ಕ್ರಿಕೆಟ್ ಲೋಕದಲ್ಲಿ ಹೊಸ ಇತಿಹಾಸ!...ಬಿಗ್ ಬ್ಯಾಷ್ ಲೀಗ್‌ಗೆ ಭಾರತದಲ್ಲೇ ಚಾಲನೆ; ಉದ್ಘಾಟನಾ ಪಂದ್ಯದ ಮೈದಾನದ ಬಗ್ಗೆ ಪ್ರಧಾನಿ ಹೇಳಿದ್ದೇನು..? | Big Bash League in India

ತಮ್ಮ ಮೂರು ದಿನಗಳ ಆಸ್ಟ್ರೇಲಿಯಾ ಪ್ರವಾಸದ ಕೊನೆಯ ದಿನದಂದು ಪ್ರಧಾನಿ ಮೋದಿ ಮತ್ತು ಅಲ್ಲಿನ ಪ್ರಧಾನಿ ಅಲ್ಬನೀಸ್ ಜಂಟಿಯಾಗಿ ಈ ಮಹತ್ವದ ಪ್ರಕಟಣೆ ಹೊರಡಿಸಿದ್ದು, ಇದನ್ನು ಎರಡೂ ದೇಶಗಳ ನಡುವೆ ಬೆಳೆಯುತ್ತಿರುವ ಕ್ರೀಡಾ ಬಾಂಧವ್ಯದ ಪ್ರಮುಖ ಭಾಗ ಎಂದು ಬಣ್ಣಿಸಿದ್ದಾರೆ.

ಇದಕ್ಕೂ ಮುನ್ನ ಪ್ರಧಾನಿ ನರೇಂದ್ರ ಮೋದಿ ಮೆಲ್ಬೋರ್ನ್‌ನ ಐತಿಹಾಸಿಕ ಕ್ರಿಕೆಟ್ ಮೈದಾನಕ್ಕೆ ಭೇಟಿ ನೀಡಿದ್ದರು. ಈ ವೇಳೆ ಮಾತನಾಡಿದ ಅವರು, ಈ ಕ್ರೀಡಾಂಗಣವು ಪ್ರತಿಯೊಬ್ಬ ಭಾರತೀಯನಲ್ಲೂ ಎರಡು ಭಾವನೆಗಳನ್ನು ಜಾಗೃತಗೊಳಿಸುತ್ತದೆ ಎಂದರು. ಎಂಸಿಜಿ ಮೈದಾನಕ್ಕೆ ಕಾಲಿಡುತ್ತಿದ್ದಂತೆ ಯಾವುದೇ ಭಾರತೀಯನಿಗೆ ಎರಡು ಭಾವನೆಗಳು ಒಟ್ಟಿಗೆ ಬರುತ್ತವೆ. ಮೊದಲನೆಯದು, ಭಾರತ-ಆಸ್ಟ್ರೇಲಿಯಾ ಪಂದ್ಯದ ರೋಮಾಂಚನ ಮತ್ತು ಎರಡನೆಯದು, ನಮ್ಮ ಎರಡೂ ದೇಶಗಳಲ್ಲಿ ಕ್ರಿಕೆಟ್ ಕೇವಲ ಒಂದು ಕ್ರೀಡೆಯಾಗಿರದೆ ಅದೊಂದು ಅದ್ಭುತ ಭಾವನೆ ಎಂಬ ಸತ್ಯದ ಸಾಕ್ಷಾತ್ಕಾರ ಎಂದು ಪ್ರಧಾನಿ ಮೋದಿ ಹೇಳಿದರು.

