ಕಾವಲು ಕಾಯುವ ಕೈಗಳು

ದೇಶದ ವಾಣಿಜ್ಯ ರಾಜಧಾನಿ ಮುಂಬೈಯಲ್ಲಿ 2008ರಲ್ಲಿ ನಡೆದ ಪಾಕಿಸ್ತಾನ ಪ್ರಾಯೋಜಿತವಾದ ಭೀಕರ ಭಯೋತ್ಪಾದಕ ದಾಳಿ ದೇಶವನ್ನೇ ನಡುಗಿಸಿತು ಮತ್ತು ಭಯೋತ್ಪಾದಕರ ಜಾಲವನ್ನು ಬೇರುಸಹಿತ ಕಿತ್ತೊಗೆಯಲು ಪ್ರಬಲ ತನಿಖಾ ಸಂಸ್ಥೆಯ ಅಗತ್ಯವನ್ನು ಮನಗಾಣಿಸಿತು. ಮುಂಬೈ ದಾಳಿಯ (26/11) ನಂತರ ಕೇಂದ್ರ ಸರ್ಕಾರವು ದೇಶದ ಮೊದಲ ಕೇಂದ್ರೀಯ ಭಯೋತ್ಪಾದನಾ ನಿಗ್ರಹ ತನಿಖಾ ಸಂಸ್ಥೆಯಾಗಿ ಎನ್‌ಐಎ ಅನ್ನು ಸ್ಥಾಪಿಸಿತು.

ಪ್ರಮುಖ ಪಾತ್ರ: ರಾಜ್ಯ ಸರ್ಕಾರಗಳ ವಿಶೇಷ ಅನುಮತಿ ಇಲ್ಲದೆಯೂ ದೇಶದ ಯಾವುದೇ ಭಾಗದಲ್ಲಿ ಭಯೋತ್ಪಾದನೆಗೆ ಸಂಬಂಧಿಸಿದ ಪ್ರಕರಣಗಳನ್ನು ಸ್ವಯಂಪ್ರೇರಿತವಾಗಿ ಕೈಗೆತ್ತಿಕೊಂಡು ತನಿಖೆ ನಡೆಸುವ ವಿಶೇಷ ಅಧಿಕಾರ ಇದಕ್ಕಿದೆ. ಉಗ್ರಗಾಮಿ ಸಂಘಟನೆಗಳಿಗೆ ಹರಿದುಬರುವ ಹವಾಲಾ ಹಣ, ನಕಲಿ ನೋಟು ಮತ್ತು ವಿದೇಶಿ ಧನಸಹಾಯದ ಜಾಲವನ್ನು ಪತ್ತೆಹಚ್ಚಿ ಮುಟ್ಟುಗೋಲು ಹಾಕಿಕೊಳ್ಳುವಲ್ಲಿ ಯಶಸ್ಸು ಸಾಧಿಸಿದೆ. ಜಮ್ಮು-ಕಾಶ್ಮೀರದ ಪ್ರತ್ಯೇಕತಾವಾದಿ ನಾಯಕರಿಗೆ ಪಾಕಿಸ್ತಾನದಿಂದ ಬರುತ್ತಿದ್ದ ಹಣದ ಜಾಲವನ್ನು ಎನ್‌ಐಎ ಧ್ವಂಸಗೊಳಿಸಿತು. ಇದರಿಂದಾಗಿ ಅಲ್ಲಿನ ಕಲ್ಲು ತೂರಾಟ ಮತ್ತು ಸ್ಥಳೀಯ ಉಗ್ರರ ನೇಮಕಾತಿ ಗಣನೀಯವಾಗಿ ಕುಸಿದಿದೆ. ಕರ್ನಾಟಕ, ಕೇರಳ ಸೇರಿದಂತೆ ಭಾರತದ विभिन्न ರಾಜ್ಯಗಳಲ್ಲಿ ಯುವಕರನ್ನು ಆನ್‌ಲೈನ್ ಮೂಲಕ ಸೆಳೆದು ಸ್ಲೀಪರ್ ಸೆಲ್‌ಗಳನ್ನು ನಿರ್ಮಿಸುತ್ತಿದ್ದ ಅಂತಾರಾಷ್ಟ್ರೀಯ ಉಗ್ರ ಸಂಘಟನೆ ಐಎಸ್ಐಎಸ್‌ನ ಹಲವು ಪಿತೂರಿಗಳನ್ನು ಮುಂಚಿತವಾಗಿಯೇ ಪತ್ತೆಹಚ್ಚಿ ನೂರಾರು ಜನರನ್ನು ಎನ್‌ಐಎ ಬಂಧಿಸಿದೆ. ಅಲ್ಲದೆ, ಜಾಗತಿಕ ಉಗ್ರರ ಜಾಲವನ್ನು ಪತ್ತೆಹಚ್ಚಲು ವಿದೇಶಿ ತನಿಖಾ ಸಂಸ್ಥೆಗಳೊಂದಿಗೆ (ಉದಾಹರಣೆಗೆ ಇಂಟರ್‌ಪೋಲ್, ಎಫ್‌ಬಿಐ) ಸಮನ್ವಯ ಸಾಧಿಸಿ ಕಾರ್ಯನಿರ್ವಹಿಸುತ್ತದೆ. ಜಾಗತಿಕ ಮಟ್ಟದ ತನಿಖಾ ಸಂಸ್ಥೆಗಳಿಗೆ ಹೋಲಿಸಿದರೆ ಎನ್‌ಐಎ ದಾಖಲಿಸಿದ ಪ್ರಕರಣಗಳಲ್ಲಿ ಅಪರಾಧಿಗಳಿಗೆ ಶಿಕ್ಷೆಯಾಗುವ ಪ್ರಮಾಣ ಶೇಕಡ 94ಕ್ಕಿಂತ ಹೆಚ್ಚಿದೆ. ಇದು ಸಂಸ್ಥೆಯ ನಿಖರ ತನಿಖೆಗೆ ಸಾಕ್ಷಿ. ಎನ್‌ಐಎ ದೇಶದ ಒಳಗಿನ ಉಗ್ರರ ಸಂಚು ಮತ್ತು ಆರ್ಥಿಕ ಮೂಲವನ್ನು ಕತ್ತರಿಸುವ ’ಮಿದುಳು’ ಆಗಿ ಕೆಲಸ ಮಾಡುತ್ತಿದೆ.

