ನವದೆಹಲಿ: ಫ್ಲೈಓವರ್ ಕೆಳಗಿನ ವಿದ್ಯುತ್ ಕೇಬಲ್ ಜಾಲದಲ್ಲಿ ಬಿಳಿಯ ಕಾರೊಂದು ( Car Gets Trapped ) ಅಪಾಯಕರವಾಗಿ ನೇತಾಡುತ್ತಿರುವ ವಿಚಿತ್ರ ದೃಶ್ಯವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ವಾಸ್ತವಕ್ಕೆ ತುಂಬಾ ದೂರವಿರುವ ಈ ಅಚ್ಚರಿಯ ಚಿತ್ರಗಳನ್ನು ನೋಡಿದ ನೆಟ್ಟಿಗರೆಲ್ಲರೂ ಒಂದು ಕ್ಷಣ ದಂಗಾಗಿದ್ದಾರೆ. ಆದರೆ, ಮೇಲ್ನೋಟಕ್ಕೆ ಅಸಲಿ ಎನಿಸುವ ಈ ಭೀಕರ ದೃಶ್ಯದ ಹಿಂದೆ ಅಡಗಿರುವ ಸತ್ಯವೇ ಬೇರೆ. ಇದು ಯಾವುದೇ ನಿಜವಾದ ಅಪಘಾತವಲ್ಲ, ಬದಲಿಗೆ ಕೃತಕ ಬುದ್ಧಿಮತ್ತೆ (AI) ಸೃಷ್ಟಿಸಿದ ಹಸಿ ಸುಳ್ಳಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಫೋಟೋಗಳಲ್ಲಿ, ಫ್ಲೈಓವರ್ ಅಡಿಯಲ್ಲಿ ನೂರಾರು ವೈರ್‌ಗಳು ಮತ್ತು ಕೇಬಲ್‌ಗಳ ಜಾಲದ ನಡುವೆ ಬಿಳಿ ಬಣ್ಣದ ಕಾರೊಂದು ಸಿಲುಕಿ ಮೇಲೆ ತೂಗಾಡುತ್ತಿರುವುದನ್ನು ಕಾಣಬಹುದು. ಕೆಳಗೆ ಜನ ಗುಂಪುಗೂಡಿ ಕಾರನ್ನು ಆತಂಕದಿಂದ ನೋಡುತ್ತಿರುವುದು ಹಾಗೂ ಮೊಬೈಲ್‌ನಲ್ಲಿ ವಿಡಿಯೋ ಸೆರೆಹಿಡಿಯುತ್ತಿರುವುದು ಈ ಚಿತ್ರಗಳಲ್ಲಿ ಸ್ಪಷ್ಟವಾಗಿ ಕಾಣುತ್ತಿದೆ. ಯಾವುದೇ ಅಧಿಕೃತ ಮಾಹಿತಿಯಿಲ್ಲದೆ ಹರಿದಾಡಿದ ಈ ಚಿತ್ರಗಳು ಇಂಟರ್ನೆಟ್ ಬಳಕೆದಾರರಲ್ಲಿ ತೀವ್ರ ಕುತೂಹಲ ಹಾಗೂ ಗೊಂದಲ ಮೂಡಿಸಿದ್ದವು.
