ಎನ್‌ಸಿಪಿ ಒಡೆಯಲ್ಲ, ನಮ್ಮ ಸಂಸದರು ಒಗ್ಗಟ್ಟಾಗಿದ್ದಾರೆ: ಶಿವಸೇನಾ ಇಬ್ಬಾಗದ ಬೆನ್ನಲ್ಲೇ ಶರದ್ ಪವಾರ್ ಸ್ಪಷ್ಟನೆ! Sharad Pawar

ಉದ್ಧವ್ ಠಾಕ್ರೆ ಅವರ ಶಿವಸೇನಾ ಬಣದ ಸಂಸದರು ಉಲ್ಟಾ ಹೊಡೆದ ತಕ್ಷಣವೇ, ಎನ್‌ಸಿಪಿಯ ಕೆಲವು ಸಂಸದರು ಮತ್ತು ಶಾಸಕರು ಕೂಡ ಅಜಿತ್ ಪವಾರ್ ನೇತೃತ್ವದ ಆಡಳಿತಾರೂಢ ಎನ್‌ಸಿಪಿ ಬಣದೊಂದಿಗೆ ಸಂಪರ್ಕದಲ್ಲಿದ್ದಾರೆ ಎಂಬ ವದಂತಿಗಳು ಮುಂಬೈ ರಾಜಕೀಯ ವಲಯದಲ್ಲಿ ಜೋರಾಗಿ ಕೇಳಿಬರುತ್ತಿದ್ದವು. ಇದಕ್ಕೆ ಮಾಧ್ಯಮಗಳ ಮುಂದೆ ಪ್ರತಿಕ್ರಿಯಿಸಿದ ಪವಾರ್, ಶಿವಸೇನಾ ಯುಬಿಟಿ ಸಂಸದರು ಸೀಳಾಗಿರಬಹುದು, ಆದರೆ ನಮ್ಮ ಪಕ್ಷದಲ್ಲಿ ಅಂತಹ ಯಾವುದೇ ಇಬ್ಬಾಗ ಆಗುವುದಿಲ್ಲ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಮಹಾರಾಷ್ಟ್ರದಲ್ಲಿ ಕಳೆದ ಕೆಲವು ವಾರಗಳಿಂದ ಭಾರಿ ರಾಜಕೀಯ ಹೈಡ್ರಾಮಾ ನಡೆಯುತ್ತಿದ್ದು, ಉದ್ಧವ್ ಠಾಕ್ರೆ ನೇತೃತ್ವದ ಶಿವಸೇನಾ (ಯುಬಿಟಿ) ಪಕ್ಷದ 6 ಜನ ಲೋಕಸಭಾ ಸಂಸದರು ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ನೇತೃತ್ವದ ಮೂಲ ಶಿವಸೇನಾ ಪಕ್ಷಕ್ಕೆ ಅಧಿಕೃತವಾಗಿ ಸೇರ್ಪಡೆಯಾಗಿದ್ದಾರೆ. ಸಂಸದರಾದ ಸಂಜಯ್ ಹರಿಭಾವು ಜಾಧವ್, ಸಂಜಯ್ ದಿನಾ ಪಾಟೀಲ್, ಸಂಜಯ್ ಉತ್ತಮ್‌ರಾವ್ ದೇಶ್‌ಮುಖ್, ಭೌಸಾಹೇಬ್ ರಾಜಾರಾಮ್ ವಾಕ್‌ಚೌರೆ, ಓಂಪ್ರಕಾಶ್ ಭೂಪಾಲ್‌ಸಿಂಗ್ ನಿಂಬಾಳ್ಕರ್ ಮತ್ತು ನಾಗೇಶ್ ಬಾಪುರಾವ್ ಪಾಟೀಲ್ ಅಷ್ಟೀಕರ್ ಪಕ್ಷಾಂತರ ಮಾಡಿದ ಪ್ರಮುಖರಾಗಿದ್ದಾರೆ.

ಇನ್ನೊಂದೆಡೆ, ಜೂನ್ 22 ರಂದು ನಡೆದ ಕಾರ್ಯಕ್ರಮದಲ್ಲಿ ಆರು ಜನ ಸಂಸದರನ್ನು ಪಕ್ಷಕ್ಕೆ ಬರಮಾಡಿಕೊಂಡ ಮಹಾರಾಷ್ಟ್ರ ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ, ನಾನು ಯಾವುದೇ ಕೆಲಸವನ್ನು ಅರ್ಧಕ್ಕೆ ಬಿಡುವುದಿಲ್ಲ, ನಮ್ಮ ಆಪರೇಷನ್ ಟೈಗರ್ ಸಂಪೂರ್ಣ ಯಶಸ್ವಿಯಾಗಿದೆ ಎಂದು ಬೀಗಿದ್ದಾರೆ.

ಇವರೆಲ್ಲರೂ ವೈಯಕ್ತಿಕ ಲಾಭಕ್ಕಾಗಿ ಬಂದಿಲ್ಲ, ತಮ್ಮ ಕ್ಷೇತ್ರಗಳ ಅಭಿವೃದ್ಧಿಗಾಗಿ ಅಸಲಿ ಶಿವಸೇನೆಗೆ ಸೇರಿದ್ದಾರೆ. 2022 ರಲ್ಲಿ ನಾವು 40 ಜನ ಶಾಸಕರು ಸೇರಿ ಬಾಳಾಸಾಹೇಬ್ ಠಾಕ್ರೆ ಅವರ ಸಿದ್ಧಾಂತವನ್ನು ಉಳಿಸಲು ಬಂಡಾಯವೆದ್ದಿದ್ದೆವು. ಈಗ ನಡೆದಿರುವುದು ಅದೇ ಚಳವಳಿಯ ಎರಡನೇ ಹಂತ ಎಂದು ಶಿಂಧೆ ಪ್ರತಿಪಾದಿಸಿದ್ದಾರೆ. ಸದ್ಯ ಶಿವಸೇನೆಯ ಈ ದೊಡ್ಡ ಸೀಳಿನ ಬೆನ್ನಲ್ಲೇ ಶರದ್ ಪವಾರ್ ತಮ್ಮ ಕೋಟೆಯನ್ನು ಕಾಯ್ದುಕೊಳ್ಳಲು ಕಸರತ್ತು ನಡೆಸುತ್ತಿದ್ದು, ಮಹಾರಾಷ್ಟ್ರ ರಾಜಕೀಯ ದಿನಕ್ಕೊಂದು ತಿರುವು ಪಡೆಯುತ್ತಿದೆ,(ಏಜೆನ್ಸೀಸ್).