ಟ್ರಕ್​​ ಡಿಕ್ಕಿಯಾಗಿ ಬಾಲಕ ದುರ್ಮರಣ: ಪಕ್ಕದಲ್ಲೇ ಶವ ಬಿದ್ದಿದ್ರೂ ಮೀನುಗಳನ್ನು ಲೂಟಿ ಮಾಡಿದ ಜನ! Road Accident

Road Accident : ಈ ಆಧುನಿಕ ಜಗತ್ತಿನ ಜತೆ ಓಡುತ್ತಿರುವ ಮನುಷ್ಯ, ತನ್ನಲ್ಲಿನ ಮಾನವೀಯತೆಯನ್ನು ಮರೆಯುತ್ತಿದ್ದಾನೆ. ಸ್ವಾರ್ಥದಲ್ಲೇ ಮುಳುಗಿ ಹೋಗಿರುವ ಮನುಜ, ತನ್ನ ಸುತ್ತಮುತ್ತಲಿನ ನೋವು-ನಲಿವುಗಳಿಗೆ ಸ್ಪಂದಿಸಲಾರದಷ್ಟು ಬದಲಾಗುತ್ತಿದ್ದಾನೆ ಎನ್ನುವುದಕ್ಕೆ ಬಿಹಾರದಲ್ಲಿ ನಡೆದ ಘಟನೆ ತಾಜಾ ಉದಾಹರಣೆಯಾಗಿದೆ.

ತಮ್ಮ ಕಣ್ಣ ಮುಂದೆಯೇ ಭೀಕರ ಅಪಘಾತ ಸಂಭವಿಸಿ, ಓರ್ವ ಬಾಲಕ ದುರಂತ ಸಾವಿಗೀಡಾದರೂ ಅದರ ಅರಿವೇ ಇಲ್ಲದಂತೆ ಸ್ಥಳೀಯ ಜನರು ವರ್ತಿಸಿರುವ ಅಮಾನವೀಯ ಘಟನೆ ಬಿಹಾರದ ಸೀತಾಮರ್ಹಿ ಜಿಲ್ಲೆಯ ಪುಪ್ರಿ ಪೊಲೀಸ್​ ಠಾಣಾ ವ್ಯಾಪ್ತಿಯ ಝಝಿಹ್ಯಾಟ್​ ಗ್ರಾಮದಲ್ಲಿ ನಡೆದಿದೆ.

ಏಳನೇ ತರಗತಿಯ ವಿದ್ಯಾರ್ಥಿ ರಿತೇಶ್ ಕುಮಾರ್, ಬೆಳಗ್ಗೆ ಶಾಲೆಗೆ ಹೋಗುತ್ತಿದ್ದಾಗ ವೇಗವಾಗಿ ಬಂದ ಪಿಕಪ್ ಟ್ರಕ್ ಆತನಿಗೆ ಡಿಕ್ಕಿ ಹೊಡೆಯಿತು. ಇದರಿಂದ ರಿತೇಶ್​, ಸ್ಥಳದಲ್ಲೇ ಮೃತಪಟ್ಟನು. ಡಿಕ್ಕಿಯ ತೀವ್ರತೆ ಎಷ್ಟಿತ್ತು ಅಂದರೆ, ಬಾಲಕನ ದೇಹ ರಕ್ತದ ಮಡುವಿನಲ್ಲಿ ಬಿದ್ದಿತ್ತು. ಅದನ್ನು ನೋಡಿದ ಕೆಲ ಜನರು ಜೋರಾಗಿ ಕಿರುಚಾಡಿದರು. ಅದೇ ಸಮಯದಲ್ಲಿ ಹುಡುಗನ ಕುಟುಂಬಕ್ಕೂ ಸಾವಿನ ಸುದ್ದಿ ತಿಳಿಯಿತು.

