Madhya Pradesh SIR | ಮಧ್ಯಪ್ರದೇಶದ ಎಸ್​ಐಆರ್...42.74 ಲಕ್ಷ ಮತದಾರರ ಹೆಸರು ಡಿಲೀಟ್​..ಇಲ್ಲಿದೆ ಕ್ಷೇತ್ರವಾರು ಮಾಹಿತಿ

ಮಧ್ಯಪ್ರದೇಶದ 5,74,06,143 ಮತದಾರರಲ್ಲಿ 5,31,31,983 ಮತದಾರರು ಪರಿಶೀಲನಾ ನಮೂನೆಗಳನ್ನು ಸಲ್ಲಿಸಿದ್ದು, 42,74,160 ಮತದಾರರ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿದೆ ಎಂದು ಮಧ್ಯಪ್ರದೇಶದ ಮುಖ್ಯ ಚುನಾವಣಾ ಅಧಿಕಾರಿ ಸಂಜೀವ್ ಕುಮಾರ್ ಝಾ ತಿಳಿಸಿದ್ದಾರೆ.

ಗೋವಿಂದಪುರ ವಿಧಾನಸಭಾ ಕ್ಷೇತ್ರದಿಂದ 97,052, ನರೇಲಾ ವಿಧಾನಸಭಾ ಕ್ಷೇತ್ರದ 81,235, ಸೆಂಟ್ರಲ್ ವಿಧಾನಸಭಾ ಕ್ಷೇತ್ರದ 67,304, ಉತ್ತರ ವಿಧಾನಸಭಾ ಕ್ಷೇತ್ರದ 51,058, ನೈಋತ್ಯ ವಿಧಾನಸಭಾ ಕ್ಷೇತ್ರದ 63,432, ಹುಜೂರ್ ವಿಧಾನಸಭಾ ಕ್ಷೇತ್ರದ 65,891. ಬೈರಾಸಿಯಾ ವಿಧಾನಸಭಾ ಕ್ಷೇತ್ರದ 12,903 ಮತದಾರರ ಹೆಸರನ್ನು ತೆಗೆದುಹಾಕಲಾಗಿದೆ. ಆಕ್ಷೇಪಣೆಗಳನ್ನು ಮುಂಬರುವ ಜನವರಿ 22 ರವರೆಗೆ ಸಲ್ಲಿಸಲು ಅವಕಾಶವಿದ್ದು, ಅಂತಿಮ ಪಟ್ಟಿಯನ್ನು ಫೆಬ್ರವರಿ 21 ರಂದು ಪ್ರಕಟಿಸಲಾಗುತ್ತದೆ.

ಮಧ್ಯಪ್ರದೇಶದದೊಂದಿಗೆ ಕೇರಳ, ಛತ್ತೀಸ್‌ಗಢ ಮತ್ತು ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಿಗೆ ಚುನಾವಣಾ ಆಯೋಗವು ಕರಡು ಮತದಾರರ ಪಟ್ಟಿಗಳನ್ನು ಪ್ರಕಟಿಸಲಿದೆ. ಛತ್ತೀಸ್‌ಗಢದಲ್ಲಿಯೂ ಈ ಸಂಖ್ಯೆ ದೊಡ್ಡಮಟ್ಟದಲ್ಲಿದೆ ಎನ್ನಲಾಗಿದ್ದು, ಈ ಹಿಂದೆ, ಚುನಾವಣಾ ಆಯೋಗವು ಪಶ್ಚಿಮ ಬಂಗಾಳ, ರಾಜಸ್ಥಾನ, ತಮಿಳುನಾಡು, ಗುಜರಾತ್, ಗೋವಾ, ಲಕ್ಷದ್ವೀಪ ಮತ್ತು ಪುದುಚೇರಿಯ ಕರಡು ಮತದಾರರ ಪಟ್ಟಿಗಳನ್ನು ಬಿಡುಗಡೆ ಮಾಡಿದೆ. ಈ ರಾಜ್ಯಗಳಲ್ಲಿ, ವಿವಿಧ ಕಾರಣಗಳಿಗಾಗಿ ಒಟ್ಟು 27 ದಶಲಕ್ಷಕ್ಕೂ ಹೆಚ್ಚು ಹೆಸರುಗಳನ್ನು ಕರಡು ಮತದಾರರ ಪಟ್ಟಿಯಿಂದ ತೆಗೆದುಹಾಕಲಾಗಿದೆ.

ಎಸ್​ಐಆರ್​ ಎನ್ನುವುದು ಮತದಾರರ ಪಟ್ಟಿಯನ್ನು ಪರಿಶೀಲಿಸುವ ಪ್ರಕ್ರಿಯೆಯಾಗಿದ್ದು, ಇದನ್ನು ಚುನಾವಣಾ ಆಯೋಗ ನಡೆಸುತ್ತದೆ. ಇದು ಪ್ರತಿ ಮನೆಗೆ ತೆರಳಿ ಎಣಿಕೆ, ಮೊದಲೇ ಭರ್ತಿ ಮಾಡಿದ ನಮೂನೆಗಳು, ಆನ್‌ಲೈನ್ ಸಲ್ಲಿಕೆಗಳು ಮತ್ತು ಹಳೆಯ ಮತದಾರರ ಡೇಟಾದ ಹೊಸ ಪರಿಶೀಲನೆಯನ್ನು ಒಳಗೊಂಡಿರುತ್ತದೆ. ಭಾರತ ಸಂವಿಧಾನದ 324 ನೇ ವಿಧಿಯ ಪ್ರಕಾರ ಚುನಾವಣಾ ಆಯೋಗವು ಸೂಕ್ತವೆಂದು ಭಾವಿಸಿದಾಗಲೆಲ್ಲಾ ಎಸ್ಐಆರ್​ ನಡೆಸುವ ಅಧಿಕಾರ ಹೊಂದಿದೆ(ಏಜೆನ್ಸೀಸ್​).