ಕಾಸ್ಟಿಂಗ್ ಕೌಚ್​ನಂತದ್ದೇನೂ ಇಲ್ಲ; ಯಾರಿಗಾದ್ರೂ ಕಹಿ ಅನುಭವ ಆಗಿದ್ರೆ, ಅದು ಅವರದೇ ತಪ್ಪು: ಚಿರಂಜೀವಿ ಹೇಳಿಕೆ ವೈರಲ್; ಆಕ್ರೋಶ | Chiranjeevi

ಹೈದರಾಬಾದ್: ತೆಲುಗು ಸಿನಿಮಾ ರಂಗದಲ್ಲಿ ಕಾಸ್ಟಿಂಗ್ ಕೌಚ್​ ಅಂತಹದ್ದೇನೂ ಇಲ್ಲ, ಯಾರಿಗಾದ್ರೂ ಕಹಿಯಾದಂತ ಘಟನೆಯ ಅನುಭವ ಆಗಿದ್ರೆ, ಅದು ಅವರದೇ ತಪ್ಪು ಎಂಬಂತಹ ಹೇಳಿಕೆ ನೀಡಿ ತೆಲುಗು ಸಿನಿಮಾ ರಂಗದ ಖ್ಯಾತ ನಟ ಮೆಗಾಸ್ಟಾರ್ ಚಿರಂಜೀವಿ ವಿವಾದಕ್ಕೆ ಸಿಲುಕಿಕೊಂಡಿದ್ದಾರೆ.

ಭಾನುವಾರ(ಜ. 25) ಹೈದರಾಬಾದ್​ನಲ್ಲಿ ನಡೆದ ಇತ್ತೀಚೆಗೆ ಬಿಡುಗಡೆಯಾದ ಮನಶಂಕರ ವರಪ್ರಸಾದ್ ಗಾರು ಸಿನಿಮಾದ ಸಕ್ಸಸ್​ ಮೀಟ್​ನಲ್ಲಿ ನೀಡಿದ ಅವರ ಹೇಳಿಕೆ ಸಾಮಾಜಿಕ ಜಾಲತಾಣ ಮತ್ತು ಹೊರಗೆ ಪರ ವಿರೋಧ ಚರ್ಚೆಯನ್ನು ಹುಟ್ಟು ಹಾಕಿದೆ. ಹಾಗೆಯೇ ಹಿರಿಯ ನಟನ ವಿರುದ್ಧ ಹಲವರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ತಾವೇ ನಟಿಸಿದ ಮನ ಶಂಕರ ವರಪ್ರಸಾದ್ ಗಾರು ಸಿನಿಮಾದ ಸಕ್ಸಸ್ ಬಗ್ಗೆ ಮಾತನಾಡುತ್ತಾ ಚಿರಂಜೀವಿ ಅವರು, ತೆಲುಗು ಸಿನಿಮಾ ಇಂಡಸ್ಟ್ರೀಯಲ್ಲಿ ಕಾಸ್ಟಿಂಗ್ ಕೌಚ್​ ಅನ್ನುವುದೇ ಇಲ್ಲ. ಅದು ನಿಮ್ಮ ನಡವಳಿಕೆಯನ್ನು ಅವಲಂಬಿಸಿರುತ್ತದೆ. ವಿಷಯಗಳು ಹೇಗೆ ಇರಬಹುದು ಎಂಬುದರ ಬಗ್ಗೆ ನಿಮಗೆ ಯಾವುದೇ ಅಭದ್ರತೆ ಇರಬಾರದು. ವೃತ್ತಿಪರರಾಗಿರಿ, ಮತ್ತು ಇತರರು ಸಹ ವೃತ್ತಿಪರರಾಗಿರುತ್ತಾರೆ ಎಂದು ಹೇಳಿದ್ದಾರೆ. 

