ಚಿನ್ನದ ಬೆಲೆಯಲ್ಲಿ ಮಹಾ ಸ್ಫೋಟ! ಒಂದೇ ದಿನ 8,550 ರೂ. ಏರಿಕೆ! ಬೆಳ್ಳಿ ದರದಲ್ಲಿ 20,500 ರೂ. ಜಿಗಿತ! ಆಮದು ಸುಂಕ ಏರಿಕೆಯ ಎಫೆಕ್ಟ್! Gold- Silver Price Hike

ಆಲ್ ಇಂಡಿಯಾ ಸರಾಫಾ ಅಸೋಸಿಯೇಷನ್ ನೀಡಿರುವ ಮಾಹಿತಿಯ ಪ್ರಕಾರ, ದೆಹಲಿ ಮಾರುಕಟ್ಟೆಯಲ್ಲಿನ ಇಂದಿನ ದರ ಹೀಗಿದೆ.

ಚಿನ್ನ (ಶೇ.99.9 ಶುದ್ಧತೆ): ಮಂಗಳವಾರ 1,56,800 ರೂ. ಇದ್ದ 10 ಗ್ರಾಂ ಚಿನ್ನದ ಬೆಲೆ, ಇಂದು 1,65,350 ರೂ. ತಲುಪಿದೆ. (ಶೇ. 5 ಕ್ಕೂ ಅಧಿಕ ಏರಿಕೆಯಾಗಿದೆ).

ಬೆಳ್ಳಿ (ಪ್ರತಿ ಕೆಜಿ): ನಿನ್ನೆ 2,77,000 ರೂ. ಇದ್ದ ಬೆಳ್ಳಿ ಬೆಲೆ ಇಂದು 2,97,500 ರೂ. ಗೆ ಜಿಗಿದಿದೆ.

ಪ್ಲಾಟಿನಂ: ಪ್ಲಾಟಿನಂ ಮೇಲಿನ ಆಮದು ಸುಂಕವನ್ನೂ ಶೇ. 15.4ಕ್ಕೆ ಏರಿಸಲಾಗಿದ್ದು, ಅದರ ದರದಲ್ಲೂ ಏರಿಕೆಯಾಗಿದೆ.

ಪಶ್ಚಿಮ ಏಷ್ಯಾದಲ್ಲಿ ಉಂಟಾಗಿರುವ ಯುದ್ಧದ ಭೀತಿ ಮತ್ತು ಕಚ್ಚಾ ತೈಲ ಬೆಲೆ ಏರಿಕೆಯಿಂದಾಗಿ ಭಾರತದ ಆಮದು ಬಿಲ್ ಭಾರಿ ಪ್ರಮಾಣದಲ್ಲಿ ಹೆಚ್ಚಾಗಿದೆ.

ವಿದೇಶಿ ವಿನಿಮಯ ರಕ್ಷಣೆ: ಡಾಲರ್ ಹೊರಹರಿವನ್ನು ತಡೆಗಟ್ಟಿ, ವಿದೇಶಿ ವಿನಿಮಯ ಮೀಸಲು ನಿಧಿಯನ್ನು ಉಳಿಸಲು ಈ ಕ್ರಮ ಅನಿವಾರ್ಯ ಎಂದು ಸರ್ಕಾರ ಭಾವಿಸಿದೆ.

ರೂಪಾಯಿ ಮೌಲ್ಯ ಕುಸಿತ: ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯ 95.80 ರೂ. ಗೆ ಕುಸಿದಿದೆ. ಇದನ್ನು ಸ್ಥಿರಗೊಳಿಸಲು ಬಂಗಾರದಂತಹ ಅನಗತ್ಯ ಆಮದಿಗೆ ಬ್ರೇಕ್ ಹಾಕಲು ಸರ್ಕಾರ ಸುಂಕ ಏರಿಕೆ ಮಾಡಿದೆ.

