ಅವನು ನನ್ನ ಮಗನಿದ್ದಂತೆ, ತಪ್ಪು ಕ್ಷಮಿಸೋದು ತಂದೆಯ ಧರ್ಮ!...ಅಭಿಷೇಕ್ ವಿರುದ್ಧ ಗುಡುಗಿದ್ದ ಕಲ್ಯಾಣ್ ಯು-ಟರ್ನ್ | Kalyan Banerjee

ಕಳೆದ ಎರಡು ದಿನಗಳ ಹಿಂದೆ ಅಭಿಷೇಕ್ ಬ್ಯಾನರ್ಜಿ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದ ಕಲ್ಯಾಣ್ ಬ್ಯಾನರ್ಜಿ, ಅಭಿಷೇಕ್ ಒಬ್ಬ ಅಹಂಕಾರಿ ವ್ಯಕ್ತಿ ಮತ್ತು ಅವರಿಂದಲೇ ಇಂದು ಪಕ್ಷವು ನಾಶವಾಗಿದೆ ಎಂದು ಆರೋಪಿಸಿದ್ದರು. ಅಲ್ಲದೆ, ಮಾಜಿ ಸಿಎಂ ಮಮತಾ ಬ್ಯಾನರ್ಜಿ ಅವರಿಗೆ ಗಡುವು ನೀಡಿದ್ದ ಅವರು, ನಿಮಗೆ ನಾವು ಬೇಕೋ ಅಥವಾ ನಿಮ್ಮ ಸೋದರಳಿಯ ಅಭಿಷೇಕ್ ಬೇಕೋ ಎಂಬುದನ್ನು ನೀವೇ ನಿರ್ಧರಿಸಿ ಎಂದು ಅಂತಿಮ ಎಚ್ಚರಿಕೆ ನೀಡಿದ್ದರು. ದೀದಿ ಒಂದು ವೇಳೆ ತಮ್ಮ ಸೋದರಳಿಯನ ಪರವಾಗಿ ನಿಂತಿದ್ದೇ ಆದಲ್ಲಿ ತಾವು ಬೇರೆ ನಿರ್ಧಾರ ತೆಗೆದುಕೊಳ್ಳಬೇಕಾಗುತ್ತದೆ ಎಂದು ಹಿರಿಯ ಸಂಸದ ಎಚ್ಚರಿಕೆಯನ್ನು ಸಹ ನೀಡಿದ್ದರು.

ರಾಜ್ಯದಲ್ಲಿ ಪ್ರಜಾಪ್ರಭುತ್ವಕ್ಕೆ ಧಕ್ಕೆ ಉಂಟಾಗಿದೆ ಎಂದು ಕಿಡಿಕಾರಿರುವ ಕಲ್ಯಾಣ್ ಬ್ಯಾನರ್ಜಿ, ಪ್ರತಿಪಕ್ಷಗಳನ್ನೇ ಇಲ್ಲದಂತೆ ಇಂದಿನ ಸರ್ಕಾರ ಸೇಡಿನ ರಾಜಕಾರಣ ಮಾಡುತ್ತಿದೆ ಎಂದು ಆರೋಪಿಸಿದ್ದಾರೆ. ಇದೇ ವೇಳೆ, ಟಿಎಂಸಿ ಪಕ್ಷದ ಕೆಲವು ಅತೃಪ್ತ ಸಂಸದರು ಲೋಕಸಭೆ ಸ್ಪೀಕರ್ ಓಂ ಬಿರ್ಲಾ ಅವರನ್ನು ಭೇಟಿ ಮಾಡಲಿದ್ದಾರೆ ಎಂಬ ವರದಿಗಳ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಬಿಜೆಪಿಯ ಆಶ್ರಯ ಪಡೆಯಲು ಹವಣಿಸುತ್ತಿರುವವರಿಗೆ ಅಲ್ಲಿ ಸ್ಥಾನ ಸಿಗುವುದಿಲ್ಲ ಎಂದು ಎಚ್ಚರಿಕೆ ನೀಡುತ್ತಾ, ಟಿಎಂಸಿ ಪಕ್ಷವು ಕಾಂಗ್ರೆಸ್ ಜೊತೆ ವಿಲೀನವಾಗಲಿದೆ ಎಂಬ ವದಂತಿಗಳನ್ನು ತಳ್ಳಿಹಾಕಿದ್ದಾರೆ.

