ಹಿಜಾಬ್​​ಗಿಲ್ಲದ ನಿಷೇಧ ಬಿಂದಿಗ್ಯಾಕೆ?; ಪಿಯೂಷ್ ಬನ್ಸಾಲ್ ಸ್ಪಷ್ಟನೆ ಬಳಿಕವೂ Lenskart​ ಡ್ರೆಸ್​ಕೋಡ್​ ವಿರುದ್ಧ ನಿಲ್ಲದ ಆಕ್ರೋಶ

ಹೌದು, ಭಾರತದ ಪ್ರಮುಖ ಸಂಸ್ಥೆಯಾದ ಲೆನ್ಸ್‌ಕಾರ್ಟ್(Lenskart Dress Code)ತನ್ನ ಸಿಬ್ಬಂದಿಗಳ ಮೇಲೆ ಹೇರಿದ್ದ ವಿವಾದಾತ್ಮಕ ಡ್ರೆಸ್ ಕೋಡ್ ನಿಯಮಗಳ ವಿರುದ್ಧ ಸಾರ್ವಜನಿಕವಾಗಿ ಭಾರಿ ಆಕ್ರೋಶ ವ್ಯಕ್ತವಾದ ಬೆನ್ನಲ್ಲೇ ಹೊಸ ಪರಿಷ್ಕೃತ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ.

ಲೆನ್ಸ್​​ಕಾರ್ಟ್ ತನ್ನ ಸಂಸ್ಥೆಯ ಸಿಬ್ಬಂದಿಗಳಿಗೆ,​ ಹಿಂದೂ ಧರ್ಮದ ಸಂಕೇತಗಳಾದ ಬಿಂದಿ ಮತ್ತು ತಿಲಕವನ್ನು ನಿಷೇಧಿಸಿ, ಹಿಜಾಬ್‌ಗೆ ಮಾತ್ರ ಅವಕಾಶ ನೀಡಿತ್ತು. ಇದನ್ನು ಉಲ್ಲೇಖಿಸಿ ಶೆಫಾಲಿ ವೈದ್ಯ ಅವರು ಎಕ್ಸ್​ನಲ್ಲಿ ಪೋಸ್ಟ್ ಹಂಚಿಕೊಂಡಿದ್ದರು. ಇದು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ವಾಗ್ವಾದಕ್ಕೆ ಗುರಿಯಾಗಿತ್ತು. ಸಾಕಷ್ಟು ಜನರಿಂದ ಟೀಕಾ ಪ್ರಹಾರಗಳು ಕೇಳಿ ಬಂದ ನಂತರ, ಈ ನಿಯಮವನ್ನು ಪಿಯೂಷ್ ಬನ್ಸಾಲ್ ರದ್ದು ಪಡಿಸಿ ಕ್ಷಮೆ ಯಾಚಿಸಿದ್ದಾರೆ.

ಹೊಸ ಡ್ರೆಸ್​ ಕೋಡ್​ ಪದ್ಧತಿಯನ್ನು ಜಾರಿ ಮಾಡಿದ್ದೇವೆ. ಲೆನ್ಸ್​​ಕಾರ್ಟ್​​ ಭಾರತದಲ್ಲಿರುವ ಭಾರತೀಯರಿಗಾಗಿ ನಿರ್ಮಿಸಿದ ಸಂಸ್ಥೆ. ಇದು ನಮ್ಮ ಸಂಸ್ಕೃತಿ ಧಾರ್ಮಿಕ ಪದ್ಧತಿಗೆ ಗೌರವ ನೀಡುತ್ತದೆ. ಆ ಹಳೆಯ ಟಿಪ್ಪಣಿಯಲ್ಲಿದ್ದ ತಪ್ಪು ಭಾಷಾ ಪ್ರಯೋಗದ ಜವಾಬ್ದಾರಿಯನ್ನು ನಾನು ವೈಯಕ್ತಿಕವಾಗಿ ಹೊರುತ್ತೇನೆ. ಈ ತಪ್ಪಿನಿಂದಾಗಿ ನೋವಾಗಿದ್ದರೆ ಖಂಡಿತ ನಾನು ಕ್ಷಮೆಯಾಚಿಸುತ್ತೇನೆ ಎಂದು ಅವರು ಹೇಳಿದ್ದಾರೆ.

ಬಿಂದಿ ಮತ್ತು ತಿಲಕಕ್ಕೆ ಸಂಬಂಧಿಸಿದ ತಪ್ಪು ಮಾಹಿತಿಯನ್ನು ಫೆಬ್ರವರಿ ತಿಂಗಳಲ್ಲೇ ಗಮನಿಸಿ ತೆಗೆದುಹಾಕಲಾಗಿತ್ತು. ಏಪ್ರಿಲ್ 18 ರಿಂದ ಅನ್ವಯವಾಗುವಂತೆ ನೂತನ ಡ್ರೆಸ್​​ ಕೋಡ್​​ ಅನ್ನು ಬಿಡುಗಡೆ ಮಾಡಿದ್ದೇವೆ. ಬಿಂದಿ, ತಿಲಕ, ಸಿಂಧೂರ, ಮಂಗಳಸೂತ್ರ, ಧಾರ್ಮಿಕ ದಾರ ಎಲ್ಲವನ್ನು ಧರಿಸಬಹುದು. ಎಲ್ಲದಕ್ಕೂ ಮುಕ್ತ ಅವಕಾಶವಿದೆ ಎಂದು ಹೇಳಿಕೊಂಡಿದ್ದಾರೆ. ಹಿಜಾಬ್ ಮತ್ತು ಟರ್ಬನ್‌ಗಳನ್ನು ಮೊದಲಿನಂತೆಯೇ ಸಮವಸ್ತ್ರದ ಭಾಗವಾಗಿ ಧರಿಸಬಹುದು ಎಂದು ಸ್ಪಷ್ಟನೆ ಕೊಟ್ಟಿದ್ದಾರೆ.

ನೀವು ಕ್ಷಮೆಯಾಚಿಸಿ, ಡ್ರೆಸ್​ ಕೋಡ್​​ ಬದಲಿಸಿರುವುದು ಪ್ರಾಮಾಣಿಕತೆಯಿಂದ ಇದೆ ಎಂದು ತಿಳಿಯುತ್ತಿಲ್ಲ. ಕೇವಲ ಜನರ ಆಕ್ರೋಶಕ್ಕೆ ಹೆದರಿಕೊಂಡು ಹೊಸ ಡ್ರೆಸ್​ ಕೋಡ್ ಜಾರಿ ಮಾಡಲಾಗಿದೆ. ಇದು ನವ ಭಾರತ ಇಲ್ಲಿ ಯಾರೂ ತಮ್ಮ ಸಂಸ್ಕೃತಿ ಮತ್ತು ನಂಬಿಕೆಯನ್ನು ಪ್ರದರ್ಶಿಸುವುದನ್ನು ತಡೆಯಲು ಸಾಧ್ಯವಿಲ್ಲ ಎಂದು ನೆಟ್ಟಿಗರು ಕಾಮೆಂಟ್ ಮಾಡಿದ್ದಾರೆ. (ಏಜೆನ್ಸೀಸ್).