ಕಳೆದ ಜೂನ್ 29 ರಂದು ಮುಸ್ಕಾನ್ ಮತ್ತು ನೀಲೇಶ್ ಅವರ ವಿವಾಹ ನೆರವೇರಿತ್ತು. ರೈಲ್ವೆ ಜೂನಿಯರ್ ಎಂಜಿನಿಯರ್ ಪರೀಕ್ಷೆಗೆ ಸಿದ್ಧತೆ ನಡೆಸಲು ಮುಸ್ಕಾನ್ ಅಕ್ಟೋಬರ್ 10 ರಂದು ತವರು ಮನೆಗೆ ಬಂದಿದ್ದರು. ಆದರೆ, ಅಕ್ಟೋಬರ್ 23 ರಂದು ಪತಿ ನೀಲೇಶ್, ತಮ್ಮ ಮನೆಗೆ ಕರೆದೊಯ್ಯುವುದಾಗಿ ಹೇಳಿ ಮುಸ್ಕಾನ್ ಅವರನ್ನು ಕರೆದುಕೊಂಡು ಹೋಗಿದ್ದ. ಆದರೆ, ತಮ್ಮ ಮನೆಗೆ ಹೋಗುವ ಬದಲಿಗೆ ಝಾನ್ಸಿಯ ಸಿಪ್ರಿಯಲ್ಲಿರುವ ಹೋಟೆಲ್ ಒಂದರಲ್ಲಿ ಕೊಠಡಿ ಬುಕ್ ಮಾಡಿದ್ದ. ಮರುದಿನ ಬೆಳಗ್ಗೆ ಮುಸ್ಕಾನ್ ದೇಹಸ್ಥಿತಿ ಹದಗೆಟ್ಟಿದೆ ಎಂದು ನೀಲೇಶ್ ಆಕೆಯನ್ನು ಆಸ್ಪತ್ರೆಗೆ ಕರೆದೊಯ್ದಿದ್ದರೂ, ಆಸ್ಪತ್ರೆಗೆ ತಲುಪುವಷ್ಟರಲ್ಲೇ ಮುಸ್ಕಾನ್ ಕೊನೆಯುಸಿರೆಳೆದಿದ್ದರು ಎಂದು ವೈದ್ಯರು ಸ್ಪಷ್ಟಪಡಿಸಿದ್ದಾರೆ.
ಈ ನಡುವೆ ಹೋಟೆಲ್‌ನ ಕೊಠಡಿಯ ಮುಂಭಾಗದಲ್ಲಿದ್ದ ಸಿಸಿಟಿವಿ ದೃಶ್ಯಾವಳಿಗಳು ಲಭ್ಯವಾಗಿದ್ದು, ಅದರಲ್ಲಿ ಹಲವು ಅನುಮಾನಸ್ಪದ ದೃಶ್ಯಗಳು ಸೆರೆಯಾಗಿವೆ. ಹೋಟೆಲ್ ಸಿಬ್ಬಂದಿ ಹಾಗೂ ನೀಲೇಶ್ ಮುಂದೆ ನಡೆಯುತ್ತಿದ್ದರೆ, ಮುಸ್ಕಾನ್ ಅವರ ಹಿಂದೆ ನಡೆದುಕೊಂಡು ಹೋಗುತ್ತಿರುವುದು ಕಂಡುಬರುತ್ತದೆ. ಕೊಠಡಿಯ ಬಾಗಿಲ ಬಳಿ ತಲುಪಿದ ತಕ್ಷಣ, ಹೋಟೆಲ್ ಸಿಬ್ಬಂದಿ ಮತ್ತು ನೀಲೇಶ್ ಒಳಗಡೆ ಹೋಗುತ್ತಾರೆ. ಆದರೆ ಬಾಗಿಲ ಬಳಿ ಕ್ಷಣಕಾಲ ನಿಲ್ಲುವ ಮುಸ್ಕಾನ್, ದಿಢೀರನೆ ಹಿಂಭಾಗಕ್ಕೆ ಕುಸಿದುಬೀಳುತ್ತಾರೆ. ತಕ್ಷಣವೇ ನೀಲೇಶ್ ಆಕೆಯನ್ನು ಎತ್ತಿಕೊಂಡು ಕೊಠಡಿಯೊಳಗೆ ಕರೆದೊಯ್ಯುವುದು ವಿಡಿಯೋದಲ್ಲಿದೆ.
