ಪಕ್ಷದ ಉಳಿವಿಗೆ ರಾಜಿಯಿಲ್ಲ; ನಿಮ್ಮ ಅಂತ್ಯ ನೋಡುವವರೆಗೂ ಬದುಕಿರುತ್ತೇನೆ: ಬಿಜೆಪಿ ವಿರುದ್ಧ ಮಮತಾ ಬ್ಯಾನರ್ಜಿ ವಾಗ್ದಾಳಿ | Mamata Banerjee

ಕೋಲ್ಕತ್ತಾ: ತೃಣಮೂಲ ಕಾಂಗ್ರೆಸ್​ ತೊರೆಯಲು ತಮ್ಮ ಸೋದರಳಿಯ ಅಭಿಷೇಕ್ ಬ್ಯಾನರ್ಜಿ ಅವರೇ ಕಾರಣ ಎಂಬ ಬಂಡಾಯ ನಾಯಕರ ಮಾತನ್ನು ಅಲ್ಲಗೆಳೆದಿರುವ ಪಕ್ಷದ ಮುಖ್ಯಸ್ಥೆ ಮತ್ತು ಮಾಜಿ ಸಿಎಂ ಮಮತಾ ಬ್ಯಾನರ್ಜಿ(Mamata Banerjee), ರಾಜಕೀಯ ಉಳಿವಿಗಾಗಿ ತಾವು ಅಥವಾ ತಮ್ಮ ಕುಟುಂಬ ಎಂದಿಗೂ ರಾಜಿ ಮಾಡಿಕೊಂಡಿಲ್ಲ. ನಿಮ್ಮ ಅಂತ್ಯ ನೋಡುವವೆರೆಗೂ ನಾನು ಬದುಕಿರುತ್ತೇನೆ ಎಂದು ಬಿಜೆಪಿ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.

ಟಿಎಂಸಿ ಬಂಡಾಯ ಬಣಕ್ಕೆ ಹಿರಿಯ ಶಾಸಕ ಮದನ್ ಮಿತ್ರಾ ಸೇರಿದ್ದು, ಅಭಿಷೇಕ್ ಬ್ಯಾನರ್ಜಿಯವರು ಪಕ್ಷದಿಂದ ಆರು ತಿಂಗಳು ದೂರ ಸರಿಯಬೇಕು ಎಂದು ಹೇಳಿದ್ದೆ. ಆದರೆ ಅವರು ಸರಿಯದ ಕಾರಣಕ್ಕೆ ತಾನೂ ಬಂಡಾಯ ಬಣಕ್ಕೆ ಸೇರಬೇಕಾಯಿತು ಎಂದು ಆರೋಪಿಸಿದ್ದರು.

ಬಳಿಕ ಫೇಸ್​ಬುಕ್ ಲೈವ್ ಮೂಲಕ ಮಾತನಾಡಿದ ಮಮತಾ ಬ್ಯಾನರ್ಜಿಯವರು, ತಮ್ಮ ಅಳಿಯನನ್ನು ಸಮರ್ಥಿಸಿಕೊಂಡಿದ್ದು, ಅಭಿಷೇಕ್ ಬ್ಯಾನರ್ಜಿ ಅವರನ್ನು ನೆಪವಾಗಿ ಪರಿವರ್ತಿಸಲಾಗಿದೆ. ಅವರ ನಾಯಕತ್ವ ಶೈಲಿಯೇ ದಂಗೆಗೆ ಕಾರಣವಾಯಿತು ಎಂಬ ಆರೋಪಗಳನ್ನು ತಿರಸ್ಕರಿಸಿದ್ದು, ಬದಲಿಗೆ ಅವರು ರಾಜಿ ಮಾಡಿಕೊಳ್ಳಲು ನಿರಾಕರಿಸಿದ್ದರಿಂದ ಅಭಷೇಕ್ ಪ್ರಮುಖವಾಗಿ ರಾಜಕೀಯ ದಾಳಿಗೆ ಗುರಿಯಾಗಿದ್ದಾರೆ ಎಂದಿದ್ದಾರೆ.

