ನನ್ನ ಬಳಿ ಮೈಕ್ ಆಫ್ ಮಾಡೋ ಸ್ವಿಚ್ ಇಲ್ಲ...ಪಕ್ಷಪಾತದ ಆರೋಪಕ್ಕೆ ಓಂ ಬಿರ್ಲಾ ಸ್ಪಷ್ಟನೆ | Om Birla

ವಿರೋಧ ಪಕ್ಷಕ್ಕೆ ಮಾತನಾಡಲು ಅವಕಾಶ ನೀಡಲಿಲ್ಲ ಎಂಬ ಆರೋಪಕ್ಕೆ ಪ್ರತಿಕ್ರಿಯಿಸಿದ ಸ್ಪೀಕರ್, ಸದನವು ಸ್ಥಾಪಿತ ನಿಯಮಗಳ ಪ್ರಕಾರ ಕಾರ್ಯನಿರ್ವಹಿಸುತ್ತದೆ, ಅದರ ಪ್ರಕಾರ ಸದಸ್ಯರು ಸದನವನ್ನು ಉದ್ದೇಶಿಸಿ ಮಾತನಾಡುವ ಮೊದಲು ಅಧ್ಯಕ್ಷರಿಂದ ಅನುಮತಿ ಪಡೆಯಬೇಕು. ಲೋಕಸಭೆಯ ನಿಯಮಗಳಿಗಿಂತ ಯಾರೂ ಮೇಲಲ್ಲ ಎಂದು ತಿಳಿ ಹೇಳಿದರು.

ಪ್ರತಿಯೊಬ್ಬ ಸದಸ್ಯನಿಗೂ ಸದನದಲ್ಲಿ ಮಾತನಾಡುವ ಹಕ್ಕಿದೆ, ಆದರೆ ನಿಯಮಗಳ ಮೂಲಕವೇ ಅದನ್ನು ಪಾಲಿಸಬೇಕಾಗುತ್ತದೆ. ಪ್ರಧಾನಿ, ಸಚಿವರು ಸೇರಿದಂತೆ ಯಾವುದೇ ಸದಸ್ಯರು ಸಭಾಪತಿಯ ಅನುಮತಿಯಿಲ್ಲದೆ ಮಾತನಾಡಲು ಸಾಧ್ಯವಿಲ್ಲ. ಸದನದ ಯಾವುದೇ ಸದಸ್ಯರಿಗೆ ವಿಶೇಷ ಸವಲತ್ತು ಇಲ್ಲ, ಸಭಾಪತಿಯಾದವರು ಅನುಮತಿಸಿ ನೀಡಿದಾಗ ಮಾತ್ರ ಅವರು ಮಾತನಾಡಬಹುದು ಎಂದು ಓಂ ಬಿರ್ಲಾ ಹೇಳಿದರು.

ಮೈಕ್ ಆಫ್ ಆರೋಪಕ್ಕೆ ಪ್ರತಿಕ್ರಿಯಿಸಿದ ಸ್ಪೀಕರ್, ನನ್ನ ಬಳಿ ಮೈಕ್ ಆನ್ ಅಥವಾ ಆಫ್ ಮಾಡಲು ಯಾವುದೇ ಸ್ವಿಚ್ ಇಲ್ಲ. ಸಭಾಧ್ಯಕ್ಷರ ಪೀಠದಲ್ಲಿ ಕುಳಿತುಕೊಳ್ಳುವ ಪ್ರತಿಯೊಬ್ಬರಿಗೂ ಈ ಸತ್ಯ ಗೊತ್ತಿರುತ್ತದೆ. ಯಾರಿಗೆ ಮಾತನಾಡಲು ಅನುಮತಿ ಸಿಗುತ್ತದೆಯೋ ಅವರ ಮೈಕ್ ಮಾತ್ರ ಸಕ್ರಿಯಗೊಳ್ಳುತ್ತದೆ. ಮೈಕ್ ನಿಯಂತ್ರಣದ ಬಗ್ಗೆ ಮಾಡಿರುವ ಆರೋಪಗಳು ಆಧಾರರಹಿತ ಎಂದು ವಿವರಿಸಿದರು.

ನಾನು ಸದನದ ಕಲಾಪಗಳನ್ನು ಶಿಸ್ತು, ಸಮತೋಲನ ಮತ್ತು ನಿಷ್ಪಕ್ಷಪಾತವಾಗಿ ನಡೆಸಲು ಶ್ರಮಿಸಿದ್ದೇನೆ, ಹೊಸದಾಗಿ ಬಂದ ಸಂಸದರಿಗೂ ಮಾತನಾಡಲು ನಾನು ಪ್ರೋತ್ಸಾಹ ನೀಡುತ್ತಾ ಬಂದಿದ್ದೇನೆ. ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಸ್ಪೀಕರ್ ವಿರುದ್ಧ ಅವಿಶ್ವಾಸ ನಿರ್ಣಯದ ಚರ್ಚೆ ನಡೆದಿರುವುದು ಇದು ಮೂರನೇ ಬಾರಿಗೆ ಎನ್ನುವ ಅಂಶವನ್ನು ಸ್ಪೀಕರ್​ ಓಂ ಬಿರ್ಲಾ ಈ ವೇಳೆ ಉಲ್ಲೇಖಿಸಿದರು.

ಬಜೆಟ್ ಅಧಿವೇಶನದ ವೇಳೆ ರಾಹುಲ್ ಗಾಂಧಿಯವರಿಗೆ ಮಾತನಾಡಲು ಅವಕಾಶ ನೀಡುತ್ತಿಲ್ಲ ಮತ್ತು ಕಾಂಗ್ರೆಸ್‌ನ ಎಂಟು ಸಂಸದರನ್ನು ಅಮಾನತುಗೊಳಿಸಲಾಗಿದೆ ಎಂದು ಆರೋಪಿಸಿ ಪ್ರತಿಪಕ್ಷಗಳು ಸ್ಪೀಕರ್ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡಿಸಿದ್ದವು. ಸುಮಾರು 118 ಸಂಸದರು ಈ ಸೂಚನೆಗೆ ಸಹಿ ಹಾಕಿದ್ದರು. ಬುಧವಾರ 12 ಗಂಟೆಗಳ ಕಾಲ ನಡೆದ ಸುದೀರ್ಘ ಚರ್ಚೆಯ ಬಳಿಕ, ಧ್ವನಿ ಮತದ ಮೂಲಕ ಈ ನಿರ್ಣಯ ಸೋಲನುಭವಿಸಿತು(ಏಜೆನ್ಸೀಸ್​).