ಮುಂದುವರೆದು, ಈ ಉದ್ಯಮ ಕನ್ನಡಿಯಿದ್ದಂತೆ, ನೀವು ಏನನ್ನು ನೀಡುತ್ತಿರೋ ಅದೇ ನಿಮಗೆ ಮರಳಿ ಸಿಗುತ್ತದೆ. ಆದ್ದರಿಂದ ಯಾರಾದ್ರೂ ಈ ಸಿನಿಮಾ ರಂಗ ಪ್ರವೇಶಿಸಲು ಬಯಸುತ್ತಿರೋ ದೃಢ ನಿಶ್ಚಯ, ಸಂಕಲ್ಪ ಹಾಗೂ ಕಠಿಣ ಪರಿಶ್ರಮದೊಂದಿಗೆ ಬನ್ನಿ. ಇಲ್ಲಿ ಹುಡುಗಿಯರು, ಹುಡುಗರು ಎಲ್ಲರೂ ಅಭಿವೃದ್ಧಿ ಹೊಂದುತ್ತಾರೆ. ಇದೊಂದು ಉತ್ತಮವಾದ ರಂಗ. ಯಾರಾದರೂ ಸಕ್ಸಸ್ ಆಗದಿದ್ದರೆ, ಅವರಿಗೆ ಕಹಿ ಅನುಭವ ಆಗಿದ್ದರೆ, ಅದು ನಿಮ್ಮದೇ ತಪ್ಪು ಎಂದು ನಾನು ಬಲವಾಗಿ ನಂಬುತ್ತೇನೆ. ನೀವು ಕಟ್ಟು ನಿಟ್ಟಾಗಿ, ಗಂಭೀರವಾಗಿದ್ದರೆ, ಯಾರೂ ನಿಮ್ಮನ್ನು ಬಳಸಿಕೊಳ್ಳಲು ಆಗಲ್ಲ ಎಂದಿದ್ದಾರೆ.

ಕಾಸ್ಟಿಂಗ್ ಕೌಚ್ ಬಗ್ಗೆ ಚಿರಂಜೀವಿ ನೀಡಿದ ಹೇಳಿಕೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ತೀವ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹಲವರು ಹಿರಿಯ ನಟನ ಹೇಳಿಕೆಗಳನ್ನು ಇದು ಸ್ತ್ರೀ ದ್ವೇಷ ಎಂದು ಖಂಡಿಸಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಗಾಯಕಿ ಚಿನ್ಮಯಿ ಶ್ರೀಪಾದ ದೊಡ್ಡ ಪೋಸ್ಟ್​ ಮೂಲಕ ನಟನ ವಿರುದ್ಧ ತೀವ್ರ ಕಿಡಿಕಾರಿದ್ದಾರೆ. ಪರೋಕ್ಷವಾಗಿ ನಟ ಚಿರಂಜೀವಿಯನ್ನು ಗೌರವಿಸುತ್ತಾ, ಇಂದು ಕಾಸ್ಟಿಂಗ್ ಕೌಚ್ ದೊಡ್ಡದಾಗಿ ಹರಡಿದೆ. ಮಹಿಳೆಯರು ಫುಲ್​ ಕಮ್ಮಿಟ್​ಮೆಂಟ್​ ನೀಡದಿದ್ದರೆ ಅವರಿಗೆ ಪಾತ್ರಗಳನ್ನು ನಿರಾಕರಿಸಲಾಗುತ್ತದೆ. ಅಸಲಿಗೆ ಈ ಪದದ ಅರ್ಥ ಸಿನಿ ಉದ್ಯಮದಲ್ಲಿ ಸಂಪೂರ್ಣವಾಗಿ ಬೇರೆಯೇ ಇದೆ. ನೀವು ಇಂಗ್ಲಿಷ್​ನಲ್ಲಿ ಶಿಕ್ಷಣ ಪಡೆದು ಬಂದಿದ್ದರೆ, ಕಮ್ಮಿಟ್​ಮೆಂಟ್​ ಎಂದರೆ ವೃತ್ತಿಪರತೆ ಎಂಬುದನ್ನು ಅರಿತಿದ್ದೀರಿ. ಕರ್ತವ್ಯದಲ್ಲಿ ಇದನ್ನು ತೋರುವುದು ಅಂತ ನೀವೇನಾದರೂ ಅಂದುಕೊಂಡಿದ್ದರೆ ಅದು ಅಕ್ಷರಶಃ ತಪ್ಪು ಎಂದಿದ್ದಾರೆ. 