ಮಮತಾ ಬ್ಯಾನರ್ಜಿ ಅವರ ಸೋದರಳಿಯ ಹಾಗೂ ಸಂಸದ ಅಭಿಷೇಕ್ ಬ್ಯಾನರ್ಜಿ ಅವರ ಅಹಂಕಾರದ ನಡವಳಿಕೆಯಿಂದ ತೀವ್ರ ಬೇಸತ್ತಿರುವ ಕಲ್ಯಾಣ್ ಬ್ಯಾನರ್ಜಿ, ಕೋಲ್ಕತ್ತಾ ಸಹಿ ಫೋರ್ಜರಿ ಪ್ರಕರಣದಿಂದ ದಿಢೀರ್ ಎಂದು ಹಿಂದೆ ಸರಿದಿದ್ದಾರೆ. ಆನಂದಬಜಾರ್ ಪತ್ರಿಕೆಯ ವರದಿಯ ಪ್ರಕಾರ, ಬುಧವಾರ ಮಧ್ಯರಾತ್ರಿ 12:30ರ ಸುಮಾರಿಗೆ ನಡೆದ ಒಂದು ಘಟನೆ ಈ ಇಡೀ ಜಗಳಕ್ಕೆ ಕಿಡಿ ಹೊತ್ತಿಸಿದೆ. ಕಲ್ಯಾಣ್ ಬ್ಯಾನರ್ಜಿ ಅವರ ಮಗ ಪ್ರಭನ್ಯ ಬ್ಯಾನರ್ಜಿ ಅವರಿಗೆ ಅಭಿಷೇಕ್ ಬ್ಯಾನರ್ಜಿ ಅವರ ಆಪ್ತ ವಲಯದಿಂದ ಒಂದು ಫೋನ್ ಕರೆ ಬಂದಿತ್ತು. ಆ ಕರೆಯಲ್ಲಿ, ಕೋಲ್ಕತ್ತಾ ಸಹಿ ಫೋರ್ಜರಿ ಕೇಸ್‌ನ ಜವಾಬ್ದಾರಿಯನ್ನು ಹಿರಿಯ ವಕೀಲರ ಬದಲಿಗೆ ಜೂನಿಯರ್ ವಕೀಲ ಅಯನ್ ಭಟ್ಟಾಚಾರ್ಯ ಅವರಿಗೆ ವಹಿಸಲಾಗುತ್ತಿದೆ ಎಂದು ತಿಳಿಸಲಾಯಿತು.

ಕೇಸ್‌ನಿಂದ ಹೊರಬಂದ ಬೆನ್ನಲ್ಲೇ ಕಲ್ಯಾಣ್ ಬ್ಯಾನರ್ಜಿ ಅವರು ನೇರವಾಗಿ ದೀದಿಗೆ ಅಂತಿಮ ಎಚ್ಚರಿಕೆ ರವಾನಿಸಿದ್ದಾರೆ. ನನಗೆ ಸುದೀರ್ಘ ರಾಜಕೀಯ ಮತ್ತು ಕಾನೂನು ಅನುಭವವಿದೆ. ಇಂತಹ ಮರ್ಯಾದೆಯಿಲ್ಲದ, ಅಹಂಕಾರದ ವರ್ತನೆಯನ್ನು ನಾನು ಸಹಿಸುವುದಿಲ್ಲ. ಪಕ್ಷದಲ್ಲಿ ಅಭಿಷೇಕ್ ಇರಬೇಕು, ಇಲ್ಲವೇ ನಾವು ಇರಬೇಕು. ಆ ಡೈಮಂಡ್ ಹಾರ್ಬರ್ ಸಂಸದನಿಗೆ ರಾಜಕೀಯ ಆಟ ಮುಗಿದಿದೆ, ಆದರೂ ಅವನ ಅಹಂಕಾರ ಮಾತ್ರ ಆಕಾಶದಲ್ಲಿದೆ ಎಂದು ಕಲ್ಯಾಣ ಬ್ಯಾನರ್ಜಿ ಗುಡುಗಿದ್ದಾರೆ(ಏಜೆನ್ಸೀಸ್​).