ಸಂಪಾದಕೀಯ: ಸುರಕ್ಷೆ ಜತೆ ಚೆಲ್ಲಾಟ ಸಲ್ಲ

ಕೆಲವು ನಿರ್ದಿಷ್ಟ ಮಾದರಿಯ ಇಂಜಿನ್​ಗಳಲ್ಲಿ (ಉದಾಹರಣೆಗೆ, ಪ್ರ್ಯಾಟ್​ ಆಂಡ್ ವ್ಹಿಟ್ನಿ) ಜಾಗತಿಕವಾಗಿ ವಿನ್ಯಾಸದ ದೋಷಗಳು ಕಂಡುಬಂದಿವೆ. ಇವು ಅತಿಯಾದ ಶಾಖ ಅಥವಾ ಘರ್ಷಣೆಯಿಂದಾಗಿ ಹಾರಾಟದ ಮಧ್ಯೆ ಸ್ಥಗಿತಗೊಳ್ಳುವ ಸಾಧ್ಯತೆ ಇರುತ್ತದೆ. ಕೆಲವು ವಿಮಾನಯಾನ ಸಂಸ್ಥೆಗಳು ನಿರ್ವಹಣಾ ವೆಚ್ಚವನ್ನು ಕಡಿಮೆ ಮಾಡಲು ಹಳೆಯ ವಿಮಾನಗಳನ್ನು ದೀರ್ಘಕಾಲ ಬಳಸುತ್ತಿವೆ. ಕೋವಿಡ್ ನಂತರ ವಿಮಾನದ ಬಿಡಿಭಾಗಗಳ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿದೆ. ಇದರಿಂದಾಗಿ ಸರಿಯಾದ ಸಮಯಕ್ಕೆ ಬಿಡಿಭಾಗಗಳನ್ನು ಬದಲಾಯಿಸಲು ಸಾಧ್ಯವಾಗದೆ ನಿರ್ವಹಣೆಯಲ್ಲಿ ಹಿನ್ನಡೆಯಾಗುತ್ತಿದ್ದು, ಬಿಡಿಭಾಗಗಳ ಸಮರ್ಪಕ ಪೂರೈಕೆಗೆ ಆದ್ಯತೆ ನೀಡಬೇಕಿದೆ.

ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯವು ವಿಮಾನಯಾನ ಸಂಸ್ಥೆಗಳ ಮೇಲೆ ಹಠಾತ್ ದಾಳಿ ನಡೆಸಿ ವಿಮಾನಗಳ ಸುರಕ್ಷತೆಯನ್ನು ಪರಿಶೀಲಿಸುತ್ತಿದೆ. ಸುರಕ್ಷತಾ ನಿಯಮ ಪಾಲಿಸದ ಸಂಸ್ಥೆಗಳಿಗೆ ಭಾರಿ ದಂಡ ವಿಧಿಸಲಾಗುತ್ತಿದೆ. ನಿರ್ದಿಷ್ಟ ದೋಷವಿರುವ ಇಂಜಿನ್​ಗಳನ್ನು ಹೊಂದಿರುವ ವಿಮಾನಗಳನ್ನು ಹಾರಾಟದಿಂದ ತಡೆಹಿಡಿಯಲು ಸೂಚನೆ ನೀಡಲಾಗಿದೆ. ಪ್ರತಿಯೊಂದು ವಿಮಾನವು ಹಾರಾಟಕ್ಕೆ ಮುನ್ನ ಫಿಟ್​ನೆಸ್ ಪ್ರಮಾಣಪತ್ರ ಪಡೆಯುವುದನ್ನು ಕಡ್ಡಾಯಗೊಳಿಸಲಾಗಿದೆ. ಆದರೂ, ಅಪಸವ್ಯಗಳು ಕಡಿಮೆಯಾಗುತ್ತಿಲ್ಲ ಎಂಬುದು ಶೋಚನೀಯ.

ಈ ನಿಟ್ಟಿನಲ್ಲಿ ವಿಮಾನಯಾನ ಸಂಸ್ಥೆಗಳು ತಮ್ಮ ಜವಾಬ್ದಾರಿ ಮತ್ತು ಉತ್ತರದಾಯಿತ್ವದಿಂದ ನುಣುಚಿಕೊಳ್ಳುವಂತಿಲ್ಲ. ತುರ್ತು ಪರಿಸ್ಥಿತಿಯನ್ನು ನಿಭಾಯಿಸಲು ಪೈಲಟ್ ಮತ್ತು ಕ್ಯಾಬಿನ್ ಸಿಬ್ಬಂದಿಗೆ ಸೂಕ್ತ ತರಬೇತಿ ಒದಗಿಸಬೇಕು. ಇಂಜಿನ್​ನ ಆರೋಗ್ಯವನ್ನು ಹಾರಾಟದ ಸಮಯದಲ್ಲಿಯೇ ನೈಜ ಸಮಯದಲ್ಲಿ ಮೇಲ್ವಿಚಾರಣೆ ಮಾಡುವ ಸಾಫ್ಟ್​ವೇರ್​ಗಳನ್ನು ಬಳಸಲಾಗುತ್ತಿದ್ದು, ಈ ಸಂಖ್ಯೆ ಹೆಚ್ಚಿಸಬೇಕಿದೆ. ಸರ್ಕಾರವು ವಿಮಾನಯಾನ ಸಂಸ್ಥೆಗಳಿಗೆ ಹಳೆಯ ವಿಮಾನಗಳ ಬದಲಿಗೆ ಹೊಸ ತಂತ್ರಜ್ಞಾನದ ವಿಮಾನಗಳನ್ನು ಖರೀದಿಸಲು ಉತ್ತೇಜನ ನೀಡಬೇಕಿದೆ. ಒಟ್ಟಾರೆ, ವಿಮಾನಯಾನ ಪ್ರಯಾಣವನ್ನು ಸುರಕ್ಷಿತ ಮತ್ತು ಸುಗಮಗೊಳಿಸುವ ನಿಟ್ಟಿನಲ್ಲಿ ಗಂಭೀರ ಪ್ರಯತ್ನಗಳು ನಡೆಯಬೇಕಿದ್ದು, ಈ ಸಮಸ್ಯೆಗಳು ಮುಂಬರುವ ದಿನಗಳಲ್ಲಿ ಮರುಕಳಿಸದಂತೆ ಕಾಳಜಿ ವಹಿಸಬೇಕಿದೆ.