ಸಿಜೆಪಿಗೆ 1 ಮಿಲಿಯನ್ ಡಾಲರ್ ನೆರವು ಘೋಷಿಸಿ ಸ್ವಾತಂತ್ರ್ಯ ದಿನ ಆಚರಿಸದಂತೆ ತಡೆಯಲು ಕರೆ ಕೊಟ್ಟ ಖಲಿಸ್ತಾನಿ ಉಗ್ರ! CJP

ನವದೆಹಲಿ: ವಿಪಕ್ಷಗಳು ಹಾಗೂ ವಿವಿಧ ಸಂಘಟನೆಗಳ ಬೆಂಬಲದ ಬೆನ್ನಲ್ಲೇ, ಈಗ 'ಕಾಕ್ರೋಚ್ ಜನತಾ ಪಾರ್ಟಿ'ಗೆ ( CJP ) ವಿದೇಶಿ ನೆಲದಿಂದ ವಿವಾದಾತ್ಮಕ ಬೆಂಬಲವೊಂದು ವ್ಯಕ್ತವಾಗಿರುವುದು ಭಾರಿ ಸಂಚಲನ ಮೂಡಿಸಿದೆ. ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರ್ಕಾರವನ್ನು ಅಧಿಕಾರದಿಂದ ಕೆಳಗಿಳಿಸುವ ಉದ್ದೇಶದಿಂದ, ಅಮೆರಿಕ ಮೂಲದ ಕುಖ್ಯಾತ ಖಲಿಸ್ತಾನಿ ಉಗ್ರ ಹಾಗೂ 'ಸಿಖ್ಸ್ ಫಾರ್ ಜಸ್ಟಿಸ್' (SFJ) ಸಂಘಟನೆಯ ನಾಯಕ ಗುರುಪತ್ವಂತ್​ ಸಿಂಗ್ ಪನ್ನುನ್​ ಸಿಜೆಪಿ ಪಕ್ಷಕ್ಕೆ ಬರೋಬ್ಬರಿ 1 ಮಿಲಿಯನ್ ಡಾಲರ್ ಧನಸಹಾಯ ನೀಡುವುದಾಗಿ ಜುಲೈ 22 ರಂದು ಸಾಮಾಜಿಕ ಜಾಲತಾಣದಲ್ಲಿ ಘೋಷಿಸಿದ್ದು, ದೇಶದ ರಾಜಕೀಯ ಅಖಾಡದಲ್ಲಿ ಹೊಸದೊಂದು ವಿವಾದದ ಬಿರುಗಾಳಿಯನ್ನೇ ಎಬ್ಬಿಸಿದೆ.

ಪ್ರತಿಭಟನಾನಿರತ ಸಿಜೆಪಿ ಕಾರ್ಯಕರ್ತರನ್ನು "ವಿದ್ಯಾರ್ಥಿಗಳು" ಎಂದು ಕರೆದಿರುವ ನಿಷೇಧಿತ 'ಸಿಖ್ಸ್ ಫಾರ್ ಜಸ್ಟಿಸ್' (SFJ) ಸಂಘಟನೆ, ಆಗಸ್ಟ್ 15ರ ಸ್ವಾತಂತ್ರ್ಯ ದಿನಾಚರಣೆಯಂದು ಪ್ರಧಾನಿ ನರೇಂದ್ರ ಮೋದಿ ಅವರ ಕಾರ್ಯಕ್ರಮವನ್ನು ತಡೆಯುವಂತೆ ಪ್ರಚೋದನೆ ನೀಡಿದೆ. ಪ್ರಧಾನಿ ಮೋದಿ ನೇತೃತ್ವದ ಬಿಜೆಪಿಯನ್ನು ಅಧಿಕಾರದಿಂದ ಕೆಳಗಿಳಿಸಲು ಸಿಜೆಪಿಗೆ 1 ಮಿಲಿಯನ್ ಡಾಲರ್ ಅನುದಾನ ಮೀಸಲಿಟ್ಟಿರುವುದಾಗಿ ತಿಳಿಸಿರುವ ಎಸ್​ಎಫ್​ಜೆ, ದೆಹಲಿಯ ಮೋದಿ ಸರ್ಕಾರದ ಪತನ ಅನಿವಾರ್ಯ ಎಂದು ಪ್ರತಿಪಾದಿಸುವ ಮೂಲಕ ಭಾರತದಲ್ಲಿ ಆಡಳಿತ ಬದಲಾವಣೆಗೆ ಬಹಿರಂಗವಾಗಿಯೇ ಕರೆ ನೀಡಿದೆ.

