ರಸ್ತೆ ಮಧ್ಯೆ ಇ-ರಿಕ್ಷಾ, ಇವಿ ಸ್ಕೂಟರ್ ದಿಢೀರ್ ಆಫ್! ನೆಟ್ಟಿಗರ ನಿದ್ದೆಗೆಡಿಸಿದ ಚೀನಾ 'ಆ್ಯಪ್'; ವಿಡಿಯೋ ವೈರಲ್​! EV Viral Video

ವೈರಲ್​: ಭಾರತದಲ್ಲಿ ಇಂಟರ್ನೆಟ್​ ಕ್ರಾಂತಿಯಾದ ದಿನದಿಂದ ಸೋಷಿಯಲ್​ ಮೀಡಿಯಾನ ಉತ್ತುಂಗವನ್ನು ಕಂಡುಕೊಂಡಿದೆ. ಈಗ ದೇಶದಷ್ಟೇ ಅಲ್ಲದೆ ಪ್ರಪಂಚಸ ಯಾವುದೇ ಮೂಲೆಯಲ್ಲಿ ನಡೆದ ಘಟನೆಗಳು ಕ್ಷಣಾರ್ಧದಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತವೆ.

ಇತ್ತೀಚಿನ ದಿನಗಳಲ್ಲಿ ಮೊಬೈಲ್​ ಅನ್ನು ಬಳಸಿಕೊಂಡು ಇ-ರಿಕ್ಷಾ ಮತ್ತು ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ನಡುರಸ್ತೆಯಲ್ಲಿ ಆಫ್ (EV Viral Video) ಮಾಡುತ್ತಿರುವ ವಿಡಿಯೋಗಳು ಬಹಳ ಹಂಚಿಕೆ ಹಾಗೂ ವೀಕ್ಷಣೆಯನ್ನು ಕಾಣುತ್ತಿದೆ. ಈ ವಿಡಿಯೋಗಳು ದೇಶದ ಜನರಲ್ಲಿ ಭೀತಿ ಮತ್ತು ಆಕ್ರೋಶ ಎರಡನ್ನು ಹುಟ್ಟುಹಾಕಿವೆ.

ಎಕ್ಸ್ (ಟ್ವಿಟರ್) ಮತ್ತು ಇನ್‌ಸ್ಟಾಗ್ರಾಮ್‌ನಲ್ಲಿ ಭಾರಿ ಸದ್ದು ಮಾಡುತ್ತಿರುವ ಈ ವಿಡಿಯೋಗಳಲ್ಲಿ, ಕೆಲವರು ರಸ್ತೆ ಬದಿಯಲ್ಲಿ ನಿಂತು ತಮ್ಮ ಸ್ಮಾರ್ಟ್‌ಫೋನ್ ಬಳಸಿ ಚಲಿಸುತ್ತಿರುವ ಇ-ರಿಕ್ಷಾ ಹಾಗೂ ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ರಿಮೋಟ್‌ನಂತೆ ಆಫ್ ಮಾಡುತ್ತಿರುವುದು ಕಂಡುಬಂದಿದೆ. ವಾಹನಗಳು ರಸ್ತೆಯ ಮಧ್ಯದಲ್ಲೇ ಇದ್ದಕ್ಕಿದ್ದಂತೆ ನಿಲ್ಲುತ್ತಿರುವುದರಿಂದ ಇವಿ (EV) ಸುರಕ್ಷತೆಯ ಬಗ್ಗೆ ಈಗ ದೊಡ್ಡ ಚರ್ಚೆ ಶುರುವಾಗಿದೆ.

ಸೋಷಿಯಲ್ ಮೀಡಿಯಾದಲ್ಲಿ ಈ ವಿಡಿಯೋಗಳು ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಈ ಟ್ರೆಂಡ್ ವಿರುದ್ಧ ಕೆಂಡಾಮಂಡಲವಾಗಿದ್ದಾರೆ. ಇದು ಕೇವಲ ಮಜಾ ಅಲ್ಲ, ರಸ್ತೆ ಮಧ್ಯೆ ಈ ರೀತಿ ವಾಹನ ನಿಲ್ಲಿಸಿದರೆ ಹಿಂದಿನಿಂದ ಬರುವ ಗಾಡಿಗಳು ಡಿಕ್ಕಿ ಹೊಡೆದು ಜೀವಗಳೇ ಹೋಗಬಹುದು, ಈ ಹುಚ್ಚಾಟವನ್ನು ತಕ್ಷಣ ನಿಲ್ಲಿಸಿ, ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ.

