ಮೋದಿಯ ಒಂದು ಕರೆ, ನಡುಗುತ್ತಿದೆ ಜಾಗತಿಕ ಮಾರುಕಟ್ಟೆ! ಬಂಗಾರದ ಬೆಲೆಗೆ ಬೀಳುತ್ತಾ ಬ್ರೇಕ್..? Gold Price

ಭಾರತದಲ್ಲಿ ಮದುವೆ, ಹಬ್ಬ ಮತ್ತು ಹೂಡಿಕೆಗಾಗಿ ಪ್ರತಿ ವರ್ಷ ಅಂದಾಜು 700 ರಿಂದ 800 ಟನ್ ಚಿನ್ನ ಬಳಕೆಯಾಗುತ್ತದೆ. ವಿಶೇಷವೆಂದರೆ, ಈ ಒಟ್ಟು ಬೇಡಿಕೆಯ ಶೇ. 90ಕ್ಕೂ ಹೆಚ್ಚು ಭಾಗವನ್ನು ಆಮದಿನ ಮೂಲಕವೇ ಪೂರೈಸಲಾಗುತ್ತದೆ. ಇದಕ್ಕಾಗಿ ಭಾರತವು ಪ್ರತಿ ವರ್ಷ ಬಿಲಿಯನ್ಗಟ್ಟಲೆ ಡಾಲರ್‌ಗಳನ್ನು ವ್ಯಯಿಸುತ್ತದೆ. 2026ರ ಹೊತ್ತಿಗೆ ಭಾರತದ ವಾರ್ಷಿಕ ಚಿನ್ನದ ಆಮದು ಬಿಲ್ ಅಂದಾಜು 60 ಬಿಲಿಯನ್ ಡಾಲರ್ (ಸುಮಾರು 5 ಲಕ್ಷ ಕೋಟಿ ರೂ.) ತಲುಪಿದೆ.

ಒಂದು ವೇಳೆ ಭಾರತೀಯರು ಪ್ರಧಾನಿಯವರ ಕರೆಗೆ ಓಗೊಟ್ಟು ಒಂದು ವರ್ಷ ಚಿನ್ನದ ಖರೀದಿಯನ್ನು ಗಣನೀಯವಾಗಿ ತಗ್ಗಿಸಿದರೆ ಆಗುವ ಬದಲಾವಣೆಗಳು ಹೀಗಿವೆ.

ವಿದೇಶಿ ವಿನಿಮಯ ಉಳಿತಾಯ: ಚಿನ್ನದ ಆಮದನ್ನು ಶೇ. 50ರಷ್ಟು ಕಡಿಮೆ ಮಾಡಿದರೂ ದೇಶಕ್ಕೆ ಸುಮಾರು 30 ಬಿಲಿಯನ್ ಡಾಲರ್ ವಿದೇಶಿ ವಿನಿಮಯ ಉಳಿತಾಯವಾಗಲಿದೆ.

ರೂಪಾಯಿ ಮೌಲ್ಯಕ್ಕೆ ಬಲ: ಡಾಲರ್ ಹೊರಹರಿವು ಕಡಿಮೆಯಾದಂತೆ ರೂಪಾಯಿ ಮೌಲ್ಯದ ಮೇಲಿನ ಒತ್ತಡ ತಗ್ಗಲಿದ್ದು, ಕರೆನ್ಸಿ ಸ್ಥಿರತೆ ಕಾಯ್ದುಕೊಳ್ಳಲು ಸಹಕಾರಿಯಾಗಲಿದೆ.

ಮೀಸಲು ನಿಧಿ ಹೆಚ್ಚಳ: ಏಪ್ರಿಲ್ 2026ರ ವೇಳೆಗೆ ಭಾರತದ ವಿದೇಶಿ ವಿನಿಮಯ ಮೀಸಲು 700 ಬಿಲಿಯನ್ ಡಾಲರ್ ಇತ್ತು. ಚಿನ್ನದ ಖರೀದಿ ಶೇ. 75ರಷ್ಟು ಕಡಿಮೆಯಾದರೆ ಮೀಸಲು ನಿಧಿಗೆ ಬರೋಬ್ಬರಿ 44 ಬಿಲಿಯನ್ ಡಾಲರ್ ಹೆಚ್ಚುವರಿಯಾಗಿ ಸೇರ್ಪಡೆಯಾಗಬಹುದು.

