ಗ್ಲೋಬಲ್ ಲೂನಾರ್ ಸ್ಯಾಟಲೈಟ್ ಮಿಷನ್​ಗೆ ಬಡ ಕಾರ್ಪೆಂಟರ್​ ಮಗಳು ಆಯ್ಕೆ: ಸರ್ಕಾರಿ ಶಾಲಾ ವಿದ್ಯಾರ್ಥಿನಿಯ ಸಾಧನೆ! Global Lunar Satellite Mission

ನವದೆಹಲಿ: ಆಂಧ್ರಪ್ರದೇಶದ ಸರ್ಕಾರಿ ಶಾಲೆಯ ಪ್ರತಿಭಾನ್ವಿತ ಬಾಲಕಿಯೊಬ್ಬಳು ಇದೀಗ ಜಾಗತಿಕ ಮಟ್ಟದಲ್ಲಿ ಭಾರತದ ಬಾಹ್ಯಾಕಾಶ ಪತಾಕೆಯನ್ನು ಹಾರಿಸಲು ಸಜ್ಜಾಗಿದ್ದಾಳೆ. ವಿಶ್ವದ ಮೊದಲ ಸಂಪೂರ್ಣ ಹೆಣ್ಣುಮಕ್ಕಳ ಲೂನಾರ್ ಕ್ಯೂಬ್‌ಸ್ಯಾಟ್ ಯೋಜನೆಯಾದ 'ಮಿಷನ್ ಶಕ್ತಿಸ್ಯಾಟ್'ಗೆ ( Global Lunar Satellite Mission ) ಭಾರತದಿಂದ ಆಯ್ಕೆಯಾದ 20 ಸಾಧಕರಲ್ಲಿ ಧವಳೇಶ್ವರಂ ಮೂಲದ 14 ವರ್ಷದ ಕಂದುಲ ಜೆಸ್ಸಿ ಜಾಗ ಗಿಟ್ಟಿಸಿಕೊಂಡು ದೇಶವೇ ಹೆಮ್ಮೆಪಡುವಂತೆ ಮಾಡಿದ್ದಾಳೆ.

ಬಡ ಬಡಗಿ (ಕಾರ್ಪೆಂಟರ್​) ಕುಟುಂಬದ ಮಗಳಾದ ಜೆಸ್ಸಿ, ಜಾಗತಿಕ ಮಟ್ಟದಲ್ಲಿ ಭಾರಿ ಪೈಪೋಟಿ ನಡುವೆಯೂ ಈ ಅಭೂತಪೂರ್ವ ಸಾಧನೆ ಮಾಡಿದ್ದಾರೆ. ಸುಮಾರು 108 ದೇಶಗಳ 12,000ಕ್ಕೂ ಹೆಚ್ಚು ಬಾಲಕಿಯರು ನೊಂದಾಯಿಸಿಕೊಂಡಿದ್ದ ಈ ತೀವ್ರ ಸ್ಪರ್ಧೆಯಲ್ಲಿ ಆಯ್ಕೆಯಾದ ಭಾರತದ ಅಂತಿಮ ತಂಡಕ್ಕೆ ತಲುಪಿದ ಆಂಧ್ರಪ್ರದೇಶದ ಏಕೈಕ ವಿದ್ಯಾರ್ಥಿನಿ ಎಂಬ ಹೆಗ್ಗಳಿಕೆಗೆ ಜೆಸ್ಸಿ ಪಾತ್ರರಾಗಿದ್ದಾರೆ.