ಪ್ರತಿಭಟನಾನಿರತ ಯುವಕರಿಗೆ "ಭಾರತದ ವಿಸರ್ಜನೆ ಹಾಗೂ ವಿಘಟನೆ" ಒಂದೇ ಏಕೈಕ ಪರಿಹಾರ ಎಂದು ಎಸ್​ಎಫ್​ಜೆ ಪ್ರಚೋದನಾತ್ಮಕ ಹೇಳಿಕೆ ನೀಡಿದೆ. ಇನ್ನೂ ವೈರಲ್​ ಆಗಿರುವ ವಿಡಿಯೋದಲ್ಲಿ ಸಿಜೆಪಿ ವಿದ್ಯಾರ್ಥಿ ಚಳವಳಿಗೆ ಸಿಖ್ಸ್ ಫಾರ್ ಜಸ್ಟಿಸ್ 1 ಮಿಲಿಯನ್ ಡಾಲರ್ ನೀಡುವುದನ್ನು ಪುನರುಚ್ಚರಿಸಿರುವ ಉಗ್ರ ಪನ್ನುನ್​, ಅದಕ್ಕಾಗಿ ಕೆಲ ಕಠಿಣ ಷರತ್ತುಗಳನ್ನು ವಿಧಿಸಿದ್ದಾನೆ. ಸಿಜೆಪಿ ವಿದ್ಯಾರ್ಥಿಗಳು ಮೋದಿ ಸರ್ಕಾರದೊಂದಿಗೆ ಯಾವುದೇ ಸಂಧಾನ ನಡೆಸಬಾರದು, ಆಗಸ್ಟ್ 15ರವರೆಗೆ ಪ್ರತಿಭಟನೆಯನ್ನು ಮುಂದುವರಿಸಬೇಕು ಹಾಗೂ ಆಗಸ್ಟ್ 15 ಅನ್ನು ವಿದ್ಯಾರ್ಥಿಗಳಾಗಲಿ ಅಥವಾ ಸಿಖ್ಖರಾಗಲಿ ಸ್ವಾತಂತ್ರ್ಯ ದಿನವೆಂದು ಪರಿಗಣಿಸಬಾರದು ಎಂದು ಆತ ಉದ್ರೇಕಕಾರಿ ಕರೆ ನೀಡಿದ್ದಾನೆ. ಅಷ್ಟೇ ಅಲ್ಲದೆ, ಆಗಸ್ಟ್ 15 ರಂದು ದೆಹಲಿಯ ಕೆಂಪುಕೋಟೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ತಡೆದು, ಅವರು ಸ್ವಾತಂತ್ರ್ಯ ದಿನಾಚರಣೆಯ ನೇತೃತ್ವ ವಹಿಸದಂತೆ ತಡೆಯುವುದಾಗಿ ಆತ ಬಹಿರಂಗ ಬೆದರಿಕೆ ಒಡ್ಡಿದ್ದಾನೆ.

ಇದಲ್ಲದೆ, ಪಂಜಾಬ್ ಅನ್ನು ಭಾರತದ ಹಿಡಿತದಿಂದ ಮುಕ್ತಗೊಳಿಸಲು ಪ್ರತ್ಯೇಕ ಖಲಿಸ್ತಾನ್ ಜನಾಭಿಪ್ರಾಯ ಸಂಗ್ರಹಣೆ ನಡೆಸುವುದಾಗಿಯೂ ಪನ್ನನ್ ಬೆದರಿಕೆ ಹಾಕಿದ್ದಾನೆ. ಸಿಖ್ಖರನ್ನು "ಯುವಕರ ರಕ್ಷಕರು" ಎಂದು ಬಿಂಬಿಸಿರುವ ಆತ, ಸಿಜೆಪಿಗೆ ಸಿಖ್ಖರೇ ನೈಸರ್ಗಿಕ ಮಿತ್ರರು ಎಂದು ಹೇಳಿಕೊಂಡಿದ್ದಾನೆ. ಅಷ್ಟೇ ಅಲ್ಲದೆ, ಪ್ರಧಾನಿ ಮೋದಿ ನೇತೃತ್ವದ ಬಿಜೆಪಿಯನ್ನು ಅಧಿಕಾರದಿಂದ ಕೆಳಗಿಳಿಸಲು 'ಮೋದಿ ವಿರುದ್ಧ ಜನಾಭಿಪ್ರಾಯ ಸಂಗ್ರಹ' ಎಂದು ಘೋಷಿಸುವಂತೆ ಸಿಜೆಪಿ ವಿದ್ಯಾರ್ಥಿಗಳಿಗೆ ಆತ ಪ್ರಚೋದಿಸಿದ್ದಾನೆ.

ಎಸ್‌ಎಫ್‌ಜೆ ನೀಡಿದ ಈ ಹಣಕಾಸು ಹಾಗೂ ಸೈದ್ಧಾಂತಿಕ ಬೆಂಬಲದ ಕುರಿತು ಅಭಿಜೀತ್ ದೀಪ್ಕೆ ನೇತೃತ್ವದ 'ಕಾಕ್ರೋಚ್ ಜನತಾ ಪಾರ್ಟಿ' (CJP) ಇದುವರೆಗೆ ಯಾವುದೇ ಅಧಿಕೃತ ಸ್ಪಷ್ಟನೆ ನೀಡಿಲ್ಲ. ಆದರೆ, ವಿದ್ಯಾರ್ಥಿಗಳ ನೈಜ ಸಮಸ್ಯೆಯನ್ನು ಇಟ್ಟುಕೊಂಡು ಆರಂಭವಾದ ಈ ಚಳವಳಿಯನ್ನು ಬಳಸಿಕೊಂಡು, ವಿಪಕ್ಷಗಳು, ಜಾತಿ ಆಧಾರಿತ ಸಂಘಟನೆಗಳು, ರಾಜಕೀಯ ಗಲಭೆಕೋರರು ಹಾಗೂ ಈಗ ಖಲಿಸ್ತಾನಿ ಉಗ್ರರೂ ಸಹ ಅನುಕಂಪ ಮತ್ತು ಬೆಂಬಲ ತೋರಿಸಲು ಪ್ರಾರಂಭಿಸಿದ್ದಾರೆ.

ಎಸ್‌ಎಫ್‌ಜೆ ನೇರವಾಗಿ ಸಿಜೆಪಿ ನಾಯಕರೊಂದಿಗೆ ಝೂಮ್ ಸಭೆ ನಡೆಸಿದೆಯೇ ಎಂಬುದು ಸ್ಪಷ್ಟವಾಗಿಲ್ಲವಾದರೂ, ಭಾರತದಿಂದ ನಿಷೇಧಿಸಲ್ಪಟ್ಟಿರುವ ಉಗ್ರ ಸಂಘಟನೆಯೊಂದು ದೇಶ ಒಡೆಯುವ ಉದ್ದೇಶಕ್ಕೆ ಹಣಕಾಸಿನ ನೆರವು ನೀಡುವುದಾಗಿ ಘೋಷಿಸಿರುವುದು ಈಗ ತೀವ್ರ ತನಿಖೆಗೆ ಅರ್ಹವಾದ ರಾಷ್ಟ್ರೀಯ ಭದ್ರತಾ ವಿಷಯವಾಗಿ ಮಾರ್ಪಟ್ಟಿದೆ, (ಏಜೆನ್ಸೀಸ್​).