ನವದೆಹಲಿ: ಮಗ ಸ್ಮಿತ್ ಮಚ್ಚಾರ್ ಮಾಡಿದ ಸಾಹಸದ ಸುದ್ದಿ ತಿಳಿಯುತ್ತಿದ್ದಂತೆ ಅವರ ತಂದೆ-ತಾಯಿಯ ಮೊದಲ ಪ್ರತಿಕ್ರಿಯೆ ಭಯವಾಗಿತ್ತು. ಆ ಆಘಾತದಿಂದ ಬೇಗನೆ ಚೇತರಿಸಿಕೊಂಡ ಅವರು, ಕೂಡಲೇ ದೇವಸ್ಥಾನಕ್ಕೆ ಧಾವಿಸಿ ಪ್ರಾರ್ಥನೆ ಮಾಡಿದರು ಎಂಬ ವಿಷಯವನ್ನು ಪೈಲಟ್ ತಂದೆ (Smit Machchhar Father) ಭೂಪೇಂದ್ರ ಮಚ್ಚಾರ್ ಅವರು ತಮ್ಮ ಜೀವನದ ಅತ್ಯಂತ ಕಷ್ಟದ ಗಂಟೆಗಳನ್ನು ಮಾಧ್ಯಮದ ಮುಂದೆ ಹಂಚಿಕೊಂಡಿದ್ದಾರೆ.
ಎನ್ಡಿಟಿವಿ ಜೊತೆ ಮಾತನಾಡಿದ ಸ್ಮಿತ್ ತಂದೆ ಭೂಪೇಂದ್ರ ಮಚ್ಚಾರ್, ಎಲ್ಲಾ ಪೋಷಕರಂತೆ, ಮೊದಲು ಅವರ ಮನಸ್ಸಿಗೆ ಬಂದ ಆಲೋಚನೆ ಆಘಾತ ಮತ್ತು ಭಯದ್ದು. ತಕ್ಷಣವೇ ನಾವು ದೇವರ ಮುಂದೆ ದೀಪ ಹಚ್ಚಿ ಪ್ರಾರ್ಥಿಸಿದೆವು ಎಂದು ಅವರು ತಿಳಿಸಿದರು.
ದೇವರ ಆಶೀರ್ವಾದವಲ್ಲದೇ ಮತ್ತೇನು ಇಲ್ಲ!
ಮುಂದುವರೆದು ಮಾತನಾಡಿದ ಭೂಪೇಂದ್ರ, ಯಾರೂ ಈ ರೀತಿಯ ಪರಿಸ್ಥಿತಿಗಾಗಿ ನಿರ್ದಿಷ್ಟವಾಗಿ ತರಬೇತಿ ಪಡೆದಿರುವುದಿಲ್ಲ. ಆದರೆ ಇದು ದೇವರ ಕೃಪೆ. ಕೆಲವು ಆಂತರಿಕ ಶಕ್ತಿ ಅವನಿಗೆ ಮಾರ್ಗದರ್ಶನ ನೀಡಿತು. ಬಿಕ್ಕಟ್ಟು ಎದುರಾದಾಗ, ಅವನು ತನ್ನ ಪ್ರತಿಯೊಂದು ಶಕ್ತಿಯನ್ನು ಬಳಸಿ ಅದನ್ನು ಎದುರಿಸಿದ. ಇದು ಎಲ್ಲಕ್ಕಿಂತ ಹೆಚ್ಚಾಗಿ ದೇವರ ಆಶೀರ್ವಾದ ಎಂಬುದು ನಮ್ಮ ನಂಬಿಕೆ ಎಂದು ಅವರು ಹೇಳಿದರು. ಗಾಯಗೊಂಡ ಪುತ್ರ ಸ್ಮಿತ್ ಚೇತರಿಸಿಕೊಳ್ಳುತ್ತಿದ್ದು, ಆದರೆ ಅವರ ಗಾಯಗಳು ಸಂಪೂರ್ಣವಾಗಿ ಗುಣಮುಖವಾಗಲು ಸ್ವಲ್ಪ ಸಮಯ ಹಿಡಿಯುತ್ತದೆ ಎಂದು ತಿಳಿಸಿದರು.
ಈ ಗಾಯಗಳು ಗುಣಮುಖವಾಗಲು ಸಮಯ ಹಿಡಿಯುತ್ತದೆ ಎಂದು ವೈದ್ಯರು ಹೇಳಿದ್ದಾರೆ. ಅವನ ತಲೆಗೆ ಮತ್ತು ಎರಡೂ ಕೈಗಳಿಗೆ ಗಾಯಗಳಾಗಿದ್ದು, ಶಸ್ತ್ರಚಿಕಿತ್ಸೆ ಮಾಡಲಾಗಿದೆ. ಸಾಕಷ್ಟು ಹೊಲಿಗೆಗಳನ್ನು ಹಾಕಲಾಗಿದ್ದು, ಸದ್ಯಕ್ಕೆ ಎಲ್ಲಾ ನಿಖರವಾದ ವಿವರಗಳನ್ನು ನೀಡಲು ಸಾಧ್ಯವಿಲ್ಲ, ಆದರೆ ಗಾಯಗಳು ಹೆಚ್ಚಿದ್ದು, ಚೇತರಿಸಿಕೊಳ್ಳಲು ಸ್ವಲ್ಪ ಸಮಯಾವಕಾಶ ಬೇಕಾಗುತ್ತದೆ ಎಂದು ಅವರು ಹೇಳಿದರು.
ಇದನ್ನೂ ಓದಿ:ನನ್ನನ್ನು ಕೊಂದುಬಿಡಿ ಎಂದಿದ್ದ ಸಹ-ಪೈಲಟ್!...ಫ್ಲೈದುಬೈ ವಿಮಾನ ದಾಳಿಯ ಹಿಂದೆ ಇರಾನ್ ಕೈವಾಡವಿದೆಯಾ...? ನೆತನ್ಯಾಹು ಸ್ಫೋಟಕ ಹೇಳಿಕೆ! | Benjamin Netanyahu
ಸ್ಮಿತ್ ಮಚ್ಚಾರ್ ತಮ್ಮ ಕೆಲಸವನ್ನು ತುಂಬಾನೇ ಇಷ್ಟಪಡುತ್ತಾರೆ ಮತ್ತು ಸದಾ ಇತರ ಪೈಲಟ್‌ಗಳಿಗೆ ಸಹಾಯ ಮಾಡುತ್ತಿರುತ್ತಾರೆ ಎಂದು ತಿಳಿಸಿರುವ ಅವರ ತಂದೆ, ಹಾರಾಟವೆಂದರೆ ಅವ್ನಿಗೆ ಹೆಂಡತಿಯಿದ್ದಂತೆ ಎಂದು ಹಾಸ್ಯ ಚಟಾಕಿ ಹಾರಿಸಿದ್ದಾರೆ. ಸುಮಾರು 17 ವರ್ಷಗಳಿಂದ ವಿಮಾನ ಹಾರಿಸುತ್ತಿರುವ ಅವರು, ನೂರಾರು ಪೈಲಟ್‌ಗಳಿಗೆ ಸಂದರ್ಶನ ಹಾಗೂ ವಾಯುಯಾನದ ವಿಷಯಗಳಲ್ಲಿ ಮಾರ್ಗದರ್ಶನ ನೀಡಿದ್ದಾರೆ. ಕೆಲಸವೇ ಅವರಿಗೆ ಸರ್ವಸ್ವವೂ ಆಗಿದ್ದು, ಅತ್ಯುತ್ತಮವಾಗಿ ವಿಮಾನ ಹಾರಿಸುವುದನ್ನು ಬಿಟ್ಟು ಬೇರೆ ಯಾವುದೇ ಯೋಚನೆ ಅವರಿಗಿಲ್ಲ ಎಂದು ತಿಳಿಸಿದ್ದಾರೆ.
