ಇದನ್ನೂ ಓದಿ : ಸಾಯಿ ಪಲ್ಲವಿಯ ವಾರಿಯರ್ ಸೀತಾ ಲುಕ್‌ಗೆ ವಿರೋಧ: ಟ್ರೋಲಿಗರಿಗೆ ಲಾರಾ ದತ್ತಾ ಖಡಕ್ ಕ್ಲಾಸ್! Ramayana movie
ದೀಪಾವಳಿ ಹಬ್ಬ ಮುಗಿದಿದ್ದು, ಛತ್ ಪೂಜೆಯ ಸಿದ್ಧತೆಗಳು ಅಂತಿಮ ಹಂತದಲ್ಲಿವೆ. ಈ ಹಬ್ಬಗಳ ಸಂದರ್ಭದಲ್ಲಿ ಪತ್ರಕರ್ತರು ತಮ್ಮ ಕುಟುಂಬದೊಂದಿಗೆ ಕಾಲ ಕಳೆಯುವ ಬದಲು ಬಿಡುವಿಲ್ಲದ ವೃತ್ತಿಜೀವನದ ನಡುವೆಯೂ ಕಾರ್ಯಕ್ರಮಕ್ಕೆ ಆಗಮಿಸಿರುವುದಕ್ಕೆ ಧನ್ಯವಾದಗಳು ಎಂದು ಹೇಳಿದರು. ಬ್ರೇಕಿಂಗ್ ನ್ಯೂಸ್ ಬೆನ್ನತ್ತಿ ಓಡುವ ನಿಮ್ಮ ಕೆಲಸದ ನಡುವೆಯೂ ಇಂತಹ ಕಾರ್ಯಕ್ರಮಕ್ಕೆ ಸಮಯ ನೀಡಿರುವುದು ಸಂತಸದ ಸಂಗತಿ ಎಂದರು.
ಮಾಧ್ಯಮ ಕ್ಷೇತ್ರದ ಬದಲಾವಣೆಯನ್ನು ವಿವರಿಸಿದ ಮೋದಿ
1990ರ ದಶಕದಲ್ಲಿ ದೇಶಾದ್ಯಂತ ಎರಡು ಪ್ರಮುಖ ಯಾತ್ರೆಗಳ ಜವಾಬ್ದಾರಿಯನ್ನು ತಮಗೆ ವಹಿಸಲಾಗಿತ್ತು. ಆಗ ಪತ್ರಿಕಾ ಪ್ರಕಟಣೆ ಕಳುಹಿಸಬೇಕೆಂದರೆ ಫ್ಯಾಕ್ಸ್ ಯಂತ್ರಕ್ಕಾಗಿ ಹುಡುಕಾಡಬೇಕಾದ ಪರಿಸ್ಥಿತಿ ಇತ್ತು. ದೆಹಲಿಗೆ ಬಂದ ನಂತರವೂ ಮಾಧ್ಯಮ ಸಂವಹನದ ಜವಾಬ್ದಾರಿ ತಮ್ಮ ಬಳಿಯೇ ಮುಂದುವರಿದಿತ್ತು ಎಂದು ನೆನಪಿಸಿಕೊಂಡರು. ಆಗಿನ ದೀಪಾವಳಿ ಮಿಲನ ಕಾರ್ಯಕ್ರಮಗಳಲ್ಲಿ ಅತಿಥಿಗಳಿಗಾಗಿ ಕುರ್ಚಿಗಳನ್ನು ಹಾಕುವುದು, ಬಂದವರನ್ನು ಸ್ವಾಗತಿಸಿ ಆತಿಥ್ಯ ವಹಿಸುವುದು ತಮ್ಮ ಕೆಲಸವಾಗಿತ್ತು. ಆಗ ಕ್ಯಾಮೆರಾಗಳ ಸಂಖ್ಯೆ ಕಡಿಮೆಯಿತ್ತು. ಆದರೆ ಪತ್ರಕರ್ತರು ಮತ್ತು ರಾಜಕೀಯ ನಾಯಕರ ನಡುವಿನ ಆತ್ಮೀಯತೆ ಮಾತ್ರ ಇಂದಿನಂತೆಯೇ ಗಟ್ಟಿಯಾಗಿತ್ತು ಎಂದು ಹೇಳಿದರು.
ಆ ದಿನಗಳಲ್ಲಿ ಕಲಿತ ಪಾಠಗಳು ಇಂದಿಗೂ ತಮ್ಮ ಕೆಲಸಕ್ಕೆ ನೆರವಾಗುತ್ತಿವೆ ಎಂದು ತಿಳಿಸಿದ ಮೋದಿ, ಪತ್ರಕರ್ತರೊಂದಿಗಿನ ಮತ್ತೊಂದು ಸ್ವಾರಸ್ಯಕರ ಘಟನೆಯನ್ನೂ ಹಂಚಿಕೊಂಡರು. ಕಳೆದ ತಿಂಗಳು ತಾವು ಸರ್ಕಾರದ ಮುಖ್ಯಸ್ಥರಾಗಿ ನಿರಂತರ 25 ವರ್ಷಗಳನ್ನು ಪೂರ್ಣಗೊಳಿಸಿದ್ದಾಗಿ ನೆನಪಿಸಿದ ಅವರು, ಪತ್ರಕರ್ತರು ತಮ್ಮನ್ನು ಹೇಗೆ ಕೆಲವೊಮ್ಮೆ ಇಕ್ಕಟ್ಟಿಗೆ ಸಿಲುಕಿಸುತ್ತಿದ್ದರು ಎಂಬುದನ್ನು ಹಾಸ್ಯಭರಿತವಾಗಿ ವಿವರಿಸಿದರು.
ಒಂದು ದಿನ ಪತ್ರಕರ್ತರ ಗುಂಪೊಂದು ತಮ್ಮ ಕೊಠಡಿಗೆ ಬಂದಿತ್ತು. ಸಾಮಾನ್ಯವಾಗಿ ಹೀಗೆ ಗುಂಪಾಗಿ ಬರುವುದು ಅಪರೂಪವಾಗಿತ್ತು. ಆಗ ಪತ್ರಕರ್ತೆಯರ ತಂಡವೂ ಸಾಕಷ್ಟು ಸಂಖ್ಯೆಯಲ್ಲಿತ್ತು. ನಮಗೆ ಸಿಹಿ ತಿನಿಸು ನೀಡಿ, ನೀವು ಗುಜರಾತ್‌ಗೆ ಹೋಗುತ್ತಿದ್ದೀರಿ, ಮುಖ್ಯಮಂತ್ರಿಯಾಗಲಿದ್ದೀರಿ ಎಂದು ಅವರು ಹೇಳಿದ್ದರು. ಆ ಸಂದರ್ಭವನ್ನು ಮೋದಿ ಮೆಲುಕು ಹಾಕಿದರು.
25 ವರ್ಷಗಳ ಆಡಳಿತದ ಪಯಣ
2001ರ ಅಕ್ಟೋಬರ್ 7ರಂದು ನರೇಂದ್ರ ಮೋದಿ ಗುಜರಾತ್ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದ್ದರು. ಆ ಮೂಲಕ ಆರಂಭವಾದ ಅವರ ಸರ್ಕಾರದ ಮುಖ್ಯಸ್ಥನ ಪಯಣ 2026ರ ಅಕ್ಟೋಬರ್ 7ಕ್ಕೆ 25 ವರ್ಷಗಳನ್ನು ಪೂರೈಸಿದೆ. 2014ರ ಮೇ 26ರಂದು ಭಾರತದ ಪ್ರಧಾನಿಯಾಗಿ ಅಧಿಕಾರ ಸ್ವೀಕರಿಸಿದ ಅವರು, 2024ರ ಜೂನ್ 9ರಂದು ಮೂರನೇ ಬಾರಿಗೆ ಪ್ರಧಾನಿಯಾಗಿ ಪ್ರಮಾಣವಚನ ಸ್ವೀಕರಿಸಿದ್ದಾರೆ.
