ದಳಪತಿ ವಿಜಯ್ ಅಧಿಕಾರಕ್ಕೇರುವ ಮುನ್ನವೇ ಮೊದಲ ಶಾಕ್​; ಪೋಕ್ಸೋ ಕೇಸ್​ನಲ್ಲಿ ಟಿವಿಕೆ ಕಾರ್ಯಕರ್ತನ ಬಂಧನ | TVK activist

ಚೆನ್ನೈ: ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿರುವ ದಳಪತಿ ವಿಜಯ್ ಅವರ ತಮಿಳಗ ವೆಟ್ರಿ ಕಳಗಂ ಪಕ್ಷ ಅಧಿಕಾರಕ್ಕೇರುವ ಮೊದಲೇ ಪಕ್ಷದ ಕಾರ್ಯಕರ್ತನೊಬ್ಬನನ್ನು(TVK activist) 10 ವರ್ಷದ ಬಾಲಕಿ ಮೇಲೆ ಅತ್ಯಾಚಾರ ಮಾಡಿದ ಆರೋಪದ ಮೇಲೆ ಪೋಕ್ಸೋ ಕೇಸ್​ನಲ್ಲಿ ಬಂಧಿಸಲಾಗಿದೆ.

ಆರೋಪಿಯನ್ನು 45 ವರ್ಷದ ಟಿವಿಕೆ ಸದಸ್ಯ ದಿನೇಶ್ ಅಲಿಯಾಸ್ ಪಂಬು ದಿನೇಶ್ ಎಂದು ಗುರುತಿಸಲಾಗಿದೆ. ಚೆನ್ನೈನ ಕಾಸಿಮೇಡು ಸಿಂಗಾರವೇಲನ್ ನಗರದ ನಿವಾಸಿ. ಮೈಲಾಪುರದ 10 ವರ್ಷದ ಬಾಲಕಿ ಆ ಪ್ರದೇಶದ ತನ್ನ ಸಂಬಂಧಿಕರ ಮನೆಗೆ ಬಂದಿದ್ದ ವೇಳೆ ಹೊರಗೆ ಆಟವಾಡುತ್ತಿದ್ದಾಗ ಮನೆಗೆ ಕರೆದುಕೊಂಡು ಹೋಗಿ ಅತ್ಯಾಚಾರ ಎಸಗಿದ್ದಾನೆ ಎನ್ನಲಾಗಿದೆ.

ಈ ವಿಷಯವನ್ನು ಯಾರಿಗಾದರೂ ಹೇಳಿದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾನೆ. ಆದರೆ ಬಾಲಕಿ ತನ್ನ ಸಂಬಂಧಿ ಮಹಿಳೆಗೆ ಘಟನೆಯ ಬಗ್ಗೆ ತಿಳಿಸಿದ್ದು, ಅವರು ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ರಾಯಪುರಂ ಮಹಿಳಾ ಪೊಲೀಸ್ ಠಾಣೆಯಲ್ಲಿ ಪೋಕ್ಸೋ ಕೇಸ್ ದಾಖಲಾಗಿದೆ.

ಆರೋಪಿ ದಿನೇಶ್​ನನ್ನು ಮೇ 04ರಂದೇ ಪೊಲೀಸರು ಬಂಧಿಸಲು ಪ್ರಯತ್ನಿಸಿದ್ದರು. ಆದರೆ ಆರ್ ಕೆ ನಗರ ಕ್ಷೇತ್ರದ ಟಿವಿಕೆ ಅಭ್ಯರ್ಥಿಯನ್ನು ಬೆಂಬಲಿಸಲು ಮತ ಎಣಿಕೆ ಕೇಂದ್ರದಲ್ಲಿದ್ದ ಕಾರಣ ಪೊಲೀಸರು ಬಂಧಿಸಿರಲಿಲ್ಲ. ಮತ ಎಣಿಕೆ ಮುಗಿದ ಬಳಿಕ ಅಂದು ರಾತ್ರಿಯೇ ಬಂಧಿಸಿದ್ದಾರೆ (ಏಜೆನ್ಸೀಸ್).