ಸುಂಕ ಏರಿಕೆಯಿಂದ ತಾತ್ಕಾಲಿಕವಾಗಿ ಬೇಡಿಕೆ ಕುಸಿಯಬಹುದು. ಆದರೆ ಜಾಗತಿಕ ಅನಿಶ್ಚಿತತೆಯ ನಡುವೆ ಚಿನ್ನವು ಇಂದಿಗೂ ಸುರಕ್ಷಿತ ಹೂಡಿಕೆಯಾಗಿದೆ. ಹೂಡಿಕೆದಾರರು ಗಾಬರಿಯಾಗುವ ಅಗತ್ಯವಿಲ್ಲ ಎಂದು ಜಿಯೋಜಿತ್ ಇನ್ವೆಸ್ಟ್‌ಮೆಂಟ್ಸ್‌ನ ಹರೀಶ್ ವಿ. ಅಭಿಪ್ರಾಯಪಟ್ಟಿದ್ದಾರೆ.

ಆದರೆ, ರತ್ನ ಮತ್ತು ಆಭರಣ ರಫ್ತು ಉತ್ತೇಜನಾ ಮಂಡಳಿ (GJEPC) ಸರ್ಕಾರದ ಈ ನಿರ್ಧಾರಕ್ಕೆ ಅಸಮಾಧಾನ ವ್ಯಕ್ತಪಡಿಸಿದೆ. ಸುಂಕ ಏರಿಕೆಯು ಕೇವಲ ಬೆಲೆ ಹೆಚ್ಚಳಕ್ಕೆ ಕಾರಣವಾಗುತ್ತದೆಯೇ ಹೊರತು ಆಮದು ತಡೆಯಲು ಸಾಧ್ಯವಿಲ್ಲ, ಬದಲಾಗಿ ಕಳ್ಳಸಾಗಣೆಗೆ ದಾರಿ ಮಾಡಿಕೊಡಬಹುದು ಎಂದು ಎಚ್ಚರಿಸಿದೆ.

ಮೋದಿಯವರ ಕರೆ: ಇತ್ತೀಚೆಗೆ ಹೈದರಾಬಾದ್‌ನಲ್ಲಿ ನಡೆದ ರ್‍ಯಾಲಿಯಲ್ಲಿ ಪ್ರಧಾನಿ ಮೋದಿ ಅವರು ಒಂದು ವರ್ಷ ಚಿನ್ನ ಖರೀದಿಸಬೇಡಿ ಎಂದು ನೀಡಿದ್ದ ಕರೆಯ ಮುಂದುವರಿದ ಭಾಗವಾಗಿ ಈ ತೆರಿಗೆ ಏರಿಕೆ ನೋಡಲಾಗುತ್ತಿದೆ.

ವಿಶೇಷವೆಂದರೆ, ಭಾರತದಲ್ಲಿ ಬೆಲೆ ಏರಿಕೆಯಾಗಿದ್ದರೆ, ಜಾಗತಿಕ ಮಾರುಕಟ್ಟೆಯಲ್ಲಿ ಸ್ಪಾಟ್ ಗೋಲ್ಡ್ ದರ ಶೇ. 0.3 ರಷ್ಟು ಇಳಿಕೆಯಾಗಿ 4,700.86 ಡಾಲರ್ ತಲುಪಿದೆ. ಅಂದರೆ ಭಾರತದಲ್ಲಿನ ಈ ಬೆಲೆ ಏರಿಕೆ ಕೇವಲ ತೆರಿಗೆ ಬದಲಾವಣೆಯಿಂದಾಗಿ ಉಂಟಾಗಿರುವ ಕೃತಕ ಏರಿಕೆಯಾಗಿದೆ.

ಬಂಗಾರದ ಮೇಲಿನ ಈ ಸುಂಕದ ಹೊರೆ ಮುಂಬರುವ ಮದುವೆ ಸೀಸನ್ ಮೇಲೆ ಭಾರಿ ಪರಿಣಾಮ ಬೀರಲಿದೆ. ಮಧ್ಯಮ ವರ್ಗದ ಜನರ ಪಾಲಿಗೆ ಬಂಗಾರ ಈಗ ಗಗನಕುಸುಮವಾಗಿದೆ. ಸರ್ಕಾರವು ಕರೆನ್ಸಿ ಉಳಿಸಲು ಕೈಗೊಂಡ ಈ 'ಸರ್ಜಿಕಲ್ ಸ್ಟ್ರೈಕ್' ಎಷ್ಟರ ಮಟ್ಟಿಗೆ ಯಶಸ್ವಿಯಾಗಲಿದೆ ಎಂಬುದು ಕಾದು ನೋಡಬೇಕಿದೆ,(ಏಜೆನ್ಸೀಸ್​).