ಸಿನಿಮಾ ಉದ್ಯಮದಲ್ಲಿ, ಈ ಪದಕ್ಕೆ ಸಂಪೂರ್ಣವಾಗಿ ವಿಭಿನ್ನ ಅರ್ಥವಿದೆ. ನಟಿಯರು ತಮ್ಮ ದೇಹವನ್ನು ತ್ಯಾಗ ಮಾಡದಿದ್ದರೆ, ಇಲ್ಲಿ ಯಾವುದೇ ಅವಕಾಶಗಳು ಸಿಗೋದಿಲ್ಲ. ಪುರುಷರು ಮಹಿಳೆಯರಿಂದ ಲೈಂಗಿಕ ಅನುಕೂಲಗಳನ್ನು ನಿರೀಕ್ಷಿಸುವುದು ಸಾಮಾನ್ಯ. ಚಿರಂಜೀವಿಯವರ ಪೀಳಿಗೆ ಬೇರೆಯಾಗಿತ್ತು, ಮತ್ತು ಆಗ ನಟರ ನಡುವೆ ಗೌರವಯುತ ಸಂಬಂಧಗಳಿದ್ದವು. ಆದರೆ, ಇಂದಿನ ಪರಿಸ್ಥಿತಿಗಳು ಆ ರೀತಿ ಇಲ್ಲ. ಬದಲಿಗೆ ಸಂಪೂರ್ಣವಾಗಿ ಹದಗೆಟ್ಟಿದೆ ಎಂದು ಚಿನ್ಮಯಿ ಹೇಳಿದ್ದಾರೆ.

ಇನ್ನೂ ಕನ್ನಡದ ನಟ ಚೇತನ್ ಅಹಿಂಸಾ, ಕಾಸ್ಟಿಂಗ್ ಕೌಚ್ ನಿರಾಕರಣೆ ಮತ್ತು ಬಲಿಪಶುಗಳ ಮೇಲೆ ಆರೋಪ ಹೊರಿಸುವುದು ಚಲನಚಿತ್ರೋದ್ಯಮದ ಉನ್ನತ ಮಟ್ಟದಲ್ಲಿ ಬೇರೂರಿರುವ ಆಳವಾದ, ವ್ಯವಸ್ಥಿತ ಸ್ತ್ರೀದ್ವೇಷವನ್ನು ಬಹಿರಂಗಪಡಿಸುತ್ತದೆ. ಪರದೆ ಮೇಲೆ ಉದಾತ್ತ ಪಾತ್ರ ಮಾಡುವುದರಿಂದ ಹೊರೆಗೆ ಪಿತೃಪ್ರಧಾನ, ಸವಲತ್ತು ಹಾಗೂ ಅಜ್ಞಾನದ ಚಿಂತನೆಯನ್ನು ಅಳಿಸಲಾಗಲ್ಲ. ತೆಲುಗು ಮತ್ತು ಕನ್ನಡ ಚಿತ್ರರಂಗದಲ್ಲಿ ಕೇರಳದ ಹೇಮಾ ಕಮಿಟಿ ರೀತಿಯ ತನಿಖೆ ಅಗತ್ಯವಿದೆ ಎಂದಿದ್ದಾರೆ.

ಹೀಗೆ ಸೆಲೆಬ್ರೆಟಿಗಳಲ್ಲದೇ ನೆಟ್ಟಿಗರು ಕೂಡ ಚಿರಂಜೀವಿಯ ಹೇಳಿಕೆಯನ್ನು ಟಾರ್ಗೆಟ್ ಮಾಡಿ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಇತ್ತೀಚೆಗೆ ಜ. 12ರಂದು ಬಿಡುಗಡೆಯಾದ ಮನಶಂಕರ ವರಪ್ರಸಾದ್ ಗಾರು ಸಿನಿಮಾ ಚಿರಂಜೀವಿ ನಟಿಸಿದ ಕೊನೆಯ ಸಿನಿಮಾ. ಚಿತ್ರದಲ್ಲಿ ನಯನತಾರಾ, ದಗ್ಗುಬಾಟಿ ವೆಂಕಟೇಶ್ ಅಭಿನಯಿಸಿದ್ದಾರೆ (ಏಜೆನ್ಸೀಸ್).