ಸಂಪಾದಕೀಯ: ಸನ್ನದ್ಧತೆ ಅಗತ್ಯ

 ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಏರಿಕೆಯಾಗುತ್ತಲೇ ಇದೆ. ಹೊಮುಜ್ ಜಲಸಂಧಿ ಸಂಚಾರಕ್ಕೆ ಮುಕ್ತವಾಗಿ ಇರಿಸುವ ಬಗ್ಗೆ ಮತ್ತು ಶಾಂತಿ, ಸ್ಥಿರತೆಯನ್ನು ಸಾಧಿಸಲು ಪರಸ್ಪರ ಕೆಲಸ ಮಾಡುವ ನಿಟ್ಟಿನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪ್ರಧಾನಿ ನರೇಂದ್ರ ಮೋದಿ ಮಂಗಳವಾರ ದೂರವಾಣಿ ಮಾತುಕತೆಯಲ್ಲಿ ರ್ಚಚಿಸಿರುವುದು, ಉತ್ತಮ ಬೆಳವಣಿಗೆ.

ಈ ನಡುವೆ, ಕದನ ವಿರಾಮದ ಕುರಿತಂತೆ ಮಾತುಕತೆಗಳು ನಡೆಯುತ್ತಿದ್ದು, ಯಾವುದೂ ಅಧಿಕೃತಗೊಳ್ಳದ, ಉದ್ವಿಗ್ನತೆ ಮುಂದುವರಿದಿರುವ ಸಂದಿಗ್ಧ ಸ್ಥಿತಿ ಇದು. ಒಂದು ವೇಳೆ, ಕದನ ವಿರಾಮ ಏರ್ಪಟ್ಟರೂ ಪರಿಸ್ಥಿತಿ ಸಹಜ ಸ್ಥಿತಿಗೆ ಬರಲು ಕೆಲವು ದಿನಗಳು ಅಥವಾ ವಾರಗಳು ಬೇಕೇ ಬೇಕು ಎಂಬ ವಾಸ್ತವವನ್ನು ಅರ್ಥ ಮಾಡಿಕೊಳ್ಳಬೇಕಿದೆ. ಹಾಗಾಗಿ, ಈ ಸಂಕಷ್ಟದ ಸನ್ನಿವೇಶವನ್ನು ಎದುರಿಸುವ ತಯಾರಿಯೂ ಅಗತ್ಯ. ದೇಶದ ಕೆಲವೆಡೆ ಎಲ್​ಪಿಜಿಯ ಕೃತಕ ಕೊರತೆ ಸೃಷ್ಟಿಸುವ ಕೃತ್ಯಗಳೂ ನಡೆಯುತ್ತಿದ್ದು, ಜನರು ಆತಂಕದಿಂದ ಖರೀದಿ ಪ್ರಮಾಣ ಹೆಚ್ಚಿಸಿರುವುದರಿಂದ, ಬೇಡಿಕೆಯೂ ಹೆಚ್ಚಿದೆ. ಈ ಎಲ್ಲ ಸ್ಥಿತಿಗಳ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಲೋಕಸಭೆ ಮತ್ತು ರಾಜ್ಯಸಭೆಯಲ್ಲಿ ಮಾತನಾಡಿದ್ದಾರೆ. ಪಶ್ಚಿಮ ಏಷ್ಯಾ ಬಿಕ್ಕಟ್ಟಿನ ಬಗ್ಗೆ ರ್ಚಚಿಸಲು ಬುಧವಾರ ಸರ್ವಪಕ್ಷಗಳ ಸಭೆಯನ್ನೂ ಕರೆದಿದ್ದಾರೆ. 

ಆರು ವರ್ಷಗಳ ಹಿಂದಿನ ಕೋವಿಡ್ ಸಂಕಷ್ಟದ ದಿನಗಳನ್ನು ಮತ್ತು ಅದನ್ನು ಭಾರತೀಯರು ಒಟ್ಟಾಗಿ ಎದುರಿಸಿದ ಬಗೆಯನ್ನು ನೆನಪಿಸಿಕೊಂಡಿರುವ ಪ್ರಧಾನಿ ನರೇಂದ್ರ ಮೋದಿ, ಯುದ್ಧಕಾಲದ ಸಂಕಷ್ಟಗಳನ್ನು ಎದುರಿಸಲು ಸನ್ನದ್ಧವಾಗಿ ಇರುವಂತೆ ಸೂಚಿಸಿದ್ದಾರೆ. ‘ಕೇಂದ್ರ ಸರ್ಕಾರ ಸಾಧ್ಯವಿರುವ ಎಲ್ಲ ಮೂಲಗಳಿಂದ ಇಂಧನ ಖರೀದಿಗೆ ಪ್ರಯತ್ನ ನಡೆಸುತ್ತಿದೆ. ಪಶ್ಚಿಮ ಏಷ್ಯಾದಲ್ಲಿನ ಯುದ್ಧವು ಅತ್ಯಂತ ಕಳವಳಕಾರಿಯಾಗಿದೆ. ರಾಜತಾಂತ್ರಿಕ ಮಾತುಕತೆಯ ಮೂಲಕ ಈ ಪ್ರದೇಶದಲ್ಲಿ ಶಾಂತಿ ನೆಲೆಸಲು ಸಾಧ್ಯ’ ಎಂದು ಪ್ರಧಾನಿ ಸ್ಪಷ್ಟಪಡಿಸಿದ್ದಾರೆ. ಹಾಗಂತ, ದೇಶದಲ್ಲಿ ಮತ್ತೊಮ್ಮೆ ಲಾಕ್​ಡೌನ್ ಘೋಷಣೆ ಆಗುತ್ತದೆ ಎಂಬ ಆತಂಕ ಅರ್ಥವಿಲ್ಲದ್ದು. ಯುದ್ಧದಂಥ ಸನ್ನಿವೇಶಗಳಲ್ಲಿ ಸಂಯಮ ಮತ್ತು ಯಾವುದೇ ಪರಿಸ್ಥಿತಿ ಎದುರಿಸುವ ಸನ್ನದ್ಧತೆ ಇರಲೇ ಬೇಕು. ಇದು ಸರ್ಕಾರದ ಮಟ್ಟದಲ್ಲೂ, ನಾಗರಿಕ ಸಮುದಾಯದ ಮಟ್ಟದಲ್ಲೂ ಅಗತ್ಯ.