ಓಲ್ಡ್ ಮಂಕ್, ಆಂಟಿಕ್ವಿಟಿ ಬ್ಲೂ, ರಾಯಲ್ ಚಾಲೆಂಜ್‌ಗೆ ಸಂಕಷ್ಟ?ಕೃತಕ ಬಣ್ಣ, ಫ್ಲೇವರ್ ಬಳಕೆ ಆರೋಪ; FSSAI ಖಡಕ್ ನೋಟಿಸ್! FSSAI Notice to Liquor Brands

ನವದೆಹಲಿ: ಮದ್ಯದಲ್ಲಿ ಕೃತಕ ಬಣ್ಣ ಹಾಗೂ ಕೃತಕ ಫ್ಲೇವರ್​ ​ಗಳನ್ನು ಬಳಸುತ್ತಿರುವ ಆರೋಪದಲ್ಲಿ ಭಾರತದ ಪ್ರಖ್ಯಾತ ಮದ್ಯ ತಯಾರಿಕಾ ಕಂಪನಿಗಳಿಗೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI Notice to Liquor Brands) ನೋಟಿಸ್​ ನೀಡಿದ್ದು, ಈ ಅಕ್ರಮ ಹೀಗೆ ಮುಂದುವರಿದರೆ ಮದ್ಯ ಮಾರಾಟಕ್ಕೆ ನಿಷೇಧ ಹೇರುವುದಾಗಿ ಎಚ್ಚರಿಸಿದೆ ಎಂದು ತಿಳಿದು ಬಂದಿದೆ.

ಭಾರತದಲ್ಲಿ ತಮ್ಮದೇ ಆದ ವಿಶಿಷ್ಟ ವಿಸ್ಕಿ ಹಾಗೂ ರಂ ಗಳನ್ನು ತಯಾರಿಸುತ್ತಿದ್ದ ಕಂಪನಿಗಳಾದ ಡಿಯಾಜಿಯೊ ಇಂಡಿಯಾ, ಇನ್‌ಬ್ರೂ ಬೆವರೇಜಸ್ ಮತ್ತು ಮೋಹನ್ ರಾಕಿ ಸ್ಪ್ರಿಂಗ್‌ವಾಟರ್​ಗೆ FSSAI ನೋಟಿಸ್​ ನೀಡಿದೆ ಎಂದು ತಿಳಿದು ಬಂದಿದೆ.

FSSAI ನೋಟಿಸ್​ ನೀಡಿರುವ ಕಂಪನಿಗಳು ತಾವು ತಯಾರಿಸುವ ಮದ್ಯದಲ್ಲಿ ಕೃತಕ ಫ್ಲೇವರ್​ಗಳನ್ನು ಬಳಕೆ ಮಾಡುತ್ತಿದ್ದು, ಇದು ಭಾರತದ ಆಹಾರ ಕಾನೂನಿನ ವಿರುದ್ಧವಾಗಿದೆ. ಹೀಗಾಗಿ ಈ ಕಂಪನಿಗಳಿಗೆ ನೋಟಿಸ್​ ನೀಡಲಾಗಿದ್ದು, ಈ ಕೆಲಸ ಮುಂದುವರಿದರೆ ಆ ಕಂಪನಿಗಳು ತಯಾರಿಸುವ ಮದ್ಯಗಳನ್ನು ಭಾರತದ ಮಾರುಕಟ್ಟೆಯಿಂದ ಹೊರದಬ್ಬಲಾಗುತ್ತದೆ ಎಂದು ಖಡಕ್​ ಎಚ್ಚರಿಕೆ ನೀಡಲಾಗಿದೆ.

FSSAI ನೀಡಿರುವ ಈ ನೋಟಿಸ್​ನಿಂದ ಭಾರತದಲ್ಲಿ ತನ್ನದೇ ಆದ ಗ್ರಾಹಕರನ್ನು ಹೊಂದಿರುವ ಓಲ್ಡ್​ ಮಂಕ್​ xxx ರಮ್​, ಆಂಟಿಕ್ವಿಟಿ ಬ್ಲೂ ವಿಸ್ಕಿ, ರಾಯಲ್ ಚಾಲೆಂಜ್ ವಿಸ್ಕಿ, ಹಾಗೂ ಬ್ಯಾಗ್‌ಪೈಪರ್ ಡಿಲಕ್ಸ್ ವಿಸ್ಕಿ ಮಾರಾಟಕ್ಕೆ ಈ ತೀರ್ಮಾನ ಕುತ್ತುತಂದಿದ್ದು, ಕಂಪನಿಗಳ ಆಟಾಟೋಪ ಹೀಗೆ ಮುಂದುವರಿದರೆ ಈ ಬ್ರಾಂಡ್​ಗಳ ಮಾರಾಟ ಭಾರತದಲ್ಲಿ ಸಂಪೂರ್ಣವಾಗಿ ನಿಲ್ಲಲಿದೆ ಎಂದು ಹೇಳಲಾಗುತ್ತಿದೆ.

FSSAI ನಿಂದ ನೋಟಿಸ್​ ಬರುತ್ತಿದ್ದಂರೆ ಮದ್ಯ ತಯಾರಕ ಕಂಪನಿಗಳಿಗೆ ಚಳಿಜ್ವರ ಬಂದತಾಗಿದ್ದು, ಕೂಡಲೇ ತಮ್ಮ ಕಂಪನಿ ವತಿಯಿಂದ ಕೆಲ ಅಧಿಕಾರಿಗಳನ್ನು FSSAI ಕಚೇರಿಗೆ ಕಳುಹಿಸಿ ಮಾತುಕತೆ ಮೂಲಕ ಈ ಸಂಗತಿಗೆ ಪರಿಹಾರವನ್ನು ಕಂಡುಕೊಳ್ಳಲು ಮುಂದಾಗಿದ್ದಾರೆಂದು ಹೇಳಲಾಗುತ್ತಿದೆ. ಆದರೆ ಮದ್ಯದಲ್ಲಿ ಹೀಗೆ ಕೃತಕ ಬಣ್ಣ ಹಾಗೂ ಫ್ಲೇವರ್​ಗಳ ಬಳಕೆ ಬಗ್ಗೆ FSSAI ಕಠಿಣ ನೀತಿಯನ್ನು ತಾಳಿದ್ದು, ಮುಂದೇನಾಗಲಿದೆ ಎನ್ನುವುದಕ್ಕೆ ಕಾಲವೇ ಉತ್ತರಿಸಬೇಕಿದೆ, (ಏಜನ್ಸೀಸ್​).