ಭಾರಿ ಹಿಮಪಾತ; ಟೇಕ್​ ಆಪ್ ಆಗುವ ವೇಳೆ ಖಾಸಗಿ ಜೆಟ್ ಪತನ; ಏಳು ಮಂದಿ ಸಾವು; ಓರ್ವನಿಗೆ ಗಾಯ | Private jet crash

ವಾಷಿಂಗ್ಟನ್​: ಅಮೆರಿಕಾದ ಮೈನೆ ರಾಜ್ಯದಲ್ಲಿ ಭಾರಿ ಹಿಮಪಾತದಿಂದ ಖಾಸಗಿ ಜೆಟ್​ವೊಂದು ಟೇಕ್ ಆಫ್ ಆಗುವ ವೇಳೆ ಪತನಗೊಂಡಿದ್ದು, ಕನಿಷ್ಠ ಏಳು ಮಂದಿ ಮೃತಪಟ್ಟಿದ್ದು, ಓರ್ವ ಸಿಬ್ಬಂದಿ ಗಾಯಗೊಂಡಿದ್ದಾರೆ ಎಂದು ಸೋಮವಾರ(ಜ. 26) ವರದಿಯಾಗಿದೆ.

ಮೈನೆ ರಾಜ್ಯದ ಬ್ಯಾಂಗೋರ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸಂಜೆ 7.45ರ ಸುಮಾರಿಗೆ ಈ ಘಟನೆ ನಡೆದಿದೆ. ಒಟ್ಟು ಎಂಟು ಜನರನ್ನು ಹೊತ್ತೊಯ್ಯುತ್ತಿದ್ದ ಬೊಂಬಾರ್ಡಿಯರ್ ಚಾಲೆಂಜರ್ 600 ಜೆಟ್​ ವಿಮಾನ ನಿಲ್ದಾಣದಿಂದ ಹೊರಡುವಾಗ ಪಲ್ಟಿಯಾಗಿ ಬೆಂಕಿ ಹೊತ್ತಿಕೊಂಡಿದೆ ಎನ್ನಲಾಗಿದೆ.

ಈ ಕುರಿತು ಮಾಹಿತಿ ನೀಡಿರುವ ಫೆಡರಲ್ ಏವಿಯೇಷನ್ ​​ಅಡ್ಮಿನಿಸ್ಟ್ರೇಷನ್(ಎಫ್‌ಎಎ), ಜೆಟ್ ಪತನವನ್ನು ದೃಢಪಡಿಸಿದ್ದು, ಸಾವುನೋವುಗಳನ್ನು ಖಚಿತ ಪಡಿಸಿದೆ. ಮತ್ತು ಗಾಯಗೊಂಡ ಸಿಬ್ಬಂದಿಯನ್ನು ತಕ್ಷಣ ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಲಾಯಿತು ಎಂದು ಹೇಳಿದೆ.

ಯುನೈಟೆಡ್ ಸ್ಟೇಟ್ಸ್‌ನ ದೊಡ್ಡ ಭಾಗಗಳಲ್ಲಿ ಚಳಿಗಾಲದ ಬೃಹತ್ ಬಿರುಗಾಳಿಗಳು ಬೀಸಿ, ಭಾರೀ ಹಿಮ, ಹಿಮಪಾತ ಮತ್ತು ಘನೀಕರಿಸುವ ಮಳೆಯನ್ನು ತಂದಾಗ ಈ ಅಪಘಾತ ಸಂಭವಿಸಿದೆ ಎನ್ನಲಾಗಿದೆ. ಇದು ದೇಶಾದ್ಯಂತ ವಾಯು ಮತ್ತು ರಸ್ತೆ ಪ್ರಯಾಣವನ್ನು ಅಡ್ಡಿಪಡಿಸಿದೆ. ಭಾನುವಾರ ಒಂದೇ ದಿನವೇ 12 ಸಾವಿರ ವಿಮಾನಗಳು ರದ್ದಾಗಿದ್ದು, 20 ಸಾವಿರ ವಿಮಾನ ಪ್ರಯಾಣಗಳು ವಿಳಂಬವಾಗಿವೆ ಎನ್ನಲಾಗಿದೆ (ಏಜೆನ್ಸೀಸ್).