ಜೆಸ್ಸಿ ಅವರ ಈ ಬಾಹ್ಯಾಕಾಶ ಪಯಣದ ಹಿಂದೆ ಅವರ ಶಾಲೆಯ ಭೌತಶಾಸ್ತ್ರ ಶಿಕ್ಷಕಿ ಹಾಗೂ ಅಟಲ್ ಟಿಂಕರಿಂಗ್ ಲ್ಯಾಬ್ ಉಸ್ತುವಾರಿ ಮಣಿಮಾಲಾ ಅವರ ಪಾತ್ರವಿದೆ. ಜೆಸ್ಸಿ ಅವರಲ್ಲಿದ್ದ ವಿಜ್ಞಾನ ಮತ್ತು ಸಂಶೋಧನಾ ಆಸಕ್ತಿಯನ್ನು ಗುರುತಿಸಿದ ಶಿಕ್ಷಕಿ, ಕಳೆದ ವರ್ಷವೇ ಅವರ ಹೆಸರನ್ನು ಈ ಯೋಜನೆಗೆ ನೊಂದಾಯಿಸಿದ್ದರು. ಇದರಿಂದ ಪ್ರೇರಿತರಾದ ಜೆಸ್ಸಿ ತಮ್ಮ ಶಾಲೆಯ ಮತ್ತಷ್ಟು ಎಂಟು ಜನ ಬಾಲಕಿಯರನ್ನೂ ಇದಕ್ಕೆ ಅರ್ಜಿ ಸಲ್ಲಿಸುವಂತೆ ಪ್ರೋತ್ಸಾಹಿಸಿದ್ದರು. ಆನ್‌ಲೈನ್ ತರಬೇತಿ ಈಗಾಗಲೇ ಪ್ರಾರಂಭವಾಗಿದ್ದರೂ, ಶಿಕ್ಷಕಿ ಮಣಿಮಾಲಾ ಅವರು ಸಂಯೋಜಕರನ್ನು ಸಂಪರ್ಕಿಸಿ ಮತ್ತೆ ಅವಕಾಶ ಗಿಟ್ಟಿಸಿಕೊಟ್ಟಿದ್ದರಿಂದ ಜೆಸ್ಸಿ ಈ ಆಯ್ಕೆ ಪ್ರಕ್ರಿಯೆಯಲ್ಲಿ ಮುಂದುವರಿದು ಯಶಸ್ಸು ಸಾಧಿಸಲು ಸಾಧ್ಯವಾಯಿತು.

ಒಂದೆಡೆ ಎಸ್ಎಸ್ಎಲ್‌ಸಿ ಪರೀಕ್ಷೆಯ ಸಿದ್ಧತೆ ನಡೆಯುತ್ತಿದ್ದರೂ, ಜೆಸ್ಸಿ ಪ್ರತಿದಿನ ಶಾಲೆಯ ನಂತರ ತಪ್ಪದೇ ಆನ್‌ಲೈನ್ ತರಗತಿಗಳಿಗೆ ಹಾಜರಾಗಿ ಈಗಾಗಲೇ ಈ ತರಬೇತಿಯ ಶೇ. 50 ರಿಂದ 60 ರಷ್ಟು ಭಾಗವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ. ಉಪಗ್ರಹ ವ್ಯವಸ್ಥೆಗಳು, ಪ್ರೊಪಲ್ಷನ್, ಥರ್ಮೋಡೈನಾಮಿಕ್ಸ್ ಮತ್ತು ಬಾಹ್ಯಾಕಾಶ ತಂತ್ರಜ್ಞಾನವನ್ನು ಒಳಗೊಂಡಿರುವ 'ಮಿಷನ್ ಶಕ್ತಿಸ್ಯಾಟ್'ನ 550ಕ್ಕೂ ಹೆಚ್ಚು ಸೆಷನ್‌ಗಳು ಮತ್ತು 21 ಮಾಡ್ಯೂಲ್‌ಗಳು ಶಾಲಾ ಪಠ್ಯಕ್ರಮಕ್ಕಿಂತ ಅತ್ಯಂತ ಕ್ಲಿಷ್ಟಕರವಾಗಿದ್ದರೂ, ತಾವು ಸತತ ಪ್ರಯತ್ನ ಹಾಗೂ ಆಸಕ್ತಿಯಿಂದ ಪ್ರತಿದಿನ ತರಗತಿಗಳಿಗೆ ಹಾಜರಾಗಿ ಇವುಗಳನ್ನು ಕರಗತ ಮಾಡಿಕೊಳ್ಳುತ್ತಿರುವುದಾಗಿ ಜೆಸ್ಸಿ ಸಂತಸದಿಂದ ಹಂಚಿಕೊಂಡಿದ್ದಾರೆ.