ತಕ್ಷಣ ಬಾಲಕನ ಕುಟುಂಬ ಸ್ಥಳಕ್ಕೆ ಆಗಮಿಸಿ, ಶವದ ಮುಂದೆ ಗೋಳಾಡಿತು. ಮಗನನ್ನು ಕಳೆದುಕೊಂಡ ಕುಟುಂಬದ ಆಕ್ರಂದನ ಮುಗಿಲನ್ನೇ ಮುಟ್ಟುವಂತಿತ್ತು. ಇತ್ತ ಬಾಲಕನ ಕುಟುಂಬ ಕಣ್ಣೀರಿನಲ್ಲಿ ಕೈತೊಳೆಯುತ್ತಿದ್ದರೆ, ರಸ್ತೆ ಬದಿಯ ಇನ್ನೊಂದು ದೃಶ್ಯವು ಇದಕ್ಕೆ ವ್ಯತಿರಿಕ್ತವಾಗಿತ್ತು. ಬಾಲಕನಿಗೆ ಡಿಕ್ಕಿ ಹೊಡೆದ ಪಿಕಪ್ ಟ್ರಕ್, ಮೀನುಗಳನ್ನು ಸಾಗಿಸುತ್ತಿತ್ತು. ಅಪಘಾತದ ವೇಳೆ ಟ್ರಕ್​ನಲ್ಲಿದ್ದ ಮೀನುಗಳು ಚೆಲ್ಲಾಪಿಲ್ಲಿಯಾಗಿ ರಸ್ತೆಯಾದ್ಯಂತ ಬಿದ್ದಿತು.

ಈ ವೇಳೆ ಸ್ಥಳದಲ್ಲಿದ ಜನರು ಟ್ರಕ್​ ಬಳಿ ಜಮಾಯಿಸಿ, ಮೀನುಗಳನ್ನು ಬಾಚಿಕೊಳ್ಳಲು ಮುಂದಾದರು. ಬಾಲಕನ ದೇಹ ರಕ್ತದ ಮಡುವಿನಲ್ಲಿ ಪಕ್ಕದಲ್ಲೇ ಬಿದ್ದಿದ್ದರು ಕೂಡ ಆಂಬ್ಯುಲೆನ್ಸ್‌ಗೆ ಕರೆ ಮಾಡುವ ಗೋಜಿಗೆ ಹೋಗಲೇ ಇಲ್ಲ. ಪೊಲೀಸರಿಗೆ ಮಾಹಿತಿ ನೀಡುವ ಬದಲು ಮೀನುಗಳನ್ನು ಲೂಟಿ ಮಾಡಲು ಪ್ರಾರಂಭಿಸಿದರು. ಬಾಲಕನ ಶವ ಹತ್ತಿರದಲ್ಲೇ ಬಿದ್ದಿದ್ದರೂ ಚೀಲಗಳನ್ನು ತಂದು ಮೀನುಗಳನ್ನು ತುಂಬಿಕೊಂಡು ಹೋಗುತ್ತಿರುವ ದೃಶ್ಯಗಳು ಸ್ಥಳದಲ್ಲಿ ಕಂಡುಬಂದಿತು.

ಅಪಘಾತದ ಬಗ್ಗೆ ಮಾಹಿತಿ ಪಡೆದ ಪುಪ್ರಿ ಪೊಲೀಸ್ ಠಾಣೆಯ ಅಧಿಕಾರಿಗಳು, ಸ್ಥಳಕ್ಕೆ ಆಗಮಿಸಿ, ರಿತೇಶ್ ಮೃತದೇಹವನ್ನು ವಶಕ್ಕೆ ತೆಗೆದುಕೊಂಡು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದರು. ಅಪಘಾತಕ್ಕೆ ಕಾರಣವಾದ ಪಿಕಪ್ ಟ್ರಕ್ ಅನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ ಮತ್ತು ಈ ವಿಷಯದ ಬಗ್ಗೆ ಅಧಿಕೃತವಾಗಿ ತನಿಖೆಯನ್ನು ಪ್ರಾರಂಭಿಸಿದ್ದಾರೆ, (ಏಜೆನ್ಸೀಸ್​).