ಈ ಪಂದ್ಯದ ಯಶಸ್ಸಿಗಾಗಿ ಆಸ್ಟ್ರೇಲಿಯಾ ಸರ್ಕಾರ ಮತ್ತು ಸೆಂಟರ್ ಫಾರ್ ಆಸ್ಟ್ರೇಲಿಯಾ-ಇಂಡಿಯಾ ರಿಲೇಶನ್ಸ್ ಸಂಸ್ಥೆಗಳು ಕೈಜೋಡಿಸಿದ್ದು, ಪಂದ್ಯದ ಸುತ್ತಮುತ್ತ ಚಲನಚಿತ್ರ ಮತ್ತು ಕಲಾ ಉತ್ಸವಗಳು ಸೇರಿದಂತೆ ಹಲವು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಿವೆ. ಟಿಕೆಟ್ ಮಾರಾಟ ಮತ್ತು ಪ್ರವಾಸದ ಪ್ಯಾಕೇಜ್‌ಗಳ ವಿವರಗಳು ಮುಂದಿನ ದಿನಗಳಲ್ಲಿ ಪ್ರಕಟವಾಗಲಿವೆ. ಭಾರತದಲ್ಲಿ ಈಗಾಗಲೇ 2030ರವರೆಗೆ ಜಿಯೋಸ್ಟಾರ್ ಜೊತೆ ಬಿಬಿಎಲ್ ಪ್ರಸಾರದ ಹಕ್ಕಿನ ಒಪ್ಪಂದವನ್ನು ಹೊಂದಿದೆ.

ಬಿಗ್ ಬ್ಯಾಷ್ ಲೀಗ್‌ನ ಕಾರ್ಯನಿರ್ವಾಹಕ ಜನರಲ್ ಮ್ಯಾನೇಜರ್ ಅಲಿಸ್ಟೇರ್ ಡಾಬ್ಸನ್ ಮಾತನಾಡಿ, ಬಿಬಿಎಲ್‌ನ ಜನಪ್ರಿಯತೆ ಆಸ್ಟ್ರೇಲಿಯಾದ ಗಡಿಗಳನ್ನು ಮೀರಿದೆ. ನಾವು ಕ್ರೀಡಾಂಗಣ ಭರ್ತಿಯಾಗುವುದನ್ನು ನೋಡಲು ಬಯಸುತ್ತೇವೆ. ಪ್ರೇಕ್ಷಕರು, ಬಣ್ಣ, ಸಂಗೀತ, ಗದ್ದಲದೊಂದಿಗೆ ಇದು ಅಪ್ಪಟ ಬಿಬಿಎಲ್ ಅನುಭವವನ್ನು ಭಾರತೀಯ ಅಭಿಮಾನಿಗಳಿಗೆ ನೀಡಲಿದ್ದು, ಈ ಪಂದ್ಯ ಇತಿಹಾಸ ಸೃಷ್ಟಿಸಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಪಂದ್ಯದ ಆಯೋಜನೆಯ ಜೊತೆಗೆ, ಬಿಬಿಎಲ್ ಕ್ಲಬ್‌ಗಳನ್ನು ಖಾಸಗಿ ಹೂಡಿಕೆದಾರರಿಗೆ ಮಾರಾಟ ಮಾಡುವ ಕುರಿತೂ ಚರ್ಚೆಗಳು ನಡೆಯುತ್ತಿವೆ. ಮೆಲ್ಬೋರ್ನ್ ರೆನೆಗೇಡ್ಸ್ ತಂಡವನ್ನು ಖರೀದಿಸಲು ಭಾರತದ ಐಪಿಎಲ್ ಫ್ರಾಂಚೈಸಿಗಳ ಮಾಲೀಕರು ಆಸಕ್ತಿ ತೋರಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಆದರೆ ಆಸ್ಟ್ರೇಲಿಯಾದ ವಿವಿಧ ರಾಜ್ಯ ಕ್ರಿಕೆಟ್ ಸಂಸ್ಥೆಗಳ ನಡುವಿನ ಭಿನ್ನಾಭಿಪ್ರಾಯಗಳಿಂದಾಗಿ ಈ ಖಾಸಗೀಕರಣ ಪ್ರಕ್ರಿಯೆ ಸದ್ಯಕ್ಕೆ ತಡೆಹಿಡಿಯಲ್ಪಟ್ಟಿದೆ(ಏಜೆನ್ಸೀಸ್​).