ಭಾರತವು ಮುಖ್ಯವಾಗಿ ಸ್ವಿಟ್ಜರ್ಲೆಂಡ್, UAE, ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾದಿಂದ ಚಿನ್ನವನ್ನು ಆಮದು ಮಾಡಿಕೊಳ್ಳುತ್ತದೆ. ಭಾರತದ ಬೇಡಿಕೆ ಕುಸಿದರೆ ಈ ದೇಶಗಳ ರಫ್ತು ಉದ್ಯಮಕ್ಕೆ ಭಾರಿ ಪೆಟ್ಟು ಬೀಳಲಿದೆ.

ಸ್ವಿಟ್ಜರ್ಲೆಂಡ್: ವಿಶ್ವದ ಅತಿದೊಡ್ಡ ಚಿನ್ನದ ಶುದ್ಧೀಕರಣ ಕೇಂದ್ರಗಳನ್ನು ಹೊಂದಿರುವ ಈ ದೇಶಕ್ಕೆ ಭಾರತವೇ ದೊಡ್ಡ ಮಾರುಕಟ್ಟೆಯಾಗಿದೆ.

ದುಬೈ: ಜಾಗತಿಕ ಚಿನ್ನದ ವ್ಯಾಪಾರ ಕೇಂದ್ರವಾಗಿರುವ ದುಬೈ, ಭಾರತೀಯ ಖರೀದಿದಾರರನ್ನೇ ಹೆಚ್ಚು ಅವಲಂಬಿಸಿದೆ.

ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ: ಇಲ್ಲಿನ ಚಿನ್ನದ ಗಣಿಗಾರಿಕೆ ಉದ್ಯಮವು ಭಾರತದ ಬೇಡಿಕೆಯ ಆಧಾರದ ಮೇಲೆ ದರ ನಿರ್ಧಾರ ಮಾಡುತ್ತದೆ.

ಚಿನ್ನದ ಆಮದು ತಗ್ಗಿಸುವುದು ಆರ್ಥಿಕ ದೃಷ್ಟಿಯಿಂದ ಒಳ್ಳೆಯದಾದರೂ, ಇದು ಭಾರತದ ಆಭರಣ ಉದ್ಯಮದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು. ಲಕ್ಷಾಂತರ ಕುಶಲಕರ್ಮಿಗಳು ಮತ್ತು ವ್ಯಾಪಾರಿಗಳ ಜೀವನೋಪಾಯಕ್ಕೆ ತೊಂದರೆಯಾಗದಂತೆ ಈ ಬದಲಾವಣೆಯನ್ನು ತರುವುದು ಸರ್ಕಾರದ ಮುಂದಿರುವ ದೊಡ್ಡ ಸವಾಲಾಗಿದೆ.

ಶೇ. 10 ರಷ್ಟು - 5 - 6 ಬಿಲಿಯನ್ ಡಾಲರ್.​

ಶೇ. 25 ರಷ್ಟು - 15 ಬಿಲಿಯನ್ ಡಾಲರ್.​

ಶೇ. 50 ರಷ್ಟು - 30 ಬಿಲಿಯನ್ ಡಾಲರ್​.

ಶೇ. 75 ರಷ್ಟು - 44 ಬಿಲಿಯನ್ ಡಾಲರ್.

ಪ್ರಧಾನಿ ಮೋದಿಯವರ ಈ ಚಿನ್ನದ ಮೀತ ಬಳಕೆಯ ಕರೆಗೆ ಭಾರತೀಯರು ಹೇಗೆ ಸ್ಪಂದಿಸುತ್ತಾರೆ ಮತ್ತು ಇದು ಜಾಗತಿಕ ಮಾರುಕಟ್ಟೆಯ ದರಗಳ ಮೇಲೆ ಎಂತಹ ಪ್ರಭಾವ ಬೀರಲಿದೆ ಎಂಬುದು ಈಗ ಕುತೂಹಲದ ಸಂಗತಿಯಾಗಿದೆ. ಇದು ಕೇವಲ ಆರ್ಥಿಕತೆಯ ಪ್ರಶ್ನೆಯಲ್ಲ, ಬದಲಾಗಿ ದೇಶದ ಕರೆನ್ಸಿಯನ್ನು ಬಲಪಡಿಸುವ ರಾಷ್ಟ್ರೀಯ ಜವಾಬ್ದಾರಿಯಾಗಿದೆ,(ಏಜೆನ್ಸೀಸ್​).