ಈ ಇಡೀ ವಿವಾದದ ಕೇಂದ್ರಬಿಂದು BAT-BMS ಎನ್ನುವ ಚೀನಾ ಮೂಲದ ಆ್ಯಪ್. ಇದು ಯಾವುದೇ ಹ್ಯಾಕಿಂಗ್ ಆ್ಯಪ್ ಅಲ್ಲ. ಬದಲಿಗೆ ಚೀನಾದ ಶೆನ್ಜೆನ್ ಗ್ರೆನರ್ಜಿ ಟೆಕ್ನಾಲಜಿ ಕಂಪನಿ ಅಭಿವೃದ್ಧಿಪಡಿಸಿರುವ ಅಧಿಕೃತ ಬ್ಯಾಟರಿ ಮ್ಯಾನೇಜ್ಮೆಂಟ್ ಸಿಸ್ಟಮ್ (BMS) ಮಾನಿಟರಿಂಗ್ ಆ್ಯಪ್ ಆಗಿದೆ. ಲಿಥಿಯಂ ಬ್ಯಾಟರಿಗಳ ವೋಲ್ಟೇಜ್, ಚಾರ್ಜ್ ಮಟ್ಟ, ತಾಪಮಾನ ಮತ್ತು ಬ್ಯಾಟರಿ ಆರೋಗ್ಯವನ್ನು ಬ್ಲೂಟೂತ್ ಮೂಲಕ ಪರಿಶೀಲಿಸಲು ಈ ಆ್ಯಪ್ ಅನ್ನು ಬಳಸಲಾಗುತ್ತದೆ.

ಭಾರತದಲ್ಲಿ ಓಡಾಡುವ ಕೆಲವು ಕಡಿಮೆ ಬೆಲೆಯ ಇ-ರಿಕ್ಷಾ ಮತ್ತು ಇ-ಸ್ಕೂಟರ್‌ಗಳಲ್ಲಿ ಬ್ಲೂಟೂತ್ ಸೌಲಭ್ಯವಿರುವ ಅಗ್ಗದ ಲಿಥಿಯಂ ಬ್ಯಾಟರಿ ಪ್ಯಾಕ್‌ಗಳನ್ನು ಬಳಸಲಾಗಿರುತ್ತದೆ. ಈ ಬ್ಯಾಟರಿಗಳಿಗೆ ಯಾವುದೇ ಪಾಸ್‌ವರ್ಡ್ ಅಥವಾ ಸೆಕ್ಯೂರಿಟಿ ಇರುವುದಿಲ್ಲ. ಹಾಗಾಗಿ, ಗಾಡಿಯ ಬ್ಲೂಟೂತ್ ರೇಂಜ್‌ನಲ್ಲಿ ನಿಲ್ಲುವ ಯಾರೇ ಆದರೂ ಈ ಚೀನಾ ಆ್ಯಪ್ ಮೂಲಕ ಆ ಬ್ಯಾಟರಿಗೆ ಕನೆಕ್ಟ್ ಆಗಬಹುದು.

ಒಮ್ಮೆ ಕನೆಕ್ಟ್ ಆದ ಮೇಲೆ ಆ್ಯಪ್‌ನಲ್ಲಿರುವ 'ಡಿಸ್ಚಾರ್ಜ್ ಆಫ್' (Discharge Off) ಆಪ್ಷನ್ ಒತ್ತಿದರೆ ಸಾಕು, ಬ್ಯಾಟರಿಯಿಂದ ಮೋಟಾರ್‌ಗೆ ಹೋಗುವ ಪವರ್ ಸಪ್ಲೈ ತಕ್ಷಣ ಕಟ್ ಆಗುತ್ತದೆ. ಇದರಿಂದ ಚಲಿಸುತ್ತಿರುವ ಗಾಡಿ ರಸ್ತೆ ಮಧ್ಯದಲ್ಲೇ ಜ್ಯಾಮ್ ಆಗಿ ನಿಲ್ಲುತ್ತದೆ.

ಸೋಷಿಯಲ್ ಮೀಡಿಯಾದಲ್ಲಿ ಬಿಂಬಿಸುತ್ತಿರುವಂತೆ ಎಲ್ಲಾ ಎಲೆಕ್ಟ್ರಿಕ್ ವಾಹನಗಳನ್ನು ಹೀಗೆ ಆಫ್ ಮಾಡಲು ಸಾಧ್ಯವಿಲ್ಲ. ಕೇವಲ ಚೀನಾ ಮೂಲದ, ಯಾವುದೇ ಸುರಕ್ಷತಾ ಪಾಸ್‌ವರ್ಡ್ ಇಲ್ಲದ ಅಗ್ಗದ ಬ್ಲೂಟೂತ್ ಬ್ಯಾಟರಿ ಹೊಂದಿರುವ ಇ-ರಿಕ್ಷಾಗಳಿಗೆ ಮಾತ್ರ ಈ ಆ್ಯಪ್ ಕನೆಕ್ಟ್ ಆಗುತ್ತದೆ. ಬ್ರ್ಯಾಂಡೆಡ್ ಮತ್ತು ಹೈ-ಸೆಕ್ಯೂರಿಟಿ ಇರುವ ಇವಿ ವಾಹನಗಳನ್ನು ಯಾರೂ ಏನೂ ಮಾಡಲು ಸಾಧ್ಯವಿಲ್ಲ, (ಏಜನ್ಸೀಸ್​).