ಚಿನ್ನದ ಆಮದು ಸುಂಕವನ್ನು ಕೇಂದ್ರ ಸರ್ಕಾರ ಹೆಚ್ಚಿಸಿದ್ದೇಕೆ? ಇದರ ಹಿಂದಿರೋ ಪ್ಲಾನ್​ ಏನು? ಕಳ್ಳಸಾಗಣೆ ಹೆಚ್ಚಾಗುವ ಆತಂಕ! Gold Import Duty

Gold Import Duty : ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ದೇಶದ ವಿದೇಶಿ ವಿನಿಮಯ ಮೀಸಲು ನಿಧಿಯನ್ನು ರಕ್ಷಿಸುವ ಉದ್ದೇಶದಿಂದ ಕನಿಷ್ಠ ಒಂದು ವರ್ಷಗಳ ಕಾಲ ಚಿನ್ನ ಖರೀದಿಸದಂತೆ ದೇಶದ ಜನತೆಗೆ ಇತ್ತೀಚೆಗೆ ಕರೆ ನೀಡಿದ್ದರು. ಇದರ ಬೆನ್ನಲ್ಲೇ ಕಠಿಣ ಕ್ರಮಕ್ಕೆ ಮುಂದಾಗಿರುವ ಕೇಂದ್ರ ಸರ್ಕಾರವು, ಚಿನ್ನ ಮತ್ತು ಬೆಳ್ಳಿಯ ಮೇಲಿನ ಆಮದು ಸುಂಕವನ್ನು ಶೇ. 6 ರಿಂದ ಶೇ. 15 ಕ್ಕೆ ಏರಿಕೆ ಮಾಡಿದೆ. ಪಶ್ಚಿಮ ಏಷ್ಯಾದ ಸಂಘರ್ಷ ಮತ್ತು ಏರುತ್ತಿರುವ ಕಚ್ಚಾ ತೈಲ ಬೆಲೆಗಳಿಂದ ಆರ್ಥಿಕತೆಯ ಮೇಲೆ ಬೀರುತ್ತಿರುವ ಒತ್ತಡವನ್ನು ತಗ್ಗಿಸಲು ಹಾಗೂ ರೂಪಾಯಿ ಮೌಲ್ಯ ಕುಸಿತವನ್ನು ತಡೆಯಲು ಸರ್ಕಾರ ಈ ಮಹತ್ವದ ನಿರ್ಧಾರ ಕೈಗೊಂಡಿದೆ.

ಕೇಂದ್ರ ಹಣಕಾಸು ಸಚಿವಾಲಯವು ಹೊರಡಿಸಿರುವ ಕಸ್ಟಮ್ಸ್ ಅಧಿಸೂಚನೆ ಸಂಖ್ಯೆ 16/2026ರ ಪ್ರಕಾರ, ಮೇ 13ರಿಂದ ಜಾರಿಗೆ ಬರುವಂತೆ ಚಿನ್ನದ ಮೇಲಿನ ಮೂಲ ಕಸ್ಟಮ್ಸ್ ಸುಂಕವನ್ನು ಶೇ. 5 ರಿಂದ ಶೇ. 10 ಕ್ಕೆ ಮತ್ತು ಕೃಷಿ ಮೂಲಸೌಕರ್ಯ ಮತ್ತು ಅಭಿವೃದ್ಧಿ ಸೆಸ್ ಅನ್ನು (AIDC) ಶೇ. 1 ರಿಂದ ಶೇ. 5 ಕ್ಕೆ ಏರಿಸಲಾಗಿದೆ. ಈ ಮಹತ್ವದ ಬದಲಾವಣೆಯಿಂದಾಗಿ ಚಿನ್ನದ ಮೇಲಿನ ಒಟ್ಟು ಆಮದು ಸುಂಕವು ಶೇ. 6 ರಿಂದ ಶೇ. 15 ಕ್ಕೆ ಏರಿಕೆಯಾದಂತಾಗಿದೆ. ಇದು ಕೇವಲ ತೆರಿಗೆ ದರದಲ್ಲಿನ ಸಣ್ಣ ಬದಲಾವಣೆಯಲ್ಲ, ಬದಲಾಗಿ ಪ್ರಸ್ತುತ ನಡೆಯುತ್ತಿರುವ ಇರಾನ್ ಯುದ್ಧದಿಂದಾಗಿ ಜಾಗತಿಕ ಮಟ್ಟದಲ್ಲಿ ಉಂಟಾಗಿರುವ ಆರ್ಥಿಕ ಒತ್ತಡದ ಸಮಯದಲ್ಲಿ ಡಾಲರ್ ಉಳಿತಾಯ ಮಾಡುವ ಬೃಹತ್ ಆರ್ಥಿಕ ಉದ್ದೇಶವನ್ನು ಹೊಂದಿದೆ. ಈ ಕ್ರಮದ ಮೂಲಕ ದೇಶದಲ್ಲಿ ಚಿನ್ನದ ಬೇಡಿಕೆಯನ್ನು ತಗ್ಗಿಸಲು, ಆಮದು ಬಿಲ್ ಕಡಿಮೆ ಮಾಡಲು ಮತ್ತು ಆ ಮೂಲಕ ಭಾರತದ ವಿದೇಶಿ ವಿನಿಮಯ ಮೀಸಲು ನಿಧಿಯನ್ನು ಭದ್ರಪಡಿಸಲು ಕೇಂದ್ರ ಸರ್ಕಾರ ಮುಂದಾಗಿದೆ.

ಈ ಅಧಿಸೂಚನೆಯು ಕೇವಲ ಆಮದು ಸುಂಕವನ್ನಷ್ಟೇ ಅಲ್ಲದೆ, ಚಿನ್ನಾಭರಣ ತಯಾರಿಕೆಯಲ್ಲಿ ಬಳಸುವ ಪೂರಕ ಪರಿಕರಗಳು ಮತ್ತು ಕೆಲವು ಕೈಗಾರಿಕಾ ಕಚ್ಚಾ ವಸ್ತುಗಳ ಮೇಲಿನ ಸುಂಕವನ್ನೂ ಪರಿಷ್ಕರಿಸಿದೆ. ವಿಶೇಷವಾಗಿ, ಅಮೂಲ್ಯ ಲೋಹಗಳನ್ನು ಹೊಂದಿರುವ ಆಶ್ ಅಥವಾ ಕ್ಯಾಟಲಿಸ್ಟ್‌ಗಳಂತಹ ಪುನರ್ಬಳಕೆ ವಿಭಾಗಗಳಿಗೆ ಶೇ. 4.35 ರಿಂದ 5 ರಷ್ಟು ರಿಯಾಯಿತಿ ದರವನ್ನು ನಿಗದಿಪಡಿಸಲಾಗಿದೆ. ಹೊಸದಾಗಿ ಚಿನ್ನವನ್ನು ಆಮದು ಮಾಡಿಕೊಳ್ಳುವ ಬದಲು, ದೇಶೀಯವಾಗಿ ಲಭ್ಯವಿರುವ ಚಿನ್ನವನ್ನು ಮರುಬಳಕೆ ಮಾಡಲು ಅಥವಾ ರೀಸೈಕ್ಲಿಂಗ್ ಮಾಡಲು ಉದ್ಯಮವನ್ನು ಪ್ರೇರೇಪಿಸುವುದು ಸರ್ಕಾರದ ಈ ಕ್ರಮದ ಹಿಂದಿರುವ ಸ್ಪಷ್ಟ ಉದ್ದೇಶವಾಗಿದೆ.

ಭಾರತದಲ್ಲಿ ಚಿನ್ನದ ಉತ್ಪಾದನೆ ಇಲ್ಲದಿರುವುದರಿಂದ ದೇಶದ ಸಂಪೂರ್ಣ ಬೇಡಿಕೆಯನ್ನು ಅಮೆರಿಕನ್ ಡಾಲರ್ ನೀಡಿ ಆಮದು ಮಾಡಿಕೊಳ್ಳುವ ಮೂಲಕವೇ ಪೂರೈಸಲಾಗುತ್ತದೆ. ಕಳೆದ 2025-26ರ ಸಾಲಿನಲ್ಲಿ ಭಾರತವು ದಾಖಲೆಯ 71.98 ಶತಕೋಟಿ ಡಾಲರ್ ವೆಚ್ಚದಲ್ಲಿ ಚಿನ್ನವನ್ನು ಆಮದು ಮಾಡಿಕೊಂಡಿದ್ದು, ಇದು ಒಟ್ಟು ಆಮದು ಬಿಲ್‌ನ ಶೇ. 9-10 ರಷ್ಟಿದೆ. ಪ್ರಸ್ತುತ ಮಧ್ಯಪ್ರಾಚ್ಯದ ಸಂಘರ್ಷ ಮತ್ತು ಕಚ್ಚಾ ತೈಲ ಬೆಲೆ ಏರಿಕೆಯಿಂದಾಗಿ ವಿದೇಶಿ ವಿನಿಮಯ ಮೀಸಲು ನಿಧಿ ಕುಸಿಯುತ್ತಿದ್ದು, ಚಾಲ್ತಿ ಖಾತೆ ಕೊರತೆ (CAD) ಹೆಚ್ಚಾಗುವ ಭೀತಿ ಇದೆ. ಈ ಹಿನ್ನೆಲೆಯಲ್ಲಿ, ಚಿನ್ನದ ಆಮದನ್ನು ಕಡಿತಗೊಳಿಸುವ ಮೂಲಕ ಡಾಲರ್ ಉಳಿಸಲು ಸರ್ಕಾರ ಮುಂದಾಗಿದೆ. ಒಂದು ವೇಳೆ ಚಿನ್ನದ ಆಮದು ಶೇ. 30 ರಿಂದ 40 ರಷ್ಟು ಇಳಿಕೆಯಾದರೆ, ವಾರ್ಷಿಕವಾಗಿ ಸುಮಾರು 20 ರಿಂದ 25 ಶತಕೋಟಿ ಡಾಲರ್ ಉಳಿತಾಯವಾಗಲಿದೆ ಎಂದು ಅಂದಾಜಿಸಲಾಗಿದೆ.

ಕೇಂದ್ರ ಸರ್ಕಾರದ ಸುಂಕ ಏರಿಕೆಯ ನಿರ್ಧಾರದಿಂದಾಗಿ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ತಕ್ಷಣವೇ ದುಬಾರಿಯಾಗಿದ್ದು, ಚಿಲ್ಲರೆ ಮಾರುಕಟ್ಟೆಯಲ್ಲಿ ಆಭರಣಗಳ ಬೆಲೆಯ ಮೇಲೆ ಇದು ನೇರ ಪರಿಣಾಮ ಬೀರಿದೆ. ಎಂಸಿಎಕ್ಸ್ (MCX) ಮಾರುಕಟ್ಟೆಯಲ್ಲಿ ಬೆಳಗ್ಗೆ 9:59ರ ಸುಮಾರಿಗೆ ಚಿನ್ನ ಮತ್ತು ಬೆಳ್ಳಿ ಎರಡೂ ಶೇ. 6ಕ್ಕಿಂತ ಹೆಚ್ಚು ಏರಿಕೆ ಕಂಡು ಕ್ರಮವಾಗಿ 1,63,000 ರೂ. ಹಾಗೂ 2,96,600 ರೂ.ನಲ್ಲಿ ವಹಿವಾಟು ನಡೆಸುತ್ತಿದ್ದವು. ಸದ್ಯದ ಮಾಹಿತಿ ಪ್ರಕಾರ, ಭಾರತದಲ್ಲಿ 24 ಕ್ಯಾರೆಟ್ ಚಿನ್ನದ ಬೆಲೆ ಪ್ರತಿ ಗ್ರಾಮ್‌ಗೆ ಸುಮಾರು 15,475 ರೂ. ತಲುಪಿದ್ದರೆ, ಬೆಳ್ಳಿಯು ಪ್ರತಿ ಕೆಜಿಗೆ 2,78,000 ರೂ. ನಿಂದ 2,90,000 ರೂ. ಆಸುಪಾಸಿನಲ್ಲಿ ಮಾರಾಟವಾಗುತ್ತಿದೆ.

ಭಾರತದಲ್ಲಿ ಚಿನ್ನವನ್ನು ಕೇವಲ ಆಭರಣವಾಗಿ ಮಾತ್ರವಲ್ಲದೆ, ಶುಭ ಸಮಾರಂಭಗಳಿಗೆ ಸಂಪ್ರದಾಯದಂತೆ ಮತ್ತು ಆಪತ್ಕಾಲದ ಸುರಕ್ಷಿತ ಹೂಡಿಕೆಯಾಗಿಯೂ ಪರಿಗಣಿಸಲಾಗುತ್ತದೆ. ಇದೀಗ ಸರ್ಕಾರದ ಸುಂಕ ಏರಿಕೆ ಮತ್ತು ಪ್ರಧಾನಿಯವರ ಮನವಿ ಈ ಎರಡೂ ನಡವಳಿಕೆಗಳ ಮೇಲೆ ಪರಿಣಾಮ ಬೀರಲಿದ್ದು, ಹೂಡಿಕೆದಾರರು ಭೌತಿಕ ಚಿನ್ನದ ಬದಲು ಡಿಜಿಟಲ್ ಗೋಲ್ಡ್ ಅಥವಾ ಗೋಲ್ಡ್ ಇಟಿಎಫ್‌ಗಳ ಕಡೆಗೆ ಹೆಚ್ಚು ಆಕರ್ಷಿತರಾಗುವ ಸಾಧ್ಯತೆಯಿದೆ. ಇದರಿಂದ ಜನರು ಹೊಸ ಆಭರಣಗಳ ಖರೀದಿಯನ್ನು ಮುಂದೂಡಬಹುದು ಅಥವಾ ಹಳೆಯ ಚಿನ್ನವನ್ನು ನೀಡಿ ಹೊಸ ಆಭರಣಗಳನ್ನು ಮಾಡಿಸಿಕೊಳ್ಳುವ 'ಮರುಬಳಕೆ' ಪದ್ಧತಿಗೆ ಹೆಚ್ಚಿನ ಒತ್ತು ನೀಡಬಹುದು.

ಆರ್ಥಿಕ ದೃಷ್ಟಿಯಿಂದ ನೋಡುವುದಾದರೆ, ಈ ಕ್ರಮವು ಕಚ್ಚಾ ತೈಲದಂತಹ ಅಗತ್ಯ ವಸ್ತುಗಳ ಆಮದಿಗೆ ಬೇಕಾದ ವಿದೇಶಿ ವಿನಿಮಯವನ್ನು ಉಳಿಸಲು ಸಹಕಾರಿಯಾಗಿದೆ. ಭಾರತವು ತನ್ನ ತೈಲದ ಅಗತ್ಯತೆಯ ಶೇ. 88 ರಷ್ಟು ಭಾಗವನ್ನು ಆಮದಿನ ಮೂಲಕವೇ ಪೂರೈಸಿಕೊಳ್ಳುತ್ತಿರುವುದರಿಂದ, ಚಿನ್ನದ ಮೇಲಿನ ಡಾಲರ್ ವೆಚ್ಚ ಕಡಿಮೆಯಾದರೆ ರೂಪಾಯಿ ಮೌಲ್ಯಕ್ಕೆ ಬೆಂಬಲ ಸಿಗುತ್ತದೆ ಮತ್ತು ಚಾಲ್ತಿ ಖಾತೆ ಕೊರತೆ (CAD) ತಗ್ಗುತ್ತದೆ. ಅಂತಿಮವಾಗಿ, ಸುಂಕ ಏರಿಕೆಯು ಅನಗತ್ಯ ಚಿನ್ನದ ಸಂಗ್ರಹಣೆಯನ್ನು ತಡೆದು ದೇಶೀಯ ಮರುಬಳಕೆ ವ್ಯವಸ್ಥೆಯನ್ನು ಬಲಪಡಿಸಲು ನೆರವಾಗಲಿದೆ.

ಆಮದು ಸುಂಕದ ಏರಿಕೆಯು ಚಿನ್ನದ ಕಳ್ಳಸಾಗಣೆ ಮತ್ತು ಅನಧಿಕೃತ ಮಾರುಕಟ್ಟೆ ಮತ್ತೆ ಚೇತರಿಸಿಕೊಳ್ಳಲು ಕಾರಣವಾಗಬಹುದು ಎಂದು ಮಾರುಕಟ್ಟೆ ತಜ್ಞರು ಮತ್ತು ಆಭರಣ ವ್ಯಾಪಾರಿಗಳ ಒಕ್ಕೂಟದ ಮುಖಂಡರು ಎಚ್ಚರಿಸಿದ್ದಾರೆ. ಸುಂಕದ ದರವು ಶೇ. 15ಕ್ಕೆ ಏರಿರುವುದರಿಂದ ನೆರೆಯ ರಾಷ್ಟ್ರಗಳ ಮೂಲಕ ಅಕ್ರಮವಾಗಿ ಚಿನ್ನ ತರುವುದು ಲಾಭದಾಯಕವಾಗಲಿದ್ದು, ಇದು ಸಮಾಂತರ ಆರ್ಥಿಕತೆ ಸೃಷ್ಟಿಸಬಹುದು ಎಂಬ ಆತಂಕ ವ್ಯಕ್ತವಾಗಿದೆ. ಪ್ರಧಾನಿಯವರ ಮಿತವ್ಯಯದ ಕರೆ ಮತ್ತು ಸುಂಕ ಏರಿಕೆಯಿಂದ ಅಧಿಕೃತ ವ್ಯಾಪಾರ ಕಷ್ಟವಾಗಲಿದ್ದು, ನಗದು ವ್ಯವಹಾರಗಳು ಹೆಚ್ಚಾಗುವ ಸಾಧ್ಯತೆ ಇರುವುದರಿಂದ ಕಸ್ಟಮ್ಸ್ ಮತ್ತು ಡಿಆರ್‌ಐ ವಿಭಾಗಗಳಿಗೆ ಕಳ್ಳಸಾಗಣೆ ತಡೆಯುವುದು ದೊಡ್ಡ ಸವಾಲಾಗಿ ಪರಿಣಮಿಸಲಿದೆ ಎಂದು ಆಲ್ ಇಂಡಿಯಾ ಜೆಮ್ಸ್ ಅಂಡ್ ಜ್ಯುವೆಲ್ಲರಿ ಕೌನ್ಸಿಲ್ ಅಧ್ಯಕ್ಷ ರಾಜೇಶ್ ರೊಕ್ಡೆ ತಿಳಿಸಿದ್ದಾರೆ.

ಸುಂಕ ಏರಿಕೆ ಮತ್ತು ಮಿತವ್ಯಯದ ಕರೆ ಆಭರಣ ಉದ್ಯಮಿಗಳ ಮೇಲೆ ನೇರ ಪರಿಣಾಮ ಬೀರಿದ್ದು, ಮಾರುಕಟ್ಟೆಯಲ್ಲಿ ಗ್ರಾಹಕರ ಸಂಖ್ಯೆ ಕಡಿಮೆಯಾಗುವ ಹಾಗೂ ಬಂಡವಾಳದ ವೆಚ್ಚ ಹೆಚ್ಚಾಗುವ ಭೀತಿ ಎದುರಾಗಿದೆ. ಈ ವಿಚಾರದಲ್ಲಿ ಉದ್ಯಮ ವಲಯವು ಇಬ್ಬಾಗವಾಗಿದ್ದು, ಕೆಲವು ವ್ಯಾಪಾರಿಗಳು ಪ್ರತಿಭಟನಾರ್ಥವಾಗಿ ಮಳಿಗೆಗಳನ್ನು ಮುಚ್ಚಿದ್ದರೆ, ಮಲಬಾರ್ ಗೋಲ್ಡ್ ಅಂಡ್ ಡೈಮಂಡ್ಸ್‌ನಂತಹ ಸಂಸ್ಥೆಗಳು ಪ್ರಧಾನಿಯವರ ಕರೆಗೆ ಬೆಂಬಲ ಸೂಚಿಸಿವೆ. ಅಲ್ಲದೆ, ಚಿನ್ನದ ನಗದೀಕರಣ ಯೋಜನೆಯನ್ನು (GMS) ಬಲಪಡಿಸಲು ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿವೆ. ಒಟ್ಟಾರೆಯಾಗಿ, ಮೊದಲು ಪ್ರಧಾನಿಯವರ ನೈತಿಕ ಮನವಿ ಮತ್ತು ಈಗ ಸರ್ಕಾರದ ತೆರಿಗೆ ನೀತಿಯು "ಚಿನ್ನದ ಖರೀದಿ ಭಾರತದ ಡಾಲರ್ ನಿಧಿಯನ್ನು ಕುಗ್ಗಿಸುತ್ತಿದೆ, ಹಾಗಾಗಿ ಇದನ್ನು ತಡೆಹಿಡಿಯಿರಿ" ಎಂಬ ಸ್ಪಷ್ಟ ಸಂದೇಶವನ್ನು ಸಾರುತ್ತಿವೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ, (ಏಜೆನ್ಸೀಸ್​).