ಸಂಪಾದಕೀಯ: ಪರ್ಯಾಯ ಕ್ರಮಗಳು ಅಗತ್ಯ

ಅನಿವಾಸಿ ಭಾರತೀಯರು ಭಾರತದ ಬ್ಯಾಂಕ್‌ಗಳಲ್ಲಿ ಡಾಲರ್ ಇಡಲು ಹೆಚ್ಚಿನ ಬಡ್ಡಿ ದರ ಹಾಗೂ ತೆರಿಗೆ ವಿನಾಯಿತಿ ನೀಡುವ ವಿಶೇಷ ಬಾಂಡ್ ಅಥವಾ ಪ್ರೋತ್ಸಾಹಕ ಯೋಜನೆಗಳನ್ನು ತರಲು ಇದು ಸೂಕ್ತ ಕಾಲ. ರೂಪಾಯಿ ಮೌಲ್ಯ ಕುಸಿದಾಗ ಸ್ವಾಭಾವಿಕವಾಗಿಯೇ ರಫ್ತುದಾರರಿಗೆ ಲಾಭವಾಗುತ್ತದೆ. ಇದನ್ನು ಬಳಸಿಕೊಂಡು ಜವಳಿ, ಔಷಧ ಮತ್ತು ಮಾಹಿತಿ ತಂತ್ರಜ್ಞಾನ (ಐಟಿ) ವಲಯದ ರಫ್ತು ಹೆಚ್ಚಿಸಲು ಸರ್ಕಾರ ಮುಂದಾಗಬೇಕಿದೆ. ಜೊತೆಗೆ, ರಫ್ತುದಾರರು ವಿದೇಶದಲ್ಲಿ ಗಳಿಸಿದ ಡಾಲರ್ ಅನ್ನು ತಕ್ಷಣವೇ ಭಾರತಕ್ಕೆ ತರುವಂತೆ ನಿಯಮಗಳನ್ನು ಬಿಗಿಗೊಳಿಸಬೇಕು. ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ ಕಚ್ಚಾ ವಸ್ತುಗಳನ್ನು ದೇಶದಲ್ಲೇ ಉತ್ಪಾದಿಸಲು ಸಬ್ಸಿಡಿಗಳನ್ನು ನೀಡುವ ಮೂಲಕ ಚೀನಾ ಮುಂತಾದ ದೇಶಗಳಿಂದ ಆಮದು ಮಾಡಿಕೊಳ್ಳುವುದನ್ನು ಸಂಪೂರ್ಣವಾಗಿ ತಗ್ಗಿಸಬೇಕು.

ರಷ್ಯಾ, ಯುಎಇ ಸೇರಿದಂತೆ ಹಲವು ದೇಶಗಳೊಂದಿಗೆ ಡಾಲರ್ ಬದಲಿಗೆ ನೇರವಾಗಿ ರೂಪಾಯಿ-ರೂಬಲ್ ಅಥವಾ ರೂಪಾಯಿ-ದಿರ್ಹಾಮ್ ಮೂಲಕ ವ್ಯಾಪಾರ ವಹಿವಾಟು ನಡೆಸುವ ಒಪ್ಪಂದಗಳನ್ನು ಇನ್ನಷ್ಟು ವಿಸ್ತರಿಸಬೇಕು. ಪಶ್ಚಿಮ ಏಷ್ಯಾದ ಬಿಕ್ಕಟ್ಟಿನಿಂದಾಗಿ ತೈಲ ದರ ಏರುತ್ತಿರುವುದರಿಂದ, ರಷ್ಯಾ ಅಥವಾ ಇತರ ಪರ್ಯಾಯ ದೇಶಗಳಿಂದ ರಿಯಾಯಿತಿ ದರದಲ್ಲಿ ತೈಲ ಖರೀದಿಸುವುದನ್ನು ಮುಂದುವರಿಸಿದರೆ, ತೈಲ ಬಿಕ್ಕಟ್ಟಿಗೆ ತಾರ್ಕಿಕ ಅಂತ್ಯ ಕಂಡುಕೊಳ್ಳಬಹುದು. ಸರ್ಕಾರಿ ನೌಕರರು ಮತ್ತು ಕಾರ್ಪೊರೇಟ್ ವಲಯಕ್ಕೆ ವಾರದಲ್ಲಿ ಕೆಲವು ದಿನ ವರ್ಕ್ ಫ್ರಮ್ ಹೋಮ್ ಕಡ್ಡಾಯ ಮಾಡುವುದು, ಸಾರ್ವಜನಿಕ ಸಾರಿಗೆ ಬಳಕೆ ಮತ್ತು ಇವಿ ವಾಹನಗಳ ಬಳಕೆಯನ್ನು ಉತ್ತೇಜಿಸುವುದರಿಂದ ಇಂಧನ ಆಮದಿನ ಮೇಲಿನ ಡಾಲರ್ ಹೊರಹರಿವನ್ನು ತಗ್ಗಿಸಬಹುದು.

ಜಾಗತಿಕ ಯುದ್ಧದ ವಾತಾವರಣ ತಿಳಿಯಾಗುವವರೆಗೆ ರೂಪಾಯಿ ಮೇಲಿನ ಒತ್ತಡ ಮುಂದುವರಿಯಲಿದೆ ಎಂಬುದು ಸ್ಪಷ್ಟ. ಆ ಬಳಿಕವೂ ಇಂಧನ ಪೂರೈಕೆ ಸುಸ್ಥಿತಿಗೆ ಬರಲು ಸಾಕಷ್ಟು ಸಮಯ ಹಿಡಿಯುತ್ತದೆ. ಆಮದಿಗಾಗಿ ದೇಶದ ಹಣ ಹೊರಹೋದಷ್ಟು ಸಮಸ್ಯೆಯ ತೀವ್ರತೆ ಹೆಚ್ಚುತ್ತದೆ. ಈ ನಿಟ್ಟಿನಲ್ಲಿ ಆಮದು ಅವಲಂಬನೆಯನ್ನು ತಗ್ಗಿಸುವುದೊಂದೇ ಇದಕ್ಕೆ ದೀರ್ಘಕಾಲೀನ ಪರಿಹಾರವಾಗಿದೆ ಮತ್ತು ರೂಪಾಯಿ ಮೌಲ್ಯ ಇನ್ನಷ್ಟು ಕುಸಿದಂತೆ ತಡೆಯಲು ತೀವ್ರ ಹಾಗೂ ಬಹುಆಯಾಮದ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಕೋವಿಡ್ ಸಂಕಷ್ಟವನ್ನೂ ಗೆದ್ದ ಭಾರತೀಯ ಆರ್ಥಿಕತೆ ಈ ಬಾರಿಯೂ ಪುಟಿದೇಳಲಿ. ಇದಕ್ಕೆ ಸಾಮೂಹಿಕ ಪ್ರಯತ್ನಗಳು ಅತ್ಯಗತ್ಯ.