ಒಬ್ಬನೇ ಒಬ್ಬ ಹಿಂದೂ ಇದ್ದರೂ ರಾಜೀನಾಮೆ ಕೊಡ್ತೀನಿ! ಶರ್ಮಾ ರಾಜೀನಾಮೆ ಸವಾಲಿಗೆ ದೀದಿ ಸೈಲೆಂಟ್ ಆಗಿದ್ದೇಕೆ..? Himanta Biswa Sarma

ಈ ಬಗ್ಗೆ ಕೋಲ್ಕತ್ತಾದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಶರ್ಮಾ, ಅಸ್ಸಾಂನ ಡಿಟೆನ್ಶನ್ ಸೆಂಟರ್‌ಗಳಲ್ಲಿ ಬಂಗಾಳಿ ಹಿಂದೂಗಳನ್ನು ಇರಿಸಲಾಗಿದೆ ಎಂಬ ತೃಣಮೂಲ ಕಾಂಗ್ರೆಸ್ (TMC) ಆರೋಪಗಳನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ.

ಮೊದಲ ಹಂತದ ಚುನಾವಣೆಯಲ್ಲಿ ದಾಖಲಾದ ಭರ್ಜರಿ ಮತದಾನದ ಬಗ್ಗೆ ಮಾತನಾಡಿದ ಸಿಎಂ ಶರ್ಮಾ, ಇದು ಅತ್ಯಂತ ಸ್ವಾಗತಾರ್ಹ ಬೆಳವಣಿಗೆ. ಮುಕ್ತ ಮತ್ತು ನ್ಯಾಯಸಮ್ಮತ ಚುನಾವಣೆಯನ್ನು ಖಚಿತಪಡಿಸಿದ ಚುನಾವಣಾ ಆಯೋಗಕ್ಕೆ ನಾನು ಧನ್ಯವಾದ ಅರ್ಪಿಸುತ್ತೇನೆ. ಅಲ್ಲದೆ, ಶೇ. 93 ರಷ್ಟು ಮತದಾನವಾಗಿರುವುದು ಒಂದು ಐತಿಹಾಸಿಕ ಸಾಧನೆ ಎಂದು ಶ್ಲಾಘಿಸಿದ್ದಾರೆ.

ಬಂಧನ ಕೇಂದ್ರಗಳ ಕುರಿತಾದ ಗೊಂದಲಗಳಿಗೆ ತೆರೆ ಎಳೆದ ಹಿಮಂತ ಬಿಸ್ವಾ ಶರ್ಮಾ, ಟಿಎಂಸಿ ನಾಯಕರು ಅಸ್ಸಾಂನ ಬಂಧನ ಕೇಂದ್ರಗಳಲ್ಲಿ ಬಂಗಾಳಿ ಹಿಂದೂಗಳಿದ್ದಾರೆ ಎಂದು ಪದೇಪದೆ ಸುಳ್ಳು ಹಬ್ಬಿಸುತ್ತಿದ್ದಾರೆ. ಅಸ್ಸಾಂನ ಮುಖ್ಯಮಂತ್ರಿಯಾಗಿ ನಾನು ಜವಾಬ್ದಾರಿಯುತವಾಗಿ ಹೇಳುತ್ತಿದ್ದೇನೆ, ಅಲ್ಲಿ ಒಬ್ಬನೇ ಒಬ್ಬ ಬಂಗಾಳಿ ಹಿಂದೂ ಇಲ್ಲ. ಒಂದು ವೇಳೆ ಯಾರಾದರೂ ಒಬ್ಬನೇ ಒಬ್ಬ ಹಿಂದೂ ವ್ಯಕ್ತಿ ಇರುವುದನ್ನು ಸಾಬೀತುಪಡಿಸಿದರೆ, ನಾನು ಈ ಕ್ಷಣವೇ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಲು ಸಿದ್ಧನಿದ್ದೇನೆ ಎಂದು ಗುಡುಗಿದ್ದಾರೆ.

ಪೌರತ್ವ ಮತ್ತು ನುಸುಳುಕೋರರ ತಡೆಗೆ ಸಂಬಂಧಿಸಿದಂತೆ ಮಾತನಾಡಿದ ಶರ್ಮಾ, 1948ರ ಅಕ್ರಮ ವಲಸೆಗಾರರ ಹೊರಹಾಕುವಿಕೆ ಕಾಯ್ದೆ (Illegal Migrants Removal Act) ಬಗ್ಗೆ ಉಲ್ಲೇಖಿಸಿದ್ದಾರೆ.

ಸುಪ್ರೀಂ ಕೋರ್ಟ್ ಅಸ್ಸಾಂಗೆ ಒಂದು ಮಹತ್ವದ ಅಧಿಕಾರವನ್ನು ನೀಡಿದೆ. ಒಬ್ಬ ಡೆಪ್ಯೂಟಿ ಕಮಿಷನರ್ (ಡಿಸಿ) ಯಾರನ್ನಾದರೂ ನುಸುಳುಕೋರ ಎಂದು ಭಾವಿಸಿದರೆ, ಅವರನ್ನು 48 ಗಂಟೆಗಳ ಒಳಗಾಗಿ ಭಾರತದ ಭೂಪ್ರದೇಶದಿಂದ ಹೊರಹಾಕಲು ಈ ಕಾಯ್ದೆ ಅನುಮತಿಸುತ್ತದೆ. ವಿಶೇಷವೆಂದರೆ, ಕಾಂಗ್ರೆಸ್ ಪಕ್ಷವೇ ರೂಪಿಸಿದ ಈ ಕಾಯ್ದೆ ಇಂದು ಹಿಂದೂಗಳ ಹಿತರಕ್ಷಣೆಗೆ ಪೂರಕವಾಗಿದೆ. ಇದನ್ನು ಕೇವಲ ಅಸ್ಸಾಂನಲ್ಲಿ ಮಾತ್ರವಲ್ಲದೆ, ದೇಶದ ಇತರ ಐದು ರಾಜ್ಯಗಳಲ್ಲೂ ಜಾರಿಗೆ ತರಬೇಕು ಎಂಬುದು ನನ್ನ ಅಭಿಪ್ರಾಯ ಎಂದು ಹಿಮಂತ ತಿಳಿಸಿದ್ದಾರೆ.

ಬಾಂಗ್ಲಾದೇಶಿ ನುಸುಳುಕೋರರ ಸಮಸ್ಯೆಯು ಕೇವಲ ಬಂಗಾಳಕ್ಕೆ ಸೀಮಿತವಲ್ಲ, ಅದು ಇಡೀ ದೇಶದ ಜನಸಂಖ್ಯಾ ಸ್ವರೂಪವನ್ನು ಬದಲಿಸುತ್ತಿದೆ ಎಂದು ಶರ್ಮಾ ಎಚ್ಚರಿಸಿದ್ದಾರೆ.

ರಾಷ್ಟ್ರೀಯ ಭದ್ರತೆ: ಪಶ್ಚಿಮ ಬಂಗಾಳದ ಚುನಾವಣೆಯು ಪ್ರತಿಯೊಬ್ಬ ಭಾರತೀಯನ ಮೇಲೆ ಪ್ರಭಾವ ಬೀರುತ್ತದೆ. ಏಕೆಂದರೆ ಇಲ್ಲಿಂದ ನುಸುಳುವವರು ದೇಶದ ಮೂಲೆ ಮೂಲೆಗೆ ಹರಡುತ್ತಾರೆ ಎಂದು ಟಿಎಂಸಿ ವಿರುದ್ಧ ಶರ್ಮಾ ಹರಿಹಾಯ್ದಿದ್ದಾರೆ.

ಧಾರ್ಮಿಕ ಸಮತೋಲನ: ಯಾವಾಗ ನುಸುಳುಕೋರರ ಸಂಖ್ಯೆ ಶೇ. 50 ಕ್ಕಿಂತ ಹೆಚ್ಚಾಗುತ್ತದೆಯೋ, ಅಲ್ಲಿ ಶರಿಯಾ ಕಾನೂನು ಜಾರಿಗೆ ತರಬೇಕೆಂಬ ಬೇಡಿಕೆಗಳು ಏಳುತ್ತವೆ. ಜನಸಂಖ್ಯಾ ಸ್ವರೂಪವು ಸ್ಥಿರವಾಗಿರುವವರೆಗೆ ಮಾತ್ರ ಜಾತ್ಯತೀತತೆ ಸುರಕ್ಷಿತವಾಗಿರುತ್ತದೆ ಎಂಬ ಹಿಮಂತ ಗಂಭೀರ ವಿಶ್ಲೇಷಣೆ ಮಾಡಿದ್ದಾರೆ.

ಬಿಜೆಪಿ ವಿರುದ್ಧದ ಆರೋಪಕ್ಕೆ ಪ್ರತ್ಯುತ್ತರ: ಮಮತಾ ಬ್ಯಾನರ್ಜಿ ಅವರ ಕೋಮುವಾದದ ಆರೋಪಕ್ಕೆ ಉತ್ತರಿಸಿದ ಶರ್ಮಾ, ಬಿಜೆಪಿ ದೇಶದ ಯಾವುದೇ ರಾಜ್ಯದಲ್ಲಿ ಗೀತಾ ಅಥವಾ ಭಾಗವತದ ಆಡಳಿತವನ್ನು ಕೇಳುತ್ತಿಲ್ಲ. ಆದರೆ ನುಸುಳುವಿಕೆಯಿಂದ ಜನಸಂಖ್ಯೆ ಬದಲಾದ ಕಡೆಗಳಲ್ಲಿ ಶರಿಯಾ ಕಾನೂನಿನ ಕೂಗು ಕೇಳಿಬರುತ್ತಿದೆ ಎಂದು ತಿರುಗೇಟು ನೀಡಿದ್ದಾರೆ.

ಹಿಮಂತ ಬಿಸ್ವಾ ಶರ್ಮಾ ಅವರ ಈ ಹೇಳಿಕೆಯು ಬಂಗಾಳದ ಹಿಂದೂ ಮತದಾರರನ್ನು ಸೆಳೆಯುವ ತಂತ್ರವೆಂದು ವಿಶ್ಲೇಷಿಸಲಾಗುತ್ತಿದೆ. ನುಸುಳುಕೋರರ ಹಾವಳಿ ಮತ್ತು ಹಿಂದೂಗಳ ಹಿತರಕ್ಷಣೆಯ ವಿಷಯದಲ್ಲಿ ಅವರು ನೀಡಿರುವ ರಾಜೀನಾಮೆ ಸವಾಲು, ವಿರೋಧ ಪಕ್ಷಗಳನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ. ಅಸ್ಸಾಂ ಮಾಡೆಲ್ ಅನ್ನು ಬಂಗಾಳದಲ್ಲೂ ಜಾರಿಗೆ ತರುವ ಇಂಗಿತವನ್ನು ಸ್ಪಷ್ಟವಾಗಿ ವ್ಯಕ್ತಪಡಿಸಿದ್ದಾರೆ,(ಏಜೆನ್ಸೀಸ್).