Israel Security: ಇಸ್ರೇಲ್‌ನ ಮೊಸ್ಸಾದ್ ಮತ್ತು ಶೈನ್ ಬೆತ್ ಗುಪ್ತಚರ ಸಂಸ್ಥೆಗಳು ಜಗತ್ತಿನಲ್ಲೇ ಅತ್ಯಂತ ಚುರುಕಾದ ಸಂಸ್ಥೆಗಳೆಂದು ಹೆಸರು ಪಡೆದಿವೆ. ಆದರೆ, 2023ರ ಅಕ್ಟೋಬರ್ 7ರಂದು ಹಮಾಸ್ ನಡೆಸಿದ ಭೀಕರ ದಾಳಿಯ ಬಳಿಕ, ಈಗ ದುಬೈನಿಂದ ಇಸ್ರೇಲ್‌ನ ಟೆಲ್ ಅವೀವ್‌ಗೆ ಹೊರಟಿದ್ದ ಫ್ಲೈದುಬೈ ವಿಮಾನದ ಮೇಲಿನ ಸಂಚು ಇಸ್ರೇಲ್‌ನ ಭದ್ರತೆಯ ಬಗ್ಗೆ ದೊಡ್ಡ ಅನುಮಾನಗಳನ್ನು ಹುಟ್ಟುಹಾಕಿದೆ. ಇಸ್ರೇಲ್ ಜೊತೆ ಯಾವುದೇ ರಾಜತಾಂತ್ರಿಕ ಸಂಬಂಧವಿಲ್ಲದ ಒಮಾನ್ ದೇಶದ ಪೈಲಟ್ ಒಬ್ಬ, ಇಸ್ರೇಲ್ ಗಡಿಯೊಳಗೆ ಹಾರುತ್ತಿದ್ದ ವಿಮಾನದ ಕಾಕ್‌ಪಿಟ್‌ಗೆ ಹೇಗೆ ನುಸುಳಲು ಸಾಧ್ಯವಾಯಿತು ಎಂಬ ಪ್ರಶ್ನೆ ಈಗ ಎಲ್ಲೆಡೆ ಮೂಡಿದೆ.
ಸಾಮಾನ್ಯವಾಗಿ ಇಸ್ರೇಲ್ ಅನ್ನು ಗುರುತಿಸದ ಅಥವಾ ರಾಜತಾಂತ್ರಿಕ ಸಂಬಂಧವಿಲ್ಲದ ದೇಶಗಳ ಪೈಲಟ್‌ಗಳಿಗೆ ಇಸ್ರೇಲ್ ವಾಯುಪ್ರದೇಶದಲ್ಲಿ ವಿಮಾನ ಹಾರಿಸಲು ಅನುಮತಿಯಿಲ್ಲ. ಈ ಹಿನ್ನೆಲೆಯಲ್ಲಿ, ಭಾರತೀಯ ಮೂಲದ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಮೇಲೆ ಹಲ್ಲೆ ನಡೆಸಿ ವಿಮಾನವನ್ನು ಅಪಘಾತಗೊಳಿಸಲು ಯತ್ನಿಸಿದ ಒಮಾನ್ ಸಹ-ಪೈಲಟ್ ಹಮಾಮ್ ಅಲ್-ಹಮ್ಮಮಿ ಬೇರೆ ದೇಶದ ದ್ವಿತೀಯ ಪೌರತ್ವ (Dual Citizenship) ಹೊಂದಿರಬಹುದು ಎಂದು ಭಾವಿಸಲಾಗಿತ್ತು. ಆದರೆ ತನಿಖಾಧಿಕಾರಿಗಳು ಆತನಿಗೆ ಯಾವುದೇ ಇತರೆ ದೇಶದ ಪೌರತ್ವವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇದು ಈ ನೇಮಕಾತಿಯ ಬಗೆಗಿನ ಅನುಮಾನಗಳನ್ನು ಮತ್ತಷ್ಟು ಹೆಚ್ಚಿಸಿದೆ.
ಯುಎಇ ಅಬ್ರಹಾಂ ಒಪ್ಪಂದದಡಿ ಇಸ್ರೇಲ್ ಜೊತೆ ಉತ್ತಮ ಸಂಬಂಧ ಹೊಂದಿದ್ದರೂ, ಒಮಾನ್‌ಗೆ ಆ ಸಂಬಂಧವಿಲ್ಲ. ವರದಿಗಳ ಪ್ರಕಾರ, ಅಲ್-ಹಮ್ಮಮಿ ತೀವ್ರವಾದಿ ಒಲವು ಹೊಂದಿದ್ದ ಕಾರಣಕ್ಕೆ ಒಮಾನ್ ದೇಶದಲ್ಲಿ ಹಾರಾಟ ನಡೆಸುವುದರಿಂದ ಈ ಹಿಂದೆ ನಿಷೇಧಕ್ಕೊಳಗಾಗಿದ್ದನು. ಆದರೆ ಒಮಾನ್ ತನ್ನ ದೇಶದಲ್ಲಿದ್ದ ಈ ಭದ್ರತಾ ಆತಂಕದ ಬಗ್ಗೆ ಇತರ ದೇಶಗಳಿಗೆ ಅಥವಾ ವಿಮಾನಯಾನ ಸಂಸ್ಥೆಗಳಿಗೆ ಮಾಹಿತಿ ನೀಡಿತ್ತೇ ಎಂಬುದು ಇನ್ನು ಸ್ಪಷ್ಟವಾಗಿಲ್ಲ.
ಇದನ್ನೂ ಓದಿ:ಮಚ್ಚಾರ್ ತೋರಿಸಿದ ದೃಢಸಂಕಲ್ಪಕ್ಕೆ ಸಾಟಿ ಇಲ್ಲ!...ಫ್ಲೈದುಬೈ ಪೈಲಟ್ ಸಾಹಸವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ ವಾಯುಪಡೆ ಮುಖ್ಯಸ್ಥರು | IAF chief Amar Preet Singh
ಭದ್ರತೆಯ ಬಗ್ಗೆ ಇಸ್ರೇಲ್ ನಿರ್ಲಕ್ಷ್ಯ!
ಇಸ್ರೇಲ್ ಮಾಧ್ಯಮಗಳ ವರದಿಯ ಪ್ರಕಾರ, ಇತ್ತೀಚಿನ ವರ್ಷಗಳಲ್ಲಿ ಡಜನ್‌ಗಟ್ಟಲೆ ಒಮಾನ್ ಪೈಲಟ್‌ಗಳು ಫ್ಲೈದುಬೈ ವಿಮಾನಗಳ ಮೂಲಕ ಟೆಲ್ ಅವೀವ್‌ಗೆ ಹಾರಾಟ ನಡೆಸಿದ್ದಾರೆ. ಇಸ್ರೇಲ್ ಭದ್ರತಾ ಸಂಸ್ಥೆಗಳು ಈ ನಿಷೇಧವನ್ನು ಕಟ್ಟುನಿಟ್ಟಾಗಿ ಪಾಲಿಸುವ ಜವಾಬ್ದಾರಿಯನ್ನು ವಿದೇಶಿ ವಿಮಾನಯಾನ ಸಂಸ್ಥೆಗಳ ಮೇಲೆಯೇ ಸಂಪೂರ್ಣವಾಗಿ ವಹಿಸಿ ನಿರ್ಲಕ್ಷ್ಯ ವಹಿಸಿವೆ ಎಂಬ ಆರೋಪ ಕೇಳಿಬಂದಿದೆ. ಒಮಾನ್ ಪೈಲಟ್‌ಗಳ ಹಿನ್ನೆಲೆಯನ್ನು ಸ್ವತಂತ್ರವಾಗಿ ಪರಿಶೀಲಿಸುವ ಕೆಲಸವನ್ನು ಶೈನ್ ಬೆತ್ ಸಂಸ್ಥೆ ಮಾಡಿಲ್ಲ ಎಂಬ ಟೀಕೆಗಳು ವ್ಯಕ್ತವಾಗಿವೆ.
ಒಪ್ಪಂದದ ಉಲ್ಲಂಘನೆಯ ಗೊಂದಲ!
ಫ್ಲೈದುಬೈ ಜೊತೆ ಮಾಡಿಕೊಂಡಿರುವ ದ್ವೈಪಕ್ಷೀಯ ವಿಮಾನಯಾನ ಒಪ್ಪಂದವು ಇಸ್ರೇಲ್‌ನೊಂದಿಗೆ ರಾಜತಾಂತ್ರಿಕ ಸಂಬಂಧವಿರುವ ದೇಶಗಳ ಪೈಲಟ್‌ಗಳು ಮಾತ್ರ ವಿಮಾನ ಕಾರ್ಯಾಚರಣೆ ನಡೆಸಬೇಕು ಎಂದು ಸ್ಪಷ್ಟವಾಗಿ ಹೇಳುತ್ತದೆಯೇ ಎಂಬ ಬಗ್ಗೆ ಪರ-ವಿರೋಧ ವಾದಗಳಿವೆ. ಇಸ್ರೇಲ್ ಸಾರಿಗೆ ಸಚಿವಾಲಯದ ಮೂಲಗಳು ಇದು ಒಪ್ಪಂದದ ಸ್ಪಷ್ಟ ಉಲ್ಲಂಘನೆ ಎಂದು ಕರೆದಿವೆ. ಸಚಿವೆ ಮಿರಿ ರೆಗೆವ್ ಅವರು ಫ್ಲೈದುಬೈ ವಿಮಾನಗಳ ಸಂಚಾರವನ್ನು ಸ್ಥಗಿತಗೊಳಿಸುವಂತೆ ಮತ್ತು ಪರಿಶೀಲನೆ ನಡೆಸುವಂತೆ ಆದೇಶಿಸಿದ್ದಾರೆ. ಆದರೆ, ಒಪ್ಪಂದದಲ್ಲಿ ಇಂತಹ ಕಟ್ಟುನಿಟ್ಟಿನ ರಾಷ್ಟ್ರೀಯತಾ ನಿಯಮಗಳ ಉಲ್ಲೇಖವಿಲ್ಲ ಎಂದು ತನಿಖಾ ಮೂಲಗಳು ತಿಳಿಸಿರುವುದಾಗಿ ವರದಿಯಾಗಿದೆ.
ಘಟನೆಯ ಹಿನ್ನಲೆ!
ದುಬೈನಿಂದ 174 ಪ್ರಯಾಣಿಕರೊಂದಿಗೆ ತೆರಳುತ್ತಿದ್ದ FZ1073 ವಿಮಾನದಲ್ಲಿ, ಒಮಾನ್ ಸಹ-ಪೈಲಟ್ ಕಾಕ್‌ಪಿಟ್‌ನಲ್ಲಿ ಭಾರತೀಯ ಕ್ಯಾಪ್ಟನ್ ಸ್ಮಿತ್ ಮಚ್ಛರ್ ಅವರ ಮೇಲೆ ದಾಳಿ ನಡೆಸಿದನು. ತೀವ್ರ ಗಾಯಗೊಂಡಿದ್ದರೂ ಕ್ಯಾಪ್ಟನ್ ಮಚ್ಛರ್ ಬಾಗಿಲು ತೆಗೆದು ಪ್ರಯಾಣಿಕರ ಸಹಾಯದಿಂದ ದಾಳಿಕೋರನನ್ನು ನಿಯಂತ್ರಿಸಲು ಯಶಸ್ವಿಯಾದರು. ನಂತರ ವಿಮಾನವನ್ನು ಸೌದಿ ಅರೇಬಿಯಾದ ತಬುಕ್‌ನಲ್ಲಿ ಸುರಕ್ಷಿತವಾಗಿ ಭೂಸ್ಪರ್ಶ ಮಾಡಿಸಲಾಯಿತು. ಸೌದಿ ಅರೇಬಿಯಾ ತನ್ನ ತನಿಖೆ ಮುಗಿಸಿ ಒಮಾನ್ ಪೈಲಟ್ ಅನ್ನು ಯುಎಇಗೆ ಹಸ್ತಾಂತರಿಸಿದೆ.
ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಸೇರಿದಂತೆ ಇಸ್ರೇಲ್ ನಾಯಕರು ಪೈಲಟ್‌ಗಳ ಸ್ಕ್ರೀನಿಂಗ್ ಮತ್ತು ಭದ್ರತಾ ಪರಿಶೀಲನೆಯಲ್ಲಿ ದೊಡ್ಡ ಅಕ್ರಮ ಇರುವುದನ್ನು ಒಪ್ಪಿಕೊಂಡಿದ್ದಾರೆ. ಒಮಾನ್‌ನಲ್ಲಿ ನಿಷೇಧಕ್ಕೊಳಗಾದ, ಯಾವುದೇ ಎರಡನೇ ಪೌರತ್ವವಿಲ್ಲದ ವ್ಯಕ್ತಿಯೊಬ್ಬ ಇಸ್ರೇಲ್ ಗಡಿಗೆ ಹಾರುವ ವಿಮಾನದ ಕಾಕ್‌ಪಿಟ್‌ಗೆ ಹೇಗೆ ಪ್ರವೇಶ ಪಡೆದನು ಎಂಬುದು ಈಗ ಇಸ್ರೇಲ್ ಗುಪ್ತಚರ ಸಂಸ್ಥೆಗಳಿಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ(ಏಜೆನ್ಸೀಸ್).
