ಸೋತವನು ಗೆದ್ದ, ಗೆದ್ದವನು ಸೋತ; ಸುಪ್ರೀಂಕೋರ್ಟ್​ ವಿರುದ್ಧವೇ ಮದ್ರಾಸ್ ಹೈಕೋರ್ಟ್ ಅಸಮಾಧಾನ!: ಕಾರಣ ಏನು?: ದಾಖಲೆ ತಿದ್ದುಪಡಿಗೆ ಆದೇಶ | Madras High Court

ಚೆನ್ನೈ: ಚುನಾವಣೆ ಫಲಿತಾಂಶಗಳಿಗೆ ಸಂಬಂಧಿಸಿದ ಪ್ರಕರಣಗಳಲ್ಲಿ ಕೆಳ ನ್ಯಾಯಾಲಯ ನೀಡಿದ ತೀರ್ಪಿನ ವಿರುದ್ಧದ ಮೇಲ್ಮನವಿ ಸಲ್ಲಿಸಿದ ಅರ್ಜಿಗಳ ವಿಚಾರಣೆ ನಡೆಸದೆ ಮತ್ತು ತೀರ್ಪು ಅನ್ನು ನೀಡದೆ ಬಾಕಿ ಇರಿಸಿಕೊಂಡಿರುವ ಸುಪ್ರೀಂಕೋರ್ಟ್ ವಿರುದ್ಧ ಮದ್ರಾಸ್ ಹೈಕೋರ್ಟ್(Madras High Court) ಶುಕ್ರವಾರ(ಜೂ. 05) ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ.

2016ರ ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಎಐಎಡಿಎಂಕೆ ನಾಯಕ ಇನ್ಬದುರೈ ಅವರ ಗೆಲುವನ್ನು ಪ್ರಶ್ನಿಸಿ ಡಿಎಂಕೆ ನಾಯಕ ಅಪ್ಪಾವು ಸಲ್ಲಿಸಿದ ಪ್ರಕರಣದ ವಿಚಾರಣೆ ವೇಳೆ ಹೈಕೋರ್ಟ್​ ಅಸಮಾಧಾನ ವ್ಯಕ್ತಪಡಿಸಿದೆ.

ಇತ್ತೀಚೆಗೆ ಸ್ವತಃ ಸುಪ್ರೀಂಕೋರ್ಟ್ ಹೊರಡಿಸಿದ ಆರು ತಿಂಗಳೊಳಗೆ ಅಂತಹ ಪ್ರಕರಣಗಳಲ್ಲಿ ತೀರ್ಪು ನೀಡುವಂತೆ ಹೊರಡಿಸಿದ ಮಾರ್ಗಸೂಚಿಗಳನ್ನು ಉಲ್ಲೇಖಿಸಿರುವ ಹೈಕೋರ್ಟ್​, ಸುಪ್ರೀಂಕೋರ್ಟ್​​ ಅದನ್ನು ಪಾಲಿಸದಿದ್ದರೆ, ಅದು ದೇಶದಲ್ಲಿ ನಿರಂಕುಶಾಧಿಕಾರಕ್ಕೆ ಕಾರಣವಾಗುತ್ತದೆ ಎಂದು ಹೇಳಿದೆ.

2016ರ ಚುನಾವಣೆಯಲ್ಲಿ ರಾಧಾಪುರಂ ಕ್ಷೇತ್ರದಿಂದ ಇನ್ಬದುರೈ ಅಲ್ಪಮತಗಳಿಂದ ಗೆಲುವು ಸಾಧಿಸಿದ್ದರು. ಆದರೆ ಡಿಎಂಕೆಯ ಅಪ್ಪಾವು ಅವರು ಅಂಚೆ ಮತಪತ್ರಗಳ ಎಣಿಕೆಯಲ್ಲಿ ಅಕ್ರಮ ನಡೆದಿದೆ. ಎಂದು ಆರೋಪಿಸಿ ಮದ್ರಾಸ್ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದ್ದರು. ಮಧ್ಯಮ ಶಾಲಾ ಮುಖ್ಯೋಪಾಧ್ಯಾಯರು ದೃಢೀಕರಿಸಿದ ಅಂಚೆ ಮತಪತ್ರಗಳು ಅಮಾನ್ಯವಾಗಿವೆ ಎಂದು ಹೇಳುವುದು ನಿಯಮಗಳಿಗೆ ವಿರುದ್ಧವಾಗಿದೆ ಎಂದು ವಾದಿಸಿದ್ದರು.

ಅಪ್ಪಾವು ವಾದವನ್ನು ಒಪ್ಪಿಕೊಂಡಿದ್ದ ಹೈಕೋರ್ಟ್​, ಮಧ್ಯಮ ಶಾಲಾ ಮುಖ್ಯೋಪಾಧ್ಯಾಯರು ಸಹ ಗೆಜೆಟೆಡ್ ಅಧಿಕಾರಿಗಳು. ಅವರು ದೃಢೀಕರಿಸಿದ ಅಂಚೆ ಮತಪತ್ರಗಳು ಮಾನ್ಯವಾಗಿವೆ ಎಂದು ಆದೇಶ ನೀಡಿತ್ತು. ಮತ್ತು ಮೂರು ಇವಿಎಂಗಳಲ್ಲಿ ಮರು ಮತಎಣಿಕೆಗೆ ಆದೇಶ ನೀಡಿತ್ತು. ಮರು ಮತಎಣಿಕೆ ಫಲಿತಾಂಶ ಪ್ರಕಟವಾಗುವ ವೇಳೆ ಇನ್ಬುದುರೈ ಸುಪ್ರೀಂಕೋರ್ಟ್​ ಮೆಟ್ಟಿಲೇರಿದ್ದರು.

