಸಲಾಮ್ ದಾರ್ ತಾಳ್ಮೆಯಿಂದ ಆಡಿ ಕೊನೆಯ ಎಸೆತದಲ್ಲಿ ತಂಡಕ್ಕೆ ರೋಚಕ ಗೆಲುವು ತಂದುಕೊಟ್ಟರು.

ಸ್ನಾಯು ಸೆಳೆತದ ನಡುವೆಯೂ ಅಬ್ಬರಿಸಿದ ಕೃನಾಲ್ ಪಾಂಡ್ಯ, ತಮ್ಮ ಸ್ಫೋಟಕ ಇನಿಂಗ್ಸ್‌ನಲ್ಲಿ ಐದು ಸಿಕ್ಸರ್ ಮತ್ತು ನಾಲ್ಕು ಬೌಂಡರಿಗಳನ್ನು ಸಿಡಿಸಿದರು. ಪಂದ್ಯದ ನಂತರ ಮಾತನಾಡಿದ ಅವರು, ತಮಗೆ ಒತ್ತಡದ ಸನ್ನಿವೇಶಗಳನ್ನು ಎದುರಿಸುವುದು ಇಷ್ಟ ಮತ್ತು ಅಂತಹ ಸಮಯಕ್ಕಾಗಿಯೇ ಸದಾ ಸಿದ್ಧರಿರುವುದಾಗಿ ತಿಳಿಸಿದರಲ್ಲದೆ, ಪಂದ್ಯವನ್ನು ತಾನೇ ಮುಗಿಸಿಕೊಡಲು ಸಾಧ್ಯವಾಗದಿದ್ದಕ್ಕೆ ಬೇಸರ ವ್ಯಕ್ತಪಡಿಸಿದರು. ಕೊನೆಯ ಹಂತದಲ್ಲಿ ಭುವನೇಶ್ವರ್ ಕುಮಾರ್ ಬಾರಿಸಿದ ಸಿಕ್ಸರ್ ಪಂದ್ಯದ ಗೆಲುವನ್ನು ನಿರ್ಧರಿಸಿತು ಎಂದು ಶ್ಲಾಘಿಸಿದ ಕೃನಾಲ್, ರಾಯ್‌ಪುರದ ಪಿಚ್‌ನಲ್ಲಿ ಕೇವಲ ಆಕ್ರಮಣಕಾರಿ ಆಟಕ್ಕಿಂತ ಹೆಚ್ಚಾಗಿ ತಾಳ್ಮೆ ಮತ್ತು ಸರಿಯಾದ ಕ್ರಿಕೆಟ್ ಶಾಟ್‌ಗಳ ಅವಶ್ಯಕತೆ ಇತ್ತು ಎಂದು ಅಭಿಪ್ರಾಯಪಟ್ಟರು.

ಸ್ನಾಯು ಸೆಳೆತದ ಬಗ್ಗೆ ಮಾತನಾಡಿದ ಕೃನಾಲ್​, ಸಾಮಾನ್ಯವಾಗಿ ನಾನು ಇಷ್ಟು ದೀರ್ಘಕಾಲ ಬ್ಯಾಟಿಂಗ್ ಮಾಡುವುದಿಲ್ಲ, ಹಾಗಾಗಿ ಕಾಲಿನ ಸ್ನಾಯುವಿನಿಂದ ಆರಂಭವಾದ ಸೆಳೆತ ಬೆನ್ನಿನವರೆಗೂ ಹರಡಿ ಬಹಳ ತೊಂದರೆ ನೀಡಿತು ಎಂದು ತಮ್ಮ ದೈಹಿಕ ಸವಾಲಿನ ನಡುವೆಯೂ ಆಡಿದ ಆಟವನ್ನು ಕೃನಾಲ್​ ಸ್ಮರಿಸಿದರು.

2016 ರಿಂದ 2021ರ ವರೆಗೆ ಮುಂಬೈ ಇಂಡಿಯನ್ಸ್ ತಂಡದ ಭಾಗವಾಗಿದ್ದ ಕೃನಾಲ್ ಪಾಂಡ್ಯ, ಪಂದ್ಯದ ನಂತರ ತಮ್ಮ ಹಳೆಯ ಫ್ರಾಂಚೈಸಿಯೊಂದಿಗಿನ ದಿನಗಳನ್ನು ನೆನಪಿಸಿಕೊಂಡು ಭಾವುಕರಾದರು. ಮುಂಬೈ ಇಂಡಿಯನ್ಸ್ ಬ್ಯಾಟಿಂಗ್ ಕೋಚ್ ಕೀರಾನ್ ಪೋಲಾರ್ಡ್ ಅವರನ್ನು ತಮ್ಮ "ದೊಡ್ಡಣ್ಣ" ಎಂದು ಕರೆದ ಕೃನಾಲ್, ಪೋಲಾರ್ಡ್ ಅವರು ಟಿ20 ಮಾದರಿಯ ಶ್ರೇಷ್ಠ ಆಟಗಾರ ಹಾಗೂ ತಂಡದ ಗೆಲುವಿನ ರೂವಾರಿ ಎಂದು ಬಣ್ಣಿಸಿದರು. ಮುಂಬೈ ಇಂಡಿಯನ್ಸ್‌ನಲ್ಲಿ ಕಳೆದ ಆರು ವರ್ಷಗಳು ತಮ್ಮ ಐಪಿಎಲ್ ವೃತ್ತಿಜೀವನದ ಅತ್ಯುತ್ತಮ ಘಟ್ಟ ಎಂದು ಹೇಳಿದ ಅವರು, "ಪೋಲಾರ್ಡ್ ಮತ್ತು ಪಾಂಡ್ಯ ಸಹೋದರರು ಮುಂಬೈ ತಂಡದ ಶಕ್ತಿ ಕೇಂದ್ರವಾಗಿದ್ದೆವು. ಅವರ ಮೇಲೆ ನನಗೆ ಅಪಾರ ಪ್ರೀತಿಯಿದೆ, ಪೋಲಾರ್ಡ್ ಅವರು ಶ್ರೇಷ್ಠ ಮಾನವೀಯತೆ ಹೊಂದಿರುವ ಅದ್ಭುತ ಆಟಗಾರ ಮತ್ತು ಅವರೇ ಹೇಳುವಂತೆ ಒಬ್ಬ ಒಳ್ಳೆಯ ವ್ಯಕ್ತಿಯನ್ನು ನೀವು ಎಂದಿಗೂ ಕಡೆಗಣಿಸಲು ಸಾಧ್ಯವಿಲ್ಲ" ಎಂದು ಮನಸಾರೆ ಮೆಚ್ಚುಗೆ ವ್ಯಕ್ತಪಡಿಸಿದರು.