1984ರಲ್ಲಿ ನಡೆದ ‘ಆಪರೇಷನ್ ಬ್ಲೂ ಸ್ಟಾರ್’ ನಂತರ ದೇಶದಲ್ಲಿ ಆಂತರಿಕ ಅಶಾಂತಿ ಮತ್ತು ಉಗ್ರರ ದಾಳಿಗಳನ್ನು ಎದುರಿಸಲು ನ್ಯಾಷನಲ್ ಸೆಕ್ಯೂರಿಟಿ ಗಾರ್ಡ್ (ಎನ್‌ಎಸ್‍ಜಿ) ಸ್ಥಾಪಿಸಲಾಯಿತು. ವಿಮಾನಗಳು ಅಥವಾ ಕಟ್ಟಡಗಳನ್ನು ಉಗ್ರರು ಹೈಜಾಕ್ ಮಾಡಿದಾಗ ಅಥವಾ ಸಾರ್ವಜನಿಕರನ್ನು ಒತ್ತೆಯಾಳುಗಳಾಗಿ ಇರಿಸಿಕೊಂಡಾಗ ರಕ್ಷಣಾ ಕಾರ್ಯಾಚರಣೆ ನಡೆಸುವುದು ಎನ್‌ಎಸ್‍ಜಿ ಮಹತ್ತರ ಹೊಣೆಗಾರಿಕೆಯಾಗಿದೆ. ಕಠಿಣ ಮತ್ತು ಅಪಾಯಕಾರಿ ಪರಿಸ್ಥಿತಿಗಳಲ್ಲಿ ಉಗ್ರರ ಅಡಗುತಾಣಗಳ ಮೇಲೆ ನೇರ ಸರ್ಜಿಕಲ್ ಮಾದರಿಯ ದಾಳಿ ನಡೆಸುವುದು, ಅತ್ಯಾಧುನಿಕ ಸುಧಾರಿತ ಸ್ಫೋಟಕಗಳನ್ನು ಪತ್ತೆಹಚ್ಚಿ ನಿಷ್ಕ್ರಿಯಗೊಳಿಸುವ ವಿಶೇಷ ಘಟಕ ಇದರಲ್ಲಿದೆ.

