Gautam Gambhir | ಆಫ್ರಿಕಾ ವಿರುದ್ಧ ಸರಣಿ ಸೋಲು; ಕೋಚ್​ ಗಂಭೀರ್​ ಬದಲಾವಣೆಗೆ ಇದು ಸಕಾಲ ಎಂದ ಮಾಜಿ ಕ್ರಿಕೆಟಿಗ

ಭಾರತ ತಂಡ ತವರಿನಲ್ಲಿ ಸರಣಿ ಸೋತಿರುವುದು ಗಂಭೀರ್ ಭವಿಷ್ಯದ ಬಗ್ಗೆ ಅನುಮಾನಗಳನ್ನು ಹುಟ್ಟುಹಾಕಿದ್ದು, ಎರಡನೇ ಟೆಸ್ಟ್‌ ಪಂದ್ಯದಲ್ಲಿನ 408 ರನ್‌ಗಳ ಹೀನಾಯ ಸೋಲು ಕ್ರಿಕೆಟ್​ ಆಸಕ್ತರ ಆಕ್ರೋಶಕ್ಕೆ ಕಾರಣವಾಗಿದೆ. ಇದರ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಮಾಜಿ ಕ್ರಿಕೆಟಿಗ ಮನೋಜ್​ ತಿವಾರಿ ಫಲಿತಾಂಶದಲ್ಲಿ ಅಚ್ಚರಿ ಏನಿಲ್ಲ ಎಂದಿದ್ದಾರೆ.

ಸರಣಿ ಆರಂಭವಾಗುವ ಮೊದಲೇ ತಂಡದ ಪ್ರದರ್ಶನದ ಬಗ್ಗೆ ಸೂಚನೆ ಸಿಕ್ಕಿತ್ತು, ಇದೇ ಆಗುತ್ತದೆ ಎನ್ನುವುದು ಗೋಡೆಯ ಮೇಲೆ ಬರೆದಾಗಿತ್ತು, ತಂಡದ ವಿಷಯದಲ್ಲಿ ಯಾವುದೂ ಸರಿಯಾಗಿ ನಡೆಯುತ್ತಿಲ್ಲ ಎಂದು ನನಗೆ ತಿಳಿದಿತ್ತು. ಆಟಗಾರರನ್ನು ಪದೇ ಪದೇ ಬದಲಾಯಿಸುವುದರಿಂದ ಏನಾಗುತ್ತದೆ ಎಂದು ಸ್ಪಷ್ಟವಾಗಿತ್ತು. ಬಾರ್ಡರ್-ಗವಾಸ್ಕರ್ ಟ್ರೋಫಿ, ನ್ಯೂಜಿಲೆಂಡ್ ವಿರುದ್ಧದ ತವರಿನ ಸರಣಿ ಮತ್ತು ಈಗ ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿ ಸೋಲಿಗೆ ಆ ಪ್ರಯೋಗವೇ ಕಾರಣ ಎಂದು ಅಭಿಪ್ರಾಯಪಟ್ಟರು.

ಬಿಸಿಸಿಐ, ಗಂಭೀರ್ ಅವರನ್ನು ಕೋಚ್ ಸ್ಥಾನದಿಂದ ವಜಾಗೊಳಿಸಿ, ಭಾರತೀಯ ಟೆಸ್ಟ್ ಕ್ರಿಕೆಟ್ ಉಳಿಸಲು ಇದು ಸೂಕ್ತ ಸಮಯ ಎಂದಿರುವ ತಿವಾರಿ, ಟೆಸ್ಟ್​ ತಂಡಕ್ಕೆ ಪ್ರತ್ಯೇಕ ಇರಬೇಕೇ ಬೇಡವೇ ಎಂದು ನಿರ್ಧರಿಸಲು ಕಾಲ ಪಕ್ವವಾಗಿದೆ ಎಂದರು.

ಸೀಮಿತ ಓವರ್​ಗಳ ಕೋಚ್​ ಆಗಿ ಯಶಸ್ಸು ಪಡೆದಿರುವ ವ್ಯಕ್ತಿಯನ್ನು ಭಾರತ ಕ್ರಿಕೆಟ್​ ತಂಡದ ಮುಖ್ಯ ಕೋಚ್ ಆಗಿ ನೋಡುವುದು ನಮ್ಮ ದುರದೃಷ್ಟಕರ, ನಿಮಗೆ ತಳಮಟ್ಟದಲ್ಲಿ ಅನುಭವವಿಲ್ಲದಿದ್ದರೆ, ಉನ್ನತ ಮಟ್ಟದಲ್ಲಿ ಫಲಿತಾಂಶಗಳನ್ನು ನೀಡಲು ನೀವು ಹೇಗೆ ನಿರೀಕ್ಷಿಸುತ್ತೀರಿ? ಅದು ಅಸಾಧ್ಯದ ಮಾತು ಎಂದು ತಿವಾರಿ ಹೇಳಿದ್ದಾರೆ(ಏಜೆನ್ಸೀಸ್​).