ಬಂಡಾಯಗಾರರ ವಿರುದ್ಧ ‘ದೀದಿ’ ರೌದ್ರಾವತಾರ: ಫಿರ್ಹಾದ್ ಹಕೀಮ್, ಅರೂಪ್ ರಾಯ್ ಸೇರಿದಂತೆ 6 ಪ್ರಮುಖ ಶಾಸಕರು ಟಿಎಂಸಿಯಿಂದ ಉಚ್ಚಾಟನೆ! Mamata Banerjee

ಈ ಮೂಲಕ ತಮ್ಮ ರಾಜಕೀಯ ಅಸ್ತಿತ್ವಕ್ಕೆ ಧಕ್ಕೆ ತಂದವರನ್ನು ಯಾವುದೇ ಮುಲಾಜಿಲ್ಲದೆ ಸದೆಬಡಿಯುವ ಮೂಲಕ ಟಿಎಂಸಿಯ ಸುಪ್ರೀಂ ತಾವೇ ಎಂಬುದನ್ನು ಮಮತಾ ಬ್ಯಾನರ್ಜಿ ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ. ಆದರೆ, ಈ ಉಚ್ಚಾಟನೆ ಬೆನ್ನಲ್ಲೇ ಉಭಯ ಬಣಗಳ ನಡುವಿನ ರಾಜಕೀಯ ಯುದ್ಧ ಈಗ ಮತ್ತಷ್ಟು ತಾರಕಕ್ಕೇರಿದೆ.

ಮಮತಾ ಕೈಗೊಂಡಿರುವ ಈ ನಿರ್ಧಾರ ಟಿಎಂಸಿ ಇತಿಹಾಸದಲ್ಲೇ ಅತ್ಯಂತ ಕಠಿಣ ಶಿಸ್ತುಕ್ರಮ ಎಂದು ರಾಜಕೀಯ ವಿಶ್ಲೇಷಕರು ಬಣ್ಣಿಸುತ್ತಿದ್ದಾರೆ. ಏಕೆಂದರೆ ಉಚ್ಚಾಟನೆಗೊಂಡ ನಾಯಕರು ಸಾಮಾನ್ಯರಲ್ಲ, ದಶಕಗಳಿಂದ ದೀದಿ ಅವರ ನೆರಳಿನಂತೆ ಇದ್ದ ಪ್ರಭಾವಿ ನಾಯಕರುಗಳಾಗಿದ್ದಾರೆ.

ಸೋಮವಾರ ನಡೆದ ಬಂಡಾಯ ಸಭೆಯಲ್ಲಿ ಅರೂಪ್ ರಾಯ್ ಅವರನ್ನು ಅಸಲಿ ಟಿಎಂಸಿಯ ಚೇರ್ಮನ್ ಎಂದು ಘೋಷಿಸಲಾಗಿತ್ತು ಹಾಗೂ ಫಿರ್ಹಾದ್ ಹಕೀಮ್ ಸೇರಿದಂತೆ ಉಳಿದವರನ್ನು ಉಪಾಧ್ಯಕ್ಷರನ್ನಾಗಿ ನೇಮಿಸಲಾಗಿತ್ತು. ಈ ಬೆಳವಣಿಗೆಯಿಂದ ಕೆರಳಿದ ದೀದಿ ನೇತೃತ್ವದ ಅಧಿಕೃತ ಹೈಕಮಾಂಡ್, 24 ಗಂಟೆಯೊಳಗೆ ಎಲ್ಲರನ್ನೂ ಪಕ್ಷದಿಂದಲೇ ಹೊರಹಾಕಿದೆ. ಇದಕ್ಕೂ ಮುನ್ನ ಈ ದಂಗೆಯ ಸೂತ್ರಧಾರ ರಿತಬ್ರತಾ ಬ್ಯಾನರ್ಜಿ ಮತ್ತು ಸಂದೀಪನ್ ಸಹಾ ಅವರನ್ನು ಈಗಾಗಲೇ ಪಕ್ಷದಿಂದ ಉಚ್ಚಾಟಿಸಲಾಗಿತ್ತು.

