ಮೂಳೆಯೊಳಗೆ ರಕ್ತನಾಳಗಳು ಹಾದುಹೋಗುತ್ತಿದ್ದ ಸೂಕ್ಷ್ಮ ಕಾಲುವೆಗಳನ್ನು ಸಂಶೋಧಕರು ಗುರುತಿಸಿದ್ದಾರೆ. ಅಚ್ಚರಿಯ ಸಂಗತಿಯೆಂದರೆ, ಈ ಕಾಲುವೆಗಳೊಳಗೆ ಅಂಡಾಕಾರದ ಆಕಾರ ಹೊಂದಿದ್ದ ಅನೇಕ ಸೂಕ್ಷ್ಮ ರಚನೆಗಳು ಕಂಡುಬಂದಿವೆ. ಇವು ಕೆಂಪು ರಕ್ತಕಣಗಳನ್ನು ಹೋಲುತ್ತಿದ್ದವು. ಕೇವಲ ಸೂಕ್ಷ್ಮದರ್ಶಕದಲ್ಲಿ ಕಂಡುಬಂದ ಆಕಾರವನ್ನೇ ಆಧರಿಸಿ ನಿರ್ಧಾರಕ್ಕೆ ಬರದೆ, ಅವುಗಳ ರಾಸಾಯನಿಕ ಸಂಯೋಜನೆಯನ್ನೂ ವಿಜ್ಞಾನಿಗಳು ಪರೀಕ್ಷಿಸಿದ್ದಾರೆ.
ರಕ್ತದ ಪ್ರಮುಖ ಅಣುವಿನ ಕುರುಹು ಪತ್ತೆ
ಸಂಶೋಧನೆಯ ವೇಳೆ ಹೀಮ್ ಬಿ ಎಂಬ ಅಣುವಿನ ಕುರುಹು ಪತ್ತೆಯಾಗಿದೆ. ಇದು ರಕ್ತದಲ್ಲಿರುವ ಹಿಮೋಗ್ಲೋಬಿನ್‌ನ ಪ್ರಮುಖ ಭಾಗವಾಗಿದ್ದು, ದೇಹದ ವಿವಿಧ ಅಂಗಗಳಿಗೆ ಆಮ್ಲಜನಕ ಸಾಗಿಸಲು ನೆರವಾಗುತ್ತದೆ. ಸೂಕ್ಷ್ಮ ರಚನೆಗಳಲ್ಲಿ ಕಬ್ಬಿಣ, ಇಂಗಾಲ ಮತ್ತು ಸಾರಜನಕದ ಅಂಶಗಳೂ ಪತ್ತೆಯಾಗಿವೆ. ಈ ಅಂಶಗಳು ರಕ್ತಕ್ಕೆ ಸಂಬಂಧಿಸಿದ ರಾಸಾಯನಿಕ ಸಂಯೋಜನೆಯೊಂದಿಗೆ ಹೊಂದಿಕೆಯಾಗಿವೆ. ಇದರ ಜತೆಗೆ, ಮೂಳೆಯ ಸುತ್ತಲಿನ ಮಣ್ಣಿನಲ್ಲಿದ್ದ ರಾಸಾಯನಿಕ ಅಂಶಗಳನ್ನೂ ಪರಿಶೀಲಿಸಲಾಗಿದೆ. ಸತ್ತ ನಂತರ ಮೂಳೆಯೊಳಗೆ ಸೇರಿಕೊಂಡಿರಬಹುದಾದ ಶಿಲೀಂಧ್ರಗಳು ಅಥವಾ ಸೂಕ್ಷ್ಮಜೀವಿಗಳಿಂದ ಈ ರಚನೆಗಳು ಉಂಟಾಗಿರಬಹುದೇ ಎಂಬ ಸಾಧ್ಯತೆಯನ್ನೂ ವಿಜ್ಞಾನಿಗಳು ಪರೀಕ್ಷಿಸಿದ್ದಾರೆ. ಹಲವು ಪ್ರತ್ಯೇಕ ಪರೀಕ್ಷೆಗಳ ಫಲಿತಾಂಶಗಳು ಈ ರಚನೆಗಳು ಮೂಲ ಡೈನೋಸಾರ್‌ನ ಜೈವಿಕ ಅವಶೇಷಗಳಾಗಿರಬಹುದೆಂಬ ವಾದಕ್ಕೆ ಬಲ ನೀಡಿವೆ.
ಕೋಟ್ಯಂತರ ವರ್ಷಗಳ ಕಾಲ ಹೇಗೆ ಉಳಿದವು?
ಸಾಮಾನ್ಯವಾಗಿ ಜೀವಿಗಳ ಮೃದು ಅಂಗಾಂಶಗಳು ಸತ್ತ ಕೆಲವೇ ಸಮಯದಲ್ಲಿ ಕೊಳೆಯುತ್ತವೆ. ಆದರೆ ಈ ಡೈನೋಸಾರ್‌ನ ಅವಶೇಷಗಳು ಆಮ್ಲಜನಕದ ಪ್ರಮಾಣ ಕಡಿಮೆ ಇದ್ದ, ಸೂಕ್ಷ್ಮಜೀವಿಗಳಿಂದ ಕೂಡಿದ ಪರಿಸರದಲ್ಲಿ ಹೂತುಹೋಗಿದ್ದವು ಎಂದು ಸಂಶೋಧಕರು ಅಂದಾಜಿಸಿದ್ದಾರೆ. ಅಲ್ಲದೆ, ಖನಿಜೀಕರಣ ಪ್ರಕ್ರಿಯೆಯು ಈ ಸೂಕ್ಷ್ಮ ರಚನೆಗಳನ್ನು ದೀರ್ಘಕಾಲ ಸಂರಕ್ಷಿಸಲು ನೆರವಾಗಿರಬಹುದು. ವಿಶೇಷವಾಗಿ ಮ್ಯಾಂಗನೀಸ್ ಹೊಂದಿರುವ ಹೌಸ್ಮನೈಟ್ ಖನಿಜವು ಈ ಸಂರಕ್ಷಣೆಯಲ್ಲಿ ಪ್ರಮುಖ ಪಾತ್ರ ವಹಿಸಿರಬಹುದು ಎಂಬುದು ವಿಜ್ಞಾನಿಗಳ ಅಭಿಪ್ರಾಯ.
