ಮೊದಲ ಬ್ಯಾಚ್‌ನ ಅಗ್ನಿವೀರರು ತಮ್ಮ 4 ವರ್ಷಗಳ ಸೇವಾ ಅವಧಿಯನ್ನು ಪೂರ್ಣಗೊಳಿಸುತ್ತಿದ್ದು, ಅವರ ಕರ್ತವ್ಯದ ಮೇಲಿನ ಶ್ರದ್ಧೆ ಹಾಗೂ ಪ್ರದರ್ಶನದ ಕುರಿತು ಸೇನೆಯಿಂದ ಅತ್ಯಂತ ಪಾಸಿಟಿವ್ ಪ್ರತಿಕ್ರಿಯೆ ಬಂದಿದೆ. ಈ ಹಿನ್ನೆಲೆಯಲ್ಲಿ, ಮೂರೂ ಪಡೆಗಳ (ಸೇನಾ ಪಡೆಗಳು) ಶಿಫಾರಸನ್ನು ಪರಿಗಣಿಸಿ ಕೇಂದ್ರ ಸಚಿವ ಸಂಪುಟವು ಈ ಅವಧಿ ವಿಸ್ತರಣೆಗೆ ಅಧಿಕೃತ ಅನುಮೋದನೆ ನೀಡಿದೆ. ಅಗ್ನಿಪಥ್ ಯೋಜನೆಯು ಯಾವುದೇ ಸ್ಥಿರ ಚೌಕಟ್ಟಿಗೆ ಸೀಮಿತವಾಗಿಲ್ಲ, ಅಗತ್ಯಕ್ಕೆ ತಕ್ಕಂತೆ ಅನುಭವದ ಆಧಾರದಲ್ಲಿ ಯೋಜನೆಗೆ ಪರಿಷ್ಕರಣೆಗಳನ್ನು ತರಲಾಗುವುದು ಹಾಗೂ ನೌಕರರ ಸಾಧನೆಗೆ ಆದ್ಯತೆ ನೀಡಲಾಗುವುದು ಎಂದು ಸಿಡಿಎಸ್ ರಮ್ಮಣ ಸ್ಪಷ್ಟಪಡಿಸಿದ್ದಾರೆ.
ಅಗ್ನಿವೀರ ತರಬೇತಿಯು ಕೇವಲ ದೈಹಿಕ ದಾರ್ಢ್ಯತೆ ಅಥವಾ ಕವಾಯತಿಗೆ ಮಾತ್ರ ಸೀಮಿತವಾಗಿಲ್ಲ. ಬದಲಾಗಿ ನೈತಿಕ ಮೌಲ್ಯಗಳು, ಅತ್ಯಾಧುನಿಕ ತಂತ್ರಜ್ಞಾನದ ಜ್ಞಾನ ಮತ್ತು ವೃತ್ತಿಪರ ಕೌಶಲ್ಯಾಭಿವೃದ್ಧಿಯನ್ನು ಅವರ ತರಬೇತಿ ಒಳಗೊಂಡಿದೆ. ಸೇನೆಯಲ್ಲಿದ್ದುಕೊಂಡೇ ಉದ್ಯೋಗಿಗಳು ತಮ್ಮ ಶೈಕ್ಷಣಿಕ ಅರ್ಹತೆಯನ್ನು 10ನೇ ತರಗತಿಯಿಂದ 12ನೇ ತರಗತಿಗೆ ಹಾಗೂ 12ನೇ ತರಗತಿಯಿಂದ ಪದವಿಗೆ ಹೆಚ್ಚಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗುತ್ತಿದೆ. ಇದು ಸಶಸ್ತ್ರ ಪಡೆಗಳ ವಿವಿಧ ವಿಭಾಗಗಳಲ್ಲಿ ಅಗ್ನಿವೀರರ ಭವಿಷ್ಯದ ಸೇವೆಗೆ ನೆರವಾಗಲಿದೆ.
ಪತ್ರಿಕಾಗೋಷ್ಠಿಯಲ್ಲಿ ಅಗ್ನಿವೀರರ ವೇತನ ಮತ್ತು ಆರ್ಥಿಕ ಸೌಲಭ್ಯಗಳ ಕುರಿತಾಗಿಯೂ ಮಾಹಿತಿ ಹಂಚಿಕೊಳ್ಳಲಾಯಿತು. ಸೇವಾವಧಿಯ ಮೊದಲ ವರ್ಷದಲ್ಲಿ ರೂ. 43,500 ಹಾಗೂ ಎರಡನೇ ವರ್ಷದಲ್ಲಿ 47,000 ಸಾವಿರ ರೂ. ವೇತನ ಸಿಗಲಿದೆ. ಇದರೊಂದಿಗೆ ಯೋಜನೆಯ ಪ್ರಮುಖ ಭಾಗವಾಗಿರುವ 'ಸೇವಾ ನಿಧಿ' ಆರ್ಥಿಕ ಭದ್ರತೆಯ ಪ್ಯಾಕೇಜ್ ಸಹ ಯಥಾವತ್ತಾಗಿ ಮುಂದುವರಿಯಲಿದೆ. ಇದಲ್ಲದೆ ಪ್ರಮೋಷನ್‌ಗಳು, ಪಿಂಚಣಿ ಹಾಗೂ ಇತರ ಆಡಳಿತಾತ್ಮಕ ವಿಚಾರಗಳಿಗೆ ಸರಿ ಹೊಂದುವ ಸೂಕ್ತ ಮಾರ್ಗಸೂಚಿಗಳನ್ನು ರೂಪಿಸಲಾಗಿದೆ.
