ದಲಾಲಿ ಜನ್ಮ ದೊಡ್ಡೋರು ನಡೆದು ಮರೆಯೋ ರೆಡ್​ಕಾರ್ಪೆಟ್​ನ್ಹಾಂಗ

ಆದರೆ ಮುಂದಿನ ಮೂರು ತಿಂಗಳುಗಳಲ್ಲಿ ಅದೆಲ್ಲವೂ ಹುಸಿಯಾಯಿತು. ಭಾರತದ ಸರಕುಗಳ ಮೇಲೆ 50% ಆಮದು ತೆರಿಗೆ, ಪಾಕಿಸ್ತಾನಿ ಸರಕುಗಳ ಮೇಲೆ ಕೇವಲ 18% ಆಮದು ತೆರಿಗೆ ವಿಧಿಸಿದರು, ಜಗತ್ತಿನಲ್ಲೇ ಅತಿ ಹೆಚ್ಚು ವಾರ್ಷಿಕ ಅಭಿವೃದ್ಧಿ ದರವನ್ನು ಸತತವಾಗಿ ತೋರಿಸುತ್ತಿರುವ ಭಾರತದ ಅರ್ಥವ್ಯವಸ್ಥೆಯನ್ನು "ಮೃತ ಅರ್ಥವ್ಯವಸ್ಥೆ' ಎಂದು ಕರೆದರು! ಅಷ್ಟೇ ಅಲ್ಲ, ಭಾರತೀಯ ಸಂಸತ್​ನ 37 ಸದಸ್ಯರನ್ನು ಬಲೆಗೆ ಹಾಕಿಕೊಂಡು ಮೋದಿ ಸರ್ಕಾರವನ್ನು ಉರುಳಿಸಲು ಸಿಐಎ ಸಂಚು ಹೂಡಿತ್ತು ಎಂಬ ಸುದ್ದಿಯೂ ಸೆಪ್ಟೆಂಬರ್​ ಮೊದಲವಾರದಲ್ಲಿ ಬಂತು. 

ಅದೇ ಸಮಯದಲ್ಲಿ ಪಾಕಿಸ್ತಾನದ ಜತೆ ಟ್ರಂಪ್​ ಆಡಳಿತದ ಮೈತ್ರಿ ಏಕಾಏಕಿ ಊಹಿಸಲಾಗದಷ್ಟು ಮಟ್ಟಕ್ಕೇರಿಬಿಟ್ಟಿತು. "ಆಪರೇಷನ್​ ಸಿಂಧೂರ'ದಲ್ಲಿ ಭಾರತದ ಹೊಡೆತದಿಂದ ಹಾನಿಗೀಡಾಗಿದ್ದ ನೂರ್​ ಖಾನ್​ ವಾಯುನೆಲೆಯ ದುರಸ್ತಿಗಾಗಿ ಟ್ರಂಪ್​ ಆಡಳಿತ ಧನಸಹಾಯ ಒದಗಿಸಿದ್ದಲ್ಲದೆ ಅಮೆರಿಕನ್​ ಸೇನೆಯ 3-ಸ್ಟಾರ್​ ಜನರಲ್​ಗಳನ್ನೂ ಸೆಪ್ಟೆಂಬರ್​ 5ರಂದು ಇಸ್ಲಾಮಾಬಾದ್​ಗೆ ಕಳುಹಿಸಿತು. ಅದಾದ ತಿಂಗಳ ನಂತರ ಅಕ್ಟೋಬರ್​ 13ರಂದು ಈಜಿಪ್ತ್​ನಲ್ಲಿ ಆಯೋಜನೆಗೊಂಡ ಗಾಜಾ ಶಾಂತಿ ಸಮಾವೇಶದಲ್ಲಿ ಅಲ್ಲಿಲ್ಲದ ಪಾಕಿಸ್ತಾನದ ಸೇನಾದಂಡನಾಯಕ ಆಸಿಮ್​ ಮುನೀರ್​ರನ್ನು "ವೇರ್​ ಈಸ್​ My ಫೇವರಿಟ್​ ಫೀಲ್ಡ್'ಮಾರ್ಷಲ್​?' ಎಂದು ಕರೆಯುತ್ತ ಟ್ರಂಪ್​ ಹುಡುಕಾಡಿದರು!

ಈ ವರ್ಷ ಅಮೆರಿಕದ ಪಾಕಿಸ್ತಾನ್​ ಪ್ರೀತಿ ಇನ್ನೂ ಉಕ್ಕಿ, ಇರಾನ್​ ಜತೆಗಿನ ಸಮರವನ್ನು ಶಮನಗೊಳಿಸಲು ಮಧ್ಯಸ್ಥಿಕೆಗಾಗಿ ಟ್ರಂಪ್​ ಆಶ್ರಯಿಸಿದರು; ತಮ್ಮ ಅಳಿಯ ಜಾರೆಡ್​ ಕುಶ್ನರ್​, ವಿಶೇಷ ರಾಯಭಾರಿ ಸ್ಟೀವ್​ ವಿಟ್​ಕಾಫ್​ ಮತ್ತು ಉಪಾಧ್ಯಕ್ಷ ಜೆಡಿ ವ್ಯಾನ್ಸ್​ರನ್ನು ಮಾತುಕತೆಗಾಗಿ ಇಸ್ಲಾಮಾಬಾದ್​ಗೆ ಕಳುಹಿಸಿದರು. ಅಲ್ಲಿ ಮೊದಲ ಸುತ್ತಿನ ಮಾತುಕತೆಗಳು ವಿಫಲವಾಗಿ ಎರಡನೆಯ ಸುತ್ತಿನ ಮಾತುಕತೆಗಳು ಸ್ವಿಜರ್​ಲ್ಯಾಂಡ್​ನಲ್ಲಿ ನಡೆಯಬಹುದು ಎಂಬ ಮಾತುಗಳು ಕೇಳಿಬಂದಾಗ, "ಮಾತುಕತೆಗಳು ಪಾಕಿಸ್ತಾನದಲ್ಲೇ ನಡೆಯುತ್ತವೆ, ಶಾಂತಿ ಒಪ್ಪಂದಕ್ಕೆ ಸಹಿ ಹಾಕಲು ನಾನೇ ಇಸ್ಲಾಮಾಬಾದ್​ಗೆ ಹೋಗಬಹುದು' ಅಂದರು ಟ್ರಂಪ್​! ಇದೆಲ್ಲವನ್ನೂ ನೋಡಿ ಭಾರತದಲ್ಲಿ ಕೆಲವರು ಹಾಡತೊಡಗಿದ ರಾಗವೆಂದರೆ, "ರಾಜತಂತ್ರದಲ್ಲಿ ಮೋದಿ ಸೋತುಹೋಗಿದ್ದಾರೆ, ಪಾಕಿಸ್ತಾನ ಗೆಲವು ಸಾಧಿಸಿದೆ, ಇದರಿಂದಾಗಿ ಭಾರತಕ್ಕೆ ಹಾನಿಯಾಗಲಿದೆ, ಈ ಹಾನಿಗೆ ಮೋದಿ ಸರ್ಕಾರವೇ ಹೊಣೆ' ಎಂದು! ಈ "ತೀರ್ಮಾನ'ದ ಸತ್ಯಾಸತ್ಯತೆ ಎಷ್ಟು? "ಜಗದಗಲ'ದಲ್ಲಿ ಇಂದು ಅದನ್ನು ಶೋಧಿಸೋಣ.

ವಿದೇಶಮಂತ್ರಿ ಎಸ್​. ಜೈಶಂಕರ್​ ಹೇಳಿದ "ಭಾರತ ದಲಾಲಿಯಾಗಲು ತಯಾರಿಲ್ಲ' ಎಂಬ ಮಾತಿನಿಂದಲೇ ನಮ್ಮ ಶೋಧವನ್ನು ಆರಂಭಿಸುವುದು ಸೂಕ್ತ. ಯಾಕೆಂದರೆ ಪ್ರಸಕ್ತ ಸನ್ನಿವೇಶದಲ್ಲಿ ಅಮೆರಿಕಕ್ಕೆ ಅಗತ್ಯವಾಗಿರುವುದು ಪ್ರಾಮಾಣಿಕ ಮಧ್ಯಸ್ಥನಲ್ಲ, ತನ್ನ ಪರವಾಗಿ ಒಬ್ಬ ದಲಾಲಿ ಅಷ್ಟೇ ಮತ್ತು ಆ ದಲಾಲಿ ಕೆಲಸ ಮಾಡಲು ಸರಿಯಾದ ದೇಶ ಪಾಕಿಸ್ತಾನವಷ್ಟೇ ಎಂಬ ದೊಡ್ಡ ಸೂಚನೆಯನ್ನು ಚಿಕ್ಕ ವಾಕ್ಯದಲ್ಲಿ ನಮ್ಮ ವಿದೇಶಮಂತ್ರಿ ನೀಡಿದ್ದಾರೆ. ಇರಾನ್​ ವಿರುದ್ಧ ಐದುವಾರಗಳ ಕಾಲ ಯುದ್ಧ ನಡೆಸುವ ಹೊತ್ತಿಗೆ ಟ್ರಂಪ್​ಗೆ ಅರ್ಥವಾದದ್ದು ತಮ್ಮ ಲೆಕ್ಕಾಚಾರಗಳಲ್ಲಿ ಎಡವಟ್ಟಾಗಿದೆ, ಹೊಸ ವಾಸ್ತವಗಳಿಗೆ ಹೊಂದಿಕೊಂಡು ರಣನೀತಿಗಳನ್ನು ಮರುರೂಪಿಸಲು ತಮಗೆ ಕದನವಿರಾಮದ ರೂಪದಲ್ಲಿ ಸ್ವಲ್ಪ ಕಾಲಾವಕಾಶದ ಅಗತ್ಯವಿದೆ ಎಂದು. ಅದಕ್ಕಾಗಿ ತೆಹರಾನ್​ ಜತೆ ಮಾತಾಡುವ ಯಾವ ನೇರ ದಾರಿಯೂ ಅವರಿಗಿರಲಿಲ್ಲ.

ಇಲ್ಲಿ ಮುಖ್ಯ ವಿಷಯವೆಂದರೆ ಸಂದೇಶಗಳು ವಾಷಿಂಗ್​ಟನ್​ ಮತ್ತು ತೆಹರಾನ್​ಗಳ ನಡುವೆ ಮಾತ್ರ ರವಾನೆಯಾಗದೆ ಕೊನೇಪಕ್ಷ ಪ್ರಾರಂಭಿಕ ಹಂತದಲ್ಲಿ ಅವು ಬೀಜಿಂಗ್​ನ ಮೂಲಕ ರವಾನೆಯಾಗುವ ಅಗತ್ಯವೂ ಇತ್ತು. ಏಕೆಂದರೆ ಅಮೆರಿಕ-ಇರಾನ್​ ನೇರ ಸಂಘರ್ಷದಲ್ಲಿ ತೆರೆಯ ಹಿಂದೆ ನಿಂತು ಮಹತ್ವದ ಪಾತ್ರ ವಹಿಸುತ್ತಿದ್ದುದು ಚೀನಾ. ಟ್ರಂಪ್​ ಇರಾನ್​ ಮೇಲೆ ದಾಳಿಯೆಸಗಿದ್ದರ ಹಿಂದಿನ ಅಘೋಷಿತ ಉದ್ದೇಶಗಳಲ್ಲೊಂದು ಆ ದೇಶದಿಂದ ಚೀನಾಗೆ ತೈಲ ಪೂರೈಕೆ ನಿಲುಗಡೆಯಾಗಬೇಕೆನ್ನುವುದಾಗಿತ್ತು. ಇದೊಂದು ಒಂದರೊಳಗೊಂದು ಸುಳಿ ಇರುವ ಸಂಕೀರ್ಣ ವಿಷಯ.

ವೆನೆಜುವೆಲಾ ಮತ್ತು ಇರಾನ್​ ಮೇಲೆ ಅಮೆರಿಕ ವಿಧಿಸಿದ್ದ ಆರ್ಥಿಕ ದಿಗ್ಬಂಧನಗಳನ್ನು ತನ್ನ ಅನುಕೂಲಕ್ಕೆ ತಿರುಗಿಸಿಕೊಂಡ ಚೀನಾ ತನ್ನ ಕಚ್ಚಾತೈಲ ಅಗತ್ಯದ 24% ಅನ್ನು ವೆನೆಜುವೆಲಾದಿಂದಲೂ, 43% ಅನ್ನು ಇರಾನ್​ನಿಂದಲೂ ಅಂತಾರಾಷ್ಟ್ರೀಯ ದರಕ್ಕಿಂತಲೂ ಕಡಿಮೆ ದರದಲ್ಲಿ ಪಡೆದುಕೊಳ್ಳುತ್ತಿತ್ತು. ವೆನೆಜುವೆಲಾದ ಮಾಜಿ ಅಧ್ಯಕ್ಷ ನಿಕೊಲಾಸ್​ ಮದೂರೋರನ್ನು ವರ್ಷದ ಆರಂಭದಲ್ಲಿ ಎತ್ತಂಗಡಿ ಮಾಡಿ ಚೀನಾದ ಕಚ್ಚಾತೈಲ ಪೂರೈಕೆಯ 24% ಅನ್ನು ಟ್ರಂಪ್​ ಒಂದೇ ಹೊಡೆತಕ್ಕೆ ಕತ್ತರಿಸಿಹಾಕಿದರು. ಆಮೇಲೆ ಅಣ್ವಸ್ತ್ರ ಯೋಜನೆಯನ್ನು ತಡೆಯುವ ಘೋಷಿತ ಉದ್ದೇಶದೊಂದಿಗೆ ಚೀನಾದ ಕಚ್ಚಾತೈಲದ ಮತ್ತೂ 43% ಅನ್ನು ಕತ್ತರಿಸುವ ಅಘೋಷಿತ ಉದ್ದೇಶದೊಂದಿಗೆ ಟ್ರಂಪ್​ ಇರಾನ್​ವಿರುದ್ಧ ಯುದ್ಧ ಆರಂಭಿಸಿದರು. 

ಟ್ರಂಪ್​ ಆಟಗಳನ್ನು ಗುರುತಿಸಿಯೇ ಇದ್ದ ಚೀನಿ ಅಧ್ಯಕ್ಷ ಷಿ ಜಿನ್​ಪಿಂಗ್​ ತೆರೆಯ ಮರೆಯಲ್ಲಿ ಇರಾನ್​ಗೆ ಎಲ್ಲ ಬಗೆಯ ಸಹಕಾರಗಳನ್ನೂ ಒದಗಿಸುತ್ತ ಹೋದರು. ಅಮೆರಿಕ-ಇರಾನ್​ ಯುದ್ಧ ನಿಜವಾಗಿ ತೆರೆಯ ಹಿಂದಿನ ಅಮೆರಿಕ-ಚೀನಾ ಹಣಾಹಣಿ. ಹೀಗಾಗಿ ಕೊಲ್ಲಿಯಲ್ಲಿ ಕದನವಿರಾಮವಾಗಬೇಕಾದರೆ ಅದರಲ್ಲಿ ಚೀನಾದ ಪಾತ್ರ ಇರಲೇಬೇಕಾಗಿದ್ದಿತು. ಅಂದರೆ ಟ್ರಂಪ್​ರಿಗೆ ಬೇಕಾಗಿದ್ದದ್ದು ತೆಹರಾನ್​ಗಷ್ಟೇ ಅಲ್ಲ, ಬೀಜಿಂಗ್​ಗೂ ಹೋಗಿಬರಬಲ್ಲ ಒಬ್ಬ ಸಂದೇಶವಾಹಕ. ಅದನ್ನು ಪಾಕಿಸ್ತಾನವಲ್ಲದೇ ಮತ್ತಾವ ದೇಶ ಮಾಡಲು ಸಾಧ್ಯ?

ಕಳೆದ ಮೇ ತಿಂಗಳ ಆಪರೇಷನ್​ ಸಿಂಧೂರದಲ್ಲಿ ಅಮೆರಿಕದ ನಿಯಂತ್ರಣದಲ್ಲಿರುವ ನೂರ್​ ಖಾನ್​ ವಾಯುನೆಲೆಯೂ ಹೊಡೆತ ತಿಂದಿತ್ತಲ್ಲವೇ? ಆಗ ಅಮೆರಿಕನ್​ವಾಯುಸೇನಾ ಸಲಕರಣೆಗಳು ಹಾನಿಗೊಳಗಾಗುವುದರ ಜತೆಗೆ ಹಲವರು ಅಮೆರಿಕನ್ನರೂ ಸಾವಿಗೀಡಾದರು. ಭಾರತದ ವಿರುದ್ಧ ಟ್ರಂಪ್​ರ ಪಿತ್ತ ಕೆರಳಿಸಿದ್ದು ಅದು. ಹೀಗಾಗಿಯೇ ಅವರು ಆಸಿಮ್​ ಮುನೀರ್​ರನ್ನು ವೈಟ್​ಹೌಸ್​ಗೆ ಆಹ್ವಾನಿಸಿ ಸಮಾಧಾನಿಸಿ ಸತ್ಕರಿಸಿ ಕಳುಹಿಸಿದ್ದು. ಆ ಪ್ರಕರಣ ಪಾಕಿಸ್ತಾನಕ್ಕೂ ಅನುಕೂಲಕರವೇ ಆಯಿತು. ಭಾರತದ ಬಗ್ಗೆ ಟ್ರಂಪ್​ ಋಣಾತ್ಮಕವಾಗಿ ನಡೆದುಕೊಂಡಷ್ಟೂ ತಮಗೆ ಲಾಭದಾಯಕ ಎಂದು ಸಹಜವಾಗಿಯೇ ಅರಿತ ಪಾಕಿಸ್ತಾನಿ ನಾಯಕರು ಅಮೆರಿಕ ಅಧ್ಯಕ್ಷರ ಮನಗೆಲ್ಲುವ ಒಂದು ಅವಕಾಶವನ್ನೂ ಕಳೆದುಕೊಳ್ಳಲಿಲ್ಲ. ಈ ಸಂದರ್ಭದಲ್ಲಿ 2025ರ ಅಕ್ಟೋಬರ್​ 13ರ ಗಾಜಾ ಶಾಂತಿ ಸಮಾವೇಶದಲ್ಲಿ ಕಂಡುಬಂದ ದೃಶ್ಯವನ್ನು ನಾವಿಲ್ಲಿ ನೆನಪಿಸಿಕೊಳ್ಳಬೇಕು. 

ಮೂವತ್ತು ಜಾಗತಿಕ ನಾಯಕರು ಈಜಿಪ್ತ್​ನ ಶರ್ಮ್​-ಎಲ್​-ಶೇಖ್​ನಲ್ಲಿ ಒಟ್ಟುಗೂಡಿದ ಆ ಸಮಾವೇಶದಲ್ಲಿ, "ನನಗೆ ಖಾಸಗಿಯಾಗಿ ಹೇಳಿದ ಮಾತುಗಳನ್ನು ಇಲ್ಲಿ ಎಲ್ಲರಿಗೂ ಹೇಳಿ' ಎಂದು ಟ್ರಂಪ್​ ಹೇಳಿದ್ದೇ ತಡ ಪಾಕಿಸ್ತಾನಿ ಪ್ರಧಾನಿ ಶೆಹ್​ಬಾಜ್​ ಶರೀಫ್​, ಒಂದೇ ಸಮನೆ ಟ್ರಂಪ್​ರನ್ನು ಹೊಗಳತೊಡಗಿದರು! ಮಾತ್ರವಲ್ಲ, ಟ್ರಂಪ್​ರನ್ನು ತಮ್ಮ ದೇಶ ನೋಬೆಲ್​ ಶಾಂತಿ ಬಹುಮಾನಕ್ಕಾಗಿ ನಾಮಿನೇಟ್​ ಮಾಡುವುದಾಗಿ ಘೋಷಿಸಿ, "ಐ ಸೆಲ್ಯೂಟ್​ ಯು ಸರ್​' ಎಂದು ಹೇಳಿ ಅಮೆರಿಕದ ಅಧ್ಯಕ್ಷರಿಗೆ ಭರ್ಜರಿ ಸೆಲ್ಯೂಟ್​ ಹೊಡೆದರು! ಈಗ ಹೇಳಿ, ಪ್ರಧಾನಿ ಮೋದಿ ಹಾಗೆ ನಡೆದುಕೊಳ್ಳುವುದನ್ನು ಊಹಿಸಲಾದರೂ ಆದೀತೇ? ತಮ್ಮ ಪರವಾಗಿ ದಲಾಲಿ ನಡೆಸಲು ಟ್ರಂಪ್​ ಆಯ್ಕೆ ಮಾಡಿಕೊಳ್ಳುವುದು ಶರೀಫ್​ರನ್ನೋ, ಮೋದಿಯವರನ್ನೋ?

ಇನ್ನು ಚೀನಾ ವಿಷಯಕ್ಕೆ ಹಿಂತಿರುಗೋಣ. ಕದನವಿರಾಮದ ತೆಹರಾನ್​ನ ರಸ್ತೆ ಬೀಜಿಂಗ್​ ಮೂಲಕ ಸಾಗುತ್ತದೆ ಎಂದು ಟ್ರಂಪ್​ಗೆ ಗೊತ್ತೇ ಇತ್ತು. ತಾವಾಗಿ ಜಿನ್​ಪಿಂಗ್​ರನ್ನು ಸಂಪರ್ಕಿಸಲು ರಾಜತಾಂತ್ರಿಕವಾಗಿ ಅದು ಸೂಕ್ತ ಸಮಯವಾಗಿರಲಿಲ್ಲ. ಅದಕ್ಕಾಗಿ ಪಾಕಿಸ್ತಾನವನ್ನು ಬಳಸಿಕೊಂಡರು. ಪಾಕಿಸ್ತಾನ ವಿದೇಶಮಂತ್ರಿ ಇಫ್ತಿಕಾರ್​ ಧಾರ್​ ಏಪ್ರಿಲ್​ 7ರಂದು ಟ್ರಂಪ್​ರ ಸಂದೇಶ ಹೊತ್ತು ಬೀಜಿಂಗ್​ಗೆ ಓಡಿದರು. ಅವರ ದಲಾಲಿಯ ಕೆಲಸ ಯಶಸ್ವಿಯಾಗಿ ಏಪ್ರಿಲ್​ 8ರ ನಸುಕಿನಲ್ಲಿ ಕದನವಿರಾಮ ಘೋಷಣೆಯಾಯಿತು. ಈಗ ಹೇಳಿ, ಈ ಬಗೆಯ ದಲಾಲಿ ಕೆಲಸಕ್ಕೆ ನಮ್ಮ ವಿದೇಶಮಂತ್ರಿ ಎಸ್​. ಜೈಶಂಕರ್​ ತಯಾರಾಗಬಹುದಿತ್ತೇ?

ತಥಾಕಥಿತ "ಪಾಕಿಸ್ತಾನಿ ರಾಜತಂತ್ರ ವಿಜಯ'ವಾಗಿ 2 ತಿಂಗಳುಗಳು ಕಳೆದುಹೋದವು. ಜೂನ್​ 21ರಂದು ಸ್ವಿಜರ್​ಲ್ಯಾಂಡ್​ನಲ್ಲಿ ಅಮೆರಿಕ ಮತ್ತು ಇರಾನ್​ ನಡುವೆ "ತಿಳಿವಳಿಕಾ ಒಪ್ಪಂದಪತ್ರ'ಕ್ಕೆ ಸಹಿ ಬಿದ್ದಾಗಲೂ ಪಾಕಿಸ್ತಾನಿ ನಾಯಕರು ಅಲ್ಲಿದ್ದರು. ಇದೆಲ್ಲದರಿಂದ ಪಾಕಿಸ್ತಾನಕ್ಕಾದ ಲಾಭವೇನು? ಇದರ ಉತ್ತರಕ್ಕಾಗಿ 55 ವರ್ಷಗಳ ಹಿಂದಕ್ಕೆ ಹೋಗೋಣ.

ಶೀತಲಸಮರ ಕಾಲದಲ್ಲಿ ಅಮೆರಿಕಾ ಮತ್ತು ಚೀನಾಗಳ ನಡುವೆ ಮೊದಲ ದಲಾಲಿ ಕೆಲಸ ಮಾಡಿದ್ದೂ ಪಾಕಿಸ್ತಾನವೇ. 1971ರ ಜುಲೈ ಮೊದಲವಾರದಲ್ಲಿ ಅಮೆರಿಕ ಮತ್ತು ಪಾಕಿಸ್ತಾನ ನಡುವಿನ ಸಂಬಂಧಗಳ ಕುರಿತಾಗಿ ಮಾತುಕತೆಗಾಗಿ ಇಸ್ಲಾಮಾಬಾದ್​ಗೆ ಬಂದ ಆಗಿನ ಅಮೆರಿಕದ ರಾಷ್ಟ್ರೀಯ ಸುರಕ್ಷಾ ಸಲಹೆಗಾರ ಹೆನ್ರಿ ಕಿಸಿಂಜರ್​ ಹೊಟ್ಟೆಯ ತೊಂದರೆಯೆಂದು ಹೇಳಿ ಜುಲೈ 9ರಂದು ಸಾರ್ವಜನಿಕ ದೃಷ್ಟಿಯಿಂದ ಮರೆಯಾದರು. 

ಆದರೆ ಅಂದು ಅವರು ಪಾಕಿಸ್ತಾನಿ ವಿಮಾನವೇರಿ ರಹಸ್ಯವಾಗಿ ಚೀನಾಗೆ ಹೋಗಿ ಮಾವೋ ಝೆದಾಂಗ್​ ಮತ್ತು ಚೌ ಎನ್​ ಲೈ ಜತೆ ಮಾತುಕತೆ ನಡೆಸಿ, ಅಮೆರಿಕ-ಚೀನಾ ಮೈತ್ರಿಗೆ ಅಸ್ತಿಭಾರ ಹಾಕಿದರು. "ಆಪರೇಷನ್​ ಮಾರ್ಕೋ ಪೋಲೋ' ಎಂದು ಹೆಸರಾಗಿರುವ ಈ ಅಂತಾರಾಷ್ಟ್ರೀಯ ರಾಜತಾಂತ್ರಿಕ ಪ್ರಕ್ರಾಂತಿಯ ಬಗ್ಗೆ ಜಗತ್ತಿಗೆ ಅರಿವಾದದ್ದು 3 ದಿನಗಳ ನಂತರ, ಕಿಸಿಂಜರ್​ ಇಸ್ಲಾಮಾಬಾದ್​ನಲ್ಲಿ ಸಾರ್ವಜನಿಕವಾಗಿ ಮತ್ತೆ ಕಾಣಿಸಿಕೊಂಡಾಗ. ಹೀಗೆ ಅಮೆರಿಕ ಮತ್ತು ಚೀನಾ ನಡುವೆ ಯಶಸ್ವಿಯಾಗಿ ದಲಾಲಿ ನಡೆಸಿದ ಪಾಕಿಸ್ತಾನವನ್ನು ಕೇವಲ 5 ತಿಂಗಳಲ್ಲಿ ಭಾರತ ಹಿಗ್ಗಾಮುಗ್ಗಾ ಬಡಿದು ಅದನ್ನು ಎರಡು ತುಂಡುಗಳಾಗಿ ಕತ್ತರಿಸಿಬಿಟ್ಟಿತು. ಪಾಕಿಸ್ತಾನ ಒಂದುಗೂಡಿಸಿದ್ದ ಅಮೆರಿಕ ಮತ್ತು ಚೀನಾಗಳು ಅದನ್ನು ಒಂದಾಗಿಯೇ ಇರಿಸಲಾಗಲಿಲ್ಲ.

ಇಂದು ನಮ್ಮ ಸ್ಥಿತಿ ಅಂದಿಗಿಂತಲೂ ಉತ್ತಮವಾಗಿದೆ. ರಷ್ಯಾದ ಬೆಂಬಲವಂತೂ ನಮಗಿದ್ದೇ ಇದೆ. ಜತೆಗೆ ಆರ್ಥಿಕವಾಗಿ ದಿವಾಳಿಯಾಗಿರುವ ಪಾಕಿಸ್ತಾನದ ಪರವಾಗಿ ನಿಂತು ಭಾರತದ ವಿಶಾಲ ಮಾರುಕಟ್ಟೆಯನ್ನು ಕಳೆದುಕೊಳ್ಳಲು ಇಂದು ಅಮೆರಿಕ ತಯಾರಿಲ್ಲ. ಹಾಗೆಯೇ ವಾಯು ಸುರಕ್ಷಾವ್ಯವಸ್ಥೆ ಮತ್ತು ಕ್ಷಿಪಣಿ ತಂತ್ರಜ್ಞಾನದಲ್ಲಿ ಇತ್ತೀಚೆಗೆ ಅಗಾಧ ಮುನ್ನಡೆ ಸಾಧಿಸಿರುವ ಭಾರತವನ್ನು ಎದುರುಹಾಕಿಕೊಳ್ಳಲು ಚೀನಾ ಸಹ ತಯಾರಿಲ್ಲ. ಇದರರ್ಥ ಅಮೆರಿಕ ಮತ್ತು ಇರಾನ್​ ನಡುವೆ ದಲಾಲಿ ನಡೆಸಿದ ಪಾಕಿಸ್ತಾನದ ಸ್ಥಿತಿ ಯಾವ ಬಗೆಯಲ್ಲೂ ಉತ್ತಮಗೊಂಡಿಲ್ಲ. ಇದು ಪಾಕಿಸ್ತಾನಿಗಳಿಗೆ ಗೊತ್ತೇ ಇದೆ. ನಮ್ಮಲ್ಲಿನ ಕೆಲವರು ಅರಿತುಕೊಳ್ಳಬೇಕಷ್ಟೇ.