ಮದುವೆ ದಿನವೇ ಕಾರು ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡ ವಧು: ಆಸ್ಪತ್ರೆಯಲ್ಲೇ ತಾಳಿ ಕಟ್ಟಿದ ವರ! Car Accident

Car Accident : ನಿಜವಾದ ಪ್ರೀತಿ ಯಾವುದು ಗೊತ್ತಾ? ಎಂಥದ್ದೇ ಸನ್ನಿವೇಶ ಎದುರಾಗಲಿ ಒಬ್ಬರನ್ನೊಬ್ಬರು ಬಿಟ್ಟುಕೊಡದಿರುವುದೇ ನಿಜವಾದ ಪ್ರೀತಿ. ಸಾವಿನಲ್ಲೂ ಒಂದಾಗುವ ಜೋಡಿ ಅಥವಾ ದಂಪತಿಯನ್ನು ನೋಡಿದ್ದೇವೆ. ಅದೇ ರೀತಿ, ಕ್ಷುಲಕ ಕಾರಣಗಳಿಗೆ ಬೇರೆಯಾಗುವವರನ್ನು ಕಂಡಿದ್ದೇವೆ. ಆದರೆ, ಎಲ್ಲವೂ ಚೆನ್ನಾಗಿ ನಡೆದುಕೊಂಡು ಹೋಗುತ್ತಿರುವ ಸಮಯದಲ್ಲಿ ವಿಧಿಯ ಘೋರ ಆಟದಲ್ಲಿ ಅಪಘಾತ ಅಥವಾ ಗಂಭೀರ ಆರೋಗ್ಯ ಸಮಸ್ಯೆ ಎದುರಾದಾಗ ಪ್ರೀತಿಯನ್ನು ಬಿಟ್ಟುಕೊಡದಿರುವ ಮಂದಿ ಸಿಗುವುದು ತುಂಬಾನೇ ಅಪರೂಪ. ಇದೀಗ ಕೇರಳದಲ್ಲಿ ಅಂಥದ್ದೇ ಅಪರೂಪದ ಘಟನೆ ನಡೆದಿದೆ.

ಅವರಿಬ್ಬರದು ಪ್ರೇಮ ವಿವಾಹ. ಮದುವೆಗಾಗಿ ಸಕಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿತ್ತು. ಆದರೆ, ಅನಿರೀಕ್ಷಿತವಾಗಿ ಸಂಭವಿಸಿದ ಕಾರು ಅಪಘಾತ ಎಲ್ಲವನ್ನು ಹಾಳು ಮಾಡಿತು. ಆದರೆ, ಅವರಿಬ್ಬರ ಪ್ರೀತಿಯನ್ನು ಮಾತ್ರ ಕುಗ್ಗಿಸಲು ವಿಧಿಯಿಂದಲೂ ಸಾಧ್ಯವಾಗಲಿಲ್ಲ. ನಿಗದಿತ ಅಂದರೆ, ಮುಹೂರ್ತದ ಸಮಯದಲ್ಲೇ ವರನು, ತನ್ನ ನಿಶ್ಚಿತ ವಧುವನ್ನು ಆಸ್ಪತ್ರೆಯಲ್ಲಿ ಎಲ್ಲರ ಮುಂದೆಯೇ ತನ್ನ ಜೀವನ ಸಂಗಾತಿಯನ್ನಾಗಿ ಮಾಡಿಕೊಂಡನು. ಗಂಭೀರ ಗಾಯದ ನಡುವೆಯೂ ಶರೋನ್ ಮತ್ತು ಅವನಿ ಕೈ ಹಿಡಿದು ಹೊಸ ಜೀವನವನ್ನು ಆರಂಭಿಸಿದರು.

ಇಂದು ಮಧ್ಯಾಹ್ನ 12.12 ರಿಂದ 12.25 ರ ನಡುವೆ ಆಲಪ್ಪುಳದ ಶಕ್ತಿ ಆಡಿಟೋರಿಯಂನಲ್ಲಿ ಈ ಜೋಡಿಯ ವಿವಾಹ ನಡೆಯಬೇಕಿತ್ತು. ಆದರೆ, ತನ್ನೀರ್ಮುಕ್ಕಂನಲ್ಲಿ ಬ್ಯೂಟಿ ಪಾರ್ಲರ್​ಗೆ ಭೇಟಿ ನೀಡಿ ಮದುವೆ ಮಂಟಪಕ್ಕೆ ಹಿಂತಿರುಗುವಾಗ ಅವನಿ ಅವರ ಕಾರು ಅಪಘಾತಕ್ಕೀಡಾಯಿತು. ಈ ವೇಳೆ ಗಂಭೀರವಾಗಿ ಗಾಯಗೊಂಡ ಅವನಿಯನ್ನು ಕೊಟ್ಟಾಯಂ ವೈದ್ಯಕೀಯ ಕಾಲೇಜಿಗೆ ದಾಖಲಿಸಲಾಯಿತು. ಇದಾದ ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಕೊಚ್ಚಿಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಯಿತು.

ಅದೃಷ್ಟವಶಾತ್​ ಅವನಿಗೆ ಯಾವುದೇ ಗಂಭೀರ ಆರೋಗ್ಯ ಸಮಸ್ಯೆಗಳು ಕಾಣಸಿಕೊಂಡಿಲ್ಲ ಎಂದು ವೈದ್ಯರು ತಿಳಿಸಿದರು. ಇದರಿಂದ ನಿಟ್ಟುಸಿರು ಬಿಟ್ಟ ಕುಟುಂಬ, ಆಸ್ಪತ್ರೆಯಲ್ಲಿ ವಿವಾಹ ಸಮಾರಂಭವನ್ನು ಸರಳವಾಗಿ ನಡೆಸಲು ನಿರ್ಧರಿಸಿತು. ಇತ್ತ ಇಬ್ಬರೂ ನಿಗದಿತ ಸಮಯದಲ್ಲೇ ಆಸ್ಪತ್ರೆಯಲ್ಲಿ ಮದುವೆಯಾದರು. ಅದೇ ಸಮಯದಲ್ಲಿ ಅತ್ತ ಆಡಿಟೋರಿಯಂನಲ್ಲಿ ವಿವಾಹ ಔತಣಕೂಟ ನಡೆಸಲಾಯಿತು.

ಅವನಿಯ ಬೆನ್ನುಮೂಳೆ ಮತ್ತು ಕಾಲಿನ ಮೂಳೆಗಳಿಗೆ ಗಾಯಗಳಾಗಿವೆ. ನಾಳೆ ಶಸ್ತ್ರಚಿಕಿತ್ಸೆ ನಡೆಯಲಿದೆ. ಅವನಿಯ ಜೊತೆಗಿದ್ದ ಮೂವರು ಸಹ ಗಾಯಗೊಂಡಿದ್ದಾರೆ. ಅದ್ಯ ಅವನಿ ಅವರು ಅವರು ಕೊಟ್ಟಾಯಂ ವೈದ್ಯಕೀಯ ಕಾಲೇಜಿನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ, (ಏಜೆನ್ಸೀಸ್​).