ಈ ಕಠಿಣ ಆಯ್ಕೆ ಪ್ರಕ್ರಿಯೆಯಲ್ಲಿ ಆನ್‌ಲೈನ್ ಕಲಿಕಾ ಮಾಡ್ಯೂಲ್‌ಗಳು, ವಿಜ್ಞಾನಿಗಳು ಹಾಗೂ ಸಂಯೋಜಕರೊಂದಿಗಿನ ಮುಖಾಮುಖಿ ಸಂದರ್ಶನ ಮತ್ತು 'ಮಿಷನ್ ಶಕ್ತಿಸ್ಯಾಟ್' ಹಾಗೂ 'ಸ್ಟೆಮ್' ಶಿಕ್ಷಣದ ಮಹತ್ವವನ್ನು ವಿವರಿಸುವ ಒಂದು ನಿಮಿಷದ ವಿಡಿಯೋ ತಯಾರಿಕೆ ಸೇರಿತ್ತು. ಅಂತಾರಾಷ್ಟ್ರೀಯ ತಜ್ಞರೊಂದಿಗೆ ಸಂಪೂರ್ಣವಾಗಿ ಇಂಗ್ಲಿಷ್‌ನಲ್ಲಿಯೇ ಸಂದರ್ಶನ ನಡೆದಿದ್ದರಿಂದ, ಶಿಕ್ಷಕರ ಮಾರ್ಗದರ್ಶನ ಮತ್ತು ಶೈಕ್ಷಣಿಕ ವಿಡಿಯೋಗಳ ಸಹಾಯದಿಂದ ಜೆಸ್ಸಿ ತಮ್ಮ ಸಂವಹನ ಕೌಶಲವನ್ನು ಸುಧಾರಿಸಿಕೊಂಡಿದ್ದರು. ಅಂತಾರಾಷ್ಟ್ರೀಯ ವಿಜ್ಞಾನಿಗಳೊಂದಿಗೆ ಮಾತನಾಡುವಾಗ ನನಗೆ ತುಂಬಾ ಭಯವಾಗಿತ್ತು, ಆದರೆ ನನ್ನಂತಹ ಸರ್ಕಾರಿ ಶಾಲೆಯ ವಿದ್ಯಾರ್ಥಿನಿ ಆಯ್ಕೆಯಾಗುತ್ತಾಳೆ ಎಂದು ನಾನು ಎಂದಿಗೂ ಊಹಿಸಿರಲಿಲ್ಲ ಎಂದು ಜೆಸ್ಸಿ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.

ಜೆಸ್ಸಿ ಶಾಲೆಯ ಅಟಲ್ ಟಿಂಕರಿಂಗ್ ಲ್ಯಾಬ್‌ನ ಸಕ್ರಿಯ ಸದಸ್ಯೆಯಾಗಿದ್ದು, ವಿಜ್ಞಾನ ಚಟುವಟಿಕೆಗಳು ಮತ್ತು ಸ್ಪರ್ಧೆಗಳಲ್ಲಿ ಸದಾ ಮುಂಚೂಣಿಯಲ್ಲಿರುತ್ತಿದ್ದರು ಎಂದು ಅವರ ಶಿಕ್ಷಕಿ ಮಣಿಮಾಲಾ ಶ್ಲಾಘಿಸಿದ್ದಾರೆ. ಇನ್ನೊಂದೆಡೆ, ಆರ್ಥಿಕ ಸಂಕಷ್ಟದಿಂದಾಗಿ ಮಗಳನ್ನು ಖಾಸಗಿ ಶಾಲೆಯಿಂದ ಸರ್ಕಾರಿ ಶಾಲೆಗೆ ಸೇರಿಸಬೇಕಾಯಿತು ಎಂದು ಜೆಸ್ಸಿ ಅವರ ತಾಯಿ ಅರುಣಾ ತಿಳಿಸಿದ್ದು, ಬಡಗಿ ಕೆಲಸ ಮಾಡುವ ಪತಿಯೊಂದಿಗೆ ಎಷ್ಟೇ ಕಷ್ಟಗಳನ್ನು ಎದುರಿಸಿದ್ದರೂ, ತಮ್ಮ ಮಗಳು ಅಂತಾರಾಷ್ಟ್ರೀಯ ವಿಜ್ಞಾನಿಗಳೊಂದಿಗೆ ಆತ್ಮವಿಶ್ವಾಸದಿಂದ ಮಾತನಾಡುವುದನ್ನು ಕಂಡ ಕ್ಷಣ ತಮ್ಮ ಜೀವನದ ಅತ್ಯಂತ ಹೆಮ್ಮೆಯ ಕ್ಷಣವಾಗಿತ್ತು ಎಂದು ಭಾವುಕವಾಗಿ ಹಂಚಿಕೊಂಡಿದ್ದಾರೆ.

ಈ ಯೋಜನೆಯ ಮುಂದಿನ ಹಂತವು ಆಗಸ್ಟ್ 23 ರಿಂದ ನವದೆಹಲಿಯಲ್ಲಿ ಪ್ರಾರಂಭವಾಗಲಿದ್ದು, ಇದರಲ್ಲಿ ಪ್ರಾಯೋಗಿಕ ತರಬೇತಿ ಮತ್ತು ರಾಷ್ಟ್ರೀಯ ಬಾಹ್ಯಾಕಾಶ ದಿನದ ಆಚರಣೆಗಳು ಒಳಗೊಂಡಿರಲಿವೆ. ಪ್ರಧಾನಿ ನರೇಂದ್ರ ಮೋದಿ ಅವರು ಭಾಗವಹಿಸಲಿರುವ ಈ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲು ಜೆಸ್ಸಿ ಉತ್ಸುಕರಾಗಿದ್ದಾರೆ. ಈ ತರಬೇತಿಯ ಅವಧಿಯಲ್ಲಿ ಅವರು ವಿಜ್ಞಾನಿಗಳೊಂದಿಗೆ ಉಪಗ್ರಹ ವಿನ್ಯಾಸ, ಪೇಲೋಡ್ ಅಭಿವೃದ್ಧಿ ಮತ್ತು ಮಿಷನ್ ಕಾರ್ಯಾಚರಣೆಗಳ ಕುರಿತು ಕೆಲಸ ಮಾಡಲಿದ್ದು, ವಿದ್ಯಾರ್ಥಿಗಳು ನಿರ್ಮಿಸಿದ ಈ ಲೂನಾರ್ ಕ್ಯೂಬ್‌ಸ್ಯಾಟ್ ಅನ್ನು ಅಕ್ಟೋಬರ್ 11 ರಂದು ಶ್ರೀಹರಿಕೋಟಾದಿಂದ ಉಡಾವಣೆ ಮಾಡಲು ಯೋಜಿಸಲಾಗಿದೆ. ಈ ಆಯ್ಕೆಯು ಐಎಸ್‌ಆರ್‌ಒ (ISRO) ಸೇರುವ ತಮ್ಮ ಕನಸಿಗೆ ಮತ್ತಷ್ಟು ಬಲ ತಂದಿದೆ ಎಂದು ಜೆಸ್ಸಿ ಸಂತಸ ವ್ಯಕ್ತಪಡಿಸಿದ್ದಾರೆ.

ಜೆಸ್ಸಿ ಅವರ ಈ ಅಭೂತಪೂರ್ವ ಸಾಧನೆಯನ್ನು ರಾಜ್ಯಸಭಾ ಸಂಸದ ಸನಾ ಸತೀಶ್ ಬಾಬು ಶ್ಲಾಘಿಸಿದ್ದು, ಇದು ಆಂಧ್ರಪ್ರದೇಶಕ್ಕೆ ಹೆಮ್ಮೆಯ ಕ್ಷಣ ಎಂದು ಬಣ್ಣಿಸಿದ್ದಾರೆ. ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಮತ್ತು ಶಿಕ್ಷಣ ಸಚಿವ ನಾರಾ ಲೋಕೇಶ್ ಅವರ ದೃಷ್ಟಿಕೋನದಂತೆ ಸರ್ಕಾರಿ ಶಾಲೆಯ ವಿದ್ಯಾರ್ಥಿಗಳಿಗೆ ಜಾಗತಿಕ ಮಟ್ಟದ ವೇದಿಕೆ ದೊರೆಯುತ್ತಿರುವುದಕ್ಕೆ ಜೆಸ್ಸಿ ಅವರ ಕಥೆಯೇ ಸಾಕ್ಷಿ ಎಂದಿರುವ ಅವರು, ಜೆಸ್ಸಿ ಕೇವಲ ಚಂದ್ರನತ್ತ ಪಯಣಿಸುತ್ತಿಲ್ಲ, ಬದಲಿಗೆ ಇಡೀ ಪೀಳಿಗೆಯೇ ದೊಡ್ಡ ಕನಸು ಕಾಣುವಂತೆ ಪ್ರೇರೇಪಿಸುತ್ತಿದ್ದಾರೆ ಎಂದು ಕೊನಿಡಾಡಿದ್ದಾರೆ, (ಏಜೆನ್ಸೀಸ್​).