NEET ಅಲ್ಲ, AI ನಿಜವಾದ ಅಪಾಯ: ನಿಮ್ಮ ಪದವಿಗಳು 'ಕಾಗದದ ಹಾಳೆ'ಯಾಗಲಿವೆ; ಶಿಕ್ಷಣದಲ್ಲಿ ಕೃತಕ ಬುದ್ಧಿಮತ್ತೆ ಅನುಷ್ಠಾನ ಅತ್ಯಾವಶ್ಯಕ: ಆರ್​ಜಿವಿ! Ram Gopal Varma on AI in Education

ಮುಂಬೈ: ದೇಶದಾದ್ಯಂತ ನೀಟ್​ ಪರೀಕ್ಷೆ ಸೋರಿಕೆ, ಮರು ಪರೀಕ್ಷೆ, ಪ್ರತಿಭಟನೆ, ಸಚಿವರ ರಾಜೀನಾಮೆ ಇದರ ಚರ್ಚೆಗಳೇ ನಡೆಯುತ್ತಿರುವ ಸಂದರ್ಭದಲ್ಲಿ ಸಿನಿಮಾ ನಿರ್ದೇಶಕ ರಾಮ್​​ ಗೋಪಾಲ್​ ವರ್ಮಾ (Ram Gopal Varma on AI in Education) ಅವರು ನೀಡಿರುವ ಹೇಳಿಕೆಯೊಂದು ಈಗ ಸಕ್ಕತ್​ ವೈರಲ್​​ ಆಗುತ್ತಿದೆ.

ನೀಟ್​ ಪ್ರತಿಭಟನೆಗೆ ಸಂಬಂಧಿಸಿದಂತೆ ತಮ್ಮ ಎಕ್ಸ್​ ಖಾತೆಯಲ್ಲಿ ಬರೆದುಕೊಂಡಿರುವ ಆರ್​​​​ಜಿವಿ, ಶಿಕ್ಷಣ ವ್ಯವಸ್ಥೆಯಲ್ಲಿ ನೀಟ್​ ಸಮಸ್ಯೆಯಲ್ಲ, ಬದಲಿಗೆ ಕೃತಕ ಬುದ್ಧಿಮತ್ತೆ (AI) ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಿದೆ ಎಂದು ಹೇಳಿದ್ದಾರೆ.

ನೀಟ್​ ಪ್ರತಿಭಟನೆ ಕುರಿತು ಹೇಳಿರುವ ಆರ್​​ಜಿವಿ, ನೀಟ್​ ಪೇಪರ್​ ಸೋರಿಕೆಯಾಯಿತು, ಕೆಲ ವಿದ್ಯಾರ್ಥಿಗಳು ಪ್ರಾಣ ಕಳೆದುಕೊಂಡರು, ಸಚಿವರ ರಾಜೀನಾಮೆ ಕೊಟ್ಟರು. ಆದರೆ ಈ ಕೃತಕ ಬುದ್ಧಿಮತ್ತೆ, ಮುಂದಿನ ದಿನಗಳಲ್ಲಿ ಈಡೀ ಶಿಕ್ಷಣ ವ್ಯವಸ್ಥೆಯನ್ನೇ ಬದಲಿಸಲಿದೆ ಎಂದು ಹೇಳಿದ್ದಾರೆ.

ವಿದ್ಯಾರ್ಥಿಗಳಿಗೆ ಎಚ್ಚರಿಕೆ ನೀಡಿರುವ ರಾಮ್​ ಗೋಪಾಲ್​​ ವರ್ಮಾ, ವಿದ್ಯಾರ್ಥಿಗಳೇ ನಿಮ್ಮ ಹೋರಾಟ ಈಗ ಕೇವಲ ನೀಟ್​ಗಾಗಿ ಅಲ್ಲ, ಬದಲಾಗಿ ಕೃತಕ ಬುದ್ಧಿಮತ್ತೆಯನ್ನು ಕಲಿಯುವತ್ತ ಗಮನಹರಿಸಿ. ಇಲ್ಲದಿದ್ದರೆ ನೀವು ಮಾಡಬೇಕಾದ ಕೆಲಸವನ್ನು AI ಮಾಡುತ್ತದೆ ಎಂದಿದ್ದಾರೆ.

ಅದರಲ್ಲಿಯೂ ಈ ಎಂಬಿಎ, ಇಂಜಿನಿಯರಿಂಗ್​, ಮೆಡಿಕಲ್​, ಕಾನೂನು ಹಾಗೂ ಡಿಸೈನಿಂಗ್​ ವಿಭಾಗದಲ್ಲಿ ಪದವಿ ಪಡೆದವರು ಕಡ್ಡಾಯವಾಗಿ ಕೃತಕ ಬುದ್ಧಿಮತ್ತೆಯನ್ನು ಕಲಿಯಬೇಕು. ಇಲ್ಲದೆ ಹೋದರೆ ಇವರು ನಿರುದ್ಯೋಗಿಗಳಾಗುವ ಸಾಧ್ಯತೆ ಹೆಚ್ಚಿದೆ ಎಂದಿದ್ದಾರೆ.

ಆದ್ದರಿಂದ ನಮ್ಮ ಶಿಕ್ಷಣ ಇಲಾಖೆಯಲ್ಲಿ ಮೊದಲು AI ಕ್ರಾಂತಿ ಆಗಲೇಬೇಕು, ಇಲ್ಲದಿದ್ದರೆ ಮುಂದಿನ 5-10 ವರ್ಷಗಳಲ್ಲಿ ನಿರುದ್ಯೋಗಿಗಳ ಸಂಖ್ಯೆ ಇನ್ನಷ್ಟು ಹೆಚ್ಚಾಗಲಿದೆ. ಈಗಲೇ ಜಗತ್ತಿನ ಅತ್ಯುನ್ನತ ಕಂಪನಿ ಮಾಲೀಕರೆಲ್ಲಾ, ಕೆಳ ಹಂತದ ಕೆಲಸಗಳನ್ನು ಈಗ AI ಮಾಡಲಿದೆ ಎಂದು ಹೇಳಿದ್ದಾರೆ. ಹೀಗಾಗಿ ಕೃತಕ ಬುದ್ಧಿಮತ್ತೆ ಕಲಿಕೆ ಆದಷ್ಟು ಬೇಗ ಪ್ರಾರಂಭವಾಗಬೇಕು ಎಂದು ಒತ್ತಾಯಿಸಿದ್ದಾರೆ, (ಏಜನ್ಸೀಸ್​).