ಅಭಿಷೇಕ್ ವಿರುದ್ಧ ಮಿತ್ರಾ ಅವರ ಹೇಳಿಕೆಗೆ ತಿರುಗೇಟು ನೀಡಿದ ಅವರು, ಇಂದು ಪಕ್ಷ ಬಿಟ್ಟು ಹೊರಟುಹೋದ ವ್ಯಕ್ತಿ ಬಂಡಾಯ ಬಣಕ್ಕೆ ಸೇರುವ ಒಂದು ದಿನ ಮೊದಲು ಜಾರಿ ನಿರ್ದೇಶನಾಲಯ ಅವರ ಪತ್ನಿ ಮತ್ತು ಇಬ್ಬರು ಪುತ್ರರಿಗೆ ಸಮನ್ಸ್ ಜಾರಿ ಮಾಡಿದೆ ಎಂದು ನಮಗೆ ತಿಳಿಸಿದ್ದರು. ಆಗಲೇ ಅವನು ಶಿಬಿರಗಳನ್ನು ಬದಲಾಯಿಸುತ್ತಾನೆ ಎಂದು ನಮಗೆ ಅರ್ಥವಾಯಿತು. ಅವರ ನಿರ್ಧಾರಕ್ಕೂ ಅಭಿಷೇಕ್​ಗೂ ಸಂಬಂಧವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಇದೇ ವೇಳೆ ಆಡಳಿತರೂ ಬಿಜೆಪಿ ತಮ್ಮ ಸಾವನ್ನು ಬಯಸುತ್ತಿದೆ ಎಂದು ಆರೋಪಿಸಿದ ಅವರು, ಅವರು ನನಗೆ ಹೃದಯಾಘಾತವಾಗಬೇಕೆಂದು ಬಯಸಿದ್ದರು. ಆದರೆ ನಿಮ್ಮ ಅಂತ್ಯವನ್ನು ನೋಡುವವರೆಗೂ ನಾನು ಬದುಕುತ್ತೇನೆ. ಟಿಎಂಸಿಯನ್ನು ದುರ್ಬಲಗೊಳಿಸಲು ಮತ್ತು ಪಕ್ಷಾಂತರಗಳನ್ನು ರೂಪಿಸಲು ಕೇಂದ್ರ ಸಂಸ್ಥೆಗಳು ಮತ್ತು ಪೊಲೀಸರನ್ನು ಬಳಸಲಾಗುತ್ತಿದೆ ಎಂದು ಆಕ್ರೋಶ ಹೊರಹಾಕಿದ್ದಾರೆ.

ತನಿಖೆ ಎದುರಿಸುತ್ತಿರುವ ನಾಯಕರು ಅಪರಾಧ ಸಾಬೀತಾಗುವುದಕ್ಕಿಂತ ರಾಜಕೀಯ ಅನುಕೂಲಕ್ಕಾಗಿ ಪಕ್ಷಾಂತರವನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ. ಮತ್ತು ಬಿಜೆಪಿಯ ವಾಷಿಂಗ್ ಮಿಷನ್ ಅನ್ನು ಪ್ರವೇಶಿಸುತ್ತಿದ್ದಾರೆ. ಸೆಟ್ಟಿಂಗ್ ಕಂಪನಿಗೆ ಸೇರಿದ ಶಾಸಕರು ಮತ್ತು ಸಂಸದರು ಭಯದಿಂದ ಹಾಗೆ ಮಾಡಿದ್ದಾರೆ ಎಂದು ಹೇಳಿದ್ದಾರೆ.

ಇದೇ ಪಕ್ಷಾಂತರಿಗಳ ವಿರುದ್ದ ಕಿಡಿಕಾರಿದ ಅವರು, ದೇಶದ್ರೋಹಿಗಳ ಪರವಾಗಿ ನಾನು ಜನರ ಮುಂದೆ ಕ್ಷಮೆಯಾಚಿಸುತ್ತೇನೆ. ರಾಜಕೀಯ ಉಳಿವಿಗಾಗಿ ನಾನು ನನ್ನ ಆತ್ಮಸಾಕ್ಷಿಯನ್ನು ಮಾರಿಲ್ಲ. ನಾನು ರಾಜಿ ಮಾಡಿಕೊಂಡಿದ್ದರೆ, ನಾವು ಇಷ್ಟೊಂದು ಹಿಂಸೆಯನ್ನು ಎದುರಿಸುತ್ತಿರಲಿಲ್ಲ. ಪಕ್ಷದಿಂದ ಹೊರಹೋದವರು ಹೋಗಲಿ ನಾನು ಪಕ್ಷವನ್ನು ಮತ್ತೆ ಕಟ್ಟುತ್ತೇನೆ ಎಂದು ವಿಶ್ವಾಸವ್ಯಕ್ತಪಡಿಸಿದ್ದಾರೆ (ಏಜೆನ್ಸೀಸ್).