ಸಂಪಾದಕೀಯ: ತಾರ್ಕಿಕ ಅಂತ್ಯ ಕಾಣಲಿ

ಕಾಂಗ್ರೆಸ್ ಪಕ್ಷವಂತೂ ಈ ಬಗ್ಗೆ ದೇಶವ್ಯಾಪಿ ದೊಡ್ಡ ಜನಾಂದೋಲನವನ್ನೇ ನಡೆಸಲು ಸಜ್ಜಾಗಿದೆ. ರಾಜ್ಯದಲ್ಲಿ 2019ರಿಂದ 2025ರ ಆರು ವರ್ಷಗಳಲ್ಲಿ ಸುಮಾರು 669 ಕೋಟಿ ರೂ. ಮೊತ್ತದ ಅಕ್ರಮ ಈ ಯೋಜನೆಯಲ್ಲಿ ನಡೆದಿದೆಯೆಂಬುದು ಸಾಮಾಜಿಕ ಲೆಕ್ಕ ಪರಿಶೋಧನೆಯಿಂದ ಗೊತ್ತಾಗಿದೆ. ಇದು ಸರ್ಕಾರದ್ದೇ ದಾಖಲೆ ಎನ್ನುವುದು ವಿಶೇಷ. ನಿಯಮದ ಪ್ರಕಾರ, ನರೇಗಾದಲ್ಲಿ ಮಾನವಶ್ರಮದ ಕೆಲಸ ನಡೆಯಬೇಕು. ಆದರೆ ಜೆಸಿಬಿಯಲ್ಲಿ ಕೆಲಸ ಮಾಡಿ, ಕಾರ್ವಿುಕರ ಹೆಸರಿನಲ್ಲಿ ಮಸ್ಟರ್ ರೋಲ್ ಸೃಷ್ಟಿ, ಸಾಮಗ್ರಿ ಪೂರೈಕೆ ಮಾಡದಿದ್ದರೂ ನಕಲಿ ಬಿಲ್ ಸಲ್ಲಿಕೆ, ಮೃತರು ಅಥವಾ ಊರಲ್ಲಿ ಇಲ್ಲದವರ ಹೆಸರಿನಲ್ಲಿಯೂ ಹಾಜರಾತಿ ದಾಖಲಿಸಿ ಅರ್ಹರಲ್ಲದವರಿಗೆ ಹಣ ವರ್ಗಾವಣೆ- ಈ ಮುಂತಾದ ಅಕ್ರಮಗಳನ್ನು ಉಲ್ಲೇಖಿಸಲಾಗಿದೆ. ಇನ್ನೊಂದೆಡೆ, ರಾಜ್ಯದ ಬೊಕ್ಕಸಕ್ಕೆ ಅತಿ ಹೆಚ್ಚು ಆದಾಯ ತರುವ ಅಬಕಾರಿ ಇಲಾಖೆ ಬಗ್ಗೆ ಪದೇಪದೆ ಆರೋಪಗಳು ಕೇಳಿಬರುತ್ತಿರುವುದು ಕಡೆಗಣಿಸುವ ಸಂಗತಿಯಲ್ಲ.

ಇಲಾಖೆ ಅಕ್ರಮದ ಬಗ್ಗೆ ಆಡಿಯೋಗಳು ಕೂಡ ಹೊರಬರುವುದು ಅಲ್ಲಿ ಏನೋ ನಡೆಯುತ್ತಿದೆಯೆನ್ನುವ ಅನುಮಾನಕ್ಕೆ ಪುಷ್ಟಿನೀಡುತ್ತವೆ. ವರ್ಗಾವಣೆ ದಂಧೆ, ಮಂಥ್ಲಿ ಮನಿ, ಕಿಕ್ ಬ್ಯಾಕ್ ಮುಂತಾದ ಆಪಾದನೆಗಳು ಸಾಲುಸಾಲಾಗಿ ಕೇಳಿಬರುತ್ತಿವೆ. ಈ ನಡುವೆ, ‘ಅಬಕಾರಿ ಇಲಾಖೆಯಲ್ಲಿ 2.5 ಸಾವಿರ ಕೋಟಿ ರೂ. ಲಂಚ ವಹಿವಾಟು ನಡೆದಿದ್ದು, ಈ ಹಣವನ್ನು ಚುನಾವಣೆಗೆ ಬಳಸಲಾಗುತ್ತಿದೆ’ ಎಂದು ಆರೋಪಿಸಿರುವ ವಿಧಾನಸಭೆ ವಿರೋಧ ಪಕ್ಷದ ನಾಯಕ ಆರ್. ಅಶೋಕ್, ಅಬಕಾರಿ ಸಚಿವ ಆರ್.ಬಿ.ತಿಮ್ಮಾಪುರ ಅವರನ್ನು ಸಂಪುಟದಿಂದ ವಜಾಮಾಡಬೇಕು ಎಂದು ಆಗ್ರಹಿಸಿದ್ದಾರೆ.

ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು 2024ರಲ್ಲಿ ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆ ಪ್ರಚಾರದ ವೇಳೆ, ಕರ್ನಾಟಕದಲ್ಲಿ ಮದ್ಯ ವರ್ತಕರಿಂದ ಹಣ ವಸೂಲಿ ಬಗ್ಗೆ ಪ್ರಸ್ತಾಪಿಸಿದ್ದು ಸಂಚಲನವನ್ನೇ ಉಂಟುಮಾಡಿತ್ತು. ಸಿಎಲ್-7 ಮದ್ಯದ ಪರವಾನಗಿಗೆ ಸಂಬಂಧಿಸಿ ಲಂಚಕ್ಕೆ ಬೇಡಿಕೆಯಿಟ್ಟ ಅಬಕಾರಿ ಅಧಿಕಾರಿಗಳು ಲೋಕಾಯುಕ್ತಕ್ಕೆ ಸಿಕ್ಕಿಬಿದ್ದಿರುವ ಈಚಿನ ಪ್ರಕರಣಕ್ಕೆ ಸಂಬಂಧಿಸಿದಂತೆ ದೂರುದಾರ ಲಕ್ಷ್ಮೀನಾರಾಯಣ್, ಅಬಕಾರಿ ಸಚಿವ ಆರ್.ಬಿ. ತಿಮ್ಮಾಪುರ ವಿರುದ್ಧ ಲೋಕಾಯುಕ್ತಕ್ಕೆ ದೂರು ಸಲ್ಲಿಸಿರುವ ಬೆಳವಣಿಗೆಯೂ ನಡೆದಿದೆ. ಈ ವಿಷಯಗಳನ್ನು ಸರ್ಕಾರ ಗಂಭೀರವಾಗಿ ಪರಿಗಣಿಸಿ, ತನಿಖೆ ಮೂಲಕ ವಾಸ್ತವವನ್ನು ಜನರೆದುರಿಡುವ ಕೆಲಸವನ್ನು ತುರ್ತಾಗಿ ಮಾಡಬೇಕು.