ಮಮತಾ ಅವರ ಈ ಭೀಕರ ಕ್ರಮಕ್ಕೆ ಬಂಡಾಯ ಪಾಳಯ ಕಿಂಚಿತ್ತೂ ಕದಡಿಲ್ಲ. ತಾವು ಮಾಡಿದ್ದೇ ಸರಿ ಎಂದು ವಾದಿಸುತ್ತಿರುವ ರಿತಬ್ರತಾ ಬ್ಯಾನರ್ಜಿ ಬಣ, ನಾವೇ ಅಸಲಿ ತೃಣಮೂಲ ಕಾಂಗ್ರೆಸ್. ಬಹುತೇಕ ಶಾಸಕರು ಮತ್ತು ಸಂಸದರು ನಮ್ಮೊಂದಿಗಿದ್ದಾರೆ. ಮಮತಾ ಅವರಿಗೆ ನಮ್ಮನ್ನು ಉಚ್ಚಾಟಿಸುವ ಯಾವುದೇ ನೈತಿಕ ಹಕ್ಕಿಲ್ಲ. ಪಕ್ಷದ ಹೆಸರು ಮತ್ತು ಅಧಿಕೃತ ‘ಜೋಡಿ ಹೂವು’ ಚಿಹ್ನೆ ನಮಗೇ ಸಿಗಬೇಕು ಎಂದು ಕೋರಿ ನಾವು ಶೀಘ್ರದಲ್ಲೇ ನವದೆಹಲಿಯ ಕೇಂದ್ರ ಚುನಾವಣಾ ಆಯೋಗದ ಮೆಟ್ಟಿಲೇರಲಿದ್ದೇವೆ ಎಂದು ಸಾರಿದ್ದಾರೆ.

ಪಶ್ಚಿಮ ಬಂಗಾಳ ವಿಧಾನಸಭೆ ಚುನಾವಣೆಯಲ್ಲಿ ಸತತ 15 ವರ್ಷಗಳ ಆಡಳಿತದ ಬಳಿಕ ಟಿಎಂಸಿ ಹೀನಾಯವಾಗಿ ಸೋತು ಅಧಿಕಾರ ಕಳೆದುಕೊಂಡಿತ್ತು. ಈ ಸೋಲಿನ ಬೆನ್ನಲ್ಲೇ ಮಮತಾ ಮತ್ತು ಅವರ ಸೋದರಳಿಯ ಅಭಿಷೇಕ್ ಬ್ಯಾನರ್ಜಿ ನಾಯಕತ್ವದ ವಿರುದ್ಧ ಪಕ್ಷದೊಳಗೆ ತೀವ್ರ ಅಸಮಾಧಾನ ಹೊಗೆಯಾಡುತ್ತಿತ್ತು. ಶಾಸಕರ ಸಹಿ ವಿವಾದದ ಬಳಿಕ ಈ ಭಿನ್ನಮತ ಉಲ್ಬಣಗೊಂಡು ಈಗ ಪಕ್ಷವೇ ಇಬ್ಬಾಗವಾಗುವ ಹಂತ ತಲುಪಿದೆ.

ಒಂದೆಡೆ 60 ಕ್ಕೂ ಹೆಚ್ಚು ಶಾಸಕರ ಬಲ ಹೊಂದಿರುವ ಬಂಡಾಯಗಾರರು, ಮತ್ತೊಂದೆಡೆ ಪಕ್ಷದ ಮೇಲಿನ ಹಿಡಿತ ಉಳಿಸಿಕೊಳ್ಳಲು ಹೋರಾಡುತ್ತಿರುವ ಮಮತಾ. ಒಟ್ಟಾರೆಯಾಗಿ ಬಂಗಾಳದ ರಾಜಕಾರಣದಲ್ಲಿ ಈಗ ಅಧಿಕೃತ ಟಿಎಂಸಿ ಯಾರದ್ದು ಎಂಬ ಹಗ್ಗಜಗ್ಗಾಟ ಆರಂಭವಾಗಿದ್ದು, ಮುಂಬರುವ ದಿನಗಳಲ್ಲಿ ಇದು ದೀದಿ ಅವರ ರಾಜಕೀಯ ಭವಿಷ್ಯವನ್ನು ನಿರ್ಧರಿಸಲಿದೆ,(ಏಜೆನ್ಸೀಸ್).