ಇನ್ಬುದುರೈ ಅರ್ಜಿಯನ್ನು ಒಪ್ಪಿದ ಸುಪ್ರೀಂ ಕೋರ್ಟ್ ಹೈಕೋರ್ಟ್ ತೀರ್ಪಿಗೆ ತಡೆ ನೀಡಿತು. ಮೇಲ್ಮನವಿಯ ಅಂತಿಮ ತೀರ್ಪು ಸುಮಾರು ಆರು ವರ್ಷಗಳ ಕಾಲ ಬಾಕಿಯಿರಿಸಿಕೊಂಡಿತ್ತು. ಇತ್ತೀಚೆಗೆ ಮೇ 21ರಂದು ಮೇಲ್ಮನವಿಯನ್ನು ಮತ್ತೆ ಆಲಿಸಿದ ಸುಪ್ರೀಂ ಕೋರ್ಟ್, ಹೈಕೋರ್ಟ್ ತೀರ್ಪಿನ ಮೇಲಿನ ತಡೆಯಾಜ್ಞೆಯನ್ನು ತೆಗೆದುಹಾಕಿತು. ಮತ್ತು 2016ರ ವಿಧಾನಸಭೆ ವಿಸರ್ಜನೆ ಉಲ್ಲೇಖಿಸಿ ಮೇಲ್ಮನವಿಯನ್ನು ಮುಕ್ತಾಯಗೊಳಿಸಿತು.

ಇಂದು ಮತ್ತೆ ಅದೇ ಅರ್ಜಿಯನ್ನು ವಿಚಾರಣೆ ನಡೆಸಿದ ಹೈಕೋರ್ಟ್, ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್‌ ತೋರಿದ ವಿಧಾನದ ಬಗ್ಗೆ ತೀವ್ರ ಅತೃಪ್ತಿ ವ್ಯಕ್ತಪಡಿಸಿತು. ಸುಪ್ರೀಂಕೋರ್ಟ್ ಇತ್ತೀಚೆಗೆ ನೀಡಿದ ಆರು ತಿಂಗಳೊಳಗೆ ಚುನಾವಣಾ ವಿವಾದಗಳನ್ನು ಪರಿಹರಿಸಲು ಸೂಚಿಸಿದ ಮಾರ್ಗಸೂಚಿಗಳನ್ನು ಉಲ್ಲೇಖಿಸಿ, ಜನತಾ ಪ್ರಾತಿನಿಧ್ಯ ಕಾಯ್ದೆಯ ಮನೋಭಾವವನ್ನು ಪಾಲಿಸದಿದ್ದರೆ ಪ್ರಜಾಪ್ರಭುತ್ವ ದುರ್ಬಲಗೊಳ್ಳುತ್ತದೆ ಎಂದು ಹೇಳಿದೆ.

ಮುಂದುವರೆದು, ಮತದಾನದ ಹಕ್ಕನ್ನು ಹೊಂದಿರುವ ಪ್ರತಿಯೊಬ್ಬರ ಮನೋಭಾವಕ್ಕೆ ಹಾನಿಯಾಗುತ್ತದೆ. ಸಂವಿಧಾನದ ರಕ್ಷಕನಾಗಿರುವ ನ್ಯಾಯಾಂಗವು ಸರ್ಕಾರದ ಇತರ ಶಾಖೆಗಳೊಂದಿಗೆ ಸಮನ್ವಯ ಸಾಧಿಸಬೇಕು ಮತ್ತು ಅತಿದೊಡ್ಡ ಪ್ರಜಾಪ್ರಭುತ್ವವಾಗಿ ಭಾರತದ ಘನತೆಯನ್ನು ರಕ್ಷಿಸಬೇಕು ಎಂದು ಬಲವಾದ ಕಮೆಂಟ್ ಮಾಡಿದೆ.

ಇದೇ ವೇಳೆ ಡಿಎಂಕೆ ಅಭ್ಯರ್ಥಿ ಅಪ್ಪಾವು ಅವರನ್ನು ವಿಜೇತ ಎಂದು ಘೋಷಿಸಿ, ಇನ್ಬದುರೈ ಅವರ ಚುನಾವಣೆ ಗೆಲುವನ್ನು ರದ್ದುಗೊಳಿಸಿತು. ಮತ್ತು ವಿಧಾನಸಭೆ ದಾಖಲೆಗಳಲ್ಲಿ ಎಲ್ಲೆಡೆ ಬದಲಾವಣೆಗಳನ್ನು ಮಾಡುವಂತೆ ವಿಧಾನಸಭೆ ಕಾರ್ಯದರ್ಶಿಗೆ ಆದೇಶ ನೀಡಿದೆ (ಏಜೆನ್ಸೀಸ್).