ಜಾಗತಿಕ ಆರ್ಥಿಕತೆಗಳಿಗೆ ಬಿಸಿ ತಟ್ಟಲಿದೆ
ಮುಂಗಾರು ಮಳೆ ಕಡಿಮೆಯಾಗುವುದು, ವಾತಾವರಣ ತೀವ್ರವಾಗಿ ಬಿಸಿಯಾಗುವುದು ಮತ್ತು ಭೀಕರ ಬರಗಾಲ ಸೃಷ್ಟಿಸುವುದು ಇದರ ಮುಖ್ಯ ಲಕ್ಷಣಗಳಾಗಿವೆ. ಫಿಲಿಪೈನ್ಸ್ ಕೇಂದ್ರ ಬ್ಯಾಂಕಿನ ಉಪ ಗವರ್ನರ್ ಸೆನೋ ರೊನಾಲ್ಡ್ ಅಬೆನೋಯಾ ಅವರ ಪ್ರಕಾರ, ಈ 'ಗಾಡ್ಜಿಲ್ಲಾ' ಆಘಾತವು ಮುಂದಿನ 4 ರಿಂದ 5 ತಿಂಗಳುಗಳ ಕಾಲ ಜಾಗತಿಕ ಆರ್ಥಿಕತೆಗಳನ್ನು ನಿಧಾನವಾಗಿ ಸುಡಲಿದೆ. ಈಗಾಗಲೇ ವಿಶ್ವದ ಹಲವು ಭಾಗಗಳಲ್ಲಿ ತಾಪಮಾನ ಅಸಾಮಾನ್ಯವಾಗಿ ಏರಿಕೆಯಾಗಿದ್ದು, ಕೃಷಿ ಉತ್ಪಾದನೆಯನ್ನು ತೀವ್ರವಾಗಿ ಹಾನಿಗೊಳಿಸಿದೆ. ಭಾರತೀಯ ಹವಾಮಾನ ಇಲಾಖೆ (IMD) ನೀಡಿರುವ ವರದಿಯ ಪ್ರಕಾರ, ಈ ವರ್ಷದ ಜೂನ್‌ನಿಂದ ಸೆಪ್ಟೆಂಬರ್‌ವರೆಗೆ ಮುಂಗಾರು ಮಳೆಯು ಶೇ. 13ರಷ್ಟು ಕುಸಿದಿದ್ದು, ಮುಂಬರುವ ದಿನಗಳಲ್ಲಿ ಗಾಡ್ಜಿಲ್ಲಾ ಈ ಪರಿಸ್ಥಿತಿಯನ್ನು ಮತ್ತಷ್ಟು ಹದಗೆಡಿಸುವ ಆತಂಕವಿದೆ.
ಈ ಹೊಸ ವಿಪತ್ತಿನ ನೇರ ಬಿಸಿ ಭಾರತದ ಆರ್ಥಿಕತೆಯ ಮೇಲೂ ತೀವ್ರವಾಗಿ ತಟ್ಟಲಿದೆ. ಭಾರತದಲ್ಲಿ 2025ರಲ್ಲಿ ಶೇ. 2.1ರಷ್ಟಿದ್ದ ಸರಾಸರಿ ಹಣದುಬ್ಬರವು 2026ಕ್ಕೆ ಬರೋಬ್ಬರಿ ಶೇ. 5ಕ್ಕೆ ಜಿಗಿಯುವ ನಿರೀಕ್ಷೆಯಿದೆ. ಅದೇ ರೀತಿ, ದೇಶದ ಒಟ್ಟು ಆಂತರಿಕ ಉತ್ಪನ್ನದ (GDP) ಬೆಳವಣಿಗೆಯು 2025ರ ಶೇ. 7.8ರಿಂದ 2026ರಲ್ಲಿ ಶೇ. 7ಕ್ಕೆ ಕುಸಿಯಲಿದೆ ಎಂದು ಅಂದಾಜಿಸಲಾಗಿದೆ. ಕೃಷಿ ಕ್ಷೇತ್ರವೇ ಭಾರತೀಯ ಆರ್ಥಿಕತೆಯ ಬೆನ್ನೆಲುಬು ಆಗಿರುವುದರಿಂದ, ಮಳೆಯ ವೈಪರೀತ್ಯವು ಗ್ರಾಮೀಣ ಆರ್ಥಿಕತೆ, ಎಫ್‌ಎಂಸಿಜಿ (FMCG) ಮಾರುಕಟ್ಟೆ, ಬ್ಯಾಂಕಿಂಗ್, ಶೇರು ಮಾರುಕಟ್ಟೆ ಮತ್ತು ಆಟೋಮೊಬೈಲ್ ವಲಯಗಳ ಮೇಲೂ ತೀವ್ರ ಪರಿಣಾಮ ಬೀರಲಿದೆ.
ಕೃಷಿ ಕ್ಷೇತ್ರಕ್ಕೆ ಕಂಟಕ
ಕೃಷಿ ಉತ್ಪನ್ನಗಳ ತೀವ್ರ ಕುಸಿತದಿಂದಾಗಿ ಆಹಾರ ಪದಾರ್ಥಗಳ ಬೆಲೆಗಳು ಗಗನಕ್ಕೇರಲಿವೆ. ಇರಾನ್-ಯುಎಸ್ ಯುದ್ಧದ ಪರಿಣಾಮದಿಂದ ಕಚ್ಚಾ ತೈಲ ಬೆಲೆ ಈಗಾಗಲೇ ಏರಿಕೆಯಾಗಿದ್ದು, ಇದರ ಜತೆಗೆ ಗಾಡ್ಜಿಲ್ಲಾ ಸೃಷ್ಟಿಸುವ ಆಹಾರ ಕೊರತೆಯು ಬೆಂಕಿ ಹಚ್ಚಿದಂತಾಗಲಿದೆ. ಗೊಬ್ಬರಗಳ ಬೆಲೆ ಗಗನಕ್ಕೇರಿರುವುದರಿಂದ ಕೃಷಿ ಕ್ಷೇತ್ರ ಈಗಾಗಲೇ ತತ್ತರಿಸಿದೆ. ಇದರ ಬೆನ್ನಲ್ಲೇ ಬಂದಪ್ಪಳಿಸುತ್ತಿರುವ ಗಾಡ್ಜಿಲ್ಲಾ ಮುಂಗಾರನ್ನು ಸಂಪೂರ್ಣವಾಗಿ ಬುಡಮೇಲು ಮಾಡಲಿದ್ದು, ಜನಸಾಮಾನ್ಯರ ಜೇಬಿಗೆ ಇದು ದೊಡ್ಡ ಹೊಡೆತ ನೀಡಲಿದೆ.
ಬಡ್ಡಿ ದರ ಹೆಚ್ಚಳ ಅನಿವಾರ್ಯ
ಹಣದುಬ್ಬರವನ್ನು ನಿಯಂತ್ರಣಕ್ಕೆ ತರಲು ವಿಶ್ವದ ವಿವಿಧ ದೇಶಗಳ ಕೇಂದ್ರ ಬ್ಯಾಂಕ್‌ಗಳು ಬಡ್ಡಿ ದರಗಳನ್ನು ಅನಿವಾರ್ಯವಾಗಿ ಏರಿಕೆ ಮಾಡುತ್ತಿವೆ. ಅಮೆರಿಕದ ಫೆಡರಲ್ ರಿಸರ್ವ್ ತನ್ನ ಕೊನೆಯ ಸಭೆಯಲ್ಲಿ ಬಡ್ಡಿ ದರವನ್ನು ಶೇ. 0.25ರಷ್ಟು ಹೆಚ್ಚಿಸಿದೆ. ಭಾರತದಲ್ಲೂ ಕೂಡ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ರೆಪೋ ದರವನ್ನು ಹೆಚ್ಚಿಸುವ ಸಾಧ್ಯತೆಯಿದ್ದು, ಇದು ಜಾರಿಗೆ ಬಂದರೆ ಗೃಹ ಸಾಲ, ವಾಹನ ಸಾಲ ಸೇರಿದಂತೆ ಎಲ್ಲಾ ರೀತಿಯ ಸಾಲಗಳ ಮೇಲಿನ ಬಡ್ಡಿಯ ಭಾರ ಹೆಚ್ಚಾಗಲಿದೆ. ಇದು ಮಧ್ಯಮ ವರ್ಗದವರು ಮತ್ತು ಉದ್ಯಮ ರಂಗಕ್ಕೆ ತೀವ್ರ ಆಘಾತ ತರಲಿದೆ.
ಡಿಸೆಂಬರ್ನಲ್ಲಿ ಉಗ್ರ ರೂಪ
ಹವಾಮಾನ ತಜ್ಞರ ಎಚ್ಚರಿಕೆಯ ಪ್ರಕಾರ, ಈ ಎಲ್ ನಿನೋದ ದುಷ್ಪರಿಣಾಮಗಳು ನವೆಂಬರ್‌ನಿಂದ ತೀವ್ರಗೊಳ್ಳಲಿದ್ದು, ಡಿಸೆಂಬರ್ನಲ್ಲಿ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಲಿದೆ. ಈ ವಿನಾಶಕಾರಿ ಪ್ರಭಾವವು ಕನಿಷ್ಠ 2027ರ ಫೆಬ್ರವರಿಯವರೆಗೆ ಮುಂದುವರಿಯಲಿದೆ. ಕೆಲವು ಪ್ರದೇಶಗಳು ಭೀಕರ ಬರಗಾಲವನ್ನು ಎದುರಿಸಿದರೆ, ಇನ್ನು ಕೆಲವು ಕಡೆಗಳಲ್ಲಿ ಮೋಡ ಒಡೆದಂತೆ ದಿಢೀರ್ ಮಳೆಯಾಗಿ ಪ್ರವಾಹ ಉಂಟಾಗಲಿದೆ. ಇಂಡೋನೇಷ್ಯಾದಲ್ಲಿ ರೈತರು ತಮ್ಮ ಜಮೀನುಗಳಿಗೆ ಬೆಂಕಿ ಹಚ್ಚುತ್ತಿರುವುದು ಈ ಎಲ್ ನಿನೋದ ಶಕ್ತಿಯನ್ನು ಮತ್ತಷ್ಟು ಹೆಚ್ಚಿಸಿದೆ ಎಂದು ನಂಬಲಾಗಿದೆ.
ಕೇವಲ ಭಾರತ ಮಾತ್ರವಲ್ಲದೆ, ನೆರೆಯ ಪಾಕಿಸ್ತಾನ, ಬಾಂಗ್ಲಾದೇಶ, ಚೀನಾ ಮತ್ತು ಫಿಲಿಪೈನ್ಸ್ ದೇಶಗಳೂ ಕೂಡ ಈ ಆರ್ಥಿಕ ಬಿರುಗಾಳಿಗೆ ಸಿಲುಕಿ ನರಳಲಿವೆ. ಪಾಕಿಸ್ತಾನದಲ್ಲಿ 2026ರಲ್ಲಿ ಹಣದುಬ್ಬರವು ಶೇ. 7.1ಕ್ಕೆ ಏರಲಿದೆ ಎಂದು ಅಂದಾಜಿಸಲಾಗಿದೆ. ಬಾಂಗ್ಲಾದೇಶದಲ್ಲಂತೂ ಹಣದುಬ್ಬರವು ಶೇ. 8.7ರಷ್ಟು ಅಧಿಕವಾಗಿರಲಿದೆ. ಚೀನಾ, ಥಾಯ್ಲೆಂಡ್ ಮತ್ತು ಇಂಡೋನೇಷ್ಯಾ ದೇಶಗಳೂ ಕೂಡ ಜಾಗತಿಕ ಪೂರೈಕೆ ಸರಪಳಿಯ ವ್ಯತ್ಯಯದಿಂದಾಗಿ ಆರ್ಥಿಕ ಹಿನ್ನಡೆಯನ್ನು ಎದುರಿಸಬೇಕಾಗುತ್ತದೆ.