2008ರ ಮುಂಬೈ ದಾಳಿಯ ಸಂದರ್ಭದಲ್ಲಿ ತಾಜ್ ಹೋಟೆಲ್, ಒಬೆರಾಯ್ ಮತ್ತು ನಾರಿಮನ್ ಹೌಸ್‌ನಲ್ಲಿ ಅಡಗಿದ್ದ ಪಾಕಿಸ್ತಾನಿ ಉಗ್ರರನ್ನು ‘ಆಪರೇಷನ್ ಬ್ಲಾಕ್ ಟೊರ್ನಾಡೊ’ ಮೂಲಕ ಸದೆಬಡಿದು, ನೂರಾರು ಒತ್ತೆಯಾಳುಗಳನ್ನು ಜೀವಂತವಾಗಿ ರಕ್ಷಿಸಿದ್ದು ಎನ್‌ಎಸ್‍ಜಿ ಕಮಾಂಡೋಗಳ ಐತಿಹಾಸಿಕ ಯಶಸ್ಸು. 2002ರಲ್ಲಿ गुಜರಾತ್‌ನ ಗಾಂಧಿನಗರದ ಅಕ್ಷರಧಾಮ ದೇವಸ್ಥಾನದೊಳಗೆ ನುಗ್ಗಿದ್ದ ಲಷ್ಕರ್-ಎ-ತೊಯ್ಬಾ ಉಗ್ರರನ್ನು ಯಶಸ್ವಿ ಕಾರ್ಯಾಚರಣೆಯ ಮೂಲಕ ಈ ಕಮಾಂಡೋಗಳು ಮಟ್ಟ ಹಾಕಿದರು. 2016ರಲ್ಲಿ ಪಂಜಾಬ್‌ನ ಪಠಾಣ್‌ಕೋಟ್ ವಾಯುನೆಲೆಯ ಮೇಲೆ ನಡೆದ ಆತ್ಮಹತ್ಯಾ ದಾಳಿಯ ಸಂದರ್ಭದಲ್ಲಿ ವಾಯುಪಡೆಯ ಪ್ರಮುಖ ಯುದ್ಧೋಪಕರಣಗಳಿಗೆ ಹಾನಿಯಾಗದಂತೆ ತಡೆದು, ಎಲ್ಲ ಉಗ್ರರನ್ನು ಸದೆಬಡಿಯಲಾಯಿತು. ದೇಶದ ಮೇಲೆ ದಾಳಿ ಮಾಡುವ ಉಗ್ರರನ್ನು ಸ್ಥಳದಲ್ಲೇ ಮುಗಿಸುವ ಭಾರತದ ಅತ್ಯಂತ ಶಕ್ತಿಶಾಲಿ ‘ಬಾಹುಬಲ’ ಆಗಿದೆ ಎನ್‌ಎಸ್‍ಜಿ.

ಭಯೋತ್ಪಾದಕ ಕೃತ್ಯಗಳನ್ನು ಸ್ಥಳೀಯ ಮಟ್ಟದಲ್ಲೇ ವೇಗವಾಗಿ ನಿಗ್ರಹಿಸಲು ಆಯಾ ರಾಜ್ಯಗಳ ಕಮಾಂಡೋ ಪಡೆಗಳು ದ್ವಿತೀಯ ರಕ್ಷಣಾ ಕವಚವಾಗಿ ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತಿವೆ. 2008ರ ಮುಂಬೈ ದಾಳಿಯ ನಂತರ, ಕೇಂದ್ರದ ಎನ್‌ಎಸ್‍ಜಿ ಪಡೆಗಳು ದೆಹಲಿಯಿಂದ ಬರುವುದು ತಡವಾಗಬಾರದು ಎಂಬ ಕಾರಣಕ್ಕೆ, ಪ್ರತಿ ರಾಜ್ಯದಲ್ಲೂ ಅತ್ಯಾಧುನಿಕ ತರಬೇತಿ ಹೊಂದಿದ ವಿಶೇಷ ಕಮಾಂಡೋ ಪಡೆಗಳನ್ನು ರಚಿಸಲಾಯಿತು. ಜನನಿಬಿಡ ನಗರಗಳು, ಮಾಲ್‌ಗಳು, ಐಟಿ ಪಾರ್ಕ್‌ಗಳು ಅಥವಾ ಮೆಟ್ರೋ ನಿಲ್ದಾಣಗಳಂತಹ ಕಡೆಗಳಲ್ಲಿ ಒತ್ತೆಯಾಳುಗಳನ್ನು ರಕ್ಷಿಸುವ ಮತ್ತು ಉಗ್ರರನ್ನು ಸೆರೆಹಿಡಿಯುವ ವಿಶೇಷ ತರಬೇತಿಯನ್ನು ಇವರು ಹೊಂದಿರುತ್ತಾರೆ. ಸ್ನೈಪರ್ ರೈಫಲ್‌ಗಳು ಮತ್ತು ನೈಟ್-ವಿಷನ್ ಗ್ಯಾಜೆಟ್‌ಗಳನ್ನು ಬಳಸುತ್ತಾರೆ. ಕೇಂದ್ರದ ಐಬಿ ಮತ್ತು ರಾಜ್ಯದ ಆಂತರಿಕ ಭದ್ರತಾ ವಿಭಾಗದ ಜೊತೆಗೂಡಿ ಸಂಶಯಾಸ್ಪದ ಚಟುವಟಿಕೆಗಳ ಮೇಲೆ ನಿರಂತರ ಕಣ್ಣಿಟ್ಟಿರುತ್ತಾರೆ. ರಾಜ್ಯಗಳ ಈ ಕಮಾಂಡೋ ಪಡೆಗಳು ದಾಳಿಯಾದಾಗ ಪ್ರತಿಕ್ರಿಯಿಸುವುದಷ್ಟೇ ಅಲ್ಲದೆ, ವರ್ಷದ 365 ದಿನಗಳೂ ರಹಸ್ಯ ತಾಲೀಮು ಮತ್ತು ಗಸ್ತು ತಿರುಗುವ ಮೂಲಕ ದೇಶದ ಆಂತರಿಕ ಭದ್ರತೆಗೆ ಭದ್ರ ಬುನಾದಿಯಾಗಿ ನಿಂತಿವೆ.

ಮುಂಬೈ ದಾಳಿಯ ನಂತರ ಕರ್ನಾಟಕದ ಆಂತರಿಕ ಭದ್ರತಾ ವಿಭಾಗದ ಅಡಿಯಲ್ಲಿ ಗರುಡ ಪಡೆಯನ್ನು ರಚಿಸಲಾಯಿತು. ಇವರಿಗೆ ಎನ್‌ಎಸ್‍ಜಿ ಮಟ್ಟದ ತರಬೇತಿ ನೀಡಲಾಗುತ್ತದೆ. ಬೆಂಗಳೂರಿನ ಆಯಕಟ್ಟಿನ ಜಾಗಗಳು, ಮಾಹಿತಿ-ತಂತ್ರಜ್ಞಾನ ಸಂಸ್ಥೆಗಳು ಹಾಗೂ ಕರಾವಳಿ ತೀರದ ಭದ್ರತೆಯಲ್ಲಿ ಗರುಡ ಪಡೆ ಪ್ರಮುಖ ಪಾತ್ರ ವಹಿಸಿದೆ. ಇತ್ತೀಚಿನ ವರ್ಷಗಳಲ್ಲಿ ಬೆಂಗಳೂರಿನಲ್ಲಿ ನಿಷೇಧಿತ ಸಂಘಟನೆಗಳ ಸ್ಲೀಪರ್ ಸೆಲ್‌ಗಳನ್ನು ಪತ್ತೆಹಚ್ಚಿ ನಿಷ್ಕ್ರಿಯಗೊಳಿಸುವಲ್ಲಿ ಗರುಡ ಪಡೆ ಮತ್ತು ಆಂತರಿಕ ಭದ್ರತಾ ವಿಭಾಗ ದೊಡ್ಡ ಯಶಸ್ಸು ಕಂಡಿವೆ. ದೇಶದಲ್ಲೇ ಮೊದಲ ಬಾರಿಗೆ ಮಹಿಳಾ ಕಮಾಂಡೋಗಳ ವಿಶೇಷ ತಂಡವನ್ನು ಕಾರ್ಯಾಚರಣೆಗೆ ಸಜ್ಜುಗೊಳಿಸಿದ ಹೆಗ್ಗಳಿಕೆಯೂ ಗರುಡ ಪಡೆಗಿದೆ.

ಫೋರ್ಸ್ ಒನ್: ಮುಂಬೈ ದಾಳಿಯ ನಂತರ ಮಹಾರಾಷ್ಟ್ರ ಸರ್ಕಾರ ‘ಫೋರ್ಸ್ ಒನ್’ ಪಡೆಯನ್ನು ರಚಿಸಿತು. ಮುಂಬೈನಂತಹ ಆರ್ಥಿಕ ರಾಜಧಾನಿಗೆ ಸದಾ ಇರುವ ಉಗ್ರಗಾಮಿ ಬೆದರಿಕೆಗಳನ್ನು ತಡೆಯುವಲ್ಲಿ ಇದು ಯಶಸ್ವಿಯಾಗಿದೆ. ಜರ್ಮನ್ ಬೇಕರಿ ಸ್ಫೋಟದ ನಂತರ ಮಹಾರಾಷ್ಟ್ರದಾದ್ಯಂತ ಹಲವು ವಿಧ್ವಂಸಕ ಕೃತ್ಯಗಳನ್ನು ಈ ಪಡೆ ಮುಂಚಿತವಾಗಿಯೇ ತಡೆದಿದೆ.

ಗ್ರೇಹೌಂಡ್ಸ್: ಆಂಧ್ರಪ್ರದೇಶ ಮತ್ತು ತೆಲಂಗಾಣದಲ್ಲಿ ವ್ಯಾಪಿಸಿದ್ದ ನಕ್ಸಲಿಸಂ ಮತ್ತು ಮಾವೋವಾದಿ ಉಗ್ರಗಾಮಿತ್ವವನ್ನು ಬೇರುಸಹಿತ ಕಿತ್ತೊಗೆಯುವಲ್ಲಿ ಗ್ರೇಹೌಂಡ್ಸ್ ಪಡೆ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆಯುವಂತಹ ಯಶಸ್ಸು ಸಾಧಿಸಿದೆ. भयೋತ್ಪಾದನೆ ನಿಗ್ರಹ ಕಾರ್ಯಾಚರಣೆಗಾಗಿಯೇ ಪ್ರತ್ಯೇಕವಾಗಿ ರಚನೆಯಾದ ಆಕ್ಟೋಪಸ್ ಪಡೆ ಹೈದರಾಬಾದ್ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವಿಧ್ವಂಸಕ ಕೃತ್ಯ ನಡೆಸಲು ಸಂಚು ರೂಪಿಸಿದ್ದ ಅಂತಾರಾಷ್ಟ್ರಿಯ ನಂಟು ಹೊಂದಿದ ಉಗ್ರರನ್ನು ಹೆಡೆಮುರಿ ಕಟ್ಟುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ.

ಕೇಂದ್ರ ಗೃಹ ಸಚಿವಾಲಯದ ಇತ್ತೀಚಿನ ಅಧಿಕೃತ ಹೇಳಿಕೆಗಳ ಪ್ರಕಾರ, ಕಳೆದ ನಾಲ್ಕು ದಶಕಗಳಲ್ಲಿ (1980ರ ದಶಕದ ಕೊನೆಯಿಂದ ಈವರೆಗೆ) ಜಮ್ಮು-ಕಾಶ್ಮೀರದಲ್ಲಿನ भयೋತ್ಪಾದನೆ, ನಕ್ಸಲಿಸಂ ಮತ್ತು ಈಶಾನ್ಯ ರಾಜ್ಯಗಳ ಬಂಡಾಯದಿಂದಾಗಿ ದೇಶದಲ್ಲಿ 92,000 ನಾಗರಿಕರು ಹಾಗೂ ಭದ್ರತಾ ಸಿಬ್ಬಂದಿ ಪ್ರಾಣ ಕಳೆದುಕೊಂಡಿದ್ದಾರೆ.

ಆಗಿನ ಪ್ರಧಾನಿ ರಾಜೀವ್ ಗಾಂಧಿ 1991ರ ಮೇ 21ರಂದು ತಮಿಳುನಾಡಿನ ಶ್ರೀಪೆರಂಬದೂರಿನಲ್ಲಿ ಲೋಕಸಭಾ ಚುನಾವಣಾ ಪ್ರಚಾರದಲ್ಲಿ ತೊಡಗಿದ್ದಾಗ ಎಲ್.ಟಿ.ಟಿ.ಇ ಉಗ್ರಗಾಮಿ ಸಂಘಟನೆಯ ಮಹಿಳಾ ಆತ್ಮಹತ್ಯಾ ಬಾಂಬರ್ ನಡೆಸಿದ ಭೀಕರ ಬಾಂಬ್ ಸ್ಫೋಟದಲ್ಲಿ ಪ್ರಾಣ ಕಳೆದುಕೊಂಡರು. ಘಟನೆಯಲ್ಲಿ ರಾಜೀವ್ ಸೇರಿದಂತೆ 25ಕ್ಕೂ ಹೆಚ್ಚು ಜನರು ಬಲಿಯಾದರು. ಈ ಭೀಕರ ಭಯೋತ್ಪಾದನಾ ಕೃತ್ಯದ ನಂತರ, ಆಗಿನ ಕೇಂದ್ರ ಸರ್ಕಾರವು भयೋತ್ಪಾದನೆಯ ಕರಾಳ ಮುಖವನ್ನು ಸಾರಲು ಮತ್ತು ದೇಶದ ಜನರಲ್ಲಿ ಜಾಗೃತಿ ಮೂಡಿಸಲು ಪ್ರತಿವರ್ಷ ಮೇ 21 ಅನ್ನು ‘ರಾಷ್ಟ್ರೀಯ ಭಯೋತ್ಪಾದನಾ ನಿಗ್ರಹ ದಿನ’ವನ್ನಾಗಿ ಆಚರಿಸಲು ಅಧಿಕೃತವಾಗಿ ಘೋಷಿಸಿತು. ಸಮಾಜದಲ್ಲಿ ಹಿಂಸಾಚಾರವನ್ನು ವಿರೋಧಿಸಿ, ಶಾಂತಿ, ಐಕ್ಯತೆ ಮತ್ತು ಸೌಹಾರ್ದವನ್ನು ಉತ್ತೇಜಿಸುವುದು, ಯುವಜನರು ದಾರಿ ತಪ್ಪಿ ಉಗ್ರಗಾಮಿ ಅಥವಾ ಹಿಂಸಾತ್ಮಕ ಹಾದಿ ಹಿಡಿಯದಂತೆ ಜಾಗೃತಿ ಮೂಡಿಸುವುದು ಮತ್ತು ದೇಶದ ರಕ್ಷಣೆಗಾಗಿ ಮತ್ತು ಭಯೋತ್ಪಾದನೆ ವಿರುದ್ಧದ ಹೋರಾಟದಲ್ಲಿ ವೀರಮರಣ ಹೊಂದಿದವರಿಗೆ ಶ್ರದ್ಧಾಂಜಲಿ ಸಲ್ಲಿಸುವುದು ಈ ದಿನದ ಉದ್ದೇಶ.

ಪ್ರತಿಜ್ಞಾ ವಿಧಿ: ಈ ದಿನದಂದು ದೇಶದಾದ್ಯಂತ ಎಲ್ಲ ಸರ್ಕಾರಿ ಕಚೇರಿ, ಶಾಲೆ, ಕಾಲೇಜು ಮತ್ತು ಸಾರ್ವಜನಿಕ ಸಂಸ್ಥೆಗಳಲ್ಲಿ ಕಡ್ಡಾಯವಾಗಿ ಭಯೋತ್ಪಾದನಾ-ವಿರೋಧಿ ಪ್ರತಿಜ್ಞೆಯನ್ನು ಸ್ವೀಕರಿಸಲಾಗುತ್ತದೆ. ‘ಭಾರತದ ನಾಗರಿಕರಾದ ನಾವು, ನಮ್ಮ ದೇಶದ ಅಹಿಂಸೆ ಮತ್ತು ಸಹಿಷ್ಣುತೆಯ ಸಂಪ್ರದಾಯದಲ್ಲಿ ದೃಢವಾದ ನಂಬಿಕೆಯನ್ನು ಹೊಂದಿದ್ದು, ಎಲ್ಲ ರೀತಿಯ ಭಯೋತ್ಪಾದನೆ ಮತ್ತು ಹಿಂಸಾಚಾರವನ್ನು ನಮ್ಮ ಪೂರ್ಣ ಶಕ್ತಿಯಿಂದ ವಿರೋಧಿಸುತ್ತೇವೆ ಎಂದು ಪ್ರಾಮಾಣಿಕವಾಗಿ ಪ್ರತಿಜ್ಞೆ ಮಾಡುತ್ತೇವೆ’.