ಕೇವಲ 15 ದಿನಗಳಲ್ಲಿ 25 ಟನ್‌ನಿಂದ 7.5 ಟನ್‌ಗೆ ಕುಸಿದ ಚಿನ್ನದ ಅಮದು! ದೇಶಾದ್ಯಂತ ಬಂಗಾರದ ಬೇಡಿಕೆ ಶೇ. 70ರಷ್ಟು ಕುಸಿತ! Gold demand drop

ಚಿನ್ನದ ಉದ್ಯಮದ ಇತ್ತೀಚಿನ ಅಧಿಕೃತ ಅಂಕಿ-ಅಂಶಗಳ ಪ್ರಕಾರ, ಮೇ 27 ಕ್ಕೆ ಭಾರತದ ಒಟ್ಟು ಚಿನ್ನದ ಬೇಡಿಕೆ ಕೇವಲ 7.5 ಟನ್‌ಗಳಿಗೆ ಕುಸಿದಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ದೇಶದಲ್ಲಿ ಬರೋಬ್ಬರಿ 25 ಟನ್ ಚಿನ್ನದ ಭರ್ಜರಿ ಮಾರಾಟವಾಗಿತ್ತು.

ಆರ್ಥಿಕ ವರದಿಗಳ ಅನ್ವಯ, ದೇಶದ ವಿದೇಶಿ ವಿನಿಮಯ ನಿಧಿಯನ್ನು ರಕ್ಷಿಸಲು ಮತ್ತು ಅನಗತ್ಯ ಆಮದಿಗೆ ಬ್ರೇಕ್ ಹಾಕಲು ಕೇಂದ್ರ ಸರ್ಕಾರವು ಕಳೆದ ಮೇ, 13 ರಿಂದ ಜಾರಿಗೆ ಬರುವಂತೆ ಚಿನ್ನದ ಆಮದು ಸುಂಕವನ್ನು ಶೇ. 6 ರಿಂದ ನೇರವಾಗಿ ಶೇ. 15 ಕ್ಕೆ ಹೆಚ್ಚಿಸಿತ್ತು. ಈ ಸುಂಕ ಏರಿಕೆಯಾದ ಕೇವಲ 15 ದಿನಗಳಲ್ಲಿ ಇಡೀ ಚಿನ್ನದ ಮಾರುಕಟ್ಟೆ ಸೈಲೆಂಟ್ ಆಗಿದೆ. ಭಾರತೀಯ ಬುಲಿಯನ್ ಮತ್ತು ಜ್ಯುವೆಲ್ಲರ್ಸ್ ಅಸೋಸಿಯೇಷನ್ (IBJA) ದೇಶದ ಪ್ರತಿಯೊಂದು ಪ್ರಮುಖ ನಗರದ ಚಿನ್ನದ ವ್ಯಾಪಾರಿಗಳಿಂದ ಮಾಹಿತಿ ಸಂಗ್ರಹಿಸಿದ್ದು, ಶೇ. 70 ರಷ್ಟು ಗ್ರಾಹಕರು ಚಿನ್ನದ ಅಂಗಡಿಗಳ ಕಡೆಗೆ ಮುಖ ಮಾಡುವುದನ್ನೇ ನಿಲ್ಲಿಸಿದ್ದಾರೆ ಎಂದು ಆತಂಕ ವ್ಯಕ್ತಪಡಿಸಿದೆ.

ಈ ಕುರಿತು ಮಾತನಾಡಿರುವ IBJA ರಾಷ್ಟ್ರೀಯ ಕಾರ್ಯದರ್ಶಿ ಸುರೇಂದ್ರ ಮೆಹ್ತಾ, ಭಾರತದ ಒಟ್ಟು ಚಿನ್ನದ ಮಾರುಕಟ್ಟೆಯಲ್ಲಿ ಶೇ. 65 ಕ್ಕೂ ಹೆಚ್ಚು ಪಾಲು ಹೊಂದಿರುವ ಅಸಂಘಟಿತ ವಲಯದ ಸಣ್ಣ ಸಣ್ಣ ಚಿನ್ನದ ವರ್ತಕರು ಮತ್ತು ಗ್ರಾಮೀಣಭಾಗದ ಆಭರಣ ತಯಾರಕರು ಈ ಸುಂಕ ಏರಿಕೆಯಿಂದ ಅತ್ಯಂತ ಭೀಕರವಾಗಿ ನಲುಗಿಹೋಗಿದ್ದಾರೆ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.

ಕೇಂದ್ರ ಸರ್ಕಾರದ ಈ ಹೊಸ ಸುಂಕ ಪರಿಷ್ಕರಣೆಯ ನಂತರ ಭಾರತದಲ್ಲಿ ಚಿನ್ನ ಖರೀದಿ ಮಾಡುವುದು ಸಾಮಾನ್ಯ ಜನರಿಗೆ ಅಸಾಧ್ಯವೆಂಬಂತಾಗಿದೆ. ಏಕೆಂದರೆ ಆಮದು ಸುಂಕದ ಜೊತೆಗೆ ಸರಕು ಮತ್ತು ಸೇವಾ ತೆರಿಗೆಯನ್ನು (GST) ಸೇರಿಸಿದರೆ, ಚಿನ್ನದ ಮೇಲಿನ ಒಟ್ಟು ಪರಿಣಾಮಕಾರಿ ತೆರಿಗೆ ಹೊರೆ ಈ ಹಿಂದೆ ಇದ್ದ ಶೇ. 9.18 ರಿಂದ ನೇರವಾಗಿ ಶೇ. 18.45 ಕ್ಕೆ ಏರಿಕೆಯಾಗಿದೆ. ಅಂದರೆ ಗ್ರಾಹಕರು ಖರೀದಿಸುವ ಪ್ರತಿ 1 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಕ್ಕೆ ಕೇವಲ ತೆರಿಗೆ ರೂಪದಲ್ಲೇ ಸುಮಾರು 18,500 ರೂಪಾಯಿಗಳನ್ನು ಸರ್ಕಾರದ ಖಜಾನೆಗೆ ಪಾವತಿಸಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ.

ಜಾಗತಿಕವಾಗಿ ಇರಾನ್ ಸೃಷ್ಟಿಸಿರುವ ಯುದ್ಧದ ಭೀತಿಯಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆಗಳು ಏರುತ್ತಿರುವ ಬೆನ್ನಲ್ಲೇ, ದೇಶೀಯವಾಗಿ ಚಿನ್ನದ ಮೇಲಿನ ಈ ಮೆಗಾ ತೆರಿಗೆ ಅಸ್ತ್ರವು ಬಂಗಾರದ ಗಿರಾಕಿಗಳನ್ನು ಸಂಪೂರ್ಣವಾಗಿ ಮಾರುಕಟ್ಟೆಯಿಂದ ದೂರ ಸರಿಸುವಂತೆ ಮಾಡಿದೆ. ಮುಂಬರುವ ದಿನಗಳಲ್ಲಿ ಮದುವೆ ಆಚರಣೆಗಳಿಗಾಗಿ ಚಿನ್ನ ಕೊಳ್ಳಲು ಯೋಜಿಸಿದ್ದ ಕುಟುಂಬಗಳು ಈಗ ಬೆಲೆ ಏರಿಕೆಯ ಬಿಸಿಗೆ ಬೆಚ್ಚಿಬಿದ್ದಿದ್ದು, ಮಾರುಕಟ್ಟೆ ಚೇತರಿಸಿಕೊಳ್ಳಲು ಇನ್ನು ಕೆಲವು ತಿಂಗಳುಗಳು ಬೇಕಾಗಬಹುದು ಎಂದು ಆಭರಣ ಉದ್ಯಮಿಗಳು ಅಂದಾಜಿಸಿದ್ದಾರೆ,(ಏಜೆನ್ಸೀಸ್​).