ಬಿಹಾರದಲ್ಲಿ ಭರ್ಜರಿ ಕಳ್ಳಸಾಗಣೆ: ಫಸ್ಟ್ ಎಸಿ ಬೋಗಿಯಲ್ಲಿ 75 ಲೀಟರ್ ಮದ್ಯದೊಂದಿಗೆ ಯುವತಿ ಅರೆಸ್ಟ್! Bihar Liquor Seizure

ಬಿಹಾರ: ಬಿಹಾರದಲ್ಲಿ ಮದ್ಯಬಂದಿ ಜಾರಿಯಲ್ಲಿದ್ದರೂ ಕಳ್ಳಮಾರ್ಗದ ಮೂಲಕ ಮದ್ಯ ಸಾಗಿಸುವವರ ಲೀಲೆಗೆ ಕೊನೆಯೇ ಇಲ್ಲದಂತಾಗಿದೆ. ಅದೆಷ್ಟೇ ಕಟ್ಟುನಿಟ್ಟಿನ ಕ್ರಮ ಕೈಗೊಂಡರೂ ಕಳ್ಳಸಾಗಾಣಿಕೆ (Bihar Liquor Seizure) ದಾರರು ಹೊಸ ಹೊಸ ದಾರಿಗಳನ್ನು ಹುಡುಕಿಕೊಳ್ಳುತ್ತಲೇ ಇರುತ್ತಾರೆ.

ಸದ್ಯ ದೆಹಲಿಯಿಂದ ಬಿಹಾರಕ್ಕೆ ಐಷಾರಾಮಿ ಫಸ್ಟ್ ಎಸಿ ಬೋಗಿಯಲ್ಲಿ ಪ್ರಯಾಣಿಸುತ್ತಾ, ಬ್ಯಾಗ್‌ಗಳಲ್ಲಿ ಮದ್ಯ ಸಾಗಿಸುತ್ತಿದ್ದ ಯುವತಿಯೊಬ್ಬಳನ್ನು ಪೊಲೀಸರು ರೆಡ್ ಹ್ಯಾಂಡ್ ಆಗಿ ಬಂಧಿಸಿರುವ ರೋಚಕ ಘಟನೆ ಬೆಳಕಿಗೆ ಬಂದಿದೆ.

ನವದೆಹಲಿಯಿಂದ ಜಯನಗರದತ್ತ ಹೊರಟಿದ್ದ 'ಸ್ವಾತಂತ್ರ್ಯ ಸೇನಾನಿ ಎಕ್ಸ್‌ಪ್ರೆಸ್' ರೈಲಿನಲ್ಲಿ ಮದ್ಯ ಕಳ್ಳಸಾಗಣೆ ಆಗುತ್ತಿದೆ ಎಂಬ ಖಚಿತ ಸುಳಿವು ಆರ್‌ಪಿಎಫ್ (RPF), ಜಿಆರ್‌ಪಿ (GRP) ಮತ್ತು ಸಿಐಬಿ (CIB) ಜಂಟಿ ತಂಡಕ್ಕೆ ಸಿಕ್ಕಿದೆ. ಕೂಡಲೇ ಎಚ್ಚೆತ್ತ ಅಧಿಕಾರಿಗಳು ಸಮಸ್ತಿಪುರ ರೈಲು ನಿಲ್ದಾಣದಲ್ಲಿ ರೈಲು ನಿಲ್ಲುತ್ತಿದ್ದಂತೆ ತರಾತುರಿಯಲ್ಲಿ ತಾವಿದ್ದ ರೈಲಿನ ಫಸ್ಟ್ ಎಸಿ ಕೋಚ್ ಕಡೆಗೆ ದೌಡಾಯಿಸಿದ್ದಾರೆ.

ಹೀಗೆ ಎಸಿ ಕೋಚ್‌ನಲ್ಲಿ ಬಿಂದಾಸ್ ಆಗಿ ಮದ್ಯ ಸಾಗಿಸುತ್ತ ಸಿಕ್ಕಿಬಿದ್ದವಳನ್ನು ನೇಹಾ ಕುಮಾರಿ ಅಲಿಯಾಸ್ ನೇಹಾ ಝಾ ಎಂದು ಗುರುತಿಸಲಾಗಿದೆ. ಈಕೆ ದರ್ಭಾಂಗಕ್ಕೆ ಮದ್ಯವನ್ನು ಸಾಗಿಸುತ್ತಿದ್ದಳು ಎನ್ನಲಾಗಿದ್ದು, ಅಲ್ಲಿ ಇದನ್ನು ನಿರ್ದಿಷ್ಟ ವ್ಯಕ್ತಿಗಳಿಗೆ ತಲುಪಿಸಬೇಕಿತ್ತು ಎಂದು ಪೊಲೀಸರ ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ.

ಪೊಲೀಸರು ನೇಹಾಳ ಹಿನ್ನೆಲೆ ಕೆದಕಿದಾಗ ಅಚ್ಚರಿಯ ಸಂಗತಿಗಳು ಒಂದೊಂದಾಗಿ ಹೊರಬಂದಿವೆ. ನೇಹಾ ಮತ್ತು ಆಕೆಯ ಸಹೋದರಿಯರು ದರ್ಭಾಂಗದಲ್ಲಿ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದಾರೆ. ವಿಶೇಷವೆಂದರೆ, ಆಕೆಯ ಸಹೋದರಿಯೊಬ್ಬರು ಕೂಡ ಜಿಲ್ಲೆಯಲ್ಲಿ ಇದೇ ಮದ್ಯ ಸಾಗಣೆ ಅಥವಾ ಮಾರಾಟದ ಸಂಬಂಧಿತ ಪ್ರಕರಣವನ್ನು ಎದುರಿಸುತ್ತಿದ್ದಾರೆ ಎನ್ನಲಾಗಿದೆ.

ಅಲ್ಲದೆ, ನೇಹಾಳ ತಂದೆ ಪಂಕಜ್ ಕುಮಾರ್ ಝಾ ಕೃಷಿ ಕೆಲಸ ಮಾಡಿಕೊಂಡಿದ್ದು, ಇವರನ್ನು ಕೂಡ ಸುಮಾರು ಎರಡು ವರ್ಷಗಳ ಹಿಂದೆ ಮದ್ಯದ ಪ್ರಕರಣವೊಂದರಲ್ಲಿ ಪೊಲೀಸರು ಜೈಲಿಗೆ ಕಳುಹಿಸಿದ್ದರು. ಇನ್ನು ತಾಯಿ ಅಂಗನವಾಡಿ ಕಾರ್ಯಕರ್ತೆಯಾಗಿ ಕೆಲಸ ಮಾಡುತ್ತಿದ್ದಾರೆ. ಕುಟುಂಬದ ಹಿನ್ನೆಲೆಯಲ್ಲಿ ಮದ್ಯದ ಕಳಂಕವಿದ್ದರೂ, ನೇಹಾಳ ಮೇಲೆ ಈ ಹಿಂದೆ ಯಾವುದೇ ಕ್ರಿಮಿನಲ್ ಕೇಸ್ ಇರಲಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ, (ಏಜನ್ಸೀನ್​).