Indian Athletics: ಅಥ್ಲೆಟಿಕ್ಸ್‌ನಲ್ಲಿ ಹೊಸ ಅಧ್ಯಾಯ: ಕೇವಲ 1 ಗಂಟೆಯಲ್ಲಿ 3 ರಾಷ್ಟ್ರೀಯ ದಾಖಲೆ ಧೂಳೀಪಟ..!

ಹೌದು, ದಶಕಗಳಿಂದಲೂ ಭಾರತೀಯ ಅಥ್ಲೆಟಿಕ್ಸ್‌ಗೆ ಕನಸಾಗಿಯೇ ಉಳಿದಿದ್ದ ಮೂರು ಪ್ರಮುಖ ಮೈಲಿಗಲ್ಲುಗಳನ್ನು ನಮ್ಮ ಅಥ್ಲೀಟ್‌ಗಳು ಒಂದೇ ರಾತ್ರಿಯಲ್ಲಿ ತಲುಪುವ ಮೂಲಕ ದೇಶದ ಕ್ರೀಡಾ ರಂಗವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ದಿದ್ದಾರೆ. ಗುರಿಂದರ್ ಬೀರ್ ಸಿಂಗ್, ವಿಶಾಲ್ ಟಿಕೆ ಮತ್ತು ತೇಜಸ್ವಿನ್ ಶಂಕರ್ ಈ ಐತಿಹಾಸಿಕ ಸಾಧನೆ ಮಾಡಿದ ಕ್ರೀಡಾ ನಾಯಕರಾಗಿದ್ದಾರೆ.

ಇಡೀ ಕ್ರೀಡಾಂಗಣ ಅತ್ಯಂತ ರೋಮಾಂಚನಗೊಂಡಿದ್ದು ಪುರುಷರ 100 ಮೀಟರ್ ಓಟದ ಸ್ಪರ್ಧೆಯಲ್ಲಿ. ಪಂಜಾಬ್ ಮೂಲದ ವೇಗದ ಓಟಗಾರ ಗುರಿಂದರ್ ಬೀರ್ ಸಿಂಗ್ ಕೇವಲ 10.09 ಸೆಕೆಂಡುಗಳಲ್ಲಿ ಗುರಿ ತಲುಪಿ ಭಾರತದ ಅತಿ ವೇಗದ ಓಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಭಾರತದ ಅಥ್ಲೆಟಿಕ್ಸ್ ಇತಿಹಾಸದಲ್ಲೇ 10.10 ಸೆಕೆಂಡ್‌ಗಿಂತ ಕಡಿಮೆ ಅವಧಿಯಲ್ಲಿ 100 ಮೀಟರ್ ಓಡಿದ ಮೊದಲ ಭಾರತೀಯ ಎಂಬ ಇತಿಹಾಸವನ್ನು ಇವರು ಬರೆದರು.

ಕೇವಲ ಒಂದು ದಿನದ ಹಿಂದೆಯಷ್ಟೇ ಅನಿಮೇಶ್ ಕುಜೂರ್ ಅವರು 10.15 ಸೆಕೆಂಡುಗಳಲ್ಲಿ ಓಡಿ ರಾಷ್ಟ್ರೀಯ ದಾಖಲೆ ಬರೆದಿದ್ದರು. ಆದರೆ, ಫೈನಲ್ಸ್‌ನಲ್ಲಿ ಅನಿಮೇಶ್ ಅವರಿಗೆ ಕಠಿಣ ಪೈಪೋಟಿ ನೀಡಿದ ಗುರಿಂದರ್ ಬೀರ್, ಬಿರುಗಾಳಿಯಂತೆ ನುಗ್ಗಿ ಅನಿಮೇಶ್ ಅವರ ದಾಖಲೆಯನ್ನು ಧೂಳೀಪಟ ಮಾಡಿದರು. ಈ ಅದ್ಭುತ ಪ್ರದರ್ಶನದೊಂದಿಗೆ ಗುರಿಂದರ್ ಪ್ರಸಕ್ತ ಸೀಸನ್‌ನಲ್ಲಿ ಏಷ್ಯಾದಲ್ಲೇ ಎರಡನೇ ಅತ್ಯಂತ ವೇಗದ ಓಟಗಾರನಾಗಿ ಹೊರಹೊಮ್ಮಿದ್ದಾರೆ ಮತ್ತು 2026ರ ಕಾಮನ್‌ವೆಲ್ತ್ ಗೇಮ್ಸ್‌ಗೆ ತಮ್ಮ ಅರ್ಹತೆಯನ್ನು ಖಚಿತಪಡಿಸಿಕೊಂಡಿದ್ದಾರೆ. 2005 ರಿಂದ 2021 ರವರೆಗೆ ಭಾರತದ 100 ಮೀಟರ್ ರಾಷ್ಟ್ರೀಯ ದಾಖಲೆ ಕೇವಲ 0.04 ಸೆಕೆಂಡ್ (10.30 ಸೆಕೆಂಡ್‌ನಿಂದ 10.26 ಸೆಕೆಂಡ್‌ಗೆ) ಸುಧಾರಿಸಿತ್ತು. ಆದರೆ ಈಗ ಕೇವಲ ಕೆಲವೇ ವರ್ಷಗಳಲ್ಲಿ ಭಾರತದ ಸ್ಪ್ರಿಂಟಿಂಗ್ ವೇಗ 10.09 ಸೆಕೆಂಡ್‌ಗೆ ತಲುಪಿರುವುದು ಕ್ರೀಡಾ ಲೋಕವನ್ನು ಬೆರಗುಗೊಳಿಸಿದೆ.

ಮತ್ತೊಂದೆಡೆ, 400 ಮೀಟರ್ ಓಟದಲ್ಲಿ ವಿಶಾಲ್ ಟಿಕೆ ಅವರು ಮಾಡಿದ್ದು ಸಾಮಾನ್ಯ ಸಾಧನೆಯಲ್ಲ. ದಶಕಗಳಿಂದ ಭಾರತೀಯ ಅಥ್ಲೀಟ್‌ಗಳು 400 ಮೀಟರ್ ಓಟವನ್ನು 45 ಸೆಕೆಂಡ್‌ಗಿಂತ ಕಡಿಮೆ ಅವಧಿಯಲ್ಲಿ ಮುಗಿಸಲು ಪ್ರಯತ್ನಿಸುತ್ತಲೇ ಇದ್ದರು. ಆ ಕನಸು ರಾಂಚಿಯಲ್ಲಿ ಕೊನೆಗೂ ನನಸಾಗಿದೆ. ವಿಶಾಲ್ ಟಿಕೆ ಅವರು ಕೇವಲ 44.98 ಸೆಕೆಂಡುಗಳಲ್ಲಿ ಓಟವನ್ನು ಪೂರ್ಣಗೊಳಿಸಿ, 45 ಸೆಕೆಂಡ್‌ಗಳ ಗಡಿಯನ್ನು ದಾಟಿದ ಇತಿಹಾಸದ ಮೊದಲ ಭಾರತೀಯ ಎನಿಸಿಕೊಂಡರು.

ಕಳೆದ ವರ್ಷವಷ್ಟೇ 45.12 ಸೆಕೆಂಡುಗಳ ರಾಷ್ಟ್ರೀಯ ದಾಖಲೆ ನಿರ್ಮಿಸಿದ್ದ ವಿಶಾಲ್, ಈಗ ತಮ್ಮದೇ ದಾಖಲೆಯನ್ನು ಮತ್ತಷ್ಟು ಉತ್ತಮಪಡಿಸಿಕೊಂಡಿದ್ದಾರೆ. ಪ್ರಸ್ತುತ ಭಾರತದಲ್ಲಿ 400 ಮೀಟರ್ ಓಟದ ಸ್ಪರ್ಧೆ ಎಷ್ಟು ಬಲಿಷ್ಠವಾಗಿದೆ ಎಂದರೆ, ಈ ಕೂಟದಲ್ಲಿ ವಿಶಾಲ್ ಜೊತೆಗೆ ರಾಜೇಶ್ ರಮೇಶ್, ಜಯ್ ಕುಮಾರ್, ಮನು ಟಿಎಸ್ ಮತ್ತು ಧರಂವೀರ್ ಚೌಧರಿ ಸೇರಿದಂತೆ ಹಲವು ಭಾರತೀಯ ಅಥ್ಲೀಟ್‌ಗಳು 46 ಸೆಕೆಂಡ್‌ಗಿಂತ ಕಡಿಮೆ ಅವಧಿಯಲ್ಲಿ ಓಡಿ ತಮ್ಮ ಪ್ರತಿಭೆ ಪ್ರದರ್ಶಿಸಿದ್ದಾರೆ.

ಈ ಐತಿಹಾಸಿಕ ರಾತ್ರಿಯ ಮೂರನೇ ಮಹಾನ್ ಸಾಧನೆ ಬಂದಿದ್ದು ತೇಜಸ್ವಿನ್ ಶಂಕರ್ ಅವರಿಂದ. ಹೈಜಂಪ್ ಮತ್ತು ಡೆಕಾಥ್ಲನ್‌ನಲ್ಲಿ ಈಗಾಗಲೇ ರಾಷ್ಟ್ರೀಯ ದಾಖಲೆ ಹೊಂದಿರುವ ತೇಜಸ್ವಿನ್, ಕಠಿಣವಾದ 10 ಕ್ರೀಡೆಗಳನ್ನೊಳಗೊಂಡ ಡೆಕಾಥ್ಲನ್‌ನಲ್ಲಿ ಬರೋಬ್ಬರಿ 8,057 ಪಾಯಿಂಟ್‌ಗಳನ್ನು ಗಳಿಸುವ ಮೂಲಕ 8,000 ಪಾಯಿಂಟ್‌ಗಳ ಗಡಿ ದಾಟಿದ ಮೊದಲ ಭಾರತೀಯ ಎಂಬ ಕೀರ್ತಿಗೆ ಭಾಜನರಾಗಿದ್ದಾರೆ.

ತಮ್ಮ ಈ ಅದ್ಭುತ ಪ್ರದರ್ಶನದ ಹಾದಿಯಲ್ಲಿ ತೇಜಸ್ವಿನ್ ಅವರು 100 ಮೀಟರ್, ಲಾಂಗ್ ಜಂಪ್, 400 ಮೀಟರ್ ಮತ್ತು 1500 ಮೀಟರ್ ಓಟದಲ್ಲಿ ತಮ್ಮ ವೈಯಕ್ತಿಕ ಅತ್ಯುತ್ತಮ ಪ್ರದರ್ಶನ ನೀಡಿದ್ದಲ್ಲದೆ, ಹೈಜಂಪ್‌ನಲ್ಲಿ 2.25 ಮೀಟರ್ ಎತ್ತರ ಜಿಗಿದು ಎಲ್ಲರನ್ನೂ ಮೂಗಿನ ಮೇಲೆ ಬೆರಳಿಡುವಂತೆ ಮಾಡಿದರು. ಜಾಗತಿಕವಾಗಿ ಇಡೀ ವಿಶ್ವದ ಇತಿಹಾಸದಲ್ಲೇ ಕೇವಲ 350 ಡೆಕಾಥ್ಲಾನ್ ಕ್ರೀಡಾಪಟುಗಳು ಮಾತ್ರ 8000 ಪಾಯಿಂಟ್‌ಗಳ ಗಡಿ ದಾಟಿದ್ದಾರೆ. ಈಗ ತೇಜಸ್ವಿನ್ ಆ ಗಣ್ಯರ ಪಟ್ಟಿಗೆ ಸೇರಿದ್ದಾರೆ. ಅಷ್ಟೇ ಅಲ್ಲದೆ, ಈ ಸಾಧನೆ ಮಾಡಿದ ಏಷ್ಯಾದ 10ನೇ ಕ್ರೀಡಾಪಟು ಹಾಗೂ ಏಷ್ಯಾದ ಸಾರ್ವಕಾಲಿಕ ಪಟ್ಟಿಯಲ್ಲಿ 7ನೇ ಸ್ಥಾನಕ್ಕೆ ಅವರು ಏರಿದ್ದಾರೆ.

ಕೇವಲ ಒಂದೇ ಒಂದು ಗಂಟೆಯ ಅವಧಿಯಲ್ಲಿ ಭಾರತದ ಅಥ್ಲೆಟಿಕ್ಸ್ ಲೋಕ ಎಂದಿಗೂ ಮರೆಯದ ಮೂರು ದೊಡ್ಡ ಗೋಡೆಗಳು ಉರುಳಿಬಿದ್ದವು. ಈ ಮೂವರೂ ಕ್ರೀಡಾಪಟುಗಳು ಕೇವಲ ರಾಷ್ಟ್ರೀಯ ದಾಖಲೆಗಳನ್ನು ಬರೆಯಲಿಲ್ಲ, ಬದಲಿಗೆ ಭಾರತೀಯ ಕ್ರೀಡಾ ಇತಿಹಾಸದಲ್ಲಿ ತಲೆಮಾರುಗಳಿಂದ ಮುರಿಯಲಾಗದ ಬ್ಯಾರಿಯರ್‌ಗಳನ್ನು ಧ್ವಂಸಗೊಳಿಸಿದರು. ಹೀಗಾಗಿಯೇ ಮೇ 23, 2026ರ ಈ ದಿನವನ್ನು ಭಾರತೀಯ ಅಥ್ಲೆಟಿಕ್ಸ್ ಇತಿಹಾಸದ ಅತ್ಯಂತ ಶ್ರೇಷ್ಠ ದಿನ ಎಂದು ಕರೆಯಲಾಗುತ್ತಿದೆ. ಇದು ಕೇವಲ ಒಂದು ಕ್ರೀಡಾಕೂಟದ ಯಶಸ್ಸಲ್ಲ, ಬದಲಿಗೆ ಜಾಗತಿಕ ಮಟ್ಟದಲ್ಲಿ ಭಾರತೀಯ ಟ್ರ್ಯಾಕ್ ಆಂಡ್ ಫೀಲ್ಡ್‌ನ ಹೊಸ ಸುವರ್ಣ ಯುಗದ ಆರಂಭವಾಗಿದೆ,(ಏಜೆನ